Abagurusi beekamba kwegera ha mbabazi za Yahwe obu baba nibakoonyera ogu ow’aihirwe omu kitebe. Yahwe atalinde abantu be abakaba bamurugireho omu ihanga erya Isaleeri eya kara kubanza kugira eki baakoraho. Oihireho nuwe yabandize kugira eki yakoraho kubahikirra batakoolekere obwokurorraho bwona obw’okwegarukamu. Yahwe akooleka embabazi obu naagambira nabbi Hoseya kuganyira mukazi we ow’akaba nakyasiisa. (Hos. 3:1; Mara. 3:7) Obu nibeegera hali Yahwe, abagurusi bagondeza kimu omusiisi kugaruka, kandi tibagumanganiza obwomeezi bwe. Ijuka eky’okurorraho kya Yesu eky’omwana ow’akaba azaahire, ise obu yarozere omwana we naagaruka omuka “yairuka, yamugwa omu kifuba, kandi yamunywegera.” (Luk. 15:20) Weetegereze ngu ise omwana atabanze  kulinda omwana we kumusaba ekiganyiro. Oihireho taata nuwe yabandize kugira eki yakoraho habwokuba akaba naagonza omwana we. w24.08 28 ¶7-8

Nkooku kirukwolekwa omu bigambo eby’ekyahandiikirwe ekya kiro kinu, Yahwe tayesigaliza amagezi ge. N’okugonza agagabira abandi. Wetegereze ekintu ekindi, Yahwe obu aha amagezi, akikora “atarukuhana” rundi ekirukumanyisa ngu tatuserramu ensobi. Tagonza twehurre kubi ngu habwokuba nuwe turukwesiga kutuha obuhabuzi. Oihireho naatwekambisa kumusaba obuhabuzi. (Nfu. 2:​1-6) Kandi itwe? Nitusobora kwegera hali Yahwe kuraba omu kugaba amagezi gaitu? (Zab. 32:8) Abantu ba Yahwe baine emigisa nyingi ey’okugabiraho abandi ebi beegere. Ekyokurorraho, tukira kutendeka abahyaka omu buheereza. N’okugumiisiriza abagurusi, batendeka abaheereza omu kitebe hamu n’ab’oruganda ababatiziibwe kumanya omulingo basobora kuhikiirizaamu obujunaanizibwa bwabo omu kitebe. Abo abaine obukugu omu kwombeka n’okudaabiriza bakoonyera omu kutendeka abandi kukora emirimo ey’ekorwa ha byombeko by’ekitebe. w24.09 28-29 ¶11-12

Ow’oruganda, kusobora kufooka omugurusi, osemeriire ‘okutabaho ekyokuhanwa,’ ekirukumanyisa ngu abandi omu kitebe nibakubazaaho kurungi habw’engeso zaawe enungi. (1 Tim. 3:2) Ekindi, osemeriire kuba noobazibwaho kurungi abo ab’aheeru. Abantu abatarukuheereza Yahwe nibasobora kubazaaho kubi enyikiriza zaawe baitu tibasemeriire kuba n’ensonga yoona ey’okukubazaaho kubi habw’okutaba mwesigwa rundi habw’engeso zaawe. (Dan. 6:​4, 5) Wekaguze, ‘Nimbazibwaho kurungi omu kitebe n’aheeru y’ekitebe?’ Obu oraaba oli muntu ‘agonza oburungi,’ serra ebirungi omu bantu kandi obasiime habw’emiringo yabo enungi. (Tit. 1:8) Ekindi, kikusemeza kukorra abandi ebirungi, noobu kyetaagisa kukora ebirukukiraho. Habwaki omulingo gunu mukuru muno hali abagurusi? Habw’okuba bakozesa kurungi obwire bwabo kugarramu abandi amaani omu kitebe n’okuhikiiriza obujunaanizibwa bwabo. (1 Pet. 5:​1-3) Noobu kiraaba nukwo kiri, okusemererwa oku batunga omu kuheereza abandi kukirra hara okwefeereza oku bakora.—Ebik. 20:35. w24.11 20-21 ¶3-5

Abaheereza bakora emirimo y’amaani omu bitebe. Omukwenda Paulo yaroraga abasaija banu abeesigwa nk’ab’omuhendo. Ekyokurorraho, obu akaba naahandiikira Abakristaayo omu Firipi, akaramukya abaheereza n’abagurusi. (Baf. 1:1) Ab’oruganda baingi ababatiziibwe, ka babe bato rundi bakuru batunga okusemererwa kwingi okuruga omu kuheereza nk’abaheereza omu kitebe. Ekyokurorraho, Devan akaba aine emyaka 18 nambere yakomiirwe kuheereza nk’omuheereza omu kitebe. Ha rubaju orundi, ow’oruganda arukwetwa Luis akakomwa kuheereza nk’omuheereza omu kitebe obu akaba ali nk’omu myaka 50. Akabazaaho enyehurra baingi ei batunga naagamba ati: “Nyine omugisa gw’amaani muno kuheereza nk’omuheereza omu kitebe, kukira muno obu nteekerezaaho okugonza ab’oruganda na banyaanya itwe barukunyoleka.” Obu oraaba oli w’oruganda  ow’abatiziibwe kandi tokafookere muheereza omu kitebe, habwaki otakifoora kigendererwa kyawe? w24.11 14 ¶1-3

