Nghena endzeni

Hundzela eka leswi nga endzeni

Wa Tsundzuka Xana?

Wa Tsundzuka Xana?

 Wa Tsundzuka Xana?

Xana u vuyeriwile loko u hlaya minkandziyiso ya sweswinyana ya Xihondzo xo Rindza? A hi vone loko u nga hlamula swivutiso leswi landzelaka:

• Hi nga dyondza yini eka xifaniso xa Yesu malunghana ni muendzeriwa la phikelelaka? (Luka 11:5-10)

Xifaniso lexi xi kombisa langutelo leri hi faneleke hi va na rona loko hi khongela. Hi fanele hi phikelela, kumbe hi hambeta hi kombela, ngopfu-ngopfu moya lowo kwetsima wa Xikwembu. (Luka 11:11-13)—12/15, matluka 20-2.

• Xifaniso xa Yesu xa noni ni muavanyisi xi kandziyisa dyondzo yihi eka hina? (Luka 18:1-8)

Xi kandziyisa xilaveko xo khongela. Ku hambana ni muavanyisi, Yehovha u lulamile naswona u lava ku hi pfuna. Tlhandlakambirhi, hi fanele hi va ni ripfumelo ro fana ni ra noni ya le xifanisweni lexi.—12/15, matluka 26-8.

• Ha yini muapostola Pawulo a byele Vakreste va le Korinto leswaku va “ndlandlamuka”? (2 Vakorinto 6:11-13)

Swi vonaka onge van’wana eKorinto a va nga va tlangeli vapfumeri-kulobye, a va nga ri na malwandla. Hi fanele hi tikarhatela ku tlangela vapfumeri-kulorhi hi mbilu hinkwayo, hambi ku ri ku tikarhatela ku va ni vanghana lavantshwa.—1/1, matluka 9-11.

• I ku funghiwa kwihi loku ku vulavuriwaka ha kona eka Nhlavutelo 7:3?

Loko Xikwembu xi tota Vakreste hi moya lowo kwetsima, va kuma mfungho wo sungula. Kambe Nhlavutelo 7:3 yi vulavula hi ku funghiwa ko hetelela, laha vatotiwa volavo va amukeriwaka tanihi lava va kombiseke vutshembeki hilaha ku heleleke.—1/1, matluka 30-1.

• Vatswari va nga dyondza yini eka rungula ra Samuwele leri nga eBibeleni?

Va fanele va dyondzisa vana va vona rito ra Xikwembu, tanihi leswi vatswari va Samuwele va n’wi dyondziseke rona. Ku tlhandlekela kwalaho, va fanele va khutaza vana va vona ku tirhela Yehovha vutomi bya vona hinkwabyo.—1/15, tluka 16.

• Hi nga swi kombisa njhani leswaku ha swi tsakela ku rindza Yehovha?

Hi ‘rindzele siku ra Yehovha,’ hi swi langutele hi mahlo-ngati ku kuma ntshunxeko loko a herisa vanhu hinkwavo lava nga xi chaviki Xikwembu. (2 Petro 3:7, 12) Hambileswi Yehovha a swi navelaka ku herisa vubihi hinkwabyo, kambe wa tikhoma leswaku a ponisa Vakreste hi ndlela leyi nga ta tisa ku dzuneka evitweni ra yena. Hi fanele hi tiyiseka leswaku Yehovha wa wu tiva nkarhi lowu faneleke wo teka goza, naswona sweswi, hi fanele hi ya emahlweni hi n’wi dzunisa hi ku hiseka. (Pisalema 71:14, 15)—3/1, matluka 17-18.

• Xana Nowa u nghenise engalaveni swiharhi swa nkombo eka xin’wana ni xin’wana lexi tengeke kumbe mimpatswa ya nkombo eka xin’wana ni xin’wana?

Nowa u byeriwe ku ‘titekela swiharhi swa ntlhanu na swimbirhi’ eka xin’wana ni xin’wana lexi tengeke. (Genesa 7:1, 2) Hi Xiheveru xiga “ntlhanu na ŝimbiri” hi ku kongoma xi vula “nkombo-nkombo.” Ndlela yoleyo yo vulavula a yi vuli mimpatswa ya nkombo, hilaha tindzimana tin’wana ta Bibele ti vulaka hakona. Entiyisweni Nowa u teke swiharhi swa nkombo eka xin’wana ni xin’wana, mimpatswa yinharhu ni xin’we xa vunkombo leswaku a ta xi tirhisela ku endla magandzelo ha xona. (Genesa 8:20)—3/15, tluka 31.

• Ha yini Vakreste va fanele va “xiyisisa” vuyelo bya ripfumelo ra vakulu, ku nga vona lava rhangelaka?

Muapostola Pawulo u hi rhamba leswaku hi “xiyisisa,” kumbe hi langutisa hi vukheta vuyelo bya ku tikhoma hi ku tshembeka bya vakulu kutani hi tekelela swikombiso swo tano swa ripfumelo. (Vaheveru 13:7) Hi endla leswi hikuva hi lerisiwe hi Rito ra Xikwembu. Nakambe, ha byeriwa leswaku vakulu va karhateka hi timhaka ta Mfumo na hi vuhlayiseki bya hina.—4/1, tluka 28.