Vuprofeta Bya Vuntlhanu. Lava Onhaka Misava

“[Xikwembu xi ta] lovisa lava onhaka misava.”—NHLAVUTELO 11:18.

● Nkulukumba Pirri a a tirha ku endla vhinyo hi mafi ya ncindzu le Kpor eNigeria. U heleriwe hi ntirho endzhaku ka loko oyili yi halekele eLwandle ra Niger. U ri: “Yi dlaya tinhlampfi ta hina, yi onha nhlonge ya hina yi tlhela yi onha swinambyana swa hina. Sweswi a ndza ha swi tivi leswaku ndzi ta tihanyisa hi yini.”

I YINI LESWI MATIMU MA SWI VULAKA? Swidyondzi swin’wana swi vula leswaku thyaka leri endlaka tithani ta 6,5 wa timiliyoni ri nghena emalwandle lama nga kona emisaveni hinkwayo lembe ni lembe. Kwalomu ka 50 wa tiphesente ta thyaka rero i tipulasitiki leti nga ha tekaka malembe ya madzana leswaku ti bola. Handle ko thyakisa misava, vanhu va karhi va hunguta rifuwo ra ntumbuluko hi ndlela leyi hlamarisaka. Mindzavisiso yi kombisa leswaku misava yi lava lembe ni tin’hweti ta ntlhanu leswaku yi vuyetela leswi vanhu va swi onhaka hi lembe. Xiviko xa phepha-hungu ra le Australia leri vuriwaka Sydney Morning Herald xi ri: “Loko vaaki ni swilo leswi va swi tirhisaka swi ya swi andza, swi ta boha leswaku hi va ni Tipulanete timbirhi ta misava leti vanhu va nga ta hanya eka tona hi 2035.”

I YINI LESWI VANHU VA SWI VULAKA? Vanhu va tlharihile naswona va swi kota ku kuma ntlhantlho wa swiphiqo. Hi nga swi kota ku lulamisa swiphiqo sweswo kutani hi hlayisa misava.

XANA LESWI VA SWI VULAKA I NTIYISO? Vanhu vo tala ni mintlawa leyi tirhaka hi matimba yi vulavule hi swilo swo tala leswi khumbaka ntumbuluko. Kambe misava ya ha ya emahlweni yi thyakisiwa swinene.

U EHLEKETA YINI? Xana ku ni xilaveko xa leswaku Xikwembu xi nghenelela leswaku xi sirhelela pulanete ya hina leswaku yi nga onhiwi, hilaha xi tshembiseke hakona?

Ku engetela eka vuprofeta bya ntlhanu lebyi ha ha ku byi kambisisaka, Bibele yi tlhele yi profeta hi swilo leswinene leswi a swi ta endleka eminkarhini ya makumu. Xiya xikombiso xin’we eka vuprofeta lebya tsevu.

[Marito lama tshahiweke exihlokweni lama nga eka tluka 8]

“Ndzi twa onge paradeyisi leyi a ndzi ri na yona se yi hundzuke ndhawu yo lahlela eka yona thyaka leri dlayaka.”—ERIN TAMBER, LA TSHAMAKA ENSONGA-NKULU WA LE RIBUWENI RA LE UNITED STATES, LOYI A A VULAVULA HI OYILI LEYI NGA HALAKA LE NSONGA-NKULU WA LE MEXICO HI 2010.

[Bokisi leri nga eka tluka 8]

Xana Xikwembu Xi Ni Vutihlamuleri Bya Leswi Endlekaka?

Leswi Bibele yi profeteke hi swiyimo swo biha leswi hi swi vonaka namuntlha, xana swi vula leswaku Xikwembu hi xona xi swi vangaka? Xana xi endla leswaku hi xaniseka? U nga kuma tinhlamulo leti enerisaka ta swivutiso leswi eka ndzima 11 ya buku leyi nge Xana Bibele Yi Dyondzisa Yini Hakunene? leyi kandziyisiweke hi Timbhoni ta Yehovha.

[Laha Xifaniso Xi Humaka Kona eka tluka 8]

U.S. Coast Guard photo