Nghena endzeni

Hundzela eka leswi nga endzeni

Valweri Va Ntiyiso

Valweri Va Ntiyiso

 Ku Thwasa Ka Ntlawa Wa Vu-132 Wa Le Giliyadi

Valweri Va Ntiyiso

HI MARCH 10, 2012, a ku ri siku ro hlawuleka entsindza wa dyondzo wa Timbhoni ta Yehovha ePatterson, le New York. Magidi ya vanhu lava ambaleke kahle, ku katsa ni vaendzi vo huma ematikweni mambe a va hlengeletane leswaku va va kona eka ku thwasa ka ntlawa wa vu-132 wa mathwasana ya Xikolo xa Bibele xa Giliyadi xa Watchtower. A ku ri ni vanhu vo tala eholweni ya le Patterson; van’wana a va hlengeletane leswaku va languta nongonoko va ri emarhavini man’wana ya Bethele laha a va wu vona eka thelevhixini. Vanhu hinkwavo lava veke kona a va ri 9 042.

A ku languteriwe swo tala. Ku hambana ni lava thwaseke eka mintlawa leyi hundzeke ya xikolo xa varhumiwa, mathwasana hinkwawo ma tshame ma va eka ntirho wo hlawuleka wa nkarhi hinkwawo—man’wana ma tirhe eBethele, man’wana ma ve maphayona yo hlawuleka, valanguteri lava famba-fambaka kumbe ma va varhumiwa—hambileswi a ma nga si tshama ma ya eGiliyadi. Kambe xana swichudeni leswi nga ni ntokoto a swi ta byeriwa yini?

A swi kalanga swi lava leswaku vayingiseri va tshama nkarhi wo leha leswaku va swi tiva. Gerrit Lösch, loyi a nga xirho xa Huvo leyi Fumaka ya Timbhoni ta Yehovha, a a ri mutshama-xitulu wa nongonoko naswona u nyikele nkulumo yo sungula. U vutise xivutiso lexi tlhontlhaka mianakanyo lexi nge “Xana U Mulwi?” U hlamusele leswaku Vakreste i valweri va ntiyiso, va lwela tidyondzo hinkwato ta Vukreste. Ku seketela ntiyiso a swi katsi ntsena ku dyondzisa vanhu ntiyiso kambe swi katsa ni ku va pfuna leswaku va wu rhandza.

Makwerhu Lösch u vutise a ku, “Xana hi swi tiva njhani leswaku hi ni ntiyiso?” U vule leswaku vumbhoni a byi vonaki hi leswaku i vanhu vangani lava amukelaka ntiyiso. Hambileswi namuntlha ku nga ni vanhu va timiliyoni lava amukeleke ntiyiso, hi Pentekosta ya 33 C.E. a ko va ni vanhu va nga ri vangani ntsena. U xaxamete tindlela ta ntlhanu leti hi swi tivaka ha tona leswaku hi ni ntiyiso: (1) Hi hambeta hi landzela dyondzo ya Yesu, (2) ha rhandzana, (3) hi namarhela milawu leyi tlakukeke ya Xikwembu, (4) a hi ngheneleli eka minjhekanjhekisano ya misava leyi naswona (5) hi vanhu lava Xikwembu xi va hlawuleke leswaku va yimela vito ra xona.

“Pfumela Ku Kongomisiwa Naswona U Yingisa Nkongomiso”

Vayingiseri a va tivutisa leswaku a ku ta humelela yini loko Geoffrey Jackson wa Huvo leyi Fumaka a ya exitejini a rhwale bege! Nhloko-mhaka ya nkulumo yakwe a yi ku, “Pfumela Ku Kongomisiwa Naswona U Yingisa Nkongomiso,” leyi sekeriweke eka Esaya 50:5. Loko yi vulavula hi vuprofeta bya malunghana na Yesu Kreste, ndzimana yoleyo yi ri: “Loko ku ri mina, a ndzi xandzukanga. A ndzi hundzulukelanga eka tlhelo lerin’wana.”

