Bbaibbele lyaamba kuti Leza uyanda kutupa “buumi bwakumbele bubotu alimwi abulangizi.” a (Jeremiya 29:11) Cakutadooneka, kaambo kamwi Leza ncaakatupeda Bbaibbele nkakuti “kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.” (Baroma 15:4) Mbuli mbotulaabone, lulayo lwamu Bbaibbele lwabusongo lulakonzya kutupa bulangizi kwiinda mukutugwasya kulwana mapenzi aabuzuba abuzuba, mpoonya zisyomezyo zyandilyo zitupa bulangizi bubotu bwakumbele.

Izili apeeji eeyi:

•  Ino mbuti Bbaibbele mbolitupa bulangizi?

•  Ino mbulangizi nzi Bbaibbele mbolipa bantu boonse?

•  Tupango twamu Bbaibbele twaamba kujatikizya bulangizi

 Bbaibbele lilatugwasya kuba abulangizi kwiinda mukutwaambila zintu zigwasya nzyotukonzya kucita kutegwa buumi bwesu bubote. Amubone zikozyanyo zimwi.

•   Amubelesye Bbaibbele kutegwa limupe busolozi bugwasya. Intembauzyo 119:105 yaamba kuti: “Ijwi lyako ndilambe kumaulu aangu, alimwi mumuni uumunikila nzila yangu.” Imumuni uumwekesya ulakonzya kucita zintu zyobilo. Ulakonzya kutugwasya kubona cintu cili ambele lyesu, alimwi acili kulamfwu. Ncimwi buyo, njiisyo zyamu Bbaibbele zilakonzya kutugwasya kulwana mapenzi ngotujisi lino, calo citupa kuzilanga kabotu zintu zicitika buzuba abuzuba. Kunze lyaboobo, zilakonzya kubukulusya nguzu zyesu akupa kuti “moyo ukkomane.” (Intembauzyo 19:7, 8) Aciindi nciconya, Bbaibbele lilatwaambila makanze aa Leza mabotu aakumbele kujatikizya bantu anyika. Bulangizi oobu bulakonzya kutupa lukkomano lutamani alimwi akukkutila.

•   Amuzumizye bantu bamwi kumugwasya. Ciindi bukkale bwesu nobwabija, inga twasunkwa kulizandula kubanamukwasyi naa balongwe. Pele Bbaibbele litwaambila kuti tacili camaano kucita boobo, nkaambo tulakonzya kucita cintu citali kabotu. (Tusimpi 18:1) Bayandwa besu balakonzya kutugwasya kuzumanana kuzilanga munzila yeelede zintu. Alimwi balakonzya kutupa mizeezo iigwasya yambotukonzya kubulwana bukkale bukatazya. (Tusimpi 11:14) Icimbi, inga batuumbulizya akutupa kukkomana, alimwi akutugwasya kuba anguzu zyakuzumanana kuliyumya kusikila mane zintu zikacince.—Tusimpi 12:25.

•   Amupaile kuli Leza. Bbaibbele lyaamba kuti: “Kowaala mukuli wako uuminya mumaanza aa Jehova, eelyo walo uyookulanganya. Kunyina nayoolekela muntu uululeme kuti awe.” b (Intembauzyo 55:22) Jehova uleelela kwaambwa kuti ngu “Leza uupa bulangizi.” (Baroma 15:13) Mulakonzya kupaila kulinguwe kujatikizya “izimupa kulibilika zyoonse,” kamujisi lusyomo lwakuti ulamubikkila maano. (1 Petro 5:7, bupanduluzi buyungizyidwe) Alimwi buya, Bbaibbele lyaamba kuti: “Uyoomuzyatika, uyoomuyumya akumwiimika nji.”—1 Petro 5:10.

•   Amuzumizye masunko kuyumya bulangizi bwanu. Bbaibbele lisyomezya kuti: ‘Ooyo uuswiilila Leza uyookkala kaliibide alimwi takanyongani akaambo kakuyoowa mapenzi.’ (Tusimpi 1:33) Ciindi guwo noyakakolomona ŋanda yamukaintu umwi uukkala ku Australia wazina lya Margaret, wakasweekelwa zintu zinji. Pele muciindi cakutyompwa, wakaiya ciiyo cipati, cakuti zintu zyakumubili tazikkalilili. Aboobo, lino wakaba amakanze aakubikkila maano kuzintu ziyandika kapati, nkokuti banamukwasyi alimwi balongwe, cilongwe cakwe a Leza, alimwi abulangizi mbolipa Bbaibbele.—Intembauzyo 37:34; Jakobo 4:8.

 Bbaibbele lisyomezya kuti bantu banoojisi buumi bubotu kumbele alimwi nyika iyoobota. Eeci ciyoocitika ino-ino. Cakutadooneka, mapenzi aabacitikila bantu mazuba aano atondezya kuti tupona “kumazuba aamamanino” aabweende bwanyika eeyi. (2 Timoteyo 3:1-5) Ino-ino, Leza uyakweendelezya zintu zicitika anyika cakumaninina alimwi akugwisya kutalulama akupenga koonse. Uyoocita oobu kwiinda mukubelesya mfwulumende iitegwa Bwami bwa Leza. (Daniele 2:44; Ciyubunuzyo 11:15) Jesu wakali kwaamba mfwulumende eeyi yakujulu ciindi naakaamba mumupailo wacikozyanyo kuti: “Abuboole Bwami bwako. Akucitwe kuyanda kwako ansi aano.”—Matayo 6:9, 10.

 Makanze aa Leza kujatikizya bantu alaambidwe cakusalazya mu Bbaibbele. Amubone mapenzi aamwi ayoogwisyigwa a Bwami bwa Leza:

•   Kunoocinyina nzala. “Nyika iyoozyala micelo yanjiyo.”—Intembauzyo 67:6.

•   Kunoocinyina malwazi. “Taakwe muntu naba omwe uukkala munyika uuyakwaamba kuti: “Ndaciswa.’”—Isaya 33:24.

•   Kunoocinyina lufwu. Leza “uyoosindula misozi yoonse kumeso [aabantu], alimwi lufwu talukabi limbi, akwalo koomoka, kulila nokuba kucisa takukabi limbi pe. Zintu zyakaindi zyamana.”—Ciyubunuzyo 21:3, 4.