Kucita Mulimo Wabupainiya Kupa Kuti Cilongwe Cesu a Leza Ciyume
Kucita Mulimo Wabupainiya Kupa Kuti Cilongwe Cesu a Leza Ciyume
“Ncibotu kwiimbila Leza wesu.”—INT. 147:1.
MIBUZYO YAKUZINZIBALA KUYEEYA
Mbuti mulimo wabupainiya mboukonzya kuyumya cilongwe canu a Jehova?
Ikuti kamuli mupainiya, ncinzi cikonzya kumugwasya kuzumanana mumulimo ooyu mubotu?
Ikuti naa tamuli mupainiya, nkucinca kuli buti kukonzya kumugwasya kutegwa mutalike mulimo wabupainiya?
1, 2. (a) Ncinzi cikonzya kucitika ikuti katuyeeya alimwi akwaamba kujatikizya muntu ngotuyanda? (Amubone cifwanikiso icili kumatalikilo aacibalo.) (b) Mibuzyo nzi njotutiilange-lange?
KUYEEYA alimwi akwaamba kujatikizya muntu ngotuyanda kulakonzya kupa kuti katumvwana kapati amuntu ooyo. Oobo mbocibede acilongwe cesu a Jehova Leza. Naakali mweembezi, Davida wakali kujana ciindi cakulanga nyenyeezi akuzinzibala kuyeeya kujatikizya Mulengi mupati wanzizyo. Wakalemba kuti: “Nembona majulu aako, milimo yaminwe yako, mwezi anyenyeezi nzowakalenga! Ino muntu ncinzi nowamwiibaluka? Amwana amuntu ncinzi, nomuswaya?” (Int. 8:3, 4) Mwaapostolo Paulo naakamana kulanga-langa makanze a Jehova aajatikizya Israyeli wakumuuya mbwaakali kuzuzikizyigwa, wakaamba kuti: “Eelyo talweeli kaka lubono, busongo aluzyibo lwa Leza!”—Lom. 11:17-26, 33.
2 Notutola lubazu mumulimo wakukambauka, tulayeeya alimwi akwaamba kujatikizya Jehova. Kucita oobo kulagwasya kapati. Banabunji ibacikonzya kucita mulimo waciindi coonse bajana kuti cilongezyo cimwi icijanika akaambo kakuyungizya ciindi cibelesyegwa mumulimo wa Bwami ncakuti luyando ndobajisi kuli Leza lulayuma kapati. Kufwumbwa naa muli kale mumulimo waciindi coonse naa muyanda kucita oobo, amubone mubuzyo ooyu: Mbuti mulimo waciindi coonse mboukonzya kuyumya cilongwe canu a Jehova? Ikuti kamuli mupainiya, amulibuzye kuti, ‘Ncinzi iciyakundigwasya kutegwa ndizumanane mumulimo ooyu mubotu?’ Ikuti naa tamunaba mupainiya, amulibuzye kuti, ‘Nkucinca kuli buti nkondikonzya kucita kutegwa nditalike mulimo ooyu?’ Atubone nzila mwalo mulimo waciindi coonse moukonzya kuyumya cilongwe cesu a Leza.
MULIMO WACIINDI COONSE MBOUCIJATIKIZYA CILONGWE CESU A LEZA
3. Notuli mumulimo wakukambauka, mbuti mbotujatikizyigwa ciindi notwaamba kujatikizya zisyomezyo zya Bwami zyakumbele?
3 Kubandika zisyomezyo zya Bwami zyakumbele abamwi kupa kuti katumvwana kapati a Jehova. Ndugwalo nzi ndomuvwula kubelesya ciindi nomucita mulimo wakuŋanda aŋanda? Sena muvwula kubelesya Intembauzyo 37:10, 11; Daniele 2:44; Johane 5:28, 29; naa Ciyubunuzyo 21:3, 4? Ciindi notubandika zisyomezyo eezyi abantu, tuyeezyegwa kuti Leza wesu mwaabi ncobeni nguupa “cipego cibotu cili coonse alimwi acipego cilondokede.” Eeci cipa kuti tumuyande kapati.—Jak. 1:17.
