Ab’oruganda abaine emiringo enungi ey’Ekikristaayo bakoonyera ekitebe. Omusaija ow’okwetegereza akurakuraniza obusinge. Obu oraaba noogonza kumanywa nk’omuntu ow’ayoleka okwetegereza, huliiriza abandi kandi olengeho kumanya omulingo barukwehurra. Ekyokurorraho, kakuba oba oli mugurusi kandi oli omurukurato rw’abagurusi kandi abarukukira obwingi bakaikiraniza ha ncwamu ey’erukuhikaana n’emisingi ya Baibuli, noija kusagika encwamu egi noobu kiraaba ngu oine enteekereza ey’erukwahukana? Otahambiriza abandi kukora ebintu omu mulingo orukugonza. Siima enteekereza z’abandi. (Kub. 13:​8, 9; Nfu. 15:22) Kinu nikimanyisa ngu toli muntu ow’atarukutamu abandi ekitiinisa rundi kukungana na bo. Oihireho obatwaza omu mulingo ogw’embabazi. Nk’omusaija ow’obusinge, kora kyona ekirukusoboka kuleetaho obusinge n’omu nyikara ezigumire. (Yak. 3:​17, 18) Ebigambo byawe eby’embabazi nibisobora kworobya enyetwaza y’abantu abandi otwaliiremu n’abo abahakaniza enyikiriza zaawe.—Bac. 8:​1-3; Nfu. 25:15; Mat. 5:​23, 24. w24.11 23 ¶13

Noobu kiraaba ngu Kristo “akafa omurundi gumu,” akyaliyo naatukorra ebintu bingi. (Bar. 6:10) Omu mulingo ki? Aikara naakora kutuhikyaho ebintu bingi ebirungi ebi turukwegondezaamu habw’ekicunguro eki yahaireyo. Teekerezaaho ebintu ebi aliyo naakora. Naaheereza nk’Omukama waitu, Nyakatagara Omukuru, kandi nk’omutwe gw’ekitebe. (1 Kol. 15:25; Bef. 5:23; Baheb. 2:17) Nuwe arukwebembera omulimo ogw’okusorooza hamu abaseeserweho amagita, hamu n’ab’ekitebe ekingi, omulimo ogu alimalirra kukora omuhito omwingi gutakahoire. (Mat. 25:32) Ekindi, akigumya ngu abaheereza be abeesigwa, baaliisibwa kurungi omu by’omwoyo omu kasumi kanu ak’omu biro ebya ha mpero. (Mat. 24:45) Kandi n’omu kasumi ak’Obulemi bwe obw’Emyaka Rukumi, naija kugumizaamu naatukorra ebintu bingi. Mali, Yahwe obu yahaireyo Omwana we hali itwe,  atakikole n’ekigendererwa eky’okutufeera kyonka, baitu n’okutukorra ebintu bingi muno! w25.01 24 ¶12

Yahwe obu atuganyira, atuganyirra kimu kandi habw’ebiro n’ebiro. Kinu kitusobozesa kutunga enkoragana enungi na Isiitwe ow’omu iguru. Ha murundi nugwo gumu, tukiijuka ngu okuganyira kwonyini kiri kisembo Yahwe eki atuha habwokuba naatugonza kandi mugabi hatali ngu habwokuba kitusemeriire. Mali itwena tusemeriire kusiima Yahwe habwokuba ali Ruhanga ow’okuganyira kwonyini! (Zab. 130:4; Bar. 4:8) Baitu obu turaaba nitugonza Yahwe kutuganyira, haroho ekintu ekikuru eki tusemeriire kukora. Wetegereze Yesu eki yagambire: “Baitu obu mutabaganyira ensobi zaabo, na Isiinywe na uwe talibaganyira ensobi zanyu.” (Mat. 6:​14, 15) Nahabweki, tusemeriire kwegera ha kuganyira kwa Yahwe. w25.02 13 ¶18-19

Tekerezaaho abantu Yahwe yahwerekeriize omu Sodomu na Gomora. Loti omusaija ow’okuhikirra yaikaraga n’abantu ab’omu Sodomu. Baitu Loti akabatebeza boona? Nangwa. Ky’amananu ngu bakaba bali babi, baitu boona bakaba bamanyire ekihikire n’ekitahikire? Nikizooka ngu tinukwo kikaba kiri. Ijuka ngu Baibuli n’ebazaaho ekitebe ky’abasaija ab’omu rubuga abakaba nibagonza kuhamba abagenyi ba Loti. Baibuli n’egamba ngu ekitebe ky’abantu kikaba kirumu “abato nabakuru.” (Kub. 19:4; 2 Pet. 2:7) Mali nitusobora kukigumya ngu Yahwe Ruhanga ow’embabazi akacwamu ngu busaho n’omu h’abantu banu ow’alihumbuuka? Eki titusobora kukigumya. Yahwe akagambira Iburahimu ngu omu rubuga oru hakaba hatarumu noobu baakuba abantu ikumi abahikiriire. (Kub. 18:32) Nahabweki baali batahikiriire kandi Yahwe akaba ahikire kubahwerekereza habw’ebikorwa byabo. Baitu nitusobora kukigumya ngu busaho n’omu omuli bo alihumbuuka omu kuhumbuuka okw’abatahikiriire? Nangwa eki titusobora kukigumya. w24.05 2 ¶3; 3 ¶8

