NKHANI YAKUSAMBIRA 27
‘Gomezgani mwa Yehova’
“Gomezga Yehova; uŵe wakukhwima na wakukhora mu mtima.”—SAL. 27:14.
SUMU 128 Kuzizipizga M’paka Umaliro
IVYO VILI MU NKHANI IYI *
1. (a) Kasi Yehova wali kutipa chigomezgo wuli? (b) Kasi ‘kugomezga mwa Yehova’ chikung’anamurachi? (Wonani mazgu ghamusi pa kamutu kakuti “Mazgu Ghalongosoreka.”)
YEHOVA wali kupeleka chigomezgo chiwemi chomene ku wose awo ŵakumutemwa. Sonosono apa wamazgenge ulwari, vitima, na nyifwa. (Chivu. 21:3, 4) Wazamuwovwira “ŵakuzika” awo ŵakugomezga mwa iyo kunozga charu chapasi kuŵa paradiso. (Sal. 37:9-11) Chinyake ntchakuti wazamovwira waliyose wa ise kuŵa paubwezi uwemi na iyo, uwo uzamuŵa wakunozga chomene kuluska uwo tili nawo sono. Ichi ntchigomezgo chiwemi nadi! Kweni kasi tingagomezga wuli kuti ivyo Chiuta wali kulayizga vizamufiskika nadi? Yehova wakuswa yayi phangano lake. Ntheura tili na chifukwa chiwemi ‘chakugomezgera mwa Yehova.’ * (Sal. 27:14) Tikulongora kuti tikugomezga mwa Yehova para tikulindilira mwakuzika kweniso mwakukondwa kuti Chiuta withu wafiske ivyo wali kulayizga.—Yes. 55:10, 11.
2. Kasi ni vinthu wuli ivyo Yehova wachita kale?
2 Yehova walongora kale kuti wakufiska ivyo walayizga. Wonani chiyelezgero chimoza. Mu buku la Chivumbuzi, Yehova wakalayizga kuti mu nyengo yithu yino, wazamuwunganya pamoza ŵanthu kufuma mu mtundu, fuko, na chiyowoyero chilichose, ndipo ŵazamumusopa mwakukolerana. Mazuŵa ghano, gulu lapadera ili likumanyikwa kuti “mzinda ukuru.” (Chivu. 7:9, 10) Nangauli mu gulu ili muli ŵanthu ŵakupambana mitundu, viyowoyero, na kakuliro, kweni iwo ni mbumba yimoza yamtende. (Sal. 133:1; Yoh. 10:16) Ŵamzinda ukuru aŵa, ŵakupharazgaso mwamwamphu. Nyengo zose mbakunozgeka kuphalirako waliyose uyo wangapulika, za chigomezgo chawo chakukhwaskana na charu chiwemi. (Mat. 28:19, 20; Chivu. 14:6, 7; 22:17) Usange ndimwe yumoza wa ŵamzinda ukuru, tikukayika yayi kuti chigomezgo cha vinthu viwemi ivyo vikwiza ntchakuzirwa chomene kwa imwe.
3. Kasi Satana wakukhumba vichi?
3 Dyabulosi wakukhumba yayi kuti ise tiŵe na chigomezgo chiwemi chamunthazi. Wakukhumba kuti imwe mugomezge kuti Yehova walije namwe ntchito kweniso kuti wazamufiska yayi ivyo wali kulayizga. Usange Satana wangananga nadi chigomezgo chithu, mbwe tiŵavyenge chikanga, ndipo tingaleka nanga nkhuteŵetera Yehova. Nga umo tiwonerenge, Dyabulosi wakayezga kunanga chigomezgo cha Yobu kweniso kumulekeska kuteŵetera Yehova.
4. Kasi tiwonenge vichi mu nkhani iyi? (Yobu 1:9-12)
4 Mu nkhani iyi, tiwonenge njomba izo Satana wakagwiliskira ntchito kuti wayezge kutondeska Yobu kuŵa wakugomezgeka. (Ŵazgani Yobu 1:9-12.) Tiwonengeso ivyo tingasambirako kwa Yobu kweniso chifukwa icho tikwenera kukumbukira kuti Chiuta wakutitemwa ndipo wazamufiska ivyo wali kulayizga.
SATANA WAKAYEZGA KUTI YOBU WATAYE CHIGOMEZGO
5-6. Kasi ni vichi vikachitikira Yobu mu kanyengo kachoko waka?