Omukama Hezekiya ow’akaba aine emyaka 39 akarwara muno. Nabbi Isaaya akamuhikyaho obutumwa kuruga hali Yahwe naamugambira ngu oburwaire obu bukaba nibwija kumwita. (2 Bakam. 20:1) Obu yahuliire amakuru ganu akaba atakyaine kunihira, ekyamuleetiire kurra muno. Akasaba Yahwe kuruga ha mutima. Yahwe obu yahuliire okusaba kwa Hezekiya kandi yarora amaziga ge, akakwatwaho muno kandi yamugambira ati: “Mpuliire okusaba kwawe, mboine amaizi omu maiso gawe: dora ndikukiza.” Habw’embabazi ze enyingi, Yahwe akaraba omuli Isaaya, naamuraganiza kwongezaayo obwomeezi bwe n’okujuna Yerusalemu kuruga omu mukono gw’Abasura. (2 Bakam. 20:​4-6) Oine oburwaire kandi torukunihira ngu nibwija kukira? Gambira Yahwe omulingo orukwehurra, kandi naija kukuhuliiriza noobu oraamusaba norra. Baibuli neetugumya ngu “Isiitwe ow’okuganyira kandi Ruhanga ow’okuhuumuza kwona” naija kutuhuumuza omu birengo ebi turukurabamu.—2 Kol. 1:​3, 4. w24.12 24 ¶15-17

Mali ka nikiija kutusemeza muno kutangirra abantu baitu abaturukugonza abaafiire abaliba bahuumbukire! Teekerezaaho omulingo olyegondeza omu kwega bingi ebirukukwata hali Yahwe kuraba omu kwecumiitirizaaho ebyahangirwe. (Zab. 104:24; Is. 11:9) Kandi ekirukukirayo obukuru, nikiija kukusemeza muno kuramya Yahwe hataroho okwecwera omusango! Mali noija kwikiriza kufeerwa emigisa enu yoona ngu habwokuba noogonza kwejumbira omu ‘kwesemeza okwekibi okurukuhwaho bwangu’? (Baheb. 11:25) Mali eki tiwakukigondeze! Emigisa egi neekirra hara okwefeereza kwona oku osobora kukora. Ijuka ngu Orugonjo Orurungi tikiri kintu eki turukwija kwikaraga nitunihira omu kasumi ak’omumaiso. Akasumi nikaija kuhika kibe kintu eki turukwija kwegondezaamuga buli kiro. Binu byona tibyakusobokere kakuba Yahwe ataratugondeze muno obu naatuha ekisembo eky’Omwana we. w25.01 29 ¶12

Musa ali omu ha bantu abarukubazibwaho omu kitabu eky’Abaheburaniya abayolekere okwikiriza okw’amaani. (Baheb. 3:​2-5; 11:​23-25) Okwikiriza kwa Musa kutafe busa, habwokuba Ruhanga omu mulingo gw’ekyamahano akaha abantu ebyokulya n’amaizi kusobora kubakoonyera omu irungu. (Kurug. 15:​22-25; Zab. 78:​23-25) Noobu kiraaba ngu Musa akaba aine okwikiriza okugumire, hanyuma y’omwaka nka gumu Isaleeri emazire kucungurwa omu mulingo gw’ekyamahano, Musa akagurukyagurukya obusobozi bwa Yahwe obw’okuha abantu be enyama. Musa akaba atasobora kuteekereza omulingo Yahwe akaba naija kuha obukaikuru n’obukaikuru bw’abantu abakaba bali omu irungu enyama erukumara. Yahwe akamugarukamu obu naamukaguza ati: “Omukono gwa [Yahwe] gugufahaire  nandiki?” (Kubar. 11:​21-23) Yahwe akasisana nk’ow’arukukaguza Musa ati, ‘Mali nooteekereza ngu tinsobora kukora eki ngambire?’ w25.03 26 ¶1-2

Kihikire kugamba ngu buli kimu ekyabaireho omu Kusandaara kw’Amaizi nikikiikirra ebintu ebiribaho omu kasumi ak’omumaiso? Eky’okugarukamu kiri nangwa. Habwaki? Habw’okuba Baibuli tinikyo erukugamba. Kyamananu ngu Yesu akalengesaniza ebiro bya Nuha n’akasumi ak’okubaho kwe, baitu atagambe ngu buli kimu kyona ekyabaireho omu biro bya Nuha nikiija kuhikiirizibwa omu mulingo nugwo gumu omu kasumi ak’omumaiso, nka Yahwe kukinga orwigi rw’eryato. (Mat. 24:​37-39) Nuha akeetwaza ata obu yahuliire obutumwa oburukuruga hali Yahwe kuhabura abantu? Akooleka ngu aine okwikiriza obu yayombekere eryato. (Baheb. 11:7; 1 Pet. 3:20) Omu mulingo nugwo gumu, abantu obu bahurra amakuru amarungi ag’Obukama bwa Ruhanga, basemeriire kwoleka okwikiriza obu nibateeka omu nkora ebibeegere. (Ebik. 3:​17-20) Petero akeeta Nuha “omutebezi w’okuhikirra.” Omu kasumi kanu, nitwejumbira omu mulimo ogw’okutebeza omu nsi yoona kandi nitukikora n’obwekambi. Baitu noobu turaalengaho tuta, titusobora kutebeza buli muntu omu nsi amakuru amarungi empero etakahikire. w24.05 9-10 ¶3-5

