AMUBE ACILONGWE A LEZA

Sena Ncobeni Jehova Ulamubikkila Maano?

“Kulimvwa kubula mpindu ambweni ndepenzi pati lindipa kutaba acilongwe a Leza.” Oobu mbwaakaamba mukaintu umwi wakali kusyoma kuti Jehova takonzyi kumubikkila maano. Sena andinywe mbomulimvwa oobo? Ikuti naa mbomulimvwa, mulakonzya kulibuzya kuti, ‘Sena ncobeni Jehova ulababikkila maano bakombi bakwe umwi aumwi kumugama?’ Bwiinguzi mbwakuti inzya! Tulasyoma kuti Jehova ulababikkila maano akaambo kamajwi ngaakaamba Jesu.—Amubale Johane 6:44.

Ino ncinzi ncakaamba Jesu walo uumuzyi kabotu Jehova alimwi amakanze aakwe kwiinda muntu uuli woonse? (Luka 10:22) Jesu wakapandulula kuti: “Kunyina muntu uukonzya kuboola kulindime ccita kuti wakwelwa a Taata wakandituma.” Aboobo, tatukonzyi kumutobela Kristo—alimwi tatukonzyi kuba mukombi wa Taateesu wakujulu, Jehova—ccita kuti Jehova nguwatukwela. (2 Batesalonika 2:13) Ikuti twamvwisya ncaakali kupandulula Jesu, tuyoobubona bumboni bwakuti Leza ulatubikkila maano.

Ino caamba nzi kuti Jehova nguutukwela? Ibbala lya Chigiliki lyaamba “kukwela” lilabelesyegwa alimwi kwaamba kukwela kansabwe kajisi nswi. (Johane 21:6, 11) Sena Jehova utusungilizya buya kumubelekela, nokuba kuti tatuyandi? Peepe. Jehova wakatupa nguzu zyakulisalila, aboobo tatusungilizyi buya kumubelekela. (Deuteronomo 30:19, 20) Jehova ulailingula myoyo yamabbiliyoni aabantu bali munyika, kuyandaula bantu bajisi myoyo mibombe. (1 Makani 28:9) Amujana muntu uuli boobu, ulakkomana kapati. Munzila nzi?

Jehova ulamukwela kabotu-kabotu muntu uujisi ‘moyo mubotu.’ (Milimo 13:48) Jehova ulacita oobo munzila zyobilo—kwiinda mumulumbe wamakani mabotu uuzwa mu Bbaibbele, walo uutusikila umwi aumwi kumugama, alimwi akwiinda mumuuya wakwe uusalala. Ciindi Jehova nabona moyo iwatambula kasimpe kamu Bbaibbele, ulabelesya muuya wakwe kugwasya muntu ooyo kutegwa akamvwisye alimwi akukatobela kasimpe aako mubuumi bwakwe. (1 Bakolinto 2:11, 12) Nitwatakagwasyigwa a Leza, nitwatakaba basikutobela Jesu beni-beni alimwi nitwatakaba bakombi ba Jehova balyaabide.

Aboobo, ino majwi aa Jesu aalembedwe mulugwalo lwa Johane 6:44 atuyiisya nzi kujatikizya Jehova Leza? Jehova ulabakwela bantu akaambo kakuti ubona cintu cibotu mumyoyo yabo alimwi ulababikkila maano umwi aumwi kumugama. Ikumvwisya kasimpe aaka kwakamuumbulizya mukaintu ngotwaamba kumatalikilo aacibalo eeci. Wakaamba kuti: “Kuba mubelesi wa Jehova ncoolwe cipati muntu uuli woonse ncakonzya kuba ancico. Alimwi ikuti Jehova wakandisala kuba mubelesi wakwe, nkokuti ndilayandika kapati kulinguwe.” Ino nywebo mulimvwa buti? Sena ikuzyiba kuti Jehova ulababikkila maano bakombi bakwe umwi aumwi kumugama cimupa kuyanda kuba acilongwe anguwe?

Magwalo aamu Bbaibbele aasalidwe kubalwa mu May

Luka 22–Johane 16

[Majwi aakwelelezya sikubala aali apeeji 14]

Jehova wakatupa nguzu zyakulisalila, aboobo tatusungilizyi buya kumubelekela