Habw’enyikara omu by’entaahya kuhindahinduka, abamu boohiibwe kwikiriza omulimo ogurukubeetaagisa kugenda hara n’eka yabo, baitu emirundi erukukira obwingi eki kyoleka ngu ebaire ncwamu ey’etali y’amagezi ei bakozere. Otakaikiriize omulimo omuhyaka, otagarukira ha kuteekerezaaho ebirungi ebi oraayegondezaamu kyonka, baitu teekerezaaho n’omulingo kiraakukwataho omu by’omwoyo. (Luk. 14:28) Wekaguze: ‘Kiki ekisobora kuhika ha buswere bwange kakuba mba ndi hara n’ou ndi na uwe omu buswere? Ninyija kusobora kugenda omu nsorrokano zoona, omu buheereza, kandi nkamara obwire n’ab’oruganda na banyaanya itwe?’ Obu oraaba oine abaana, osemeriire kwekaguza ekikaguzo kinu ekikuru: ‘Ndaasobora nta kukuza abaana bange “[nimbooroora] omu kuhana n’omu kuteerererwa kwa Yahwe” obu ndaaba ntali na bo?’ (Bef. 6:4) Obu oraaba nookora encwamu, webeemberwe enteekereza eya Ruhanga hatali ey’ab’omuka yaawe rundi abanywani baawe abatarukutamu emisingi ya Baibuli ekitiinisa. w25.03 29 ¶12

Omukristaayo ow’akyali muto omu by’omwoyo, ayanguha kuhondera ‘kubiihabiihwa kw’abantu’ kandi naasobora kwikiriza ebisuba by’abo abeecwireho ekitebe. Ayanguha kukwatwa ihali, atabangura obusinge, ayanguha kubiihirwa, kandi kimwanguhira kukora ekibi obu ayohebwa. (1 Kol. 3:3) Ebyahandiikirwe birengesaniza kukura omu by’omwoyo n’omulingo omwana akura akafooka omuntu mukuru. (Bef. 4:15) Omwana obu aba akyali muto aba aine bingi ebi atamanyire kandi ayetaaga kumugambira eky’okukora. Ekyokurorraho, omukazi naasobora kugambira muhara we kumukwata ha mukono obu barukuba nibacwanganiza oruguudo. Omwisiki obu agenda naakura, nyina naasobora kumuleka kucwanganiza oruguudo wenka, baitu nabwo naabanza kurora omu mbaju zoona atakacwanganiize kurora obu haraaba haliyo ekiiruka kyona. Baitu obu ayeyongera kukura aba amanyire eky’okukora kwetantara akabi. Omu mulingo nugwo gumu, Abakristaayo abakuzire omu by’omwoyo obu baba nibagonza kukora encwamu, baserra emisingi ya Baibuli ey’eraabakoonyera kumanya enteekereza ya Yahwe, kandi niyo basigikirraho kukora encwamu. w24.04 3 ¶5-6

Kumara akasumi enkoragana ya Ruhanga yagarukiraga hali abo abayaikaraga na bo omu iguru. Hanyuma, akahanga abantu kandi na bo bakaba nibasobora kufooka bagenyi be hanu omu nsi. Bamu h’abagenyi abo bakaba nubo Enoka, Nuha, Iburahimu, hamu na Yobu. Abaheereza ba Ruhanga abo ab’amananu bakeetwa banywani ba Ruhanga, rundi abantu abaagendaga “hamu na Ruhanga.” (Kub. 5:24; 6:9; Yob. 29:4; Is. 41:8) Kumara ebyasa bingi, Yahwe akagumizaamu naaraaliza banywani be kufooka bagenyi be. (Ez. 37:​26, 27) Ekyokurorraho, kusigikirra ha bunabbi bwa Ezekyeri, nitwega ngu Ruhanga mali naagonza abaheereza be abeesigwa kuba n’enkoragana enungi na uwe. Naaraganiza “[kuragaana] na bo ekiragano ekyobusinge.” Obunabbi obu nibubazaaho akasumi nambere abo abaine okunihira okw’okugenda omu iguru hamu n’abo abaine okunihira okw’okwomeera ebiro n’ebiro omu nsi baliba hamu omu heema ye ey’akokurorraho ‘nk’igana limu.’ (Yoh. 10:16) Kandi akasumi ako, nuko akaturumu. w24.06 2 ¶2, 4; 3 ¶5