Makwerhu Jackson u khutaze swichudeni leswaku swi hatlisa swi xiya nkongomiso lowu Yehovha a wu nyikaka hi ku tirhisa moya wakwe wo kwetsima, Bibele ni nhlengeletano yakwe. Eka xifaniso xakwe xa titalenta, lexi nga eka Matewu 25:14-30, hi ndlela yo karhi, hlonga ha rin’we ri nyikiwe ntsengo lowu ringanaka, hikuva leswi mahlonga ma nyikiweke swona a swi ya hi vuswikoti bya wona. A ma languteriwe ku endla hilaha ma nga kotaka hakona. Mahlonga mambirhi ma bumabumeriwile naswona ma vuriwe mahlonga ‘lamanene yo tshembeka.’ Ku tshembeka a swi titsheganga hi vuyelo kambe hi ku pfumela ku kongomisiwa naswona u yingisa nkongomiso.

Hlonga ra vunharhu ri vuriwe “ro homboloka ni ra vulolo” ni “leri nga pfuniki nchumu.” Xana xiphiqo xa rona a ku ri xihi? Ri celele talenta ya rona. Talenta a ku nga ri xingwece, kambe a ku ri ndlela yo pima leyi a yi ringana ni tidenari ta 6 000 leti a ti ri ni ntiko lowu ringanaka tikhilogiramu ta 20. Wolowo i mpimo lowu munhu a pfumeleriwaka ku wu rhwala ebegeni yakwe loko a endzela ematikweni man’wana hi xihaha-mpfhuka. A swi ta lava matimba leswaku a celela xilo lexi ringanaka ni bege hi ku kula. Kutani hlonga ri endle swin’wana—ri celele talenta yoleyo—kambe sweswo a ku nga ri swona leswi a ri byeriwe ku swi endla. Hilaha ku fanaka, murhumiwa  a nga ha khomeka—kambe u khomeka a ri karhi a endla yini? Kumbexana a nga ha khomeka hi ku tsala mapapila yo leha, ku nghena eka Internet, ku endla vunghana kumbe ku nghenelela etimhakeni ta mabindzu. Munhu wo tano a nga karhala swinene endzhaku ka loko a endle swilo swo tano, kambe a nga endlanga leswi a byeriweke ku swi endla. Makwerhu Jackson u gimete a ku: “Landzela nkongomiso minkarhi hinkwayo!”

“U Nga Pfumeleli Mianakanyo Ya Wena Leswaku Yi Kanakana Yehovha”

Yoleyo a ku ri nhloko-mhaka leyi nyikeriweke hi Anthony Morris wa Huvo leyi Fumaka. U te: “Bibele a yi vulavuli hi ripfumelo ni ku kanakana tanihi swilo leswi fambisanaka. Ripfumelo a ri fambisani ni ku kanakana.” Sathana u humelerile eku endleni leswaku wansati la hetisekeke, ku nga Evha, a kanakana, kutani na hina a nga endla leswaku mianakanyo ya hina yi va ni ku kanakana. Makwerhu Morris u te: “Wundla ripfumelo ra wena, kutani ku kanakana a ku nge vi kona.” U dzike emhakeni ya Petro loyi a “[fambeke] ehenhla ka mati” kambe loko “a languta xidzedze” a sunguleke ku chava kutani a sungula ku mbombomela. Endzhaku ka loko Yesu a n’wi khomile, u n’wi vutise a ku: “Ha yini u kanakana?” (Matewu 14:29-31) “Leswi n’wina varhumiwa mi nga ta va mi khomekile hi ntirho wa nkarhi hinkwawo, vanhu van’wana va nga ha tsakisiwa hileswi mi swi endlaka, onge hiloko mi famba ehenhla ka mati, kambe loko ku ta swidzedze, mi nga kanakani.”

