KASI ukulimanya lurombo ulo Yesu wakasambizga ŵasambiri ŵake?— Usange ukulimanya yayi, tingaŵazgira limoza mu Baibolo, pa Mateyu 6:9 mupaka 13. Lurombo ulu, ulo ŵantu ŵanandi ŵakulicema kuti Lurombo lwa Fumu, likusazgapo mazgu agha: “Ufumu winu wize.” Kasi Ufumu wa Ciuta ukuwumanya?—

Reka nikurongosolere. Fumu panji themba ni muwusi wa caru panji cigaŵa. Ndipo boma lakuwusika na fumu panji themba likucemeka ufumu. Mu vyaru vinyake uyo wakuwusa boma wakucemeka pulezidenti. Kasi Muwusi wa boma la Ciuta wakucemeka njani?— Themba panji Fumu. Ici ndico cifukwa cake boma la Ciuta likucemeka Ufumu.

Kasi ukumumanya muntu uyo Yehova Ciuta wasanka kuŵa Themba la boma Lake?— Mwana wake, Yesu Kristu. Ncifukwa wuli Yesu ni muweme kuruska ŵawusi wose awo ŵantu ŵangasanka?— Ncifukwa cakuti  Yesu wakutemwa Yehova, Ŵadada ŵake. Nteura nyengo zose wakucita ico nciweme.

Virimika vinandi pambere Yesu wandababike mu Betelehemu, Baibolo likayowoyerathu za kubabika kwake ndipo likayowoyaso kuti wazamuŵa Muwusi wakusankika na Ciuta. Tiye tiŵazge nkani iyi pa Yesaya 9:6, 7. Ipo pakuti: “Kwababika kwa ise mwana, kwa ise kwapika mwanamwanarumi; ufumu tiuŵenge pa ciŵegha cake, zina lake tiliŵenge . . . Karonga wa Cimango. Wandanyi wa ufumu wake na wa cimango kuti wamkumara cara.”

Mu lemba ili, cifukwa cakuti Yesu ni muwusi wa Ufumu wa Ciuta, wakucemeka “Karonga.” Ndipo Yesu ni Mwana wa Karonga panji kuti Themba Likuru, Yehova. Kweni Yehova wasankaso Yesu kuŵa Themba la boma Lake, ilo lizamuwusa caru capasi kwa virimika 1000. (Civumbuzi 20:6) Pamanyuma pakuti Yesu wabapatizika, wakamba ‘kupharazga na kuyowoya kuti: Ng’anamukani mtima; cifukwa ufumu wa kucanya waneng’enera.’— Mateyu 4:17.

Kasi ukughanaghana kuti ncifukwa wuli Yesu wakati Ufumu waneng’enera?— Cifukwa cakuti Themba, ilo mukuruta kwa nyengo lizamuwusa kucanya, likaŵa pakati pawo! Ndico cifukwa cake Yesu wakaphalira ŵantu kuti: “Ufumu wa Ciuta uli mukati mwinu.” (Luka 17:21) Kasi iwe ukukhumba kuŵa pafupi na Themba la Yehova, utepanji na kulikhwaska wuwo?—

Niphalira, kasi ni mulimo wuli wakuzirwa uwo Yesu wakizira pa caru capasi?— Yesu wakazgora fumbo ili, wakati: “Nkwenera kupharazga makani ghaweme gha Ufumu wa Ciuta na mu mizi yinyake wuwo: cifukwa ceneici ndico nkatumikira.” (Luka 4:43) Yesu wakamanya kuti wangakwaniska kupharazga yekha yayi. Anteura, kasi ukughanaghana kuti wakacitaci?—

Yesu wakendanga na ŵantu mu upharazgi na kuŵasambizga umo ŵangapharazgira. Ŵantu  ŵakwamba awo wakasambizga ŵakaŵa ŵapostole ŵake 12. (Mateyu 10:5, 7) Kweni kasi Yesu wakasambizga ŵapostole ŵake 12 pera kuti ŵacite mulimo uwu? Yayi, Baibolo likuyowoya kuti Yesu wakasambizgaso ŵantu ŵanyake ŵanandi kupharazga. Mukuruta kwa nyengo, wakasanka ŵasambiri ŵanyake 70 na kuŵatuma ŵaŵiri-ŵaŵiri muntazi mwake. Kasi ncivici ico iwo ŵakasambizganga ŵantu?— Yesu wakati: ‘Rutani mukaŵaphalire kuti, Ufumu wa Ciuta waneng’enera kwa imwe.’ (Luka 10:9) Mu ntowa iyi ŵantu ŵakasambira za boma la Ciuta.

Kale mu Israyeli, mathemba ghapya ghakanjiranga mu msumba uku ghakwera pa mbunda kuti ghajirongore ku ŵantu. Ici ndico Yesu wakacita peneapo wakanjiranga kaumaliro mu Yerusalemu. Ici cikung’anamura kuti Yesu wazamuŵa Muwusi wa Ufumu wa Ciuta. Kasi ŵantu ŵakakhumba kuti iye waŵe Themba?—

Peneapo wakakwera pa mbunda, ŵantu ŵanandi ŵakamba kutandika minjirira yawo mu ntowa. Ŵanyake ŵakadumula mintavi ya makuni na kuyiŵika mu ntowa. Mwakucita nteura iwo ŵakarongoranga kuti ŵakukhumba kuti Yesu waŵe Themba lawo. Ŵakacemerezga kuti: ‘Ngwakutumbikika Karonga uyo wakwiza mu zina la Yehova!’ Kweni ni waliyose yayi uyo wakakondwa. Nakwenenako, ŵarongozgi ŵanyake ŵacisopo ŵakaphalira Yesu kuti: ‘Phalira ŵasambiri ŵako kuti ŵakhale cete.’—Luka 19:28-40.

