Micito Mibi Iyoomana!

LEZA watupa Jwi lyakwe lyakasololelwa amuuya, lyalo lipandulula cipa kuti bantu kabacita zyintu zibi. Alimwi watupa nguzu zyakusala cakucita ambotukonzya kulijata kutegwa tutaciti zyintu zibi. (Deuteronomo 30:15, 16, 19) Aboobo, akaambo kanguzu eezyi nzyotujisi, tulakonzya kutuzyiba tumpenda ntotujisi akutuleka. Twacita boobo, tuyakukkomana antoomwe ambotukkala limwi.—Intembauzyo 1:1.

Nokuba kuti swebo twasoleka buti kutantamuka kucita zyintu zibi, bamwi bantu balazumanana kucita zyintu zibi zileta mapenzi kubantunyina. Bbaibbele lilacenjezya kuti: “Koziba kuti kumazuba aakumamanino kuyooba ziindi zikataazya.” Ikutondezya cipa kuti zyintu ‘zikataazye,’  lilayungizya kwaamba kuti: “Bantu bayooba basikuliyanda, basimuyanda mali, basimantumbwaambwa, basikakomokomo, basikasankusanku, batamvwi bamawisi, batalumbi, batakombi, basikancimwa, basimfundiilili, abasiluvuya lwakutaminizya, batalyeendeleli, basitunyetunyetu, batayandi bubotu, basimusuzyanya, basikainya, basikulisumpula, bayandisya misalo yaansi kwiinda Leza, balijisi ciwa cabukombi pele inguzu zyambubo balazikazya. Eno kobafutatila bali bobuya.”—2 Timoteo 3:1-5.

Tulasyoma kuti mwaabona mabala aakuti “mazuba aakumamanino” mumakani aakasinsimwa aazubululwa atala aawa. Ino eeco caamba nzi kulindinywe? Bantu banji balizyi kuti “mazuba aakumamanino” atondezya kuti kuli cintu cimwi ciyanda kumana. Ino cintu eeco ncinzi? Amubone Leza ncasyomezya mu Jwi lyakwe.

Bantu bacita zibi bayakugusyigwa.

“Kaba kaindi kaniini sizibi takooyooba wo; unooyeeya nkwaakabede, pele takooyooba nkuko. Pele babombemyoyo bayoovuba nyika, bayookondwa muluumuno lunji.”—INTEMBAUZYO 37:10, 11.

“Jehova ulabamba boonse bamuyandisya, pele basizibi boonse ulabanyonyoona.”—INTEMBAUZYO 145:20.

Basikudyaaminina bayakugusyigwa.

“Nkaambo ulavuna bacete nibakwiila, abalo bapengede abaabo babula mugwasyi. Ulanununa buumi bwabo kulupenzyo.”—INTEMBAUZYO 72:12, 14.

“Azyalo zilenge zini zikalubulwe kubuzike bwabubozi, bube abulubulo bulemu bwabana ba-Leza.”—BA-ROMA 8:21.

Bantu bayakupegwa nzyobayandika.

“Banooyookede umwi aumwi mucisiko camusaansa wakwe amumukuyu wakwe, nkabela takukooyooba muntu naba omwe uubayoosya.”—MIKA 4:4.

“Bayooyaka maanda akukala mulingao, bayoobyala myuunda yamisaansa akulya micelo yayo. Maanda ngebayaka taakooyookalwa umbi, amicelo njibabyala tiikooyooligwa umbi pe, nkaambo mazuba aabantu bangu ayooba mbuli mazuba aamusamu, abantu mbensalide bayoongozya milimo yamaanza aabo.”—ISAYA 65:21, 22.

Zyintu ziyakululama.

“Sena Leza takooyoobakosweda abo mbasalide, aboompolola kulinguwe isikati amasiku . . . ? Ndamwaambila kuti uyoofwamba kubakosweda.”—LUKA 18:7, 8.

“Jehova ulayandisya bululami, tasii basalali bakwe. Baluleme bayoobambwa lyoonse.”—INTEMBAUZYO 37:28.

Muciindi cabulyatu, kuyakuba bululami.

“Imbeta zyako niziboneka ansi, bantu baluwa balaiya bululami.”—ISAYA 26:9.

“Swebo tulangila ijulu ipya anyika impya, mbubonya mbuli mbwaakatusyomezya. Mulinzizyo momukala bululami.”—2 PETRO 3:13.

Bantu Balacinca—Naaba Mazuba Aano

Kakunyina kudooneka, toonse tulakonzya kukkomana azisyomezyo eezyi. Pele ino ncinzi citupa kusyoma kuti zyintu eezyi  ziyakuzuzikizyigwa? Noliba lino tulijisi bumboni butondezya kuti zisyomezyo zya Leza ziyakuzuzikizyigwa. Ino mbumboni nzi oobo? Mbumboni bwakuti mazuba aano nyika yoonse bantu banji batuleka tumpenda tubi mbuli bulyatu, kutalilemeka, bukali alimwi lino balasyomeka, mbaasiluumuno alimwi mbatete moyo. Mazuba aano, Bakamboni ba Jehova bainda ku 7 miliyoni balamvwana alimwi tabasalululani akaambo kamubala, musyobo, kucisi nkobazwa, eezyi zyintu zyalo izipa kuti bantu kabatamvwani, kabalwana akujayana kwamyaka minji. * Eezyi zicitika mazuba aano zitupa kusyoma kuti zisyomezyo zya Leza ziyakuzuzikizyigwa.