Makwerhu Morris u ye emahlweni a vula leswaku ku hlangavetana ni minkarhi ya swidzedze swi nga tika, kambe eku heteleleni, mimoya leyi ya hela. Loko a vulavula hi minkarhi leyi tikaka, u khutaze swichudeni leswaku swi swi tekela enhlokweni leswi Pawulo na Silasi va swi endleke loko va pfaleriwe ekhotsweni le Filipiya. Mintirho 16:25 yi vula leswi: “Exikarhinyana ka vusiku Pawulo na Silasi a va khongela ni ku dzunisa Xikwembu hi risimu; ina, vakhotsiwa a va va twa.” Xiya leswi: A va lo khongela ntsena, va yimbelerile. Va yimbelele hi marito lama tlakukeke lerova ni vabohiwa lavan’wana va va twa. Makwerhu Morris u vule leswaku vo tala va hina a hi na marito lama leteriweke ku yimbelela, kambe a hi fanelanga hi khomiwa hi tingana loko hi yimbelela, ngopfu-ngopfu loko hi langutane ni swiyimo swo tika. Makwerhu Morris u gimete hi ku hlaya marito ya Risimu 135 leri nge “Ku Tiyisela Ku Ya Fika Emakumu” leri nga ebukwini ya tinsimu leyi nge Yimbelelelani Yehovha.

Tinkulumo Tin’wana Leti Khutazaka

“Xana U Ta Rhandza Masiku Lama Ringaneke?” yoleyo a ku ri nhloko-mhaka ya nkulumo leyi nyikeriweke hi Robert Luccioni loyi a tirhaka eka Ndzawulo yo Xava Nhundzu. Nhloko-mhaka leyi yi tekiwe eka marito ya Hosi Davhida lama nga eka Pisalema 34:12. Nkulumo ya Makwerhu Luccioni a yi vulavula hi ndlela leyi u nga hlangavetanaka ni swiyimo swo tika kambe u hambeta u va ni vuxaka lebyinene na Yehovha. Ku nga dyondziwa swo tala eka mhaka leyi nga eka Samuwele wo Sungula ndzima 30. Loko Davhida, vavanuna vakwe ni mindyangu ya vona va boheke ku baleka Hosi Sawulo, va ye va ya tumbela eSikilaga. Loko mindyangu ya vona yi endliwe makhumbi hi Vaamaleke, vavanuna va sole Davhida naswona a va lava ku n’wi khandla hi maribye. Xana Davhida u angule njhani? A nga hetiwanga matimba kambe ‘u titiyise hi Yehovha Xikwembu xakwe.’ (1 Samuwele 30:6) U kombele leswaku Yehovha a n’wi kongomisa, a landzela nkongomiso wolowo kutani a ponisa makhumbi wolawo. Xivulavuri xi tiyisekise swichudeni leswaku loko swi tshemba Yehovha hi ndlela leyi fanaka ni ku landzela nkongomiso wakwe, swi ta rhandza masiku lama ringaneke ku vona leswinene. Swi ta va ni ntsako evuton’wini hikwalaho ka lunghelo ra risima leri swi nyikiweke rona.

“Anakanya Hi Masiku Ya Ku Vonakala Lama Nga Ta Ta Endzhaku Ka Munyama” yoleyo a ku ri nhloko-mhaka ya nkulumo leyi nyikeriweke hi Michael Burnett, loyi a nga un’wana wa valeteri va Xikolo xa Giliyadi. Vaisrayele va ave vusiku hi swiphemu ku suka eku peleni ka dyambu ku fika loko ri xa leswaku ku va ni varindzi vanharhu lava rindzaka tiawara ta mune. Xiphemu xo hetelela, lexi sungulaka hi 2:00 a.m ku fika hi 6:00 a.m., a ku ri xona xa xinyami naswona a xi ri ni xirhami naswona a ku ri nkarhi lowu swi tikaka leswaku munhu a tshama a xalamukile. Mupisalema u tate mianakanyo yakwe hi marito ya Yehovha leswaku hi nkarhi lowu wo rindza, a papalata ku khudzehela. (Pisalema 119:148) Makwerhu Burnett u byele swichudeni a ku: “Swi ta lava leswaku mi xalamuka. Minkarhi yin’wana mi ta va ni masiku ya munyama lama hetaka matimba naswona mi ta vona vuyelo bya misava leyi nga ni xirhami ni leyi pfumalaka rirhandzu ku fana ni mupisalema.  Mi fanele mi teka xiboho ka ha ri emahlweni leswaku mi ta endla yini leswaku mi hlula swihinga swoleswo.” Kutani u va tsundzuxe leswaku va fanele va hambeta va dyondza tidyondzo leti enteke ni leti nga ni vuxokoxoko ta le Bibeleni leswaku va ta tshama va xalamukile hi tlhelo ra moya. Makwerhu Burnett u endle xikombiso hi yinhla leyi: “Siku ni siku mi khongela Yehovha hileswi mi lavaka a va munghana wa n’wina. Pfumelelani Yehovha, tanihi leswi a nga munghana wa n’wina, leswaku a vulavula na n’wina siku ni siku hi ku tirhisa matluka ya Bibele. Vusiku byi fambile swinene, kutani hlelani ka ha ri emahlweni leswaku mi ta ma tirhisa njhani masiku ya n’wina, hi ndlela yoleyo, mi ta va mi anakanya hi masiku ya ku vonakala lama nga ta ta endzhaku ka munyama.”

