Nghena endzeni

Hundzela eka leswi nga endzeni

Ha Yini U Fanele U Tshemba Masingita?

Ha Yini U Fanele U Tshemba Masingita?

 Ha Yini U Fanele U Tshemba Masingita?

“Masingita ma hlamuseriwa ma ri lama lwisanaka ni tidyondzo ta sayense.”—RICHARD DAWKINS, KHALE KA PROFESA WA YUNIVHESITI YA OXFORD YA LE NGHILANDHI.

“Ku tshemba masingita swa twisiseka swinene. Masingita a ma lwisani ni vukhongeri, kambe i swikombiso swa rirhandzu ra Xikwembu eka ntumbuluko ni leswaku xi hambeta xi katseka eka wona.”—ROBERT A. LARMER, PROFESA WA FILOSOFI.

“XANA wa ma tshemba masingita?” Hilaha swi kombisiweke hakona eka mintshaho leyi nga laha henhla, mavonelo ma hambana swinene. Kambe xana a wu ta xi hlamula njhani xivutiso xexo?

U nga ha kanakana ku hlamula u ku, “Ina, ndza ma tshemba.” Kumbexana u nga ha vona onge ku endla tano swi nga ha kombisa leswaku u ni vukholwa-hava kumbe a wu dyondzekanga. Vo tala va titwa hi ndlela leyi fanaka.

Hi hala tlhelo, u nga ha va u kholwa leswaku masingita ya endleka hakunene. Swi nga ha endleka u tshemba masingita lama tsariweke eBibeleni, yo tanihi ku va Muxe a endla leswaku mati ya Lwandle ro Tshwuka ma avana hi le xikarhi. Nakambe u nga ha va u tshemba masingita lama endlekaka enkarhini wa hina. Entiyisweni, xiviko lexi humesiweke sweswinyana xi kombisa leswaku “nhlayo ya vaaki va le matikweni ya le Vupela-dyambu—hi xikombiso vaaki va kwalomu ka 75 wa tiphesente va le United States ni lava endlaka 38 wa tiphesente va le Britain—va ya emahlweni va tshemba masingita.” (The Cambridge Companion to Miracles, leyi tsariweke hi Graham H. Twelftree) Ku engetela kwalaho, a hi Vakreste ntsena lava tshembaka masingita. Hi ku ya hi Britannica Encyclopedia of World Religions, “vukhongeri hinkwabyo byi vonaka” byi tshemba swiendlakalo swa masingita.

Kumbexana u nga ha wela eka ntlawa wa vunharhu, lowu a wu ta hlamula wu ku: “A ndzi swi tivi naswona a ndzi na mhaka na swona! Masingita a ma endleki evuton’wini bya mina!” Ha yini u fanele u tshemba masingita?

 Xiya xiendlakalo lexi: Tivone hi tihlo ra mianakanyo u ri ni vuvabyi lebyi nga tshungulekiki. Loko ku ri hileswaku a wu fanele u hlaya xiviko eka magazini lowu dumeke wa swa vutshunguri malunghana ni murhi lowuntshwa lowu nga tshungulaka vuvabyi bya wena, xana a swi nga ta va swa nkoka ku tinyika xinkarhana xo kambisisa timhaka teto ta nkoka? Hilaha ku fanaka, Bibele yi tshembisa leswaku ku nga ri khale ku ta endleka masingita man’wana lama hlamarisaka. Ma ta khumba munhu un’wana ni un’wana laha misaveni. Xana a swi nga ta va swa nkoka ku tinyika nkarhi wo lavisisa loko xitshembiso xexo xi ri ntiyiso?

Hambiswiritano, emahlweni ko va hi kambisisa leswaku hi wahi masingita wolawo lama tshembisiweke, a hi hlamuleni mavonelo manharhu lama tolovelekeke malunghana ni masingita.

[Bokisi leri nga eka tluka 3]

I YINI SINGITA?

I xiendlakalo lexi tlulaka matimba ya vanhu naswona hi ntolovelo xi tekiwa tanihi muxaka wo karhi wa matimba yo tlula lama tolovelekeke.