Mazgu Ghakwamba gha Chigaŵa 2
Chifukwa wuli Yehova wakatuma chigumula icho chikananga charu? Ŵanthu ŵakati ŵalengeka waka, pakawuka nkhondo pakati pa uwemi na uheni. Ŵanthu ŵanyake nga ni Adamu, Eva, na mwana wawo Kayini, ŵakasankha kuŵa ku chigaŵa cha uheni. Ŵanyake ŵachoko waka, nga ni Abelu na Nowa, ŵakasankha kuŵa ku chigaŵa cha uwemi. Ŵanthu ŵanandi ŵakaŵa ŵaheni chomene mwakuti Yehova wakaŵaparanya. Chigaŵa ichi chitovwirenge kuti timanyenge kuti Yehova wakuwona chigaŵa icho ise tasankha kweniso kuti walekelerenge yayi kuti uheni uthereske uwemi.
MU CHIGAŴA ICHI
Adamu na Eva Ŵakaleka Kupulikira Chiuta
Kasi khuni linyake likaŵa lapadera wuli mu munda wa Edeni? Chifukwa wuli Eva wakarya chipasi cha mu khuni ili?
Wakakoma Munyake Chifukwa cha Ukali
Chiuta wakakondwa na sembe ya Abelu kweni ya Kayini yayi. Kayini wakati wamanya, wakakwiya chomene ndipo wakachita chinthu chakofya.
Chingalaŵa cha Nowa
Ŵangelo ŵaheni ŵakati ŵatora ŵanakazi pa charu chapasi, ŵakababa viŵana vikuru na vyankhaza. Nkhaza zikaŵa palipose. Kweni Nowa wakaŵa muwemi—wakatemwanga Chiuta na kumupulikira.
Ŵanthu 8 Ŵakapona
Pa Chigumula, vula yikalokwa mazuŵa 40, muhanya na usiku. Nowa na mbumba yake ŵakakhala mu chingalaŵa kujumpha chaka chimoza. Pamanyuma, ŵakafuma.