Tusemeriire kuserra emiringo ey’okwoleka embabazi n’okutamu banywani ba Yahwe ekitiinisa. (Bar. 12:10) Omu mulingo ki? Omulingo gumu ogurukusigikirra omu Zabuli 15:​4, nugwo ngu omugenyi omu heema ya Yahwe “obwarahira, nobwaraba ahweriirwe, tahinduka.” Kulema kuhikiiriza ebi tweragire nikisobora kusaaliza abandi. (Mat. 5:37) Yahwe naanihirramu banyineeka na banyinabwenge kulinda ekirahiro kyabo eky’obuswere. Ekindi, kimusemeza muno kurora abazaire nibakora kyona ekirukusoboka kuhikiiriza ebi baba banihiize abaana baabo. Okugonza oku twiniire Ruhanga hamu n’abandi nikwija kutwekambisa kukora kyona eki turukusobora kuhikiiriza eki tweragire. Omulingo ogundi ogututamu banywani ba Ruhanga ekitiinisa nukwo kuba bantu abagabi kandi abarukwoleka amakune. (Bar. 12:13) Obwire obu tumara hamu n’ab’oruganda na banyaanya itwe nitwegonza butukoonyera kugumya enkoragana yaitu na bo hamu na Yahwe. Ekindi, obu twoleka amakune tuba nitwegera hali Yahwe. w24.06 12 ¶15-16

Abantu abeebundaazi, nubo Yahwe amanyisa amananu. (Mat. 11:25) Noobwebundaazi, tukaikiriza obukoonyezi kusobora kwega amananu. (Ebik. 8:​30, 31) Baitu nabwo twegendereza kurora ngu titwaba b’emyehembo. Obu tuba b’emyehembo, nitusobora kutandika kuteekereza ngu enteekereza zaitu nazo zihikire, nkooku emisingi kuruga omu Baibuli n’oburagirizi kuruga omu kitebe kya Yahwe, bihikire. Kusobora kwikara tuli beebundaazi, tusemeriire kukiijuka ngu tuli ba hansi muno obu tulengesanizibwa na Yahwe. (Zab. 8:​3, 4) Ekindi, tusemeriire kusaba Yahwe nukwo atukoonyere kukurakuraniza omutima ogw’obwebundaazi, kandi ogurukwegesebwa. Yahwe naija kutukoonyera kwebembeza ebiteekerezo bye ebi twega kuruga omu Baibuli hamu n’omu kitebe kye, kukira ebyaitu. Obu oraaba nooyesomesa Baibuli, serra ensonga ezirukwoleka ngu Yahwe agonza obwebundaazi, kandi anoba emyehembo hamu n’emyekuniko. Ekindi, weegendereze muno kurora  ngu waikara oli mwebundaazi kakuba otunga obujunaanizibwa obukuleetera kumanywa muno. w24.07 10 ¶8-9

N’omu kasumi kanu, Yahwe naakyagumizaamu kuteekaniza abantu be. Kuruga 1919, Yesu aikaire naakozesa guruupu entaito ey’abasaija abaseeserweho amagita kuteekaniza omulimo ogw’okutebeza n’okuha abantu be ebyokulya eby’omwoyo. (Luk. 12:42) Kandi mali Yahwe naaha omugisa omulimo ogu barukukora. (Is. 65:​13, 14) Obu twakubaire tutateekaniziibwe kurungi, titwakusoboire kuhikiiriza omulimo Yesu ogu yatuhaire. (Mat. 28:​19, 20) Ekyokurorraho, kakuba ab’oruganda batateekaniza kurungi ebiikaro eby’okutebezaamu, buli omu yaakutebiize nambere arukugonza. Abatebezi baakutebiize muno omu biikaro ebimu kukira ebindi. Noosobora kuteekerezaaho emiringo endi ei tugasirwamu habwokuba tuteekaniziibwe kurungi? Nkooku Yesu yateekaniize abahondezi be obu akaba ali omu nsi, n’akasumi kanu naakyagumizaamu kuteekaniza abantu ba Ruhanga. w24.04 8-9 ¶2-4