Nk’abantu ba Yahwe, tusagika Obukama bwa Ruhanga n’omutima gwaitu goona, baitu emirundi erukukira obwingi, twetaaga obumanzi kukikora. (Mat. 6:33) Ekyokurorraho, omu nsi enu embi nitwetaaga obumanzi kuhondera endengo za Yahwe, hamu n’okutebeza amakuru amarungi ag’Obukama. Kandi emirundi erukukira obwingi, kyetaagisa obumanzi kwikara tutarukugwera orubaju omu by’obulemi omu nsi enu embi ey’erukweyongera kwebaganizaamu. (Yoh. 18:36) Baingi h’abantu ba Yahwe nibahikwaho ebizibu omu by’entaahya, batiirwe, kandi batairwe omu nkomo habw’okwanga kwejumbira omu by’obulemi, rundi kutaaha amahe. Obu tuteekerezaaho omulingo abandi baayolekere obumanzi kusobora kwikara bali beesigwa hali Yahwe hamu n’Obukama bwe, na itwe kitwekambisa kuba bamanzi. Omukama waitu Yesu Kristo obu akaba akyali omu nsi, akangira kimu okusindikirizibwa okw’okwejumbira omu by’obulemi eby’ensi ya Sitaani. (Mat. 4:​8-11; Yoh. 6:​14, 15) Buli kaire, yayesigaga Yahwe kumuha amaani. w24.07 3 ¶4; 4 ¶7

Yahwe akahandiikisa ebintu binu omu Baibuli nukwo tusobole kwetegereza ekintu ekikuru. Kinu nikitukoonyera kwetegereza habwaki anobera kimu ekibi. Ekibi kitwahukaniza hali Isiitwe kandi kirugamu okufa. (Is. 59:2) Egi niyo nsonga habwaki Sitaani omujeemu ayatandikireho okubonabona kunu agonza ekibi kandi akikurakuraniza. Nahabweki, Adamu na Hawa obu baasiisire, Sitaani naasobora kuba yateekeriize ngu ekigendererwa kya Yahwe hali abantu, akiremeseze. Baitu ateeteegereze ngu Yahwe ali Ruhanga ow’okugonza. Ruhanga takahinduraga ekigendererwa kye hali abaijukuru ba Adamu na Hawa. Habwokuba naagonza abantu, ahonaaho, akabaha okunihira. (Bar. 8:​20, 21) Yahwe akaba akimanyire ngu bamu h’abaijukuru baabo, bakaba nibaija kumugonza kandi baserre obukoonyezi bwe omu kurwanisa ekibi. Kandi nka Isebo kandi Omuhangi wabo, yakubateriireho omulingo ogw’okulekerwa kuruga omu kibi kandi bairre haihi na uwe. w24.08 3 ¶3-4

Abantu ba Yahwe abarukukira obwingi baine bingi eby’okukora. Tukora emirimo ey’etusobozesa kwehikyaho ebyetaago byaitu hamu n’ebya b’omu maka gaitu. (1 Tim. 5:8) Abakristaayo baingi nibarolerra abanyabuzaale baabo abarwaire rundi abakuzire omu myaka. Kandi itwena nitwetaaga kurolerra obwomeezi bwaitu, ekintu ekitwara obwire. Kwongerra ha bujunaanizibwa bunu, twine obujunaanizibwa obundi omu kitebe. Obujunaanizibwa obukuru nubwo obw’okwejumbira omu mulimo ogw’okutebeza n’obwekambi. Kusoma Baibuli kiri kimu ha ‘bintu ebirukukirayo obukuru’ omu bwomeezi bwaitu nk’Abakristaayo, nahabweki tusemeriire kukigumya ngu twatunga obwire obw’okugisoma. Zabuli esuura ey’okubanza ebazaaho omuntu ow’aine okusemererwa eti: ‘Baitu ebiragiro bya Yahwe nibyo bimusemeza; asoma ebiragiro bye kandi abiteekerezaaho nyamusana n’ekiro.’ (Zab. 1:​1, 2) Eki nikyoleka kurungi ngu tusemeriire kutunga obwire obw’okusoma Baibuli. Bwire ki oburungi obw’okusoma Baibuli? Nikisigikirra ha bwire obu orukurora ngu burungi hali iwe. Baitu ekikuru kiri ngu busemeriire kuba obwire obu osobora kwikara nookikora buli kiro. w24.09 3 ¶5-6

