Nghena endzeni

Hundzela eka leswi nga endzeni

Vuprofeta Bya Vutsevu. Ntirho Wo Chumayela eMisaveni Hinkwayo

Vuprofeta Bya Vutsevu. Ntirho Wo Chumayela eMisaveni Hinkwayo

 Vuprofeta Bya Vutsevu. Ntirho Wo Chumayela eMisaveni Hinkwayo

“Mahungu lamanene lawa ya mfumo ma ta chumayeriwa emisaveni hinkwayo leyi akiweke.”—MATEWU 24:14.

● Vaiatea u tshama exihlaleni xa Pacific lexi nga xoxe naswona xi nga ehansi ka Swihlala swa Tuamotu. Hambileswi xihlala xa Tuamotu xi nga na kwalomu ka 80 wa swihlala leswitsongo naswona xi nga anama tikhilomitara to tlula 802 900, xi ni vaaki va kwalomu ka 16 000 ntsena. Kambe Vaiatea ni vaakelani vakwe va endzeriwe hi Timbhoni ta Yehovha. Ha yini? Hikuva Timbhoni ti lava ku byela vanhu hinkwavo mahungu lamanene ya Mfumo wa Xikwembu—ku nga khathariseki leswaku va tshama kwihi.

I YINI LESWI MATIMU MA SWI VULAKA? Rungula ra Mfumo ri chumayeriwa emisaveni hinkwayo. Hi lembe ra 2010, Timbhoni ta Yehovha ti hete tiawara to tlula 1,6 wa tibiliyoni ti ri eku chumayeleni ka mahungu lamanene ematikweni ya 236. Leswi vulaka leswaku Mbhoni yin’wana ni yin’wana yi heta timinete ta 30 siku rin’wana ni rin’wana yi ri karhi yi chumayela. Eka khume ra malembe lama hundzeke, ti kandziyise ni ku hangalasa minkandziyiso yo tlula 20 wa tibiliyoni leyi pfunetaka ku dyondzisa Bibele.

I YINI LESWI VANHU VA SWI VULAKA? Se ku hundze magidi ya malembe rungula ra Bibele ri ri karhi ri chumayeriwa.

XANA LESWI VA SWI VULAKA I NTIYISO? I ntiyiso leswaku vanhu vo tala va tshame va chumayela rungula ra Bibele. Kambe leswi a swi tlhaveriwanga hi dyambu naswona a va chumayela endhawini yo karhi ntsena. Ku hambana na vona, ntirho wo chumayela wa Timbhoni ta Yehovha lowu hleriweke kahle, wu fikelela madzana ya timiliyoni ta vanhu emisaveni hinkwayo. Ematin’wini hinkwawo ya vanhu, Timbhoni ti tiyiserile entirhweni wa tona wo chumayela ku nga khathariseki nkaneto lowukulu lowu humaka eka minhlangano leyi nga ni matimba naswona yi nga ni nsele. * (Marka 13:13) Timbhoni ta Yehovha a ti holi loko ti chumayela. Ti tirhisa nkarhi wa tona hi ku tirhandzela naswona ti nyika vanhu minkandziyiso ya tona handle ko va hakerisa. Ntirho wa tona wu seketeriwa hi minyikelo ya ku tirhandzela.

U EHLEKETA YINI? Xana “mahungu lamanene . . . ya mfumo” ma karhi ma chumayeriwa emisaveni hinkwayo? Xana ku hetiseka ka vuprofeta lebyi swi vula leswaku swilo leswinene swi ta endleka ku nga ri khale?

[Nhlamuselo ya le hansi]

^ par. 6 Leswaku u kuma rungula leri engetelekeke, vona ti-DVD leti nge “Faithful Under Trials,” “Purple Triangles” ni leyi nge “Jehovah’s Witnesses Stand Firm Against Nazi Assault” leti kandziyisiweke hi Timbhoni ta Yehovha.

[Marito lama tshahiweke exihlokweni lama nga eka tluka 9]

“Loko Yehovha a ha swi pfumelela, hi ta hambeta hi chumayela mahungu lamanene ya Mfumo hi ku hiseka, hi tirhisa tindlela hinkwato leswaku hi fikelela vanhu.”—BUKU YA LEMBE YA TIMBHONI TA YEHOVHA YA 2010.