Kaini akaba ali mutabani wa Adamu na Hawa, ow’okubanza. Nk’abaana ba Adamu na Hawa abandi boona, Kaini na uwe akaijukura ekibi kuruga hali bazaire be. Kwongerraho, Baibuli emubazaaho eti: “Ebikorwa bye bikaba biri bibi.” (1 Yoh. 3:12) Eki nikyoleka habwaki Yahwe “atamuikirize nekihongwakye.” Omu kiikaro ky’okuhinduramu engeso ze, “Kaini [akabiihirwa] muno namaisoge gasisikara.” Kiki Yahwe eki yakozere? Akabaza na Kaini. (Kub. 4:​3-7) Weetegereze ngu Yahwe akabaza na Kaini omu mulingo gw’embabazi, kandi yamugambira ngu akaba naija kumuha omugisa obu yaakukozere ebirungi. Akongera yamugambira ngu ekiniga kye kikaba nikiija kumuleetera kukora ekintu ekibi. Eky’obusaasi, Kaini atahuliirize. Ataikirize Yahwe kumukoonyera kwegarukamu. Hanyuma ya Kaini kwanga kuhuliiriza, Yahwe akaleka kukoonyera abasiisi kwegarukamu? Nangwa! w24.08 10 ¶8

Ihanga lya Isaleeri likaba liine okunihira okw’akasumi k’omumaiso akarungi. Habw’emigisa ya Yahwe, Abaisaleri bakaba nibaija kumara omu nsi ei akaba abaraganiize akasumi akaraihire muno. Kandi mali ekaba eri nsi nungi muno ey’erukwana ebyana! Musa akagibazaaho ati: “Embuga enkoto kandi enungi ezotarayombekere, namaju agaijuire ebintu ebirungi agotaraijuize, namaziba agalimirwe agotaralimire, nengonjo ezemizabibu nemiti emizeituni eyotarabyaire.” (Bir. 6:​10, 11) Ekindi, Musa akahabura Abaisaleeri. Akabagambira ngu kusobora kugumizaamu nibaikara omu nsi ey’ekaba esemiire, bakaba basemeriire kworobera ebiragiro bya Yahwe. Musa akabateererra ‘kukomamu obwomeezi’ kuraba omu kuhuliiriza Yahwe “nokumugumiraho.” (Bir. 30:20) Baitu, Abaisaleeri bakajeemera Yahwe. Nahabweki akaire kakahika Ruhanga yaikiriza Abasiriya kandi hanyuma n’Abababuroni kubasingura kandi baabatwara omu bunyagwa.—2 Bakam. 17:​6-8, 13, 14; 2 Byom. 36:​15-17, 20. w24.11 9 ¶5-6

Abantu baingi kasumi kanu bagamba ngu ‘nibaikiririza omuli Yesu’ kandi bamweta omujuni wabo. Baitu haroho ekirukukira hali eki, eki basemeriire kukora. (Yoh. 6:29) Haroho abantu baingi omu Galiraaya abakaba nibaikiririza omuli Yesu baitu hanyuma baaleka kumwikiririzaamu. Habwaki? Abantu baingi baahonderaga Yesu habwokuba, yabahaga ebi, ebi bakaba nibeetaaga. Bakaba nibagonza abakize omu mulingo gw’ekyamahano. Abahe ebyokulya ebya busa, rundi abeegese omu mulingo ogu bakaba nibagonza. Baitu, Yesu akabooleka ngu hakaba haroho ekintu ekikuru eki bakaba basemeriire kukora. Akagamba ngu ataije omu nsi kuhikiiriza ebyetaago eby’omubiri kyonka. Bakaba basemeriire kwikiriza okuraalizibwa kwe okw’okumuhondera kuraba omu kuhondera buli kimu eki yayegeseze.—Yoh. 5:40. w24.12 12 ¶12-13

Kiki ekisobora kukoonyera nyineeka kusingura engeso ey’okujuma mukazi we n’okumutwaza omu mulingo ogurukumumaramu ekitiinisa? Naasobora kulengaho kwegera hali Yesu. Omulingo yatwaizeemu abeegeswa be kyokurorraho ekirungi ekirukwoleka omulingo nyineeka asemeriire kutwazamu mukazi we. Weetegereze omulingo banyineeka basobora kwegera ha mulingo Yesu yatwaizeemu abeegeswa be n’omulingo yabazaaga na bo. Yesu akatwaza abeegeswa be omu mulingo ogw’embabazi kandi ogw’ekitiinisa. Tiyabazaaga na bo omu mulingo ogw’ekiniga. Yesu atakozese amaani ge kubaleetera kwehurra ngu baceke rundi kumutiina. Oihireho akabaheereza omu mulingo gw’obwebundaazi. (Yoh. 13:​12-17) Akagambira abeegeswa be ati: “Munyegereho, habwokuba ndi muculeezi kandi ndi mwebundaazi omu mutima, nimwija kutunga okuhuumura.” (Mat. 11:​28-30) Weetegereze ngu Yesu akaba ali muculeezi. Omuntu kuba muculeezi tikirukumanyisa ngu muceke. Oihireho aba aine amaani agamusobozesa kwoleka okwetanga. Obu bamubiihiza, aikara ateekaine kandi alema enyehurra ze. w25.01 10 ¶10-11