Omukristaayo ow’akuzire omu by’omwoyo na uwe naayetaaga obukoonyezi kuruga ha muntu ondi? Ego. Obwire obumu na bo nibasobora kwetaaga obukoonyezi. Baitu omuntu ow’akyali muto omu by’omwoyo, anihira ngu abandi nibaija kumugambira eky’okukora, rundi kumukorra encwamu. Baitu ha rubaju orundi Omukristaayo ow’akuzire omu by’omwoyo naasobora kusaba abandi bamuhemu amagezi, baitu tabanihirramu kumukorra encwamu habwokuba akimanyire ngu “buli omu alyetweka omugugu gwe wenka.” Nkooku abantu abakuzire nibaahukana omu nzooka yabo, n’Abakristaayo abakuzire omu by’omwoyo tibooleka emiringo ey’Ekikristaayo ha rulengo nurwo rumu. Ekyokurorraho, abandi baine amagezi maingi, abandi bamanzi, abandi bagabi, kandi abandi booleka embabazi. Ekindi, Abakristaayo babiri abakuzire omu by’omwoyo nibasobora kwesanga omu nyikara ezirukusisana, kandi nibasobora kukora encwamu ezirukwahukana baitu zoona nizisigikirra ha misingi ya Baibuli. Eki kikira kubaho omu nyikara nambere kyetaagisa  omuntu kukora encwamu naasigikirra ha muntu we ow’omunda. Nahabweki tibacwerangana omusango habw’okukora encwamu ezirukwahukana. Oihireho bata omutima ha kulinda obumu.—Bar. 14:10; 1 Kol. 1:10. w24.04 4 ¶7-8

Kiki eki osobora kukora kakuba oba nooyehurra nk’ow’ataine mugaso? Soma enkarra za Baibuli ezikugumya ngu oli w’omuhendo hali Yahwe kandi ozecumiitirizeeho. Obu oraaba ohoirwemu amaani habwokuba olemerwe kuhikiiriza ekigendererwa kyawe rundi tosobora kuheereza muno nk’abandi, otateeka omutima ha by’otasobora kukora. Yahwe tarukukunihirramu kukora ebintu ebi otarukusobora. (Zab. 103:​13, 14) Obu oraaba watwaziibwe kubi, otecwera omusango habw’ogu ayakutwaize kubi. Etabe nsobi yaawe! Ijuka ngu Yahwe naija kucwera omusango abo abatwaza kubi abandi kandi akonyere abo abatwaziibwe kubi. (1 Pet. 3:12) Otaligurukyagurukya ngu Yahwe obu araaba naasobora kukukozesa kukonyera abandi. Akuhaire omugisa ogw’okukorra hamu na uwe omu buheereza. (1 Kol. 3:9) Ebizibu ebi orabiremu omu bwomeezi nibisobora kuba bikukonyiire kwega kusaalirirwa abandi n’okumanya omulingo basobora kuba nibehurra. Haroho bingi ebi osobora kukora kubakonyera. w24.10 7-8 ¶6-7

Yahwe akwatwaho muno ha mulingo tutwazibwamu. “Yahwe agonza omusango ogwobulyo.” (Zab. 37:28) Yesu atugumya ngu Yahwe naija “kukigumya ngu [twatunga] obwinganiza omu bwangu” omu kasumi akahikire. Kandi omu kasumi akatali aka hara naija kwihiraho kimu ebintu ebiretiire abantu kubonabona kandi amarreho kimu obutali bwinganiza bwona. (Zab. 72:​1, 2) Yahwe atukonyera kugumiisiriza obutali bwinganiza obu nitulindirra akasumi nambere haliba okuhikirra. (2 Pet. 3:13) Atwegesa omulingo tusobora kwetantara kukora ekintu ekitali ky’amagezi obu tutwazibwa omu mulingo ogutali gw’obwinganiza. Kuraba omu Mwana we, Yahwe atuteriireho ekyokurorraho ekirungi ekirukwoleka omulingo tusobora kugumira obutali bwinganiza. Kandi atuha obuhabuzi obu tusobora kuta omu nkora obu tuba tutwaziibwe omu mulingo ogutali gw’obwinganiza. w24.11 2-3 ¶3-4

Yesu kusaba kuliisa abantu kikaba nikizooka nk’ekitarukusoboka habwokuba hakaba haroho abasaija abarukuhika nka 5,000. Kandi kakuba obarramu abakazi n’abaana, naasobora kuba akaba aine kuliisa abantu nka 15,000. (Mat. 14:21) Andereya akagamba ati: “Hanu haroho omwojo omuto anyakwine emigaati etaano eya sayiri hamu n’encu ibiri entaito. Baitu binu biraagasa ki h’abantu banu boona?” (Yoh. 6:9) Emigaati ey’ekozerwe omu sayiri niyo eyakiraga kuliibwa abantu baingi, kandi encu nizisobora kuba zikaba zisiigirwe ekisura kandi zoomere. Baitu nabwo, ebyokulya by’omwojo ogu bikaba bitasobora kumara abantu abo boona. Habwokuba Yesu akaba naagonza kwoleka abantu amakune, akabaragira kwikarra omu guruupu entaitotaito ha bunyansi. (Mar. 6:​39, 40; Yoh. 6:​11-13)  Ebyahandiikirwe nibyoleka ngu Yesu akasiima Ise habw’omugaati n’encu. Mali kikaba kihikiire kimu Yesu kusiima Ise habwokuba nuwe Ndugiiro ey’ebyokulya. Mali kinu kyokurorraho ekirungi eky’okuhondera Yesu eky’okusaba tutakaliire. Hanyuma Yesu akaragira abakwenda kugaba ebyokulya kandi abantu boona bakalya kandi baiguta. w24.12 2-3 ¶3-4