5 Yobu vinthu vikamwenderanga makora chomene. Wakaŵa paubwezi uwemi na Yehova. Wakaŵa na mbumba yikuru yakukolerana, ndipo wakaŵa musambazi chomene. (Yobu 1:1-5) Kweni mu zuŵa limoza pera, Yobu wakataya pafupifupi vinthu vyose. Chakwamba, wakataya usambazi wake. (Yobu 1:13-17) Kufuma apo, ŵana ŵake wose ŵakafwa. Ghanaghaniranipo pachoko waka za soka ili. Ŵapapi mitima yikusweka para mwana wawo yumoza wafwa. So mukughanaghana kuti Yobu na muwoli wake ŵakajipulika wuli ŵati ŵapulika kuti ŵana ŵawo wose 10 ŵafwa panyengo yimoza? Ŵakwenera kuti ŵakaŵa na chitima chikuru chomene. Mphake kuti Yobu wakapalura vyakuvwara vyake ndipo wakawa pasi!—Yobu 1:18-20.
6 Kufuma apo, Satana wakatimba Yobu na nthenda yakuŵinya na yakulengeska chomene. (Yobu 2:6-8; 7:5) Pambere ivi vindachitike, Yobu wakaŵa munthu wakuchindikika chomene mu chikaya icho wakakhalanga. Ŵanthu ŵakizanga kwa iyo kuzakapempha ulongozgi. (Yobu 31:18) Kweni apa ŵakamugeganga. Ŵabali ŵake, ŵabwezi ŵake, na ŵateŵeti ŵamunyumba yake wuwo ŵakamba kumuswaya!—Yobu 19:13, 14, 16.
Ŵabali na ŵadumbu ŵanandi ŵangapulikiska umo Yobu wakajipulikiranga apo wakaŵa mu suzgo (Wonani ndime 7) *
7. (a) Kasi Yobu wakagomezganga kuti wakusuzgika chifukwa cha vichi, kweni ntchivichi icho wakakana kuchita? (b) Kasi Mkhristu wangakumana wuli na chiyezgo chakuyanako na ivyo tikuwona pa chithuzi apa?
7 Satana wakakhumbanga kuti Yobu wagomezge kuti wakasuzgikanga chifukwa chakuti Yehova wakaleka kukondwa nayo. Mwachiyelezgero, Satana wakatuma chimphepo kuwiska nyumba iyo ŵana wose 10 ŵa Yobu ŵakachezgangamo. (Yobu 1:18, 19) Kweniso wakachitiska moto kuwa kufuma kuchanya na kukoma viŵeto vya Yobu kweniso ŵateŵeti awo ŵakaviliskanga. (Yobu 1:16) Pakuti chimphepo na moto vikafuma kuchanya, lekani Yobu wakaghanaghananga kuti Yehova Chiuta ndiyo wakatuma vinthu ivi. Ntheura Yobu wakagomezganga kuti panji wamukwiyiska Yehova. Nangauli vikaŵa nthena, Yobu wakakana kutuka Awiske ŵakuchanya aŵa. Yobu wakazomerezga kuti kwa vyaka vinandi Yehova wakamupa vinthu vinandi viwemi. Ntheura wakaghanaghana kuti usange wakaŵa wakukondwa kupokelera viwemi, ipo wakweneraso kuŵa wakunozgeka kupokelera viheni. Lekani wakati: “Zina la Yehova lilutilire kulumbika.” (Yobu 1:20, 21; 2:10) Nangauli Yobu wakataya chuma, ŵana, kweniso wakaŵa mulwari, kweni wakalutilira kugomezgeka kwa Yehova. Kweni Satana wakalekera papo yayi.
8. Kasi Satana wakagwiliskiraso ntchito njomba wuli pa Yobu?
8 Satana wakagwiliskiraso ntchito njomba yinyake pa Yobu; wakakhuŵilizga ŵabwezi ŵatesi ŵatatu kuyowoya vinthu ivyo vikapangiska Yobu kujiwona wawakawaka. Ŵanthu aŵa ŵakayowoya kuti Yobu wakasuzgikanga chifukwa cha viheni vinandi ivyo wakachita. (Yobu 22:5-9) Ŵakayezgaso kumukhorweska kuti nanga vingaŵa kuti iyo wakuchita viheni yayi, kweni vyose ivyo wakachitanga kuti wakondweske Chiuta vikaŵa vyawaka. (Yobu 4:18; 22:2, 3; 25:4) Iwo ŵakakhumbanga Yobu wakayikire kuti Chiuta wakumutemwa, wakumupwelelera, ndiposo kuti palije phindu kumuteŵetera. Ivyo ŵakayowoya mphanyi vikamuchitiska Yobu kutaya chigomezgo.