Nkooku empero ey’obusinge bunu eriyo nirra haihi, nitusobora kunihira ngu kwehikyaho ebyetaago byaitu nikiija kweyongerra kimu kuguma. Obutabanguko omu by’obulemi, ebikorwa by’okurwana, ebigwererezi rundi endwaire empyaka nibisobora kuleetaho enturukya ezi tuteeteekaniriize, kufeerwa emirimo yaitu, ebintu byaitu rundi amaka gaitu. Kiki ekisobora kutukoonyera kukora encwamu ezirukwoleka ngu nitwesiga omukono gwa Yahwe? Ekintu eky’amagezi kandi ekikuru eki osemeriire kukora, nukwo kunagira Yahwe ebintu ebirukukweraliikiriza. Musabe kukuha amagezi ag’orukwetaaga kusobora kukora encwamu enungi hamu n’okukuha omutima oguteekaine kusobora kwetantara ‘kwikara oyetuntwire’ habw’enyikara yaawe. (Luk. 12:​29-31) Ikara noomusaba kwikara nookurakuraniza okumarwa ebintu ebi orukwetaaga omu bwomeezi byonka. (1 Tim. 6:​7, 8) Kora okuseruliiriza omu bitabu byaitu ha mulingo osobora kusingura ebizibu omu by’entaahya. Baingi bagasiirwe omu bintu ebirukusangwa ha jw.org ebirukubazaaho omulingo ogw’okugumira ebizibu omu by’entaahya. w25.03 28-29 ¶10-11

Akasumi kakaba kahikire ab’amahanga abakaba batasazirwe kufooka kicweka ky’abantu ba Ruhanga. Omukwenda Petero akasindikwa kutebeza omunyaihanga Koroneeriyo, ow’akaba naija kuba muntu ow’okubanza omu guruupu enu empyaka ey’Abakristaayo. Abayudaaya tibaakoraganaga muno n’abamahanga, nahabweki tikirukuhuniiriza ngu Petero akaba naayetaaga obukoonyezi kweteekaniriza obujunaanizibwa bunu. Petero obu yayetegeriize ekigendererwa kya Ruhanga ha nsonga egi, akahindura enteekereza ye. Ekyarugiremu, atange kugenda obu yatumirwe. (Ebik. 10: 28, 29) Akatebeza Koroneeriyo n’eka ye kandi baabatizibwa. (Ebik. 10:​21-23, 34, 35, 44-48) Hanyuma y’emyaka, Petero akeekambisa Abakristaayo bagenzi be kuba ‘n’omutima gumu’ rundi enteekereza emu. (1 Pet. 3:8) Nk’abantu ba Yahwe, nitusobora kuba n’enteekereza emu kuraba omu kuteekerezaaho enteekereza ya Yahwe nkooku erukwolekwa omu Kigambo kye. w25.03 9-10 ¶7-8

Omulingo abantu bateekereza nigweyongerra kimu kwahukana n’omulingo Yahwe ateekereza. (Nfu. 17:15) Nahabweki, tusemeriire kugumya obusobozi bwaitu obw’okumanyirra n’okwanga enteekereza ezitahikire abarukutuhakaniza ezi bakozesa, kutumaramu amaani n’okutuhabisa. Kikuru muno kuta omutima ha buhabuzi omukwenda Paulo obu yahaire Abakristaayo Abaheburaniya obw’okugumizaamu nibakurakurana omu by’omwoyo. Kinu nikitwarramu okumanya amananu agahamire, n’okumanya kurungi omulingo Yahwe ateekerezaamu. Kinu tugumizaamu nitukikora na hanyuma y’okwehayo n’okubatizibwa. Ka tube tumazire obwire oburukwingana ki omu mananu, itwena tusemeriire kwikara nitusoma kandi nitwesomesa Ekigambo kya Ruhanga. (Zab. 1:2) Kuba n’enteekaniza enungi ey’okwesomesa nikiija kutukoonyera kugumya omulingo Paulo ogu yabalizeeho omu bbaruha ei yahandiikiire Abaheburaniya kandi oku nukwo okwikiriza.—Baheb. 11:​1, 6. w24.09 10 ¶7-8

Kakuba turora Yahwe nk’ow’aroho kwo, eki nikiija kutukoonyera kwikara tuli beesigwa hali uwe. Eki nikyo kyahikire hali Yusufu. Akangira kimu kusiihana. Akarora Ruhanga nk’ow’aroho kwo, kandi akaba atarukugonza kumubiihiza. (Kub. 39:9) Kusobora kurora Yahwe nk’ow’aroho kwo, tusemeriire kumusaba n’okwesomesa ekigambo kye Baibuli. Obu turaakikora enkoragana yaitu na uwe niija kuba y’amaani. Nka Yusufu obu turaatunga enkoragana enungi na Yahwe titurukwija kukora ekintu kyona ekiraamubiihiza. Abo abeebwa ngu Ruhanga mwomeezi kibanguhira kuleka kumwesiga. Teekerezaaho ekyahikire h’Abaisaleeri obu bakaba bali omu irungu. Bakaba nibakimanya ngu Yahwe aroho baitu bakatandika kugurukyagurukya obu araaba naasobora kubarolerra. (Kurug. 17:​2, 7) Ekyarugiremu bakajeemera Ruhanga. Mali titwakugondeze kuhondera eky’okurorraho kyabo eky’obujeemu.—Baheb. 3:12. w24.06 24 ¶14-15

