Bulemu Bumweelede Muntu Ceelelo Citabikkilwi Maano Kanji-kanji

“Zintu zyoonse zyakali kucitika mucilabba zyakali kusampuzya.”—MAGDALENA KUSSEROW REUTER, SIKUFWUTUKA MUCILABBA CAKUPENZEZYA CA NAZI.

NOKUBA kuti mapenzi aakali kucitika muzilabba zya Nazi lya Nkondo Yanyika Yabili akali mabi kapati, tanaakali ngamatalikilo naa mamanino akutabikkila maano kubulemu bumweelede muntu. Kufwumbwa naa twalanga-langa zyakali kucitika kaindi naa zicitika lino, ibwini mbwakuti kuzwa kaindi bantu banji bali kusampaulwa.

Pele kutabikkila maano kubulemu bumweelede muntu takujatikizyi buyo lunya lwalikucitwa mubukkale bwabantu. Kanji-kanji kulacitwa munzila zinji zitali zyacigaminina. Amuyeeye zyamwana ufwubaazyigwa akaambo kaciimo cakwe. Naa muzwakule usampaulwa akaambo kazilengwa zimwi “zyankobazwa.” Naa muntu usalaulwa akaambo kamubala wakwe naa cisi. Aabo bacita zintu eezi inga bayeeya kuti basobana buyo, pele oobo tabusyi mbobalimvwa aabo ibafwubaazyigwa nkaambo cibapa moyo kucisa.—Tusimpi 26:18, 19.

Ino Bulemu Bumweelede Muntu Ninzi?

Ibbuku limwi lipandulula mabala lyaamba kuti bulemu ‘nkubikkilwa maano naa kulemekwa.’ Aboobo, bulemu bumweelede muntu bujatikizya mbazu zyobile, mbotulibona ambobatweendelezya bamwi. Nokuba kuti kuli zintu zinji zikonzya kweendelezya mbotulibona, ikapati mbobatubona naa mbobatweendelezya bamwi nzezipa  kulimvwa kuti tulabikkilwa maano mubukkale bwabuzuba abuzuba.

Iciinga cimwi acimwi cilijisi bacete, batakwabilidwe alimwi abapengede. Pele ikuba muciimo cili boobo tacaambi kuti muntu ooyo teelede kulemekwa. Mbobamubona alimwi ambobacita bamwi nzezikonzya kupa kuti muntu ooyo alimvwe kuti talemekwi. Icuusisya ncakuti kanji-kanji ibapengede tabalemekwi pe. Ziindi zinji tulaakumvwa majwi mbuli aakuti “unyina ncito,” “uli manide,” akuti “uli ciyanga” elyo bacembeede, bacete naa balemene nobapenzegwa.

Ncinzi cipa bantu kufwubaazyanya? Sena ceelelo cabantu cakuti kabalemekwa kuli nociya kuzwidilila? Cibalo citobela cilijisi bwiinguzi bukkazika moyo buzwa mu Jwi lya Leza, Ibbaibbele.