Pati pajumpa mazuŵa ghankondi Yesu wakakakika na kutolekera ku nyumba ya kazembe, Pontiyo Pilato. Ŵarwani ŵa Yesu wakamutetera kuti wakayowoyanga kuti ni themba ndiposo kuti wakasuskanga boma la Roma. Nteura Pilato wakafumba Yesu kuti wayowoyepo pa nkani iyi. Yesu wakati iyo wakakhumbanga kupoka boma yayi. Wakaphalira Pilato kuti: “Ufumu wane kuti ngwa caru cino cara.”—Yohane 18:36.

Pamanyuma pake Pilato wakafumira kuwaro na kuphalira ŵantu kuti wakasanga kafukwa yayi mwa Yesu. Kweni ŵantu ŵakakhumbanga yayi kuti Yesu waŵe Themba lawo. Ŵakakhumbanga yayi kuti wasuturike. (Yohane 18:37-40) Wakati wayowoyaso na Yesu, Pilato wakasimikizga kuti Yesu wakacita cintu ciheni cilicose yayi. Mwanteura, wakati wamufumiskira  kuwaro kwa nyengo yaumaliro, Pilato wakati: “Awonani, karonga winu.” Kweni ŵantu ŵakacemerezga kuti: “Muwuskapo! muwuskapo? mupayika!”

Pilato wakafumba kuti: “Kasi ndipayike karonga winu?” Ŵasofi ŵarara ŵakazgora kuti: ‘Tilije karonga, kweni Kesare pera.’ Aghanaghanira waka! Ŵasofi ŵaheni ŵara ŵakanyengelera ŵantu kuti ŵakane Yesu!—Yohane 19:1-16.

Mazuŵa ghano vintu vikuyana waka nga ni umo vikaŵira mu nyengo ya Yesu. Ŵantu ŵanandi ŵakukhumba yayi kuti Yesu waŵe Themba lawo. Iwo  ŵangayowoya kuti ŵakugomezga mwa Ciuta, kweni ŵakukhumba yayi kuti Ciuta panji Kristu waŵaphalirenge ivyo ŵakwenera kucita. Iwo ŵakukhumba maboma ghawo penepano pa caru capasi.

Wuli pakuyowoya za ise? Para tasambira za Ufumu wa Ciuta na vintu viweme vyose ivyo Ufumu uwu uzamucita, kasi ici cikutipangiska kuti ticiteci?— Tikwenera kumutemwa Ciuta, asi ntena?— Ipo, kasi tingamurongora wuli Ciuta kuti tikumutemwa ndiposo kuti tikukhumba kuwusika na Ufumu wake?—

Tingamurongora Ciuta kuti tikumutemwa mwakurondezga ivyo Yesu wakacitanga. Kasi Yesu wakacitanga vici kurongora kuti wakatemwanga Yehova?— “Mazuŵa ghose nkucita vyeneivyo vikumukondweska,” ndimo Yesu wakayowoyera. (Yohane 8:29) Enya, Yesu wakiza pa caru capasi ‘kuzakacita khumbo la Ciuta’ na “kufiska mulimo wake.” (Ŵahebere 10:7; Yohane 4:34) Tiye tiwone ico Yesu wakacita pambere wandayambe mulimo wakupharazga.

Yesu wakaruta kwa Yohane Mbapatizi ku Mronga wa Yorodani. Ŵakati ŵanjira mu maji, Yohane wakabizga Yesu mu maji na kumuzuwuraso. Kasi ukumanya cifukwa ico Yohane wakabapatizira Yesu?—

Yesu ndiye wakapempa Yohane kuti wamubapatize. Kweni kasi tikumanya wuli kuti Ciuta wakakhumbanga kuti Yesu wabapatizike? — Tikumanya cifukwa cakuti Yesu wakati wafuma mu maji, wakapulika mazgu kufuma kucanya: ‘Iwe ndiwe Mwana wane wakutemweka, wa mweneiwe nkukondwa nawe.’ Ciuta wakatuma nanga ni mzimu wake utuŵa uwo ukawoneka nga ni njiŵa pacanya pa mutu wa Yesu. Anteura mwakubapatizika, Yesu wakarongora kuti wakukhumba kuteŵetera Yehova mu umoyo wake wose, enya, muyirayira swii.—Marko 1:9-11.

Iwe sono ucali mwana. Kweni kasi uzamucita vici para wakura?— Kasi uzamucita nga ni Yesu na kubapatizika?— Iwe ukwenera kurondezga ciyerezgero cake, pakuti Baibolo likuyowoya kuti wakakusidira ‘bambiro, mwakuti urondezgenge marwayo ghake.’ (1 Petros 2:21) Usange wabapatizika, uzamurongora kuti ukukhumba nadi kuwusika na Ufumu wa Ciuta. Kweni kubapatizika kwekha nkwakukwanira yayi.

Tikwenera kupulikira vintu vyose ivyo Yesu wakasambizga. Yesu wakayowoya kuti tikwenera kuŵa ‘ŵa caru cara.’ Kasi tingayowoya kuti tikumupulikira usange tikucita vintu vya caru? Yesu na ŵapostole ŵake ŵakatceŵanga kucita vintu ivi. (Yohane 17:14) Kasi ni vici ivyo ŵakacitanga mu malo mwake?— Ŵakaphaliranga ŵanji za Ufumu wa Ciuta. Uwu ndiwo ukaŵa mulimo wakuzirwa comene mu umoyo wawo. Kasi ise nase tingacita mulimo uwu?— Enya tingacita, ndipo ticitenge usange ivyo tikuyowoya vikufumira nadi pasi pa mtima para tikuromba kuti Ufumu wa Ciuta wize.