Yesu obu akaba ali omu nsi, akaha Ise ekitiinisa kuraba omu kugambira abantu ngu Yahwe nuwe yamuhaire amaani ag’okukora ebyamahano. (Mar. 5:​18-20) Ekindi, Yesu akaha Yahwe ekitiinisa kuraba omu mulingo yamubazaahoga n’omu mulingo yatwazaamuga abandi. Kiro kimu, Yesu akaba naayegesa omu isorrokaniro. Omu bantu abakaba nibahuliiriza, hakaba harumu omukazi ow’akaba atalibaniziibwe daimooni kumara emyaka 18. Daimooni, ekaba eretiire omubiri gwe kwegema nahabweki akaba atasobora kwemerra ateerekeriire. Mali kiine kuba kyamuleeteraga obusaasi bwingi! Habw’embabazi ze, Yesu akahikirra omukazi onu kandi yamugambira ati: “Mukazi iwe, okiziibwe oburwaire bwawe.” Hanyuma akamutaho emikono ye kandi ahonaaho, omukazi akeemerra ateerekeriire kandi “yatandika kukugiza Ruhanga,” habwokuba akaba afookere mwomeezi kandi atungire n’ekitiinisa! (Luk. 13:​10-13) Omukazi ogu akaba aine ensonga enungi ey’okuha Yahwe ekitiinisa, kandi na itwe nikyo tusemeriire kukora. w25.01 2-3 ¶3-4

Itwe itwenka titusobora kugarraho ekintu Adamu na Hawa baafeeriirwe. (Zab. 49:​7-9) Kakuba tutaratungire obukoonyezi, twakubaire tutaine okunihira okw’okutunga obwomeezi obutahwaho rundi kuhumbuuka. Amananu gali, twakufiire nk’ebisoro ebitarahangiirwe kwomeera ebiro n’ebiro kandi ebitaine okunihira okw’okuhumbuuka. (Mug. 3:19; 2 Pet. 2:12) Isiitwe ow’okugonza Yahwe, atuhaire ekisembo ekisasura ibanja ery’ekibi eki twagwetiirwe kuruga hali Adamu. Yesu akasoborraho ekisembo kinu ati: “Habwokuba Ruhanga akagonza muno ensi, yahayo Omwana we ayazairwe omu wenka, nukwo ogu weena arukumwikiririzaamu atahwerekerezebwa baitu atunge obwomeezi obutahwaho.” (Yoh. 3:16) Kwongerraho, ekisembo nikyo kimu kitusobozesa kutunga enkoragana enungi na Yahwe. Nitusobora kugasirwa kuruga omu kisembo kinu ekirungi ekisobozesa ebibi byaitu rundi “amabanja” gaitu kuganyirwa. w25.02 3 ¶3-6

Kiki ekyakoonyiire Saulo kubatizibwa? Yesu Kristo Omukama ow’akaba aine ekitiinisa ekingi obu yamubonekiire, Saulo akafa amaiso. (Ebik. 9:​3-9) Akasiiba kumara ebiro bisatu kandi naasobora kuba akaba naateekerezaaho ekikaba kimuhikireho. Mali, Saulo akakigumiza kimu ngu Yesu akaba ali Masiya kandi ngu abahondezi be bakaba bali omu diini ey’amananu. Haroho amasomo aga tusobora kwegera hali Saulo. Akaba naasobora kwikiriza emyehembo rundi kutiina abantu kumulemesa kubatizibwa. Baitu eki atakiikirize kubaho. Saulo akaba ayehaireyo kufooka Omukristaayo noobu kiraaba ngu akaba akimanyire ngu naija kuhiiganizibwa. (Ebik. 9:​15, 16; 20:​22, 23) Hanyuma y’okubatizibwa kwe, akaikara naayesiga Yahwe kumukoonyera kugumira ebirengo ebirukwahukana. (2 Kol. 4:​7-10) Okubatizibwa kwawe nk’omu h’Abakaiso ba Yahwe nikusobora kuleetaho ebirengo baitu noija  kutunga obukonyezi. Noosobora kukigumya ngu Ruhanga na Kristo nibaija kwikaraga nibakusagika.—Baf. 4:13. w25.03 4 ¶8-9