Tuli omu biro ebya ha mpero nahabweki nitunihira ngu ebintu ebirukutuleetera kurra nibiija kwikara nibyeyongera. Yahwe arora amaziga agaturra kandi akwatwaho muno. Atugonza muno obu twikara tuli beesigwa hali uwe noobu turaaba tuli omu busaasi kandi aijuka amaziga gaitu. Nahabweki obu turaahikwaho enyikara ezigumire, kirungi tusabe Yahwe kuruga ha mutima. Tusemeriire kwirra haihi n’ab’oruganda na banyaanya itwe omu kitebe. Leka tugumizeemu kutunga okuhuumuzibwa kuruga omu bigambo ebirukuhuumuza ebirukusangwa omu Baibuli. Nitusobora kukigumya ngu obu turaikara nitugumiisiriza n’obwesigwa, Yahwe naija kutuha emigisa. Kandi eki nikitwarramu omurago omurungi muno ngu omu kasumi ak’omumaiso naija kutusiimuura amaziga goona agaturra habw’enaku, kugobezebwa omuntu ou turukwesiga hamu n’okuhwamu okunihira habw’okurwara oburwaire obutarukukira. (Kus. 21:4) Omu kasumi ako nitwija kuba n’amaziga ag’okusemererwa gonka. w24.12 20 ¶3; 25 ¶19

Yahwe atukomere kuba Bakaiso be kandi naaraganiza kutuha obumanzi. (Is. 43:​10, 11) Leka tubazeeho emiringo ena ei arukukikoramu. Ogw’okubanza, akozesa Yesu kutwebembera obu tuba nitutebeza amakuru amarungi. (Mat. 28:​18-20) Ogwa kabiri, Yahwe ahaire bamalaika obujunaanizibwa obw’okutukoonyera. (Kus. 14:6) Ogwa kasatu, atuha omwoyo ogurukwera ogutukoonyera kwijuka ebintu ebi tusemeriire kubaza. (Yoh. 14:​25, 26) Ogwa kana, Yahwe atuhaire ab’oruganda na banyaanya itwe kutebeza hamu na itwe. Habw’obukoonyezi bwa Yahwe n’obusagiki bw’ab’oruganda na banyaanya itwe, nitusobora kuba bamanzi kandi tukagumizaamu nitutebeza. Baitu kakuba ohurra ohoirwemu amaani obu osanga abantu batali muka, wekaguze: ‘Abantu ab’omu kicweka kinu bali nkaha saaha zinu?’ (Ebik. 16:13) ‘Bali ha mirimo rundi bagenzere omu katale?’ Obu kiraaba nukwo kiri, noosobora kulengaho kubaza n’abantu kuraba omu kutebeza ha rubaju rw’omuhanda? w24.04 17 ¶10-11

Obu oraaba oli nyineeka kandi noogonza kufooka mugurusi omu kitebe, eka yaawe esemeriire kuba neebazibwaho kurungi, nahabweki osemeriire kuba ‘noolema kurungi eka yaawe.’ Osemeriire kuba noomanywa nk’ow’arukugonza eka yaawe kandi ow’arukugifaaho. Kinu nikitwarramu kwebembera eka yaawe omu miringo yoona ey’okuramya. Obu oraaba oli taata, osemeriire kuba ‘n’abaana abahulizi kandi abaine engeso enungi.’ (1 Tim. 3:4) Osemeriire kubeegesa n’okubatendeka omu mulingo ogw’okugonza. Ky’amananu ngu nk’abaana abandi boona, nibaija kwegondeza omu kuseka n’okuzaana. Baitu habw’okubatendeka kurungi, nibaija kuba bahulizi, abarukutamu abandi ekitiinisa, kandi abarukwetwaza kurungi. Ekindi, osemeriire kukora kyona ekirukusoboka kukoonyera abaana baawe kuba n’enkoragana enungi na Yahwe, kuhondera emisingi ya Baibuli n’okukurakurana kuhika ha kubatizibwa. w24.11 22 ¶10-11

Obu turaayeyongera kwejumbira omu buheereza bwaitu hali Yahwe, nitwija kweyongera kurora obusagiki bwa Yahwe kandi ekirarugamu, obwesige bwaitu omuli uwe nibwija kweyongera kuguma. (1 Kol. 3:9) Baitu ijuka ngu Yahwe talengesaniza obuheereza bwawe n’obw’abantu abandi; oihireho, arora ekiri omu mutima gwawe. Asemererwa obu arora noosiima kuruga ha mutima ekisembo kye eky’omuhendo kandi eki nikyo ekicunguro. (1 Sam. 16:7; Mar. 12:​41-44) Ekicunguro nikyo ekisobozesa ebibi byaitu kuganyirwa, kutunga enkoragana enungi na Yahwe, n’okutunga okunihira okw’okwomeera ebiro n’ebiro. Leka twikale nitwoleka okusiima kwaitu habw’okugonza kwa Yahwe, okwamuleetiire kutuhikyaho emigisa enu yoona. (1 Yoh. 4:19) Ekindi, leka twoleke ngu nitusiima Yesu ayatugondeze muno yahayo obwomeezi bwe habwaitu. w25.01 31 ¶16-18

