Mbomukonzya Kucita Kutegwa Ciindi Cakwiiya Bbaibbele Kacikkomanisya Akugwasya Kapati

Mbuti mbotukonzya kukkomana kapati ciindi notwiiya Bbaibbele? Mbuti mbotukonzya kugwasyigwa ciindi notwiiya Bbaibbele? Atulange-lange zyintu zyotatwe ziyandika kapati zikonzya kupa kuti tugwasyigwe kapati aciiyo cesu ca Bbaibbele.

1 AMUPAILE: Cintu cakusaanguna ncotweelede kucita nkupaila. (Int. 42:8) Nkaambo nzi? Kwiiya Jwi lya Leza tweelede kukubona kuti ncibeela cabukombi bwesu. Aboobo, tweelede kulomba Jehova kuti atugwasye kuba amizeezo iikkalikene akutupa muuya wakwe uusalala. (Lk. 11:13) Misyinali umwi wabeleka kwaciindi cilamfwu, ulaazyina lya Barbara wakaamba kuti: “Lyoonse ndilapaila kanditanatalika kubala naa kwiiya Bbaibbele. Ndacita oobo, ndilimvwa kuti Jehova uli andime alimwi kuti ulacikkomanina ncondicita.” Kupaila katutanatalika kwiiya kujalula mizeezo yesu amoyo kutegwa tutambule cakulya cakumuuya ncotubambilidwe.

2 KUZINZIBALA KUYEEYA: Akaambo kakuceya kwaciindi, bamwi bainzya buyo mulawo wakubala Jwi lya Leza. Pele akaambo kakucita oobu, kunyina mpindu njobajana mukwiiya Bbaibbele. Ba Carlos, balo bali kubelekela Jehova kwamyaka iinda ku 50, bakabubona bubotu bwakubikka ambali ciindi cakuzinzibala kuyeeya kutegwa bagwasyigwe kapati. Bakaamba kuti: “Mazuba aano ndibala buyo mapeeji masyoonto aamu Bbaibbele—andiza mapeeji obilo buyo abuzuba. Mpoonya ndibelesya ciindi cinji kuzinzibala kuyeeya nzindali kubala kutegwa ndigwasyigwe kapati.” (Int. 77:12) Notujana ciindi cakuzinzibala kuyeeya, tuyungizya luzyibo lwesu alimwi akumvwisya kuyanda kwa Leza.—Kol. 1:9-11.

3 AMUZIBELESYE: Ikuti twabona bubotu bwamulimo umwi, tulagwasyigwa kapati anguwo. Oobu mbombubo mbocibede akwiiya Bbaibbele. Mukwesu umwi uucili mukubusi ulaazyina lya Gabriel, walo ujisi bubambe bwakwiiya Bbaibbele lyoonse wakaamba kuti: “Kwiiya Bbaibbele kulandigwasya kulwana mapenzi aabuzuba-abuzuba, alimwi kulandigwasya kutegwa ndicikonzye kugwasya bamwi. Ndilasoleka kuzibelesya zyoonse nzyondiiya mubuumi bwangu.” (Dt. 11:18; Jos. 1:8) Inzya, tulakonzya kujana luzyibo lunji lwabunaleza ndotukonzya kubelesya.—Tus. 2:1-5.

KWIINDULUKA: Eelo kaka tulijisi coolwe cakuyandaula luzyibo ndwapa Jehova, Kasensa ka busongo boonse! (Lom. 11:33) Aboobo, ciindi citobela kamutanatalika kwiiya Bbaibbele mweelede kusaanguna kupaila kuli Jehova akumulomba kuti amugwasye kuba amizeezo iili kabotu alimwi amuuya wakwe uusalala. Mpoonya mweelede kujana ciindi cakuzinzibala kuyeeya zyintu nzyomubala. Kuyungizya waawo, mweelede kuzibelesya nzyomwiiya mubuumi bwanu. Nomucita zyintu eezyi ziyandika, muyoojana kuti ciiyo canu ca Bbaibbele cinookkomanisya alimwi akugwasya kapati.