Kusoma Baibuli kiri kigendererwa kirungi. Baitu kusobora kugasirwa omu kusoma Baibuli, tusemeriire kukora ekirukukiraho. Teekerezaaho ekyokurorraho kinu: Ebimera byetaaga enjura kusobora kukura. Baitu enjura obu egwa nyingi muno itaka liijura amaizi kandi ebimera tibigasirwa. Kiba kirungi enjura egwe mpora-mpora nukwo amaizi gataahe omu itaka kandi gasobole kukoonyera ebimera kukura. Omu mulingo nugwo gumu, tusemeriire kwetantara kusoma Baibuli nitwanguhiriza, tukalemwa kutunga obwire obw’okuteekerezaaho, kwijuka n’okuta omu nkora ebi turukuba tusomere. (Yak. 1:24) Haroho obu oyesanga ngu osoma Baibuli nooyanguhiriza? Kiki eki osobora kukora? Soma mpora-mpora. Tunga obwire obw’okuteekerezaaho ebi orukusoma rundi hanyuma y’okusoma tunga obwire oteekerezeeho ebi osomere. w24.09 4 ¶7-9

Abagurusi obu batunga oburagirizi, basemeriire kubusoma n’okubwetegereza kurungi kandi bakole kyona ekibarukusobora kubuta omu nkora. Tibagarukira ha kutunga oburagirizi ha mulingo basemeriire kuha ebicweka omu nsorrokano kyonka, baitu n’omulingo basobora kusaba omu nsorrokano, n’omulingo basemeriire kurolerramu entaama za Kristo. Obu bahondera oburagirizi bunu kuruga omu kitebe, kikoonyera ab’oruganda na banyaanya itwe kwehurra baine obulinzi n’okwehurra ngu Ruhanga naabagonza. Obu tutunga oburagirizi kuruga omu bagurusi, tusemeriire kubuhondera. Obu tukora eki, nikiija kubanguhira kuhikiiriza obujunaanizibwa Yahwe obu abahaire. Baibuli etuteererra kworobera n’okutamu ekitiinisa abo abarukutwebembera. (Baheb. 13:​7, 17) Baitu obwire obumu, eki nikisobora kutugumira. Habwaki? Habwokuba bali bantu abatahikiriire. Baitu kakuba tuta omutima ha butahikirra bwabo omu kiikaro ky’okuguta ha miringo yabo enungi, nitwija kuba nitukoonyera abanyanzigwa baitu. Omu mulingo ki? Abanyanzigwa baitu nibagonza kutuleetera kugurukyagurukya ekitebe kya Ruhanga. w24.04 10 ¶11-12

Boona abaraafeera omu bintu ebiraabaho omu kasumi ak’omuhito omwingi, nibaija kuhwerekerra ebiro n’ebiro batatungire omugisa ogw’okuhumbuuka? Ebyahandiikirwe nibisoborra kurungi ngu abo boona abarukuhakaniza Yahwe, kandi Uwe n’ihe lye abaalihwerekereza ha bulemu bwa Amagedoni tibarukwija kuhumbuuka. (2 Bas. 1:​6-10) Baitu kiki ekirihika h’abantu abandi, ekyokurorraho, abo abaliitwa ebintu ebindi omu kasumi ak’omuhito omwingi nk’oburwaire, kukura omu myaka, butandwa rundi kwitwa abantu abandi? (Mug. 9:11; Zak. 14:13) Abantu banu nibasobora kuba bamu hali abo ‘abatahikiriire’ abalihumbuurwa omu nsi empyaka? (Ebik. 24:15) Titumanyire. Baitu haroho ebintu ebirukwahukana ebi tumanyire ebirukukwata h’akasumi ak’omumaiso. Ekyokurorraho, nitukimanya ngu ha bulemu bw’Amagedoni, abantu nibaija kucwerwa omusango kusigikirra ha mulingo batwaizemu bagenzi ba Kristo. (Mat. 25:40) Kandi abo abalicwerwa  omusango nk’entaama nubo abaayolekere obusagiki bwabo hali abaseeserweho amagita na Kristo.—Kus. 12:17. w24.05 10-11 ¶9-11

Baibuli egamba ngu tuli omu “[busumi] obw’akabi kaingi.” (2 Tim. 3:1) Kwongerra ha bizibu buli omu ebi atangatangana omu nsi enu, Abakaiso ba Yahwe bahikwaho okuhakanizibwa n’okuhiiganizibwa. Kiki eki tukoonyera kwikara nituramya Yahwe noobu kiraaba ngu nituraba omu bizibu binu? Ensonga enkuru niyo ngu tweroliire obukoonyezi bwa Yahwe kandi twamumanya nka “Ruhanga omwomezi.” (Yer. 10:10; 2 Tim. 1:12) Yahwe ali Muntu wenyini ow’arora buli kizibu kyona eki turabamu kandi aikara naagonza kutukoonyera. (2 Byom. 16:9; Zab. 23:4) Kumurora nka Ruhanga omwomeezi nikisobora kutukoonyera kugumira buli birengo byona ebi turukurabamu. w24.06 20 ¶1-2

