Nghena endzeni

Xana Bibele Yi Vula Leswaku Misava I Xiphepherhele?

Xana Bibele Yi Vula Leswaku Misava I Xiphepherhele?

Nhlamulo ya Bibele

Doo, Bibele a yi vuli leswaku misava i xiphepherhele. * Bibele a hi buku ya sayense. EBibeleni a ku na nchumu lowu lwisanaka ni sayense. Leswi Bibele yi swi vulaka swa ‘tshembeka mikarhi hinkwayo, sweswi ni hilaha ku nga riki na makumu.’—Pisalema 111:8.

 Xana Bibele yi vula yini loko yi ku “ematlhelweni ya mune ya misava”?

Xiga lexi nge “ematlhelweni ya mune ya misava” ni lexi nge “emakumu ya misava” leswi tirhisiweke eBibeleni a swi vuli swona leswaku misava yi fana ni bokisi kumbe yi ni laha yi helelaka kona. (Esaya 11:12; Yobo 37:3) Kahlekahle ko va swigaririmi leswi vulaka, misava hinkwayo. Loko Bibele yi ku “[e]vuxeni ni le vupela-dyambu, ni le n’walungwini ni le dzongeni” yi va yi vula misava hinkwayo.—Luka 13:29.

Rito ra Xiheveru leri hundzuluxeriweke ri ku “ematlhelweni” kumbe “emakumu” ri vonaka ri ri xivulavulelo lexi humaka eka rito “timpapa.” Hi ku ya hi The International Standard Bible Encyclopedia, “leswi timpapa ta xinyenyana ti funengetaka mavondlo ya xona, [rito leri ra Xiheveru] ri vula ku funengeta ku suka emakun’wini man’wana ku ya emakun’wini laman’wana.” Buku yoleyo yi engetela hi ku vula leswaku eka Yobo 37:3 na Esaya 11:12, “rito rero ri vula etindhawini ta le lwandle, emindzilakaneni kumbe misava hinkwayo.” *

 Xana Diyavulosi u n’wi ringe njhani Yesu?

Hiloko “Diyavulosi a tlhela a famba na yena [Yesu] entshaveni leyi tlakukeke ngopfu, a n’wi komba mimfumo hinkwayo ya misava ni ku vangama ka yona.” (Matewu 4:8) Van’wana va vula leswaku rungula leri ra Bibele ri vula leswaku munhu a nga kota ku vona misava hinkwayo loko a yime endhawini yo karhi kwala misaveni. Hambiswiritano, “[ntshava] leyi tlakukeke ngopfu” leyi ku vulavuriwaka ha yona laha, swi tikomba ku ri xigego, ku nga ri ntshava ya xiviri. Xiya leswaku hikwalaho ka yini swi twala ku vula sweswo.

  • Laha misaveni a yi kona ntshava leyi loko munhu a ri eka yona a nga kotaka ku vona mimfumo hinkwayo ya misava.

  • Diyavulosi u kombe Yesu mimfumo hinkwayo ni ku “vangama ka yona.” Munhu a nge swi koti ku vona swilo sweswo a ri ekule, leswi vulaka leswaku Diyavulosi u tirhise xivono xo karhi leswaku a kota ku komba Yesu swilo sweswo. Leswi swi nga fanisiwa ni munhu loyi a tirhisaka projekta ni xikirini leswaku a komba munhu un’wana swifaniso swa tindhawu to hambanahambana ta laha misaveni.

  • Rungula ra Luka 4:5 ri vula leswaku Diyavulosi u kombe Yesu “mimfumo hinkwayo ya misava leyi akiweke, hi xinkarhana,” leswi nga taka swi nga koteki nikatsongo loko munhu a swi languta a ri endhawini yo karhi. Leswi swi vula leswaku Diyavulosi a nga ringanga Yesu hi ku n’wi komba sweswo hi ku kongoma kambe u tirhise xivono.

^ par. 3 Bibele yi vulavula hi Xikwembu tanihi lexi “tshamaka ehenhla ka xirhendzevutana xa misava.” (Esaya 40:22) Tibuku tin’wana ti vula leswaku rito leri hundzuluxeriweke ri ku “xirhendzevutana” ri nga ha vula xiphepherhele. Hambiswiritano, Bibele a yi vuli leswaku misava i xiphepherhele.

^ par. 8 Bibele leyi pfuxetiweke, Vholumo 2, tluka 4.