Atukkomane Akaambo Kabulangizi Bwesu
Atukkomane Akaambo Kabulangizi Bwesu
“[Kuli] bulangizi bwabuumi butamani oobo Leza uutakonzyi kubeja, mbwaakasyomezya kale-kale.”—TIT. 1:2.
KWIINDULUKA
․․․․․
Tuzyi buti kuti kuli lukkomano kujulu ciindi umwi wabananike nazumanana kusyomeka mubuumi bwakwe boonse?
․․․․․
Ino kuzuzikizyigwa kwabulangizi bwambelele zimbi kuswaangene buti akwabananike?
․․․․․
Kutegwa tukabubone bulangizi bwesu kabuzuzikizyigwa, ‘mbukkale nzi busalala’ alimwi ‘milimo nzi yakubelekela Leza cakulyaaba’ njotweelede kutondezya?
1. Mbuti bulangizi mbwaatupa Jehova mbobukonzya kutugwasya kuliyumya?
MWAAPOSTOLO PAULO wakaamba kuti Jehova ngu “Leza uupa bulangizi.” Alimwi wakayungizya kwaamba kuti Jehova ulakonzya ‘kutuzuzya akukondwa koonse alimwi aluumuno kutegwa twiindile kuba abulangizi munguzu zyamuuya uusalala.’ (Lom. 15:13) Ikuti twaindila kuba abulangizi, tuyoocikonzya kuliyumya mubukkale buli boonse bukonzya kutucitikila, myoyo yesu kaizwide kukondwa aluumuno. Mbubwenya mbuli Banakristo bananike bulangizi buli boobu buyooba “ngobyo yiimika bwato yabuumi . . . , ibusinizyide alimwi ibuyumu nta” aku Banakristo bamwi. (Heb. 6:18, 19) Bulangizi bwesu ncintu ncotukonzya kujatilila ciindi camapenzi aamubuumi, ncintu cikonzya kutugwasya kutegwa lyoonse katujisi lusyomo.—Amubale Bahebulayo 2:1; 6:11.
2. Mbulangizi nzi bobilo mbobajisi Banakristo bapona mazuba aano, alimwi nkaambo nzi “[ba]mbelele zimbi” ncobayandisya kuzyiba zyabulangizi bwa bananike?
2 Banakristo ibapona mazuba aano aamamanino babikkila maano kubulangizi bomwe akati kabulangizi bobilo buliko. Banakristo bananike baceede ibali “[mu]katanga kaniini” bajisi bulangizi bwabuumi butafwi kujulu kabali bami abapaizi antoomwe a Kristo mu Bwami bwakwe. (Lk. 12:32; Ciy. 5:9, 10) Kumane “[iba]nkamu mpati” “[ya]mbelele zimbi” bajisi bulangizi bwakupona kukabe kutamani muparadaiso anyika kabali balelwa ba Bwami bwabu Mesiya. (Ciy. 7:9, 10; Joh. 10:16) Bambelele zimbi tabeelede kuluba kuti lufwutuko lwabo luyeeme akugwasyilizya ‘banyina’ Kristo bananike bacipona anyika. (Mt. 25:34-40) Bananike bayootambula bulumbu bwabo, pele abwalo bulangizi bwambelele zimbi buyoozuzikizyigwa ncobeni. (Amubale Bahebulayo 11:39, 40.) Cakusaanguna, atulange-lange bulangizi mbobajisi bananike.
“BULANGIZI BUPONA” BWA BANAKRISTO BANANIKE
3, 4. Muunzila nzi Banakristo bananike ‘mbobazyalwa bupya kuti babe abulangizi bupona,’ alimwi ino mbulangizi oobu ninzi?