Tusemeriire kwikara nitwesiga ekitebe kya Yahwe. Obu kyeyoleka kurungi ngu empindahinduka neeyetaagwa omu nyetegereza yaitu, rundi omulingo omulimo gw’Obukama guteekaniziibwe, abo abarukwebembera bakora empindahinduka ezirukwetaagisa ahonaaho. Eki bakikora habwokuba bagondeza kimu kusemeza Yahwe. Ekindi, bakora kyona ekirukusoboka kurora ngu encwamu zaabo zaasigikirra ha Kigambo kya Ruhanga, abantu be boona eki basemeriire kworobera. Omukwenda Paulo akagamba ati: “Ikara ogumiire ha rulengo orw’ebigambo ebirungi ebi wahuliire.” (2 Tim. 1:13) ‘Orulengo rw’ebigambo ebirungi’ nikimanyisa enyegesa ez’Ekikristaayo ezirukusangwa omu Baibuli. (Yoh. 17:17) Buli kimu kyona eki twikiriza, kisigikirra ha nyegesa ezi. Ekitebe kya Yahwe kitwegeseze kurorra kimu ngu enyikiriza zaitu, zaasigikirra ha rulengo oru. Obu turaakikora, Yahwe naija kutuha emigisa. w24.07 11-12 ¶12-13

Omukwenda Petero akeetegereza obukuru bw’okwegarukamu n’okuganyira, nahabweki akeegesa abandi ebi akaba ayegere ha kwegarukamu n’okuganyira. Kandi hayuma ya Pentekooti, Petero akasoborra Abayudaaya abakaba batarukwikiririza omuli Yesu ngu bakaba baisire Masiya. Baitu omu mulingo ogw’okugonza, akabateererra naagamba ati: “Mwegarukemu, kandi muhinduke nukwo ebibi byanyu bisiimuurwe, nukwo obusumi obw’okuhuumuzibwa busobole kwija nambere muli kuruga hali Yahwe wenyini.” (Ebik. 3:​14, 15, 17, 19) Nahabweki, Petero akakyoleka ngu kwegarukamu kireetera omusiisi kuhinduka, kuhindura enteekereza ye embi n’ebikorwa bye ebibi, kandi atandike kukora ebintu ebirungi ebirukusemeza Ruhanga. Ekindi, omukwenda Petero akooleka ngu Yahwe yaakuragaize ebibi byabo, rundi kubibuzaaho. Mali eki ka nikihuumuza kukimanya ngu obu twegarukamu ebibi byaitu otwaliiremu n’ebibi eby’amaani Yahwe atuganyirra kimu! w24.08 12 ¶14

Obu turaaba twine okwikiriza okugumire ngu Yahwe ali haihi kuhwerekereza ensi enu embi, titurukwija kuteekereza ngu kuba na sente nyingi rundi ebintu kikuru. Baibuli egamba ngu abantu, “balinaga efeza yabu omu makute,” habwokuba balikyetegereza ngu “efeza yabu nezabu yabu tibirisobora kubajuna omu kiro kyokubihirwa kwa [Yahwe].” (Ez. 7:19) Omu kiikaro ky’okuta omutima ha kutunga sente nyingi muno, tusemeriire kukora encwamu eziraatukoonyera kwikaza obwomeezi bwaitu bwanguhire kandi eziraatukoonyera kuheereza Yahwe. Eki nikitwarramu kwangirra ekyohyo eky’okutunga amabanja agatarukwetaagisa rundi kukozesa obwire bwaitu oburukukira obwingi niturolerra itungo. Ekindi, tusemeriire kwetantara kugonza muno ebintu ebi twine. (Mat. 6:​19, 24) Obu tuliyo nitwirra haihi n’empero ey’obusinge bunu, okwikiriza kwaitu nikusobora kulengwa obu kirukuhika ha itungo n’ensonga ezindi. w24.09 11 ¶13-14

Nitusobora kusingurra kimu obuceke bwaitu. Baitu nitusobora kusanga ngu twine kurwanisa obuceke obundi kumara akasumi kaingi. Teekerezaaho ekyahikire hali omukwenda Petero. Akooleka ngu naatiina abantu obu yayehakaine Yesu emirundi esatu. (Mat. 26:​69-75) Petero akazooka nk’ow’akaba asingwire okutiina obu yatebiize hali Yesu n’obumanzi omu maiso g’Orukurato. (Ebik. 5:​27-29) Baitu, hanyuma y’emyaka kurabaho, akabanza yaleka kulya n’abamahanga “habw’okutiina abo abasazirwe.” (Bag. 2:​11, 12) Obuceke bwa Petero bukaba bugarukire. Obundi akaba atabusinguliire kimu. Nitusobora kwesanga omu nyikara niyo emu. Baitu, nitusobora kwerinda engeso rundi obuceke obwikara nibututalibaniza kuraba omu kuhondera obuhabuzi bwa Yesu oburukukwata ha kwohebwa oburukugamba ngu, ‘mwikale nimurora.’ (Mat. 26:41) N’omu busumi nambere orukwehurra ngu ogumire, gumizaamu nooyerinda enyikara ezisobora kukuleetera kwohebwa. Ikara noota omu nkora ebintu ebyakukoonyiire kusingura obuceke bwawe.—2 Pet. 3:14. w24.07 18-19 ¶17-19

