Usange ndimwe Kaboni wa Yehova, kasi muli kughanaghanapo kuti ŵapolisi ŵangamupelekezgani para mukupharazga ku nyumba na nyumba? Ivi ndivyo vikachitikira Joseph ku Micronesia mu 2017. Iyo na Ŵakaboni ŵanyake ŵatatu ŵakapharazganga ku chirwa chinyake chakutali chomene.

 Cha m’ma 12 koloko muhanya, Ŵakaboni aŵa ŵakafika pa chirwa chinyake icho chili na ŵanthu pafupifupi 600. Meya wa pa chirwa ichi wakaŵapokelera makora chomene. Joseph wakalongosora ivyo vikachita, wakati: “Meya wakatiphalira kuti pali galimoto ya ŵapolisi iyo yingakatilinda panyumba yiliyose mu muzi uwu. Tikakondwa chomene na wovwiri uwo ŵakatipa, kweni tikakana mwantchindi. Ise tikakhumbanga kupharazgira ŵanthu mu nyumba zawo nga umo tikuchitira nyengo zose.”

 Ŵakaboni aŵa ŵakambako kwenda pasi na kupharazga ku nyumba na nyumba. Kaboni munyake wakati: “Ŵanthu ŵakatipokelera makora chomene ndipo ŵakanweka na uthenga withu. Ivi vikapangiska kuti tikhalengepo nyengo yinandi panyumba yimoza, kuluska umo ise tikakhazgiranga.”

 Kumise, galimoto ya ŵapolisi yikamujumpha kaŵiri Joseph, ndipo ulendo wachitatu yikayima. Ŵapolisi ŵakaphalira Joseph kuti mbakunozgeka kukamulinda panyumba yiliyose iyo wakuluta. Joseph wakati: “Nangumuphalirani kale kuti yayi.” Kweni ŵapolisi nawo ŵakalimbikira ndipo ŵakaniphalira kuti, ‘mwakhala na nyengo yichoko kuti muwere, ntheura tingakamulindani kuti mupharazgire nyumba izo zakhalako.’ Vikanitonda kuti nikane, chifukwa kukakhala nadi nyumba zinandi zakuti nipharazge. Panyumba yiliyose iyo tikafikanga, ŵapolisi ŵakaniphaliranga kuti para nawodira ndipo ŵanthu ŵakufuma yayi, mbwenu ŵalizgenge hutala kuti ŵanthu ŵafume.

 “Ŵapolisi ŵakatovwira chomene kuti tipharazgire nyumba yiliyose. Tikagaŵira mabuku na magazini ghanandi ndipo tikapangana na ŵanthu ŵanandi kuti tikizeso.”

 Ŵapolisi ŵakaphalira Joseph kuti “ŵakukondwa chomene kuti ŵanthu ŵapharazgenge makani ghawemi.” Apo Ŵakaboni aŵa ŵakaweranga mise yira, ŵapolisi ŵakaŵabayibiskanga mwakukondwa uku magazini ghali mu mawoko.