3 Mwaapostolo Petro wakalemba magwalo obilo ku Banakristo bananike, balo mbaakaita kuti ‘basale.’ (1 Pe. 1:1) Wakaamba makani aabulangizi butaliboteli bwambelele zimbi. Mulugwalo lwakwe lwakusaanguna, Petro wakalemba kuti: “Aatembaulwe Leza alimwi Usyi wa Mwami wesu Jesu Kilisito, nkaambo muluse lwakwe lutalivwulili wakatupa kuzyalwa kupya kuti tube abulangizi bupona kwiinda mububuke bwa Jesu Kilisito kuzwa kubafwu, kuti mube alukono lutanyonyooki, lunyina kampenda alimwi lutakulumpali. Ilukono oolu mwakayobwedwa ndulo kujulu, nywebo nomukwabililwa anguzu zya Leza kwiinda mulusyomo kutegwa mukafwutuke mulufwutuko iluyooyubununwa kuciindi cakumamanino. Akaambo kaceeci mulakondwa kapati.”—1 Pe. 1:3-6.
4 Mweelwe musyoonto wa Banakristo basalidwe a Jehova kutegwa babelekele antoomwe a Kristo mu Bwami bwakujulu, ‘balazyalwa bupya’ kabali bana ba Leza bamuuya. Balananikwa amuuya uusalala kuba bami alimwi abapaizi antoomwe a Kristo. (Ciy. 20:6) Petro wakaamba kuti “kuzyalwa kupya” kubapa “bulangizi bupona,” calo ncaita kuti “[nd]ukono lutanyonyooki, lunyina kampenda alimwi lutakulumpali” luyobwedwe mbabo “kujulu.” Tacigambyi pe kuti bananike “[ba]lakondwa kapati” abulangizi bwabo bupona. Pele kuzuzikizyigwa kwabulangizi bwabo, kuyeeme akusyomeka kwabo.
5, 6. Nkaambo nzi Banakristo bananike ncobeelede kusungwaala kutegwa basinizye bwiite bwabo?
5 Mulugwalo lwakwe lwabili, Petro wakakulwaizya Banakristo bananike ‘kusungwaala kutegwa basinizye bwiite alimwi akusalwa kwabo.’ (2 Pe. 1:10) Bananike beelede kusungwaala kutegwa babe abube bwa Bunakristo mbuli lusyomo, luyando alimwi beelede kubelekela Leza cakulyaaba akuba aluyando lwabunyina. Petro wakaamba kuti: “Ikuti naa zyintu eezyi kaziliko mulindinywe akuvwulisya, ziyoopa kuti mutabi batolo naa kutazyala micelo.”—Amubale 2 Petulo 1:5-8.
6 Mumulumbe wakwe kubaalu bananikidwe amuuya bamumwaanda wamyaka wakusaanguna ibakali mumbungano yaku Filadelfia mu Asia Minor, Kristo iwakabusyigwa wakaamba kuti: “Akaambo kakuti wakalitobela jwi lyaamba zyakuliyumya kwangu, andime ndiyookubamba muciindi camasunko, iciyoosikila muntu woonse anyika, ikusunka baabo bakkala anyika. Ndilaboola cakufwambaana. Kozumanana kujatisya eeco ncojisi, ikutegwa kutabi muntu uukunyanga musini wako.” (Ciy. 3:10, 11) Ikuti Munakristo munanike wacileka kusyomeka, takonzyi kuyootambula “musini wabulemu uutakulumpali” ngobakasyomezyegwa aabo ibakasalwa ibazumanana kusyomeka kusikila mane bafwa.—1 Pe. 5:4; Ciy. 2:10.