“Mi Leteriwile Leswaku Mi Endla Ntirho Lowu Wa Ha Taka,” yoleyo a ku ri nhloko-mhaka leyi hlawuriweke hi Mark Noumair leyi sekeriweke eka 1 Petro 5:10, loyi a nga un’wana wa valeteri va le Giliyadi. U vutise swichudeni xivutiso lexi, lexi nge: “Leswi mi nga vachumayeri lava nga ni ntokoto, ha yini mi rhambiwile leswaku mi ta eNtsindza wa Dyondzo wa Watchtower?” Nhlamulo hi leyi: “Mi ni ntokoto entirhweni wa n’wina. Vanhu vo tala lava nga ni ntokoto va teka masiku yo wisa entirhweni wa vona leswaku va ta ya eswikolweni leswi va dyondzisiwaka ku antswisa vutshila bya vona. Eka tin’hweti ta ntlhanu leti hundzeke, Yehovha a a ri eku mi ‘tiyiseni’ ni ku mi “nyika ntamu” hi ku tirhisa dyondzo leyi enteke ya Rito rakwe ni nhlengeletano leswaku mi kota ku byarha vutihlamuleri lebyi tikaka lebyi mi nga hlangavetanaka na byona. Timbalelo ta lwangu leti tiyeke a ti goveki, a ti tshoveki kumbe ti hambana loko ti twa ku tikeriwa. Vuyelo bya ndzetelo lowu mi wu kumeke byi ta vonaka loko mi ri karhi mi tirha ni vamakwerhu va xinuna ni va xisati. Xana ntshikilelo wu ta mi endla leswaku mi tshika milawu ya Xikwembu, kumbe mi ta khomelela swi tiya hi ku pfumelelana ni leswi mi swi dyondzeke eRitweni ra Xikwembu? Xilo lexi tiyeke xi nga rhwala ndzhwalo. Matimba ya timbalelo ya titshege hi ndlela leyi ti hlanganisiweke ha yona. Matimba ya n’wina ma titshege hi leswaku mi vamani endzeni-ndzeni ni ndlela leyi mi nga ha yona. Yehovha u mi tise laha leswaku a ta mi endla mi tiya, mi va lava tshembekaka naswona mi tshembeka eka ntirho lowu mi yimeleke. Xikwembu xi tlange xiphemu xa xona, kutani hi khongela leswaku na n’wina mi tlanga xiphemu xa n’wina kutani mi pfumelela ‘Muleteri wa n’wina Lonkulu’ a heta ku mi letela.”

Mintokoto Ni Mimbulavurisano

Minkarhi hinkwayo swa phyuphyisa ku twa swo karhi eka swichudeni loko ku thwasa ntlawa wa le Giliyadi naswona swi ve tano ni sweswi. Eka xiyenge xin’wana xa nongonoko, swichudeni swi encenyete swiendlakalo swin’wana swa sweswinyana swa loko swi ri karhi swi chumayela. Hi xikombiso, mpatswa lowu humaka eFurwa wu yime erivaleni ra swihaha-mpfhuka ku ringana tiawara ta tsevu loko wu ri endleleni yo ya eXikolweni xa Giliyadi. Erhesiturente leyi nga erivaleni ra swihaha-mpfhuka, wu teke goza ro sungula bulo ni vavanuna vambirhi lava na vona a va yimele swihaha-mpfhuka leswi a va famba ha swona. Loko un’wana wa vavanuna volavo a vula leswaku u huma eMalawi, wu burisane na yena hi Xichewa. Leswi a swi n’wi hlamarisa leswaku wu vulavula Xichewa, u wu vutise leswaku swi ta njhani wu tiva ririmi rakwe. Wu hlamusele leswaku a wu ri varhumiwa eMalawi. Loko wanuna lowun’wana a vule leswaku u huma eCameroon, wu sungule ku vulavula Xifurwa, leswi na yena swi n’wi hlamariseke. Vavanuna lava havambirhi a va xixima Timbhoni ta Yehovha kutani varhumiwa lava va va chumayerile.

