Jehova Leza uyanda kuti katulimvwa kwaanguluka lyoonse kubandika anguwe kujatikizya mbotulimvwa. (Luka 18:1-7) Ulaswiilila nkaambo ulatubikkila maano. Mbwaanga calubomba Taateesu wakujulu ututamba kuti katupaila, ncamaano kuzumina kutamba kwakwe?—Amubale Bafilipi 4:6.

Kupaila taili buyo nzila yakulomba lugwasyo. Muciindi caboobo, mupailo utugwasya kuswena kuli Leza. (Intembauzyo 8:3, 4) Ikuti lyoonse katumwaambila Leza kujatikizya mbotulimvwa, ciyootupa kuswena kulinguwe.—Amubale Jakobo 4:8.

Notupaila, Leza tayandi kuti katubelesya majwi akulisumpula naa kwiinduluka kwaamba mipailo yakupeta. Alimwi tatuyandiki kuti mane buya tukkale munzila imwi iilibedelede notupaila. Jehova uyanda kuti katupaila kuzwa ansi aamoyo. (Matayo 6:7) Mucikozyanyo, mu Israyeli yansiku, Hana wakapaila kujatikizya penzi pati ndyaakajisi mumukwasyi. Mukuya kwaciindi, kuusa kwakwe nokwakasanduka kuba lukkomano, wakamulumba Jehova kwiinda mumupailo uuzwa ansi aamoyo.—Amubale 1 Samuele 1:10, 12, 13, 26, 27; 2:1.

Eelo kaka tulijisi coolwe cibotu! Tulakonzya kumwaambila mbotulimvwa Mulengi wesu. Alimwi tulakonzya kumutembaula akumulumba kujatikizya zintu nzyacita. Aboobo tweelede kucibikkila maano coolwe eeci citaliboteli.—Amubale Intembauzyo 145:14-16.