Kasi mu Baibolo Ningasangamo Mazgu Ghakupembuzga?
Ivyo Baibolo likuyowoya
Enya. (Ŵaroma 15:4) Wonani viyelezgero vya nkhani zinyake za mu Baibolo izo zikapembuzga ŵanandi awo ŵakasangananga na masuzgo ghakuru kweniso ŵakasuzgikanga maghanoghano.
Mu nkhani iyi
Masuzgo
Salimo 23:4: “Nangauli nkhwenda mu chinkhwawu cha mdima bii, kweni nkhopa chara, pakuti imwe muli nane.”
Ng’anamuro lake: Para mukulomba kwa Chiuta na kugomezga chomene ulongozgi wa mu Mazgu ghake Baibolo, muŵenge ŵachikanga pakulimbana na masuzgo.
Ŵafilipi 4:13: “Mu vinthu vyose, nkhusanga nkhongono mwa uyo wakunipa nkhongono.”
Ng’anamuro lake: Chiuta wangamupani nkhongono zakuzizipizgira suzgo lililose.
Nyifwa ya ŵakutemweka ŵithu
Mupharazgi 9:10: “Ku Dindi uko ukuluta kulije mulimo, maghanoghano, kumanya, panji vinjeru.”
Ng’anamuro lake: Awo ŵafwa ŵakusuzgika yayi, ndipo ŵangatipwetekaso yayi. Iwo ŵakumanya kalikose yayi.
Milimo 24:15: “Kuzamuŵa chiwuka.”
Ng’anamuro lake: Chiuta wazamuwuska ŵakutemweka ŵithu awo ŵali kufwa.
Kujiyimba mulandu mwakujumphizga
Salimo 86:5: “Chifukwa imwe, A Yehova, a ndimwe muwemi, wakunozgeka kugowokera, ndimwe wakuzura na lusungu ku wose awo ŵakuchema pa imwe.”
Ng’anamuro lake: Chiuta wakugowokera awo ŵalapa nadi ivyo ŵakabudiska kumasinda ndipo ŵaŵikapo mtima kuleka kuwerezgaposo ivyo ŵakabuda.
Salimo 103:12: “Umo uliri utali kufuma kumafumiro gha dazi kuya kumanjiliro gha dazi, Ndimo waŵikira maubudi ghithu kutali na ise.”
Ng’anamuro lake: Para Chiuta wagowoka, wakuŵika maubudi ghithu kutali chomene na ise. Iyo wakutikumbuskaso yayi ivyo tikabuda panji kutilanga chifukwa cha igho.
Chitima
Salimo 31:7: “Mwawona visuzgo vyane. Mukumanya kukweŵeka kwane.”
Ng’anamuro lake: Chiuta wakumanya suzgo lililose ilo mukusangana nalo. Iyo wakupulikiska makora chomene umo mukujipulikira kuluska munthu waliyose.
Salimo 34:18: “Yehova wali pafupi na ŵakusweka mu mtima. Wakuponoska awo mzimu wawo wateketeka.”
Ng’anamuro lake: Chiuta wakulayizga kuti waŵenge namwe para muli na chitima. Iyo wangamupani nkhongono zakuti muzizipizgire.
Ulwari
Salimo 41:3: “Yehova wamufukatirenge pa bedi ilo wakulwalira.”
Ng’anamuro lake: Chiuta wangamovwirani para mukulwara chomene mwa kumupani mtende wa mu mtima, pamoza na nkhongono, chizizipizgo, na vinjeru kuti musankhe vinthu mwamahara.
Yesaya 33:24: “Pazamuŵavya munthu wakukhala mu charu uyo wazamuti: ‘Nalwara.’”
Ng’anamuro lake: Chiuta wakulayizga kuti kunthazi uku waliyose wazamukondwa na umoyo uwemi.
Kusuzgika maghanoghano
Salimo 94:19: “Para vyenjezgo vyaninyekezga, imwe mukunisanguluska na kunizikiska mtima.”
Ng’anamuro lake: Usange tikuchimbilira kwa Chiuta para tamba kusuzgika maghanoghano, iyo watovwirenge kuti mtima withu uwelere m’malo.
1 Petrosi 5:7: “Muthulirani vyose ivyo mukwenjerwa navyo, chifukwa wakumupwelelerani.”
Ng’anamuro lake: Chiuta vikumukhwaska para wakuwona ise tikusuzgika. Iyo wakutipempha kuti tilombenge kwa iyo para tikusangana na masuzgo.
Nkhondo
Salimo 46:9: “Wakulekeska nkhondo pa charu chose chapasi.”
Ng’anamuro lake: Sonosono apa Ufumu wa Chiuta uzamumazgirathu nkhondo.
Salimo 37:11, 29: “Kweni ŵakuzika ŵazamuhara charu chapasi, ŵazamukondwa chomene na mtende ukuru. . . . Ŵarunji ŵazamuhara charu chapasi, ndipo ŵazamukhala mwenemumo muyirayira.”
Ng’anamuro lake: Ŵanthu ŵawemi ŵazamusangwa na mtende pa charu chapasi muyirayira.
Kwenjerwa na vyamunthazi
Yeremiya 29:11: “Yehova wakuti: ‘Pakuti nkhumanya maghanoghano agho nkhughanaghanira imwe, maghanoghano gha mtende, gha soka chara, kumupani munthazi muwemi na chigomezgo.’”
Ng’anamuro lake: Chiuta wakusimikizgira ŵanthu ŵake kuti ŵakwenera kugomezga kuti wizenge na munthazi muwemi.
Chivumbuzi 21:4: “Wazamufyura masozi ghose ku maso ghawo, ndipo nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya. Vinthu vyakale vyafumapo.”
Ng’anamuro lake: Chiuta wakulayizga kuti wawuskengepo vinthu viheni vyose ivyo tikuviwona mazuŵa ghano.
a Yehova ni zina leneko la Chiuta. (Salimo 83:18) Wonani nkhani yakuti, “Kasi Yehova Ni Njani?”
Panji Mungatemwa Kuŵerengaso Nkhani Izi
GONGWE LA MULINDA
Kasi Pali Uwemi Wuli Kumanya Kuti Chiuta Wakutipwelelera?
Malemba ghakutovwira kukhozga chipulikano chithu pa ivyo Yehova wali kutilayizga.
MAFUMBO AGHO BAIBOLO LIKUZGORA
Kasi Chigomezgo Ningachisanga Nkhu?
Pali chinthu chinyake icho chingamovwirani chomene kusintha umoyo winu pasono na kumupani chigomezgo chiwemi chamunthazi.
NKHANI ZINYAKE
Kupembuzga Awo Ŵakulira
Para wakutemweka withu wafwa, tingawona nga kuti palije uyo wangatipulikiska umo vikuŵinyira. Ndipouli Chiuta nayo vikumuŵinya ndipo wangatovwira.
GONGWE LA MULINDA
Para Tikuwona Kuti Ntchakusuzga Kuzizipizga
Umoyo ngwakuzirwa nanga tingasangana na masuzgo ghakuru.
VISAMBIZGO VYAKUZIRWA VYA MU BAIBOLO
Chifukwa Wuli Chiuta Walekelera Uheni na Suzgo?
Ŵanthu ŵanandi ŵakufumba kuti ‘chifukwa wuli ŵanthu ŵakusuzgika?’ Baibolo lili na zgoro la fumbo ili.
IVYO BAIBOLO LIKUSAMBIZGA
Yezgani Kusambira Nase Baibolo
Sangani mwaŵi wakusambira Baibolo munthowa yakudumbiskana na munthu.