Mimpatswa yimbirhi leyi nga swichudeni yi vulavurisane na Nicholas Ahladis la tirhaka eNdzawulweni ya Mintirho ya Vuhundzuluxeri. Mpatswa lowun’wana a wu rhurhe eAustralia leswaku wu ya va varhumiwa etikweni ra East Timor leri hlakatiweke hi nyimpi. Kasi mpatswa lowun’wana a wu rhurhe eKorea leswaku wu ya tirha eHong Kong. Mimpatswa leyi hayimbirhi a yi swi langutele hi mahlo-ngati ku tlhelela eswiavelweni swa yona swa le matikweni mambe leswaku yi ya tirhisa leswi yi swi dyondzeke exikolweni.

Endzhaku ka loko mathwasana ma nyikiwe swiavelo swa wona, hi ku yimela ntlawa hinkwawo, xichudeni xin’wana xi hlaye papila ra ku kombisa ku tlangela ndzetelo lowu swi wu kumeke. Kutani Makwerhu Lösch u tirhise swiga-ririmi swo tsakisa loko a vula marito yakwe yo gimeta, a vula leswaku ntiyiso wu fana ni nkwangulatilo hi ku xonga, wu fana ni xihlovo emananga naswona wu fana ni nsoma wa xikepe loko ku ri ni xidzedze elwandle. U te: “Mawaku ndlela leyi swi nga nkateko ha yona ku tiva ntiyiso! Lwela ntiyiso kutani u pfuna ni van’wana leswaku va va valweri va ntiyiso.”

 [Chati/Mepe lowu nga eka tluka 31]

TINHLAYO TA NTLAWA

12 matiko lama yimeriweke

36 xiringaniso xa malembe

20 xiringaniso xa malembe va khuvuriwile

15 xiringaniso xa malembe evutirhelini bya nkarhi hinkwawo

[Mepe]

(Leswaku u vona rungula leri hleriweke hi ku helela, vona nkandziyiso wa kona)

Swichudeni swi averiwe ematikweni lama kombisiweke laha hansi:

SWIAVELO SWA VARHUMIWA

BELIZE

BENIN

CAMBODIA

CAMEROON

CAPE VERDE

CÔTE D’IVOIRE

DOMINICAN REPUBLIC

EAST TIMOR

ECUADOR

GABON

GEORGIA

GUINEA

HONG KONG

LIBERIA

MADAGASCAR

MALAWI

PERU

SAMOA

SÃO TOMÉ AND PRÍNCIPE

UNITED STATES OF AMERICA

ZIMBABWE

[Chati/Mepe lowu nga eka tluka 31]

Ntlawa Wa Vu-132 Lowu Thwasaka Wa Xikolo Xa Bibele Xa Giliyadi Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Iap, R.; Iap, J.; Ng, T.; Ng, P.; Laurino, F.; Laurino, B.; Won, S.; Won, S.

(2) Morales, N.; Morales, M.; Zanutto, J.; Zanutto, M.; Rumph, I.; Rumph, J.; Germain, D.; Germain, N.

(3) Atchadé, Y.; Atchadé, Y.; Thomas, C.; Thomas, E.; Estigène, C.; Estigène, P.

(4) Ehrman, D.; Ehrman, A.; Bray, J.; Bray, A.; Amorim, M.; Amorim, D.; Seo, Y.; Seo, Y.

(5) Simon, J.; Simon, C.; Seale, C.; Seale, D.; Erickson, J.; Erickson, R.

(6) McCluskey, D.; McCluskey, T.; Brown, A.; Brown, V.; Mariano, D.; Mariano, C.; Loyola, Y.; Loyola, C.

(7) Rutgers, P.; Rutgers, N.; Foucault, P.; Foucault, C.; Wunjah, J.; Wunjah, E.