9. Kasi ntchivichi chikamovwira Yobu kuŵa wakukhwima na wakukhora mu mtima?
9 Muŵe nga mukaŵako ndipo mukuwona ivyo vikuchitika. Yobu wakhala pa vyoto, ndipo wali mu ulwilwi ukuru. (Yobu 2:8) Ŵabwezi ŵake ŵara ŵakuleka yayi kumunena na kumupangiska kuti wajiwonenge wawakawaka. Viyezgo vikamunyekezga nga ni malibwe ghazito, ndipo mtima wake ukasweka chifukwa cha nyifwa ya ŵana ŵake. Pakwamba, Yobu wakakhala chete. (Yobu 2:13–3:1) Usange ŵanyake ŵa Yobu ŵakaghanaghananga kuti kukhala chete uku ntchilongolero chakuti Yobu wagalukirenge Mlengi wake, ŵakajipusikanga waka. Pa nyengo yinyake, Yobu wakwenera kuti wakinuska mutu wake na kudodoliska ŵabwezi ŵatesi aŵa, na kuyowoya kuti: “Nitayengepo chara kunyoloka kwane m’paka nifwe!” (Yobu 27:5) Kasi ntchivichi chikamovwira Yobu kuŵa wakukhwima na wakukhora mu mtima nangauli wakaŵa mu visuzgo vinandi? Iyo wakataya yayi chigomezgo chakuti paumaliro Chiuta wake wachitemwa wazamumupumuzga ku masuzgo ghose, nanga ni apo wakaŵa wakugongoweskeka. Wakamanya kuti nanga wangafwa, Yehova wazamumuwuska.—Yobu 14:13-15.
KASI TINGAMUYEZGA WULI YOBU?
10. Kasi nkhani ya Yobu yikutisambizga vichi?
10 Nkhani ya Yobu yikutisambizga kuti Satana wangatichichizga yayi kusida Yehova kweniso kuti Yehova wakumanya chilichose icho chikutichitikira. Ivyo Yobu wakajumphamo vingatisambizgaso fundo zakuzirwa. Wonani vinyake ivyo tingasambirako kwa Yobu.
11. Kasi chichitikenge ntchivichi usange tikulutilira kuthemba Yehova? (Yakobe 4:7)
11 Yobu wakalongora kuti usange tikulutilira kuthemba Yehova, tingazizipizga chiyezgo chilichose na kumususka Satana. Kasi chichitikenge ntchivichi para tachita nthena? Malemba ghakutisimikizgira kuti Dyabulosi watichimbirenge.—Ŵazgani Yakobe 4:7.
12. Kasi chigomezgo chakuti ŵakufwa ŵazamuwuka chikamovwira wuli Yobu?
12 Tikwenera kukoleska chomene chigomezgo chakuti ŵakufwa ŵazamuwuka. Nga umo tikasambilira mu nkhani iyo yajumpha, kanandi Satana wakutofya kuti tifwenge pakukhumba kutitondeska kugomezgeka kwa Yehova. Pa nkhani ya Yobu, Satana wakayowoya kuti Yobu wangachita chilichose, nanga nkhuleka kuteŵetera Yehova, kuti waponoske umoyo wake. Apa Satana wakateta chomene. Yobu wakayima nganganga nanga ni apo vikawonekanga kuti nyifwa yanunkhira. Wakazizipizga chifukwa cha kukhorwa kuti Yehova ni muwemi kweniso chigomezgo chakuti paumaliro Yehova wazamunozga vinthu. Yobu wakaŵa na chipulikano chakuti para Yehova wangamovwira yayi apo wachali wamoyo, Chiuta wazamuchitapo kanthu munthazi na kumuwuska ku ŵakufwa. Chigomezgo chakuti ŵakufwa ŵazamuwuka chikaŵa chanadi kwa Yobu. Usange chigomezgo ichi ntchanadi kwa ise, nanga ni nyifwa yingatitondeska yayi kuŵa ŵakugomezgeka.