4. Nkaambo nzi ncotulumba kapati bubotu bwa Leza twabona mbobapengede kumuuya bamwi?
4 Kubona mbobapengede kumuuya bantu mbotukambaukila kupa kuti katubikkila kapati maano kukasimpe. Bantu munyika tabajisi busolozi bukonzya kubagwasya kuzwidilila akukkomana. Bantu banji balalibilika kujatikizya ziboola kumbele alimwi tabajisi bulangizi. Baluujisi kulangaula kutegwa bazyibe mpindu yabuumi. Nobaba baabo ibajisi bubi mumakani aabukombi bajisi buyo luzyibo lusyoonto lwamu Magwalo. Bali mbuli bantu bakaindi baku Nineve. (Amubale Jona 4:11.) Ikuti twayungizya ciindi ncotubeleka mumulimo wakukambauka, tulabona lwiindano luliko akati kabukkale bwakumuuya bwabaabo mbotukambaukila alimwi abwabantu ba Jehova. (Is. 65:13) Tulayeezyegwa kujatikizya bubotu bwa Jehova akubona kuti tatupi buyo nzyotuyandika kumuuya; pele ulabatamba bantu boonse kutegwa bakatalusyigwe kumuuya akuba aabulangizi bwancobeni.—Ciy. 22:17.
5. Ino kugwasya bamwi kumuuya kutupa kulimvwa buti kujatikizya mapenzi ngotujisi?
5 Kugwasya bamwi kumuuya kupa kuti tucileke kulibilika kapati amapenzi ngotujisi. Ba Trisha, bapainiya baciindi coonse, bakabona mbwaali aamasimpe majwi aaya ciindi bazyali babo nobakalekana. Bakaamba kuti: “Ndakapenga kapati mumizeezo nocakacitika eeco.” Bumwi buzuba nokuba kuti bakaluuside kapati akulimvwa kuti inga tiibaunka mumuunda, bakasala buyo kuunka kuyakusololela ciiyo ca Bbaibbele kubana botatwe ibatakali kukkala kabotu aŋanda. Bausyi bakalitijide, mpoonya mupati wabo musankwa wakali kubatundulula. Ba Trisha bakaamba kuti: “Mapenzi oonse ngondakajisi akali masyoonto kweezyanisya amapenzi ngobakajisi. Notwakali kwiiya, bakatalika kulibonya kukkomana abusyu alimwi bakatalika kuseka-seka caansaansi. Aaba bana cakali cipego kuzwa kuli Jehova, kwaambisya mubuzuba oobo.”
6, 7. (a) Mbuti mboluyumizyigwa lusyomo lwesu ciindi notuyiisya kasimpe kamu Bbaibbele? (b) Mbuti mbokujatikizyigwa kulumba kwesu kubusongo bwa Leza ciindi notubona basikwiiya Bbaibbele kabacinca bukkale bwabo kwiinda mukubelesya njiisyo zyamu Magwalo?
6 Kuyiisya bamwi kasimpe kamu Bbaibbele kupa kuti tuyumye lusyomo lwesu. Mwaapostolo Paulo wakaamba zyaba Juda bamwi bamumazuba aakwe ibatakali kucita nzyobakali kukambauka, wakati: “Sena yebo ooyiisya umbi, toliyiisyi omwini?” (Lom. 2:21) Oobo tabusyi mbobabede bapainiya mazuba aano! Balijisi zyoolwe zinji zyakuyiisya bamwi kasimpe akusololela ziiyo zya Bbaibbele. Kutegwa bazwidilile mukucita oobo beelede kulibambila ciiyo cimwi acimwi ambweni akuvwuntauzya kutegwa baingule mibuzyo. Mupainiya uulaazyina lyakuti Janeen wakapandulula kuti: “Ciindi aciindi nondijisi coolwe cakuyiisya bamwi kasimpe, ndilimvwa kuti kasimpe kalindinjide kapati mumoyo. Akaambo kaceeco, lusyomo lwangu lulazumanana kukomena.”
7 Kubona basikwiiya Bbaibbele kabacinca bukkale bwabo kwiinda mukubelesya njiisyo zyamu Bbaibbele kupa kuti katulumba kapati busongo bwa Leza. (Is. 48:17, 18) Eeci acalo citupa kuti makanze eesu aakuzumanana kubelesya njiisyo eezyi mubuumi bwesu ayume. Ba Adrianna, bapainiya, bakaamba kuti: “Buumi bwabantu bulabija kapati ikuti kabasyoma mubusongo bwabo. Pele nobatalika kusyoma busongo bwa Jehova, bubotu bulatalika kulibonya mpoonya-mpoonya.” Mbubwenya buyo, abalo ba Phil bakaamba kuti: “Mulabona Jehova mbwacinca buumi bwabantu aabo ibakaalilwa kucinca nobakasola kucita oobo munguzu zyabo.”