Ino ncinzi cipa kuti bantu bacince? Bwiinguzi nkobuli mubusinsimi mbwaakalemba Isaya buli mu Bbaibbele. Wakalemba kuti:

“Umpe uyookala antoomwe akabelele; siluwe uyoolala antoomwe atupongo; moombe akalavu bayoolya mucilido comwe; boonse bayoolala antoomwe, nkabela mwana muniini uyoobeembela. . . . Mulavu uyoocela bwizu mbubonya mbuli iŋombe. Mwana uucinyonka uyoosobana abulyango bwanzoka, amwana uulesedwe uyoobika ijanza lyakwe abwina bwacipile. Tabakooyooluma nikuba kunyonyoona moonse mucilundu cangu cisalala, nkaambo nyika iyoozula luzibo lwa-Jehova mbubonya mbuli maanzi mbwaazuzya lwizi.”—Isaya 11:6-9.

Sena businsimi oobu bwaamba buyo ciindi banyama nobayookkala muluumuno abantu? Peepe, kuli azimwi. Amubone ncocaamba cibalo nkocili kumamanino: “Nyika iyoozula luzibo lwa-Jehova.” Sena luzyibo  lwa Jehova lulakonzya kupa kuti banyama bacince? Peepe. Pele lulakonzya kubacinca bantu! Businsimi oobu bwaamba kuti aabo ibajisi tumpenda twabunyama bayakutuleka akusama buntu bwa Bunakristo akaambo kakwiiya akutobela ncoliyiisya Bbaibbele.

Mucikozyanyo, atubone cakacitika kuli ba Pedro. * Bakali kusyoma kuti bakali kulwanina lwaanguluko nibakatalika kubeleka akabunga kazigwebenga. Nibakabayiisya cakucita, bakabaambila kuti bakaumpe maanda aabamapulisa. Nibakacili kulibambila kucita boobo, bakaangwa. Ba Pedro bakakkala muntolongo kwamyezi iili 18 nkobakazumanana amicito yakubukila mfwulumende. Aciindi nciconya eeci, bakaintu baba Pedro bakatalika kwiiya Bbaibbele a Bakamboni ba Jehova. Nibakazwa buyo muntolongo, ba Pedro abalo bakatalika kwiiya Bbaibbele alimwi nzyobakayiya kujatikizya Jehova Leza zyakapa kuti bacince mbobakali kuzibona zyintu. Bakaamba kuti, “Ndilamulumba Jehova akaambo kakuti myaka njindakali cigwebenga, tiindakajaya muntu naba omwe. Lino ndibelesya panga lya muuya wa Leza, Ibbaibbele, kwaambila bamwi mulumbe waluumuno abululami—mulumbe mubotu wa Bwami bwa Leza.” Ba Pedro mane bakaakuswaya  kumaanda aabamapulisa ngobakali kuyanda kuumpa, kutegwa bakakambauke mulumbe waluumuno alimwi awanyika mutakwe nkondo.

Inguzu nzyolijisi Jwi lya Leza izyakucinca bantu zitupa kusyoma kuti Leza uyakubugusya bubi boonse kweelana ambwaakasyomezya. Masimpe, bantu tabakazumanani kucita zyintu zibi, pele bayakucinca. Lino-lino Jehova uyoomugusya wakatalisya zibi, Saatani Diabolosi walo weendelezya bantu boonse bacita zibi. Ibbaibbele lyaamba kuti: “Nyika yoonse ili mumaanza aamubi.” (1 Johane 5:19, NW) Pesi lino-lino uyakugusyigwa. Abalo bazumanana kucita zyintu zibi bayakugusyigwa. Eelo kaka ciyoobota kupona aciindi eeco!

Ino muntu weelede kucita nzi kutegwa akajanike aciindi eeco? Amuyeeye kuti kuba ‘aluzyibo lwa Jehova’ nkokupa kuti bantu mazuba aano bacince alimwi kuyakupa kuti nyika yoonse ikabe kabotu kumbele. Ikuti mwayiya Bbaibbele akutobela ncolyaamba mbuli mbobakacita ba Pedro, andinywe mulakonzya kulangila kuyakupona munyika munakuli “bululami.” (2 Petro 3:13) Aboobo, tumukulwaizya kuti mutalike kwiiya zya Leza a Jesu Kristo kutegwa mukajane buumi butamani.—Johane 17:3.

Bupanduluzi buyungizidwe

Majwi aakwelelezya sikubala aali apeeji 9]

Andinywe mulakonzya kulangila kuyakupona munyika munakuli “bululami.”—2 PETRO 3:13