13. Chifukwa wuli tikwenera kumanya njomba izo Satana wakagwiliskira ntchito kwa Yobu?
13 Tikwenera kuzimanya makora njomba izo Satana wakagwiliskira ntchito kwa Yobu chifukwa njomba zenezizi ndizo wakwiza nazo pa ise mazuŵa ghano. Wonani ivyo Satana wakayowoya, wakati: “Munthu [Yobu pera yayi] wapelekenge vyose ivyo wali navyo kuti wawombore umoyo wake.” (Yobu 2:4, 5) Apa tingati Satana wakang’anamuranga kuti ise tikumutemwa zanadi yayi Yehova Chiuta, ndipo tingamusida na chilato chakuti tiponoske umoyo withu. Satana wakutiso Chiuta wakutitemwa yayi ise ndipo walije navyo ntchito ivyo tikuchita kuti timukondweske. Pakuti tikumanyirathu njomba zake, tikugomezga yayi mautesi ghake.
14. Kasi viyezgo vingavumbura vichi mwa ise? Yowoyani chiyelezgero.
14 Tikwenera kuwona viyezgo kuŵa mwaŵi wakuti tijimanye makora. Viyezgo ivyo Yobu wakajumphamo vikamovwira kumanya vigaŵa vinyake ivyo wakachitanga makora yayi na kuyezga kuvinozga. Mwachiyelezgero, Yobu wakamanya kuti wakwenera kusazgirako mukhaliro wakujiyuyura. (Yobu 42:3) Nase tingajimanya makora para tikuyezgeka. Mubali munyake zina lake Nikolay, * uyo ŵakamujalira mu jele nangauli wakaŵa makora yayi muthupi, wakuti: “Jele lili nga mashini gha X-ray, likuvumbura makhaliro ghamukati gha Mkhristu.” Para tamanya apo tikutondeka kuchita makora, tingachitapo kanthu na kunozgapo.
15. Kasi tikwenera kutegherezga kwa njani, ndipo chifukwa wuli?
15 Tikwenera kutegherezga kwa Yehova, ku ŵalwani ŵithu yayi. Yobu wakategherezga mwakupwelelera chomene apo Yehova wakayowoyanga nayo. Chiuta wakadumbiskana nayo Yobu, wakaŵa nga wakuyowoya kuti: ‘Kasi ukuziwona nkhongono zane za kulenga? Nkhumanya vyose ivyo vyakuchitikira. Kasi ukughanaghana kuti ningakupwelelera yayi?’ Mwakujiyuyura Yobu wakazgora ndipo wakawonga chomene uwemi wa Yehova. Iyo wakati: “Makutu ghane ghakapulikanga waka vya imwe, kweni sono namuwonani na maso ghane.” (Yobu 42:5) Yobu apo wakayowoyanga mazgu agha, wakwenera kuti wakaŵa wachali pa vyoto, vilonda thupi lose fwapu, kweniso ŵana ŵake ŵakaŵa mu dindi. Nangauli vikaŵa nthena, Yehova wakamusimikizgira Yobu kuti wakumutemwa kweniso wakamuphalira kuti wakukondwa nayo.—Yobu 42:7, 8.
16. Kuyana na Yesaya 49:15, 16, kasi tikwenera kukumbuka vichi para takumana na viyezgo?
16 Lero napo, ŵanthu ŵangatinena na kuchita nase vinthu nga tili ŵawakawaka. Ŵangayezga kunanga mbiri yithu patekha panji nga gulu na ‘kutitetera uheni wa mtundu uliwose.’ (Mat. 5:11) Pa nkhani ya Yobu, tikusambirapo kuti Yehova wakugomezga kuti tilutilirenge kugomezgeka kwa iyo para takumana na viyezgo. Yehova wakutitemwa ndipo wazamuŵasidapo yayi awo ŵakugomezga mwa iyo. (Ŵazgani Yesaya 49:15, 16.) Ntchiwemi yayi kutegherezga mautesi gha ŵalwani ŵa Chiuta! James, mubali wa ku Turkey uyo mbumba yake yikasangana na viyezgo vikuru, wakuti: “Tikamanya kuti usange titegherezgenge mautesi agho ŵalwani ŵakuyowoyera ŵanthu ŵa Chiuta vitigongoweskenge waka. Ntheura tikaŵika mtima pa chigomezgo chithu cha Ufumu na kulutilira kutangwanika kuteŵetera Yehova. Ivi vikatovwira kuti tilutilire kuŵa ŵachimwemwe.” Nga ni Yobu, nase tikutegherezga kwa Yehova! Mautesi agho ŵalwani ŵithu ŵakuyowoya ghangananga yayi chigomezgo chithu.