8. Mbuti mbotujatikizyigwa kwiinda mukubeleka abalongwe babotu mumulimo wakukambauka?
8 Kubeleka abalongwe babotu mumulimo wakukambauka kupa kuti tuyume kumuuya. (Tus. 13:20) Bapainiya banji balatola ciindi cilamfwu mumulimo wakukambauka kabali abakambausinyina. Eeci cipa kuti babe azyoolwe zinji ‘zyakuyumizyanya.’ (Lom. 1:12; amubale Tusimpi 27:17.) Mupainiya uulaazyina lyakuti Lisa wakaamba kuti: “Kumulimo kanji-kanji bantu bayanda kuzundana akufwidilana munyono. Abuzuba ulamvwa bantu kabavwiya akwaamba majwi aacisapi. Bantu bayanda kuti lyoonse kabali mbabo ibali kumbele. Zimwi ziindi balakonzya kukusampaula naa kukuseka akaambo kabukkale bwako bwa Bunakristo. Pele kubeleka a Banakristoma mumulimo wakukambauka kulayumya ncobeni. Ndakotoka, inga ndilimvwa kukatalusyigwa nokuba kuti inga ndilikatede.”
9. Ncinzi cikonzya kucitika kucikwati cesu ikuti katucitila antoomwe bupainiya angotukwetene limwi?
9 Kucitila antoomwe bupainiya angotukwetene limwi kupa kuti cikwati cesu ciyume. (Muk. 4:12) Ba Madeline, balo ibacitila antoomwe bupainiya abalumi babo, bakapandulula kuti: “Mebo abalumi bangu tulajana ciindi cakubandika mbowabede mulimo wakukambauka naa kaambo kamwi nkotwajana mukubala kwesu kwa Bbaibbele nkotukonzya kubelesya mumulimo wakukambauka. Mwaka amwaka notucitila antoomwe bupainiya, cikwati cesu cilazumanana kuyuma.” Mbubwenya buyo, abalo ba Trisha bakaamba kuti: “Toonse tulikanzide kutanjila munkongole, aboobo tatupengi kulangaula mali manji. Tubelesya mulongo omwe mumulimo wakukambauka, aboobo tucitila antoomwe nyendo zyakupilukila amukusololela ziiyo zya Bbaibbele, eeci cipa kuti katweendelana mumizeezo akumuuya.”
10. Mbuti mbolujatikizyigwa lusyomo lwesu ciindi notubikka ziyandika zya Bwami mubusena bwakusaanguna akubona Leza mbwatugwasya?
10 Kubona Jehova mbwatugwasya akwiingula mipailo yesu notusaanguna kucita ziyandika zya Bwami, kupa kuti katumusyoma kapati Jehova. Nokuba kuti oobo mbocibede ku Banakristo boonse basyomeka, aabo ibali mumulimo waciindi coonse babona kuti kusyoma Jehova kubagwasya kuzumanana kubeleka mulimo wabupainiya. (Amubale Matayo 6:30-34.) Ba Curt, balo ibabeleka kabali bapainiya alimwi akugwasyilizya mulangizi wabbazu, cimwi ciindi bakalombwa kuyakuswaya mbungano imwi musinzo weendwa amootokala mawoola obilo acisela. Balo alimwi abakaintu babo ibabeleka kabali bapainiya abalo bakajisi buyo mungwimba iwakali kukonzya kubasisya nkobakali kuunka kutali kupiluka kuŋanda, alimwi kwakaceede nsondo yomwe kutegwa ba Curt bavwole. Ba Curt bakaamba kuti: “Ndakatalika kulibuzya naa kusala kwangu kwakali kabotu.” Nobakamana kwaapailila makani aaya, bakabona kuti bakali kukonzya kuuzuzikizya mulimo ooyu, kabasyomede kuti Leza uyakubalanganya. Nobakali kulibambila kunyamuka, mucizyi umwi wakaboola akubaambila kuti ndamuletela cipego. Cipego eeco akali mali aakkwana yaayo ngobakali kuyandika mulweendo oolu. Ba Curt bakaamba kuti: “Ikuti kocitikilwa zyintu zili boobu ciindi aciindi, tacikatazyi kubona Jehova mbwagwasya.”
