Bbaibbele lijisi busongo bwiinda kubota alimwi bugwasya mubuumi. Ikuti kamulibala lyoonse akuzinzibala kuyeeya nzyomubala alimwi akuzibelesya, ‘muyoozwidilila munzila zyanu.’ (Joshua 1:8; Intembauzyo 1:1-3) Alimwi muyoomuzyiba Leza a Mwanaakwe, Jesu, mpoonya luzyibo oolo luyoomusololela kulufwutuko.​—Johane 17:3.

Ino mweelede kwaatobelanya buti kwaabala mabbuku aamu Bbaibbele? Mulakonzya kulisalila. Mulongo ooyu wakubala Bbaibbele ulamugwasya kwaabala mabbuku aamu Bbaibbele kweelana ambwaatobelana naa kweelana amakani. Mucikozyanyo, mulakonzya kusala kubala zibeela zyaamba makani aajatikizya Leza mbwaakali kweendelezya bana Israyeli bansiku. Mulakonzya kubala zibeela zimwi kutegwa mwiiye mboyakatalika mbungano ya Banakristo bamumwaanda wamyaka wakusaanguna alimwi amboyakakomena. Aboobo kuti abuzuba kamubala zyaandaano kweelana ambozibikkidwe mulakonzya kulibala Bbaibbele lyoonse mumwaka omwe.

Kufwumbwa naa muyandaula mulongo wakubala Bbaibbele buzuba abuzuba, mwaka omwe, naa mutalika buya, mulongo ooyu uyoomugwasya. Amukkope pepa eeli likonzya kusimbwa litondezya mulongo wakubala Bbaibbele, mpoonya akutalika kubala sunu.