Busaho muntu ow’akyakizireyo kukonyera abantu nka Yesu. Yesu obu akaba akyali omu nsi, akakozesa amaani ge ag’okukora ebyamahano kukonyera abandi. (Luk. 9:​12-17) Akatuha ekisembo ekirukukirayo kuraba omu kuhayo obwomeezi bwe habwaitu. (Yoh. 15:13) Kurugira kimu ha kuhumbuuka kwe, Yesu agumiizeemu naatukonyera. Nkooku yaraganiize, akasaba Yahwe kutuha omwoyo ogurukwera kutwegesa n’okutuhuumuza. (Yoh. 14:​16, 17; 16:13) Kandi kuraba omu nsorrokano z’ekitebe, Yesu naagumizaamu kutuha ebi turukwetaaga kusobora kufoora abantu abeegeswa omu nsi yoona. (Mat. 28:​18-20) Omukwenda Paulo akahandiika ngu hanyuma ya Yesu kugenda omu iguru, ‘akaha ebisembo omu bantu.’ (Bef. 4:​7, 8) Paulo akasoborra ngu Yesu akaha ebisembo binu kukonyera ekitebe omu miringo ey’erukwahukana. (Bef. 1:​22, 23; 4:​11-13) Ky’amananu ngu abasaija banu tibahikiriire, nahabweki bakora ensobi. (Yak. 3:2) Baitu Mukama waitu Yesu Kristo abakozesa kutukonyera, kandi mali bali bisembo eby’omuhendo hali itwe. w24.10 18 ¶1-2

Daudi akagambira mutabani we Suleimani ngu yaakubaire musinguzi obu yaakwikaire naayorobera Yahwe Ruhanga. Eky’obusaasi, Suleimani obu yakuzire akatandika kuramya baruhanga abandi. Eki kitasemeze Yahwe kandi akalekeraho kuha Suleimani amagezi ag’okwebembera abantu be omu kuhikirra n’omu bwinganiza. (1 Bakam. 11:​9, 10; 12:4) Isomo ki eri turukwega? Obu turaayorobera Yahwe, naija kutuha emigisa kandi atukonyere. (Zab. 1:​1-3) Kyamananu ngu, Yahwe taturaganiize kutuha obuguuda n’ekitinisa ebi yahaire Suleimani. Baitu obu turaamworobera, naija kutuha amagezi agaraatusobozesa kukora encwamu enungi. (Nfu. 2:​6, 7; Yak. 1:5) Emisingi ya Baibuli neesobora kutukonyera obukirukuhika ha kukora encwamu ezirukukwata ha mirimo, eby’obwegese, eby’okwesemeza hamu na sente. Obu turaata omu nkora amagezi ga Yahwe, nikiija kutulinda hali akabi ak’ebiro n’ebiro. (Nfu. 2:​10, 11) Nitwija kutunga abanywani abarungi kandi amaka gaitu nigaija kubamu okusemererwa. w24.11 10-11 ¶11-12

Koonyera omwana waawe kurora obwakaiso oburukwoleka ngu Baibuli ehikire. Abazaire mukozese buli mugisa gwona kubaza n’omwana wanyu ebirukukwata ha Baibuli, rundi ebirukukwata ha kwikiririza omuli Ruhanga. Omugisa ogu nimusobora kugutunga obu murukuba mubungire omu miziyaamu. Noosobora kuleetera omwana waawe kuteekerezaaho ebintu ebyabaireho omu byafaayo rundi ebintu ebyakozerwe kara ebisobora kumukonyera kukigumya ngu Baibuli ehikire. Omwana waawe akimanyire ngu ibara lya Ruhanga nirisangwa ha ibaale erimazire emyaka 3,000 kandi erikumanywa nka Ibaale ly’omu Moabu? Ekisisani ekirukwesisaniriza ibaale ly’omu Moabu kitimbirwe omu kicweka kya miziyaamu ekiine omutwe “The Bible and the Divine Name” ekirukusangwa ha Kitebe Ekikuru eky’Abakaiso ba Yahwe omu Warwick, New York. Ibaale lya Moabu niryoleka ngu Omukama Mesa owa Moabu akajeemera Isaleeri. Kandi eki nikihikaana na Baibuli eki egamba. (2 Bakam. 3:​4, 5) Omwana waawe obu araayerorra n’amaiso ge ngu Baibuli ebi erukubaza by’amananu kandi bihikire, okwikiriza kwe nikwija kweyongera kuguma. w24.12 14 ¶4; 15 ¶6