11. Nzilongezyo nzi zimwi bapainiya nzyobajana?
11 Kanji-kanji bapainiya bajana kuti nobabelesya ciindi cabo mumulimo wa Jehova akuzumanana kumvwana anguwe, balajana zilongezyo zinji kapati. (Dt. 28:2) Nokuba boobo, kuli buyumuyumu bukonzya kujanwa mumulimo wabupainiya. Kunyina mubelesi wa Leza uutakonzyi kusikilwa mapenzi aboola akaambo kabuzangi bwa Adamu. Nokuba kuti bapainiya bamwi cakabaalila kuzumanana mumulimo ooyu, buyumuyumu bujanwa bulakonzya kweelebwa. Ncinzi cikonzya kubagwasya bapainiya kuzumanana kukkomana mumulimo ooyu?
MBOMUKONZYA KUZUMANANA MUMULIMO WACIINDI COONSE
12, 13. (a) Ncinzi mupainiya ncaelede kucita ikuti kajisi buyumuyumu bwakukkwanya mawoola aayandika? (b) Nkaambo nzi kubala Bbaibbele, ciiyo canu nobeni, alimwi akuzinzibala kuyeeya ncokuyandika kapati?
12 Bapainiya banji balijisi bubi kapati. Zimwi ziindi nciyumu kucita zyoonse ziyandika, aboobo kucita zyintu bweelede kulayandika. (1 Ko. 14:33, 40) Ikuti mupainiya kajisi buyumuyumu bwakukkwanya mawoola aayandika, weelede kulanga-langa mbwacibelesya ciindi. (Ef. 5:15, 16) Ulakonzya kulibuzya kuti: ‘Ncinji buti ciindi ncondibelesya mukulikondelezya? Sena ndeelede kulilesya? Sena inga ndacesya ciindi ncondibeleka mumulimo wakumubili?’ Munakristo uuli woonse ulakonzya kuzumina kuti ncuuba-uba kuyungizya zyintu zyakucita aali zyeezyo nzyacita; aboobo, aabo ibali mumulimo waciindi coonse beelede kwaalanga-langa makani aaya kutegwa babone naa kuli aayandika kucinca.
13 Mulongo wamupainiya weelede kubikkilizya akubala Bbaibbele abuzuba, ciiyo cakwe mwini, alimwi aciindi cakuzinzibala kuyeeya. Alimwi cilayandika kuti mupainiya walilesya caboola kukucita zyintu zitayandiki kapati kutegwa zitamumanini ciindi ncayanda kubelesya kucita zyintu ziyandika kapati. (Flp. 1:10) Mucikozyanyo, amusole kubona mupainiya iwakotoka mumulimo naamana kubeleka buzuba boonse. Uyanda kuti asika kuŋanda alibambile miswaangano. Nokuba boobo, wasaanguna kuyasya cipekupeku kutegwa aswiilile makani. Aboobo, wayasya cipekupeku akuswiilila makani. Mpoonya makani naamana, kwaboola pulogilamu naa filimu njayanda. Naalanga ankoloko wajana kuti kwainda kale mawoola obilo alimwi tanatalika kulibambila miswaangano kweelana ambwaali kukanza. Nkaambo nzi eeci ncociyandika kubikkila maano? Aabo ibatola lubazu muzisobano beelede kubikkila maano kumibili yabo kutegwa bazumanane mumulimo ooyo. Mbubwenya buyo, abalo bapainiya beelede kuba abubambe bwakucita ciiyo cabo beni lyoonse kutegwa kabali bayumu kumuuya akuzumanana mumulimo waciindi coonse.—1 Ti. 4:16.
14, 15. (a) Nkaambo nzi bapainiya ncobeelede kuba aliso lilangide buyo acintu comwe? (b) Ikuti mupainiya wajana buyumuyumu, ncinzi ncaelede kucita?
14 Bapainiya ibazwidilila balabikkila maano kubona kuti bapona buumi butayandiki zyintu zinji. Jesu wakakulwaizya basikwiiya bakwe kuti babe aliso lilangide buyo acintu comwe. (Mt. 6:22) Walo mwini wakapona buumi butayandiki zyintu zinji kutegwa acite mulimo wakwe kakunyina kunyonganizyigwa. Akaambo kaceeco wakali kukonzya kwaamba kuti: “Bamwaaba balijisi malyango abayuni bamujulu balijisi ziteente, pele Mwana wamuntu tajisi akooneka mutwe.” (Mt. 8:20) Ikuti mupainiya kayanda kwiiya kuzwa kuli Jesu, weelede kuzyiba kuti kuba aazyintu zinji kuyandika ciindi cinji cakuzilanganya akuzibamba.