Teekerezaaho omulingo omuhandiiki wa Zabuli 73 yayehuliire. Akarora abantu abatarukuramya Yahwe nibegondeza omu bwomeezi oburungi, bali baguuda kandi hataroho ekirukuberaliikiriza. (Zab. 73:​3-5, 12) Obu yarozere ngu ebintu nibibagendera kurungi, kikamuleetera kwehurra ngu amaani akaba naatamu kuheereza Yahwe gakaba nigafa busa. Enteekereza enu ey’erukumaramu amaani ekamuleetera ‘kusaalizibwa obukyabukya.’ (Zab. 73:​13, 14) Akasobora ata kusingura enyehurra zinu embi? Omuhandiiki wa Zabuli akagenda harukwera ha Yahwe. (Zab. 73:​16-18) Obu akaba ali oku n’abantu ba Yahwe, akasobora kutunga enteekereza ey’ehikire. Akakyetegereza ngu noobu kiraaba ngu obwomeezi bwabo bukaba nibuzooka nk’oburungi, bakaba bataine okunihira okw’obusumi obw’omumaiso. Eki kikamukonyera kuleka kuhwamu amaani kandi yakigumya ngu encwamu ey’okwebembeza kuheereza Yahwe niyo erukukirayo oburungi. Ekyarugiremu, akacweramu kimu kugumizaamu naaheereza Yahwe.—Zab. 73:​23-28. w24.10 27 ¶11-12

Yahwe atukomere kuba “bakaiso” be. (Is. 43:​10-12) Omu myaka nke enyuma, ebbaruha kuraga h’Akatebe Akalemi ekagamba eti: “Omugisa ogurukukirayo buli omu hali itwe ogw’arukwegondezaamu nukwo kwetwa omu h’Abakaiso ba Yahwe.” Habwaki nitugamba tuti? Teekerezaaho ekyokurorraho kinu. Kakuba oba noogonza omuntu kukuheera obwakaiso omu kooti, nooserra omuntu ou omanyire, ou orukwesiga, kandi ow’aine engeso enungi. Habwokuba Yahwe atukomere kuba Bakaiso be, kyoleka ngu naatumanya kurungi kandi naatwesiga ngu nitwija kumuheera obwakaiso ngu nuwe Ruhanga wenka ow’amananu. Omugisa gunu tugutwara kuba gw’omuhendo kandi tukozesa buli mugisa tutunga kumanyisa abandi ibara lye n’okwoleka ngu ebintu ebibi byona ebimubaziibwaho tibihikire. Obu tukora eki, tuba nituhikiiriza eki tusemeriire kukora nk’Abakaiso ba Yahwe.—Bar. 10:​13-15. w24.05 18 ¶13

Kuheereza abandi kyaleeteraga Yesu okusemererwa kwingi. Kiro kimu Yesu obu akaba naaheereza abantu, atagarukire ha kubeegesa kyonka. Akabafaaho n’omu byetaago byabo eby’omubiri. Omu mulingo ogw’ekyamahano akabaha ebyokulya kandi yakozesa abeegeswa be kubibagabira. (Mar. 6:41) Obu yakozere eki, akaba naayoleka abeegeswa be omulingo basobora kuheereza abandi. Ekindi, akooleka ngu emirimo nk’egi nayo nkuru. Teekerezaaho okusemererwa abakwenda oku baatungire obu baakozere hamu na Yesu kuha abantu ebyokulya ebikaba bibahairwe omu mulingo ogw’ekyamahano kuhikya ‘boona obu baaliire kandi baiguta’! (Mar. 6:42) Gunu gutabe mulingo gwonka Yesu oguyayebembiizeemu ebyetaago by’abandi kukira ebye. Akakozesa obwomeezi bwe bwona omu nsi kuheereza abantu. (Mat. 4:23) Yesu akatunga okusemererwa n’okumarwa kuraba omu kwegesa abandi n’okubahikyaho ebyetaago byabo. w24.11 16 ¶10-11

Nkooku enyikara omu “biro ebya ha mpero” eriyo neeyeyongera kusiisikara, hataroho kugurukyagurukya nitwija kutunga emigisa nyingi ey’okukoonyera ab’oruganda na banyaanya itwe. Ekindi, nitusobora kuhuumuza ab’oruganda na banyaanya itwe omu biteekerezo n’omu by’omwoyo, n’okubooleka okugonza. Gumu ha miringo tusobora kukikora nukwo kubaza na bo obu baija omu nsorrokano. Nahabweki ab’oruganda na banyaanya itwe obu baija omu nsorrokano, nitugonza kukora kyona ekirukusoboka kubaleetera kwehurra nibagonzebwa, bahuumuziibwe kandi baine obulinzi. Abagurusi nibasobora kuba rukomero hali abo abali omu kitebe abarukuraba omu ihunga lyonyini rundi ery’akokurorraho. Obu habaho ebigwererezi rundi eby’obujanjabi ebya bwangu-bwangu, abagurusi banguha kugira eki baakoraho kukoonyera ab’oruganda na banyaanya itwe. Ekindi bakoonyera ab’oruganda na banyaanya itwe omu by’omwoyo. Ab’oruganda na banyaanya itwe nikiija kubanguhira kuhikirra omugurusi kakuba aba amanyirwe nk’ow’arukwetwaza kurungi, ow’embabazi, kandi ow’aikara ayeteekaniize kubahuliiriza. Emiringo nk’egi ereetera abandi kwehurra nibafiibwaho, ekibaleetera kwanguhirwa kuta omu nkora obuhabuzi bwona oburukusigikirra ha Baibuli omugurusi obu abaha.—1 Bas. 2:​7, 8, 11. w24.06 29 ¶12-13