COOLWE CAKUNJILA MU BWAMI
7. Ino mbulangizi nzi butaliboteli Juda mbwaakaamba mulugwalo lwakwe?
7 Mumwaka wa 65 C.E., Juda mwanookwabo a Jesu wakalemba lugwalo ku Banakristonyina bananike mbaakaamba kuti “bakaitwa.” (Jud. 1; amweezyanisye a Bahebulayo 3:1.) Wakali kuyanda kubalembela kujatikizya bulangizi butaliboteli bwalufwutuko ‘ndobajisi boonse’ Banakristo bajisi bwiite bwakujulu mu Bwami bwa Leza. (Jud. 3) Nikuba kuti wakalijisi makani aambi aakali kuyandika cakufwambaana ngaakali kuyanda kulemba, kumamanino aalugwalo lwakwe lufwaafwi wakalemba kujatikizya bulangizi butaliboteli mbobajisi Banakristo bananike naakati: “Lino kuli yooyo uukonzya kumukwabilila kutegwa mutalebwi alimwi akumupa kwiima nji cakukondwa kapati kamutakwe kampenda kumbele lyabulemu bwakwe, kuli Leza omwe buyo Mufwutuli wesu kwiinda muli Jesu Kilisito Mwami wesu, akube bulemu, bupati, nguzu alimwi abweendelezi kuzwa lili alili asunu alimwi alyoonse mane kukabe kutamani.”—Jud. 24, 25.
8. Kweelana alugwalo lwa Juda 24, ncinzi citondezya kuti kulaba kukondwa kujulu kuti munanike omwe wazumanana kusyomeka mubuumi bwakwe boonse?
8 Masimpe, Banakristo bananike ibasyomeka bayanda kulikwabilila umwi aumwi kumugama kutegwa batakanyonyoonwi. Bulangizi bwabo ibuyeeme aa Bbaibbele mbwakuti Jesu Kristo uyoobabusya kuzwa kubafwu, kubapa coolwe cakuyoolibonya kumbele lya Leza kabakkomene alimwi kabalondokede kumuuya. Kuti munanike wafwa kasyomeka, ulijisi bulangizi bwa “[ku]busigwa . . . amubili wamuuya,” kubusyigwa amubili ‘uutaciboli limbi pe . . . , mubulemu.’ (1 Ko. 15:42-44) Kuti kakuli “kukondwa kapati kujulu akaambo kasizibi omwe weempwa,” amuyeeye buyo kukondwa kubako kujulu kuti omwe buyo aakati kabanyina Kristo bananikidwe amuuya wamanizya buumi bwakwe bwaanyika cakusyomeka! (Lk. 15:7) Jehova alimwi azilenge zyamuuya zisyomeka bayookkomana antoomwe amunanike ooyo uutambula bulumbu bwakwe “cakukondwa kapati.”—Amubale 1 Johane 3:2.
9. Mbuti bwiite bwakunjila mu Bwami mbobuli “coolwe cipati” kubananike basyomeka, alimwi ino bulangizi oobu bubajatikizya buti bananike bacili anyika?
9 Mbubwenya buyo, awalo Petro wakalembela Banakristo bananike kuti naa basinizya bwiite bwabo kwiinda mukusyomeka, “[ba]yoopegwa coolwe cipati cakunjila mu Bwami butamani bwa Mwami a Mufwutuli wesu Jesu Kilisito.” (2 Pe. 1:10, 11) “[Ba]yoopegwa coolwe cipati”cakunjila akutambula bulumbu bwakujulu,’ kumwi bube bwabo bwa Bunakristo kabumweka. Majwi aakuti “[ba]yoopegwa coolwe cipati” alimwi alakonzya kutondezya kuti aaba ibalitakata mumuzundano wakubuumi bayookondwa kapati. Balakkomana alimwi kubona mbobasyomeka mubuumi bwabo. Cakutadooneka, bulangizi buli boobu bulabayumya-yumya Banakristo bananike bacili anyika ‘kulibambila kucita mulimo canguzu.’—1 Pe. 1:13.
AAYEEME “BULANGIZI” BWAMBELELE ZIMBI
10, 11. (a) Ino mbulangizi nzi mbobajisi bambelele zimbi? (b) Mbuti kuzuzikizyigwa kwa bulangizi bwakupona anyika mbokuswaangene a Kristo alimwi “[a]kuyubununwa kwabana ba Leza”?
