Mafumbo Ghakufumira ku Ŵaŵazgi

Kasi urongozgi wa Yehova uwo wuli kulembeka pa Yeremiya 7:16 ukung’anamura kuti Ŵakristu wakwenera yayi kupemperera muntu uyo wasezgeka mu mpingo Wacikristu cifukwa ngwambura kurapa?

Pamanyuma pa kupereka ceruzgo ku Ŵayuda ŵambura kugomezgeka, Yehova wakaphalira Yeremiya kuti: “Nteura iwe ungaromberanga ŵantu aŵa, nesi kukwezga nkuto panji lurombo cifukwa ca iwo, nesi kuŵaŵeyerera kwa Ine, cifukwa nkukupulika cara.”—Yeremiya 7:16.

Ncifukwa wuli Yehova wakakanizga Yeremiya kupemperera Ŵaisrayeli? Mwakuwonekerathu, cikaŵa cifukwa cakuti iwo ŵakanangiranga dala marango ghake. Iwo ŵakacitanga mwapakweru ndiposo mwambura soni, vintu viheni nga ni ‘kwiba, kukoma, ureŵi, kurapa utesi, kumotcera Bala sembe zakununkira, na kurondezga ŵaciuta ŵanyake.’ Nga ncakufumapo cake, Yehova wakaphalira Ŵayuda ŵambura cipulikano aŵa kuti: “Ndamkumutayani kumufumyanipo pamaso pane, nga ndi umo nkatayira kuŵafumyapo ŵanaŵanyinu wose, mpapu yose ya Efraim.” Naunenesko, cikatenge ciŵenge cintu cambura kwenerera kwa Yeremiya, panji muntu waliyose, kupempa Yehova kuti waleke kwiziska ceruzgo pa ŵantu aŵa.—Yeremiya 7:9, 15.

Mwakukorerana na mazgu agha, mpostole Yohane wakalemba za mapempero agho ngakwenelera kwa Ciuta. Cakwamba, wakasimikizgira Ŵakristu kuti: “Usange tikuromba kantu kwakuyana na khumbo lake, wakutipulika.” (1 Yohane 5:14) Ndipo pakuyowoya za kupemperera ŵanji, Yohane wakarutilira kuyowoya kuti: ‘Usange muntu wakuwona mbali wake wakwananga kwananga uko kuti nkwa nyifwa cara, wati warombe, ndipo Ciuta wati wapereke umoyo kwa aŵo ŵakwananga kwananga uko kuti nkwa nyifwa cara. Kulipo kwananga uko nkwa nyifwa: kuti ndiko nkuti wangarombera cara.’ (1 Yohane 5:16) Yesu wakayowoyaso za kwananga uko  “kulive kugowokereka,” uko ni kwanangira mzimu utuŵa.—Mateyu 12:31, 32.

Kasi ici cikung’anamura kuti ŵantu wose awo ŵali kusezgeka mu mpingo Wacikristu cifukwa ca kwananga kukuru ŵali kucita kwananga uko “nkwa nyifwa” mwakuti tileke kuŵapempelera? Umu ndimo viliri yayi, cifukwa pali kwananga kunyake uko nkwa nyifwa cara. Kuyowoya unenesko, nkhwakusuzga kumanya umo kuliri kwananga kwa muntu uyo. Ciyerezgero ciwemi pa nkani iyi ni Themba Manase la caru ca Judah. Iye wakazenga majotcero gha ŵaciuta ŵatesi, wakapereka ŵana ŵake kuŵa sembe zakotca, wakawukwanga na kucita ufwiti, na kupenja viŵanda na kuŵika cikozgo cakuŵaja mu nyumba ya Yehova. Ndiposo, Baibolo likuyowoya kuti Manase na ŵantu ŵake ŵakacita ‘viheni pamaso pa Yehova, kwakuyana na maunyankasi gha ŵamitundu awo Yehova wakaŵacimbizga pamaso pa Ŵaisrayeli.’ Cifukwa ca uheni wose uwu, Yehova wakaranga Manase mwa kumukaka na unyoro na kumutumizga ku wuzga ku Babulone.—2 Mathemba 21:1-9; 2 Midauko 33:1-11.

Nangauli Manase wakaŵa muntu wakwananga, kweni kasi zakwananga zake zikaŵa za nyifwa? Comene viŵi yayi, pakuti Baibolo likurutilira kuyowoya kuti: “Ndipo pakuŵa mu suzgo wakaŵeyerera Yehova Ciuta wake, na kujiyuyura comene pamaso pa Ciuta wa ŵasekuru ŵake. Wakaromba kwa Iye ndipo Ciuta wakapokera kuŵeyerera kwake na kupulika, na kumuwezgeraso ku Jerusalem mu uthemba wake; penepapo ndipo Manase wakamanya kuti Yehova ndiye Ciuta.”—2 Midauko 33:12, 13.

Mwanteura tileke kweruzga luŵiro kuti usange muntu wasezgeka mu mpingo ndikuti wacita kwananga kwa nyifwa. Pakutora nyengo kuti mukhaliro weneko wa mtima wa muntu uvumbukwe. Kuyowoya unenesko, kanandi kukuyowoyeka kuti cilato cimoza ca kusezga muntu wakwananga ncakuti wajinyumwe ndipo wang’anamuke mtima na kuwerako ku uheni.

Pakuti panyengo iyi muntu wakuŵa mu mpingo cara, kusinta kwa mtima na mikhaliro yake vingamba kuwoneka danka na awo ŵakukhala nayo pafupi, nga ni mufumu panji muwoli wake ndiposo ŵantu ŵa mu mbumba yake. Awo ŵakuwona masintiro agha ŵangamba kumanya kuti muntu wakwananga uyo kuti wakacita kwananga kwa nyifwa cara. Iwo ŵangamba kumupemperera kuti wasange nkongono mu Mazgu ghakufunyilirika na Ciuta, nakuti Yehova wacitire muntu wakwananga uyo kwakuyana na khumbo Lake.—Salmo 44:21, Mupharazgi 12:14.

Nangauli ŵanyake mu mpingo ŵangaŵa na ukaboni wakukwana wakuti muntu warapa, kweni mpingo wose kuti ndimo ungawonera cara. Iwo ŵangakhuŵara, kusuzgika maghanoghano, na kuzizwa comene usange ŵangapulika muntu munyake wakupemperera muntu uyo wali kusezgeka. Pa cifukwa ici, awo ŵakukhumba kupemperera muntu wakwananga ŵakwenera kumupemperera kwaŵekha, na kuleka nkani yose mu mawoko gha ŵabali ŵarara pa mpingo.

[Cithuzithuzi pa peji 30]

Zakwananga zikuru za Manase zikagowokereka apo wakajiyuyura pamaso pa Yehova

[Kulongosora Cithuzithuzi pa peji 29]

Cithuzithuzi ici tatora mu Illustrierte Pracht—Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s