15 Bapainiya balizyi kuti mulimo ngobacita ngwaalubazu, nokuba boobo tabayeeyi kuti balo mbabotu kwiinda bamwi. Muciindi caboobo, balizyi kuti coolwe camulimo wabupainiya ncipego kuzwa kuli Jehova. Aboobo, kutegwa bazumanane kubeleka mulimo wabupainiya, beelede kusyoma Jehova. (Flp. 4:13) Buyumuyumu amapenzi ayakuboola. (Int. 34:19) Ikuti naa aboola, muciindi cakufwambaana kucileka mulimo ooyu, bapainiya beelede kulangila kuli Jehova akumupa ciindi cakuti abagwasye akubasololela. (Amubale Intembauzyo 37:5.) Ciindi nobabona Leza mbwabagwasya caluyando, bayakumvwana kapati anguwe, Usyi wabo wakujulu uulanganya.—Is. 41:10.
SENA ANDINYWE INGA MWATALIKA MULIMO WABUPAINIYA?
16. Ncinzi ncomweelede kucita kuti kamuyanda kucita bupainiya?
16 Ikuti andinywe kamuyanda kutambula zilongezyo mbuli zyeezyo nzyobajana aabo ibali mumulimo waciindi coonse, amumuzyibye Jehova makanze aanu. (1 Jo. 5:14, 15) Amubandike abaabo ibacita mulimo wabupainiya. Amube ambaakani zikonzya kumugwasya kutegwa mube mupainiya. Eeco ncencico ncobakacita ba Keith aba Erika. Boonse bobilo bakalilembedwe mulimo, alimwi mbuli banabukwetene banji ibali muciimo cabo, bakaula ŋanda amootokala mupya ciindi cisyoonto buyo kuzwa nobakakwatana. Bakaamba kuti: “Twakali kuyeeya kuti zyintu eezyo inga zyatupa kukkutila—pele eeco kunyina nocakacitika.” Ba Keith nobakatandwa mulimo, bakatalika kucita bupainiya bwakugwasyilizya. Bakaamba kuti: “Kucita bupainiya kwakandigwasya kubona lukkomano luboola akaambo kakutola lubazu mumulimo wakukambauka.” Bakatalika kumvwana abanabukwetene bambi ibakali bapainiya, banabukwetene aabo bakabagwasya kubona lukkomano luboola kwiinda mukupona buumi butayandiki zyintu zinji akucita bupainiya. Ncinzi ncobakacita ba Keith aba Erika? Bakaamba kuti: “Twakalemba mulongo wambaakani zyakumuuya, akunamatika pepa eelyo kufiliji, mpoonya twakali kucconga mbaakani eezyo nzyotwakali kuzuzikizya.” Muciindi, bakacikonzya kucita bupainiya.
17. Nkaambo nzi ncocili cabusongo kucinca zyintu nzyomucita naa bukkale kutegwa mucite bupainiya?
17 Sena andinywe inga mwatalika mulimo wabupainiya? Ikuti kamutakonzyi kucita oobo lino, amubone mbocinga cakonzyeka, amucite zyoonse nzyomukonzya kuyumya cilongwe canu a Jehova kwiinda mukuyungizya ciindi ncomubeleka mumulimo wakukambauka. Kwiinda mukwaapailila makani aayo, mulakonzya kujana kuti kucinca zimwi zyintu nzyomucita naa bukkale inga kwapa kuti mucikonzye kucita bupainiya. Ikuti mwatalika bupainiya, muyakujana lukkomano lunji. Lukkomano luboola akaambo kakubikka ziyandika zya Bwami mubusena bwakusaanguna luyakuvwula. (Mt. 6:33) Muyakujana lukkomano iluboola kwiinda mukwaabila bambi. Kuyungizya waawo, muyakujana zyoolwe zinji zyakuyeeya akwaamba kujatikizya Jehova, kuyumya luyando lwanu ndomujisi kulinguwe akumukkomanisya.
[Mibuzyo yaciiyo]
[Cifwanikiso icili apeeji 27]
[Zifwanikiso izili apeeji 29]
Kuba basungu mumulimo waciindi coonse kupa kukkutila mubuumi (Amubone muncali 9)