10 Mwaapostolo Paulo wakalemba kujatikizya bulangizi butaliboteli bwa ‘bana ba Leza bamuuya,’ kuti “[m]basikukonanyina” a Kristo. Kumane wakaamba bulangizi butaliboteli Jehova mbwasyomezya bambelele zimbi batabaliki kuti: ‘Zilenge naa bantu balalangila cakuyandisisya kuyubununwa kwabana ba Leza [bananike]. Nkaambo izilenge zyakaba abuumi bwabuyo, ikutali kuti zyakaliyandila buya pe, pele nkaambo kayooyo wakayanda kuti kube boobo akaambo kabulangizi bwakuti zilenge azyalo ziyooangununwa kubuzike bwakubola akuba alwaanguluko lwabulemu bwabana ba Leza.’—Lom. 8:14-21.
11 “Bulangizi” bwabantu bwakapegwa a Jehova ciindi naakasyomezya lufwutuko kuzwa “[ku]muzoka ooyo wakaindi” uutegwa Saatani Diabolosi kwiinda “[mu]lunyungu” lwakasyomezyegwa. (Ciy. 12:9; Matl. 3:15) Kusaanguna Jesu Kristo ngookali “lunyungu.” (Gal. 3:16) Kwiinda mulufwu alimwi akubusyigwa kwakwe, Jesu wakapa ntalisyo njumu yabulangizi bwabantu kutegwa bakaangununwe kubuzike bwacibi alufwu. Kuzuzikizyigwa kwa bulangizi oobu kuleendelana “[a]kuyubununwa kwabana ba Leza.” Bananike ncibeela cabili “[c]alunyungu.” ‘Bayooyubununwa’ ciindi baakutola lubazu antoomwe a Kristo kunyonyoona bweende bwazyintu bwa Saatani. (Ciy. 2:26, 27) Eeci ciyooleta lufwutuko kuli bambelele zimbi, balo banooli bainda mumapenzi mapati.—Ciy. 7:9, 10, 14.
12. Ino kuyubununwa kwa bananike kuyooleta mpindu nzi kubantu?
12 Eelo kaka “zilenge” naa bantu bayoomvwa kabotu mu Bulelo bwa Kristo bwa Myaka Iili Cuulu! Aciindi eeco, “bana ba Leza” ‘bayooyubununwa’ alimwi nibayoobeleka kabali bapaizi a Kristo, kupa mpindu yacipaizyo cacinunuzyo ca Jesu kubantu. Kabali balelwa ba Bwami bwakujulu, “zilenge” naa bantu bayootalika kwaangununwa kuzyintu ziboola akaambo kacibi alufwu. Asyoonto-syoonto bantu basyomeka “[ba]yooangununwa kubuzike bwakubola.” Kuti bazumanana kusyomeka kuli Jehova kwamyaaka iili Cuulu alimwi amumusunko wamamanino uuyoba kumamanino aa bweendelezi bwa Myaka iili Cuulu, mazyina aabo ayoolembwa kwaciindi coonse “[mu]bbuku lyabuumi.” Bayoonjila “[mu]lwaanguluko lwabulemu bwabana ba Leza.” (Ciy. 20:7, 8, 11, 12) Eelo kaka oobu mbulangizi butaliboteli!
KUYUMYA BULANGIZI BWESU LYOONSE
13. Ino mpaanzi mpobuyeeme bulangizi bwesu, alimwi ino Kristo uyooyubununwa lili?
13 Magwalo aa Petro obilo aakasololelwa amuuya ngaakalemba alijisi lugwasyo kubananike abambelele zimbi mbobakonzya kuyumya bulangizi bwabo. Bulangizi bwabo tabuyeeme amilimo yabo pe, buyeeme aluzyalo lwa Jehova. Wakalemba kuti: “Amube abulangizi muluzyalo lwa Leza ndomuyootondezyegwa kuciindi cakuyubununwa kwa Jesu Kilisito.” (1 Pe. 1:13) Kristo uyakuyubununwa aakuboola kupa bulumbu kuli basikumutobela basyomeka akuleta lubeta lwa Jehova anyika mbyaabi.—Amubale 2 Batesalonika 1:6-10.
