XANA marito wolawo ma vula yini? Ma vulavula hi xiyimo xa miehleketo ni mintlhaveko ya munhu. “La xanisekaka” u tshamela ku anakanya hi swilo leswi hoxeke—ku nga vonelo leri endlaka leswaku masiku ya yena ma ‘biha’ kumbe ma n’wi vangela ntshikilelo. Ku hambana na sweswo, loyi a nga ni “mbilu leyinene” u ringeta ku dzikisa mianakanyo yakwe eka leswinene—ku nga vonelo leri tiselaka munhu ntsako lowu endlaka a “tshama a ri ni nkhuvo.”

Hinkwerhu hi ni swiphiqo leswi nga hi tekelaka ntsako. Kambe, hi nga ha kota ku endla swilo swo karhi leswi nga hi pfunaka ku kondletela ntsako wa hina loko hi langutane ni minkarhi yo nonon’hwa. Xiya leswi Bibele yi swi vulaka.

• U nga pfumeleli mivilelo ya mundzuku yi ku tshikilela namuntlha. Yesu Kreste u te: “Mi nga tshuki mi vilela hi swa mundzuku; siku ra mundzuku ri ta va ni mivilelo ya rona. A xi kona xivangelo xo karhateka hi mivilelo ya siku rin’wana ni rin’wana.”—Matewu 6:34, Good News Translation.

• Ringeta ku dzika eka swilo leswinene leswi nga tshama swi ku humelela. Entiyisweni, loko u titwa u tshikilelekile, ha yini u nga swi tsali ehansi swilo sweswo leswinene ivi u anakanyisisa ha swona? Nakambe u nga dzikisi mianakanyo ya wena eka swihoxo swa nkarhi lowu hundzeke kumbe eka swiendlo swo biha leswi u swi endleke. Dyondza eka swona, ivi u ya emahlweni ni vutomi. Fana ni muchayeri loyi a langutaka xivoni xa movha wakwe kambe a nga dzikisiki mianakanyo yakwe eka xona. Na wena, tsundzuka, leswaku “[Xikwembu xi] ni ndzivalelo wa ntiyiso.”—Pisalema 130:4.

• Loko mivilelo yi ku tshikilela, yi phofulele un’wana loyi a nga kotaka ku ku khutaza. Swivuriso 12:25 yi ri: ‘Ku vilela ku nga endla leswaku mbilu ya hina yi tshoveka, kambe rito lerinene ra yi tsakisa.’ ‘Rito rero lerinene’ ri nga ta ri huma eka xirho xa ndyangu kumbe eka munghana loyi u n’wi tshembaka—ku nga munhu loyi a nga hundzeletiki timhaka kambe ‘loyi a nga ni rirhandzu nkarhi hinkwawo.’—Swivuriso 17:17.

Marito ya vutlhari lama humaka eBibeleni ma pfune vo tala leswaku va kuma ntsako lowukulu evuton’wini, hambiloko va langutane ni minkarhi yo nonon’hwa. Onge na wena marito wolawo ya risima ma nga ku pfuna.