Titusemeriire kuteekereza ngu habwokuba Ruhanga aine obusobozi, taine enyehurra. Akatuhanga omu kisisani kye n’obusobozi obw’okuba n’enyehurra, ekirukwoleka ngu na uwe aine enyehurra. Baibuli emubazaaho nk’omuntu ‘ow’abiihirwa’ kandi ‘ow’asaalizibwa.’ (Zab. 78:​40, 41) Mali Yahwe akasaalirwa muno obu yarozere Omwana we naabonabonesebwa kubi muno kuhika obu yafiire! Ekicunguro nikitwegesa ngu busaho n’omu ow’atugonza nkooku Yahwe atugonza, noobu yaakuba omunyabuzaale ow’akirayo kukugonza rundi omunywani waawe nfenanfe. (Bar. 8:​32, 38, 39) Hataroho kugurukyagurukya, Yahwe atugonza muno kukira nkooku twegonza. Ogonza kwomeera ebiro n’ebiro? Yahwe naagonza oyomeere ebiro n’ebiro n’okukukira. Noogonza kuganyirwa ebibi byawe? Yahwe naagonza biganyirwe n’okukukira. Ekintu kyonka eki arukutunihirramu, nikwo kwoleka okusiima habw’ekisembo eky’embabazi eky’ekicunguro kuraba omu  kumwikiririzaamu n’okumworobera. Mali ekicunguro kiri kisembo eky’omuhendo mwingi muno ekyoleka okugonza Yahwe oku atwiniire.—Mug. 3:11. w25.01 22-23 ¶8-9

Itwena tukora encwamu nitusigikirra ha bintu ebi turora, ebi tuhurra, n’enyehurra zaitu. Baitu ebi turora rundi tukahurra obwire obumu nibisobora kutuhabya. Ekindi, kakuba tukora encwamu nitusigikirra hali ebi ebi turukurora, ebi turukuhurra, rundi ha nyehurra zaitu, nitusobora kumalirra tugayire oburagirizi bwa Ruhanga. (Mug. 11:9; Mat. 24:​37-39) Baitu kakuba tugendera omu kwikiriza, nitwija kukora encwamu ‘ezirukusiimwa Mukama waitu.’ Kuhondera obuhabuzi bwa Ruhanga, nikiija kutuha obusinge omu mutima kandi kituleetere okusemererwa kwonyini. (Zab. 16:​8, 9; Is. 48:​17, 18) Kandi kakuba tugumizaamu nitugendera omu kwikiriza, nitwija kutunga obwomeezi obutahwaho omu kasumi ak’omumaiso. (2 Kol 4:18) Nitusobora tuta kumanya obu turaaba nitugendera omu kwikiriza rundi omu kurora? Nitusobora kwekaguza, obumba ninkora ncwamu, nsigikirra hali ki? Nsigikirra ha bintu ebi ndukurora rundi nyebemberwa oburagirizi bwa Yahwe? w25.03 20-21 ¶3-4

Itwena twine eki tusobora kukora kusikiiriza abandi kwija omu rugonjo orw’eby’omwoyo. Eki nitusobora kukikora kakuba twegera hali Yahwe. Tahambiriza abantu kwija omu rugonjo orw’eby’omwoyo. Oihireho, omu mulingo gw’embabazi ‘abacunda’ naabaleeta nambere ali. (Yoh. 6:44; Yer. 31:3) Abantu abaine emitima enungi abeega ha kugonza kwa Yahwe n’emiringo ye enungi beeyongera kumwirra haihi. Kuba n’engeso enungi hamu n’emiringo enungi nibisobora kusikiiriza abantu kutweteeranizaaho omu rugonjo runu orurungi. Gumu ha miringo nukwo kutwaza ab’oruganda na banyaanya itwe omu mulingo ogw’okugonza kandi ogw’embabazi. Abahyaka obu baraija omu nsorrokano zaitu nitugonza beehurre nk’abantu ab’omu Kolinso abaagendaga omu nsorrokano baitu abaali batali baheereza ba Yahwe. Bakagamba ngu: “Ruhanga ali omulinywe.” (1 Kol. 14:​24, 25; Zak. 8:23) Nahabweki tusemeriire kuhondera oburagirizi obuli omu kyahandiikirwe kya kiro kinu. w24.04 23-24 ¶16-17