14, 15. (a) Kutegwa tuzumanane kuyumya bulangizi bwesu, ino ncinzi ncotweelede kubikkila maano? (b) Ino ndulayo nzi Petro ndwaakapa?
14 Kutegwa tuyumye bulangizi bwesu, tweelede kugamika mizeezo yesu abuumi kukuboola kwa “buzuba bwa Jehova.” Buzuba bwa Jehova buyoonyonyoona “majulu” aaliko naa bweendelezi bwabantu, alimwi “[a]nyika” naa ciinga cabantu babyaabi “amilimo iili mumo.” Petro wakalemba kuti: “Amuyeeye buyo naa mweelede kuba bantu bali buti . . . , nomulindila akuyeeyesya kubako kwabuzuba bwa Jehova, eelyo majulu naayoonyonyoonwa mumulilo uuvwilima alimwi zyintu zyakujulu ziyoonyenguluka akupya kutaambiki!”—2 Pe. 3:10-12.
15 “Majulu” alimwi “[a]nyika” iziliko ziyoonjililwa busena “[a]majulu mapya [mfwulumende ya Bwami bwa Kristo] anyika mpya [ciinga cabantu cipya].” (2 Pe. 3:13) Mpoonya Petro wakapa lulayo lugaminide iluyeeme ‘aakulindila’ naa kuyumya bulangizi bwesu lyoonse akaambo kacisyomezyo canyika mpya ilwakuti: “Aboobo, nobayandwa, mbwaanga nywebo mulindila zyintu eezyi, amusoleke kusikila mpomugolela kuti kumamanino akamujane kamutajisi kabala nokaba kampenda alimwi kamuli muluumuno.”—2 Pe. 3:14.
KUPONA KWEELANA ABULANGIZI BWESU
16, 17. (a) Ino ‘mbukkale nzi busalala’ alimwi ‘milimo nzi yakubelekela Leza cakulyaaba’ njotweelede kutondezya? (b) Ino bulangizi bwesu buyoozuzikizyigwa buti?
16 Kuyungizya aakuyumya bulangizi bwesu lyoonse, tweelede kupona kweelana abulangizi bwesu. Tweelede kubikkila maano kubukkale bwesu bwakumuuya. ‘Bukkale busalala’ bubikkilizya ‘kuba abukkale buli kabotu lyoonse akati kabamasi’ kwiinda mukulilemeka. (2 Pe. 3:11; 1 Pe. 2:12) Tweelede kuba ‘aluyando akati kesu.’ Eeci cibikkilizya kucita zyintu nzyotukonzya kutegwa lukamantano lwesu lwanyika yoonse lwabunyina luzumanane nimuba mumbungano zyesu. (Joh. 13:35) “Milimo yakubelekela Leza cakulyaaba” ijatikizya milimo yeendelana kutegwa tube acilongwe a Jehova. Eeci cilabikkilizya kupaila mipailo iimvwika, alimwi akubala Bbaibbele abuzuba, kucita ciiyo cesu tobeni, kukomba mumukwasyi alimwi akutola lubazu cabusungu mukukambauka “makani mabotu aa Bwami.”—Mt. 24:14.
17 Umwi aumwi wesu ulayanda kutambulwa kuli Jehova alimwi akufwutulwa bweende bwazyintu oobu ‘bwaakweenzemuka.’ Aboobo, eeco ciindi bulangizi bwesu buyoozuzikizyigwa, “abulangizi bwabuumi butamani oobo Leza uutakonzyi kubeja, mbwaakasyomezya kale-kale.”—Tit. 1:2.
[Mibuzyo yaciiyo]
[Cifwanikiso icili apeeji 22]
Banakristo bananike ‘balazyalwa bupya kutegwa babe abulangizi bupona’
[Cifwanikiso icili apeeji 24]
Amuyumye bulangizi bwanu mumukwasyi
