Maminiti 60 ghakwambilira para mwana wababika waka ghakuŵa ghakuzirwa chomene. Chifukwa wuli? Chifukwa pa nyengo iyi mama wakwenera kuŵa pafupi chomene na mwana wake kuti ŵamanyane makora. Ichi chikovwira kuti mwana wakure makora. *

Ntchivichi chikutuma mama kuti wapwelelere mwana wake uyo wababika waka? Purofesa Jeannette Crenshaw wakalongosora kuti mahomoni agho “mama wakufumiska ghakumovwira kuti waŵe na chiwuravi ku mwana wake uyo wababika waka para wamukora, kumulaŵiska, na kumonkheska.” Mahomoni ghanyake agho mama wakufumiska pa nyengo iyi “ghakovwira mama kuti waŵikeko mahara ku mwana wake” kweniso ghakumupangiska kuti wambe kumutemwa chomene mwana wake. Purofesa uyu wakalongosora ivi mu buku lakuti, The Journal of Perinatal Education. Chifukwa wuli mama wakuchita ivi?

Chitemwa icho chikuŵa pakati pa mama na mwana chili kufuma kwa Mlengi withu, Yehova Chiuta. * Fumu Davide yikawonga Chiuta chifukwa cha ‘kumufumiska’ na kumuvikilira mu “nthumbo” ya amama ŵake. Iyo wakalomba kuti: “Kufuma apo nkhababikira nili kupelekeka kwa imwe kuti munipwelelere. Ndimwe Chiuta wane kwambira mu nthumbo ya amama.”—Salimo 22:9, 10.

GHANAGHANIRANI FUNDO IYI: Usange Chiuta wali kulenga mama munthowa yakuti watemwenge mwana wake na kumanya ivyo wakukhumba, kasi ise pakuŵa “ŵana ŵa Chiuta” ntchakupulikikwa yayi kuti iyo wakutipwelelera na kuŵikako mahara kwa ise?—Milimo 17:29.

Yesu Khristu uyo wakumumanya makora Mlengi withu kuluska waliyose, wakasambizga kuti: “Asi mpheta ziŵiri zikugulika na kanjawala kakuzirwa pachoko? Kweni palije nanga njimoza iyo yikuwa pasi kwambura Awiskemwe kumanya. Kweni nanga ni masisi gha ku mutu kwinu ghose ghali kupendeka. Ntheura kopa chara, imwe muli ŵakuzirwa kuluska mpheta zinandi.”—Mateyu 10:29-31.

Mbanthu ŵachoko waka awo ŵangaŵikako mahara usange kayuni kachoko chomene kangawa pasi. Kweni Adada ŵithu ŵakuchanya ŵakumanya kayuni kalikose pakekha. Yehova wakuwona taŵanthu kuti ndise ŵakuzirwa chomene kuluska viyuni nanga vingaŵa vinandi wuli. Apa sambiro ndakuti: Mukwenera “kopa chara” panji kuti kukayika kuti Chiuta wakuleka kumupwelelerani. M’malo mwake iyo wakuŵikako chomene mahara kwa imwe.

 Malemba ghakutisimikizgira kuti

• “Maso gha Yehova ghali palipose, wakulaŵiska ŵaheni na ŵawemi wuwo.”—ZINTHARIKA 15:3.

• “Maso gha Yehova ghali pa ŵarunji, makutu ghake ghakupulika para ŵakulira kuti waŵawovwire.”—SALIMO 34:15.

• “Nisekelerenge chomene mu lusungu lwinu, chifukwa mwawona visuzgo vyane. Mukumanya kukweŵeka kwane.”—SALIMO 31:7.

Kasi pangaŵa mphambano yiliyose usange taŵanthu tamanya kuti Chiuta wakutipwelelera kweniso wakutitemwa? Enya. Wonani ivyo Hannah * wa ku England wakalongosora. Wakati:

“Kanandi nkhajipulikanga kuti Yehova wakunitemwa yayi ndipo malurombo ghane ghakuzgoreka yayi. Nkhaghanaghananga kuti ghakuzgoreka yayi chifukwa chakuti chipulikano chane ntchichoko. Nkhawonanga kuti Chiuta wakunilanga panji wakuŵikako mahara yayi kwa ine chifukwa chakuti ndine wambura kuzirwa. Nkhajipulikanga kuti Chiuta wakunipwelelera yayi.”

Ndipouli, pasono Hannah wakukayika yayi kuti Yehova wakumughanaghanira kweniso wakumutemwa. Ntchivichi chikamovwira kuti wasinthe umo wakaghanaghaniranga? Iyo wakati: “Vinthu vikasintha chomene. Nkhakumbuka nkhani yinyake ya mu Baibolo iyo yikayowoyeka vyaka vinandi kumasinda yakuyowoya za sembe ya Yesu. Nkhani iyi yikanikhwaska chomene chifukwa yikanisimikizgira kuti Yehova wakunitemwa. Kweniso para nkhuwona kuti malurombo ghane ghakuzgoreka, kanandi nkhuthiska masozi chifukwa chakumanya kuti Yehova wakunitemwa chomene. Kusambira Baibolo na kuwungana vyanisambizga vinandi vya Yehova nga ni wunthu wake na chitemwa chake. Nkhuwona kuti Yehova wakutovwira kweniso wakutitemwa ndipo ngwakukhumbisiska kovwira waliyose payekha.”

Ivyo Hannah wakayowoya ni vyakukhozga. Kweni kasi mungasimikizga wuli kuti Chiuta wakumanya na kupulikiska umo mukujipulikira? Nkhani yakulondezgapo, yizgorenge fumbo ili.