CHIGOMEZGO CHINU CHIMUVIKILIRANINGE
Yobu wakatumbikika chifukwa cha kunyoloka kwake. Iyo na muwoli wake ŵakasangwa na thumbiko la Yehova nyengo yitali (Wonani ndime 17) *
17. Kasi mukusambirako vichi ku ŵanalume na ŵanakazi ŵakugomezgeka awo ŵakuzunulika mu Ŵahebere chaputara 11?
17 Yobu njumoza waka mwa ŵateŵeti ŵa Yehova awo ŵakalutilira kuŵa ŵakukhwima na ŵakukhora mu mtima nanga ni apo ŵakaŵa mu viyezgo vyakofya. Mu kalata iyo wakalembera Ŵahebere, mpositole Paulosi wakazunuraso ŵanyake ŵanandi, wakaŵachema ‘bingu likuru la ŵakaboni.’ (Heb. 12:1) Wose aŵa ŵakajumpha mu viyezgo vyakofya; kweni ŵakalutilira kuŵa na chipulikano chakukhora mwa Yehova. (Heb. 11:36-40) Kasi ŵakaphyokapo waka kuzizipizga na kulimbikira? Napachoko pose! Nangauli mu umoyo wawo ŵakawonapo yayi kuti malayizgo gha Chiuta ghafiskika, kweni ŵakalutilira kugomezga mwa Yehova. Pakuti ŵakaŵa ŵakukhorwa kuti Yehova wakuŵatemwa, ŵakaŵa na chigomezgo kuti ŵazamuwona malayizgo agha ghakufiskika. (Heb. 11:4, 5) Ivyo ŵanthu aŵa ŵakachita vingatikhozga kuti nase tilutilire kugomezga mwa Yehova.
18. Kasi mwaŵikapo mtima kuchitachi? (Ŵahebere 11:6)
18 Mazuŵa ghano, tikukhala mu charu icho chikuhenipirahenipira. (2 Tim. 3:13) Satana wandaleke yayi kuyezga ŵanthu ŵa Chiuta. Nangauli tisanganenge na masuzgo, mphanyi taŵikapo mtima kuteŵetera Yehova, uku tikugomezga kuti “taŵika chigomezgo chithu mwa Chiuta wamoyo.” (1 Tim. 4:10) Kumbukani kuti umaliro uwo Chiuta wakapeleka kwa Yobu mbukaboni wakuti “Yehova ngwachitemwa chomene ndiposo ngwalusungu.” (Yak. 5:11) Mphanyi nase talutilira kugomezgeka kwa Yehova, uku tikukhorwa kuti iyo wazamupeleka njombe ku “awo ŵakumupenja na mtima wose.”—Ŵazgani Ŵahebere 11:6.
SUMU 150 Penjani Chiuta Kuti Mupone
^ Para tikughanaghana vya munthu uyo wakazizipizga viyezgo vyakofya, kanandi tikughanaghana vya Yobu. Kasi tikusambirako vichi ku ivyo vikachitikira munthu wakugomezgeka uyu? Tikusambirako kuti Satana wangatichichizga yayi kuti tiside Yehova. Tikusambirakoso kuti nyengo zose Yehova wakumanya vyose ivyo vikutichitikira. Ndiposo nga umo Yehova wakamazgira viyezgo vya Yobu, zuŵa linyake wazamumazgaso masuzgo ghithu ghose. Usange tikulongora mu vyakuchita vithu kuti tikukhorwa kuti fundo izi ni zaunenesko, ndikuti tili ŵamoza mwa awo ‘ŵakugomezga mwa Yehova.’
^ MAZGU GHALONGOSOREKA: Lizgu Lachihebere ilo lili kung’anamurika kuti “gomezga,” chomene likuyowoya vya “kulindilira” chinthu chinyake na kunweka kukuru. Lingang’anamuraso kuthemba munthu munyake.—Sal. 25:2, 3; 62:5.
^ Mazina ghanyake ghasinthika mu nkhani iyi.
