Zitondezyo Zyakapegwa Mucilengaano Zya Bwami Bwa Leza Zyazuzikizyigwa
Zitondezyo Zyakapegwa Mucilengaano Zya Bwami Bwa Leza Zyazuzikizyigwa
“Mulabotya na mwateya matwi [kumajwi aabusinsimi], nkaambo ali mbuli ilampi limunika mumudima.”—2 PETRO 1:19.
1. Ino nkwiindana kuli buti mazubaano nkotujana munyika?
NYIKA mazubaano ili mumapenzi aatamani. Kutalikila kumapenzi aakunyonyoona cilawo kusikila kuzyigwebenga munyika yoonse, mapenzi aabantu alibonya kuti ayaabwiindilila buya. Nozyiba zikombelo zyamunyika zyaalilwa kugwasya bantu. Mubwini, kanji-kanji zisumpula buyo kusalaulana, kusulaikana alimwi akuyandisya cisi icipa kuti bantu baandaane. Inzya, kweelana ambokwakasinsimwa, ‘imudima uusiya mbi’ wavwumba “misyobo yoonse.” (Isaya 60:2) Pele aciindi ncimunya, tuulunzuma twabantu balijisi lusyomo mubulangizi bwakumbele. Ino nkaambo nzi? Nkaambo kakuti balalibikkila maano Jwi lya Leza lyabusinsimi ilili “mbuli ilampi limunika mumudima.” Balalizumina “jwi” lya Leza antela mulumbe, ooyo lino uujanika mu Bbaibbele kuti ubasololele.—2 Petro 1:19.
2. Kweelana abusinsimi bwa Daniele bwaamba “kumamanino aaciindi,” ino mbaani balikke ibakonzya kumvwisya zintu zyakumuuya?
2 Kujatikizya “mamanino aaciindi,” musinsimi Daniele wakalemba kuti: “Bantu banji bayootuntulika, aboobo luzibo luyooyungizizigwa. Bantu banji bayoolisalazya akulibotya akulitubya, pele basizibi bayoocita bubi. Taakwe naba omwe wabasizibi uuyoomvwisya pe; basongo mbebayoomvwisya.” (Daniele 12:4, 10) Ibakonzya kumvwisya zintu zyakumuuya, mbabaabo buyo ‘ibatuntulika’ camoyo woonse, antela ibasungwaalila kwiiya Jwi lya Leza kwiinda mukuvwuntauzya, akutobela zyeelelo zyakwe, alimwi akusolekesya kucita luyando lwakwe.—Matayo 13:11-15; 1 Johane 5:20.
3. Ino nkasimpe nzi basikwiiya bakusaanguna nkobakazyiba kumyaka yakuma 1870?
3 Kakucili kuma 1870, kaatanatalika “mazuba aakumamanino,” Jehova Leza wakatalika kupa luzibo lunji kujatikizya makani “aasisidwe aa-Bwami bwakujulu.” (2 Timoteo 3:1-5; Matayo 13:11) Aciindi eeco kabunga kabasikwiiya Bbaibbele bakazyiba kuti, ikuboola kwa Kristo kwakali kuyoocitika cakutalibonya, mukwiimpana ambobakali kuyeeya banji. Naakali kuyoobikkwa mubwami kujulu, Jesu wakali kuyooboola munzila yakuti wakali kuyoobikkila maano kunyika kali Mwami. Citondezyo cijisi zibeela zinjaanji zilibonya, cakali kuyoozyibya basikwiiya bakwe kuti kubako kwakwe kutalibonyi kwakalitalikide.—Matayo 24:3-14.
Zitondezyo Zyakapegwa Mucilengaano Nozyakazuzikizyigwa
4. Mbuti Jehova mbwaaluyumya lusyomo lwababelesi bakwe bamazubaano?
4 Cilengaano cakusanduka cakali citondezyo citaliboteli cabulemu mbwaakali kunoojisi Kristo mu Bwami. (Matayo 17:1-9) Cilengaano eeco cakayumya lusyomo lwa Petro, Jakobo alimwi a Johane iciindi banji nobakalekede kumutobela Jesu akaambo kakuti tanaakacita nzyobakali kulangila kuti ulacita. Ncimwi buyo asunu, muciindi eeci camamanino, Jehova waluyumya lusyomo lwababelesi bakwe bamazubaano kwiinda mukubagwasya kumvwisya kuzuzikizyigwa kwacilengaano eeco cigambya alimwi abusinsimi bunji buswaangene ancico. Lino atulange-lange zimwi zyazikozyanyo zyakumuuya eezyi ziyumya lusyomo izyazuzikizyigwa.
5. Ino nguni wakaba Intanda, alimwi ino ndiilili alimwi mbuti ‘mbwaakamunika’?
5 Kaamba zyakusanduka, imwaapostolo Petro wakalemba kuti: “Mbubonya obo mbutwakasimpikizigwa lusinizyo lwamajwi aabasinsimi. Ayo majwi mulabotya na mwateya matwi kulingao, nkaambo ali mbuli ilampi limunika mumudima, mane kusikila kubucedo kumazwido aantanda mumyoyo yanu.” (2 Petro 1:19) Eeyo Intanda yacikozyanyo antela ‘intanda iimwekesya,’ ngu Jesu Kristo iwalemekwa naa kusumpulwa. (Ciyubunuzyo 22:16) ‘Wakamunika’ mu 1914 eelyo Bwami bwa Leza nobwakatalika kulela kujulu. Aayo akaba matalikilo aabukkale bupya. (Ciyubunuzyo 11:15) Mucilengano cakusanduka, Musa alimwi a Eliya bakalibonya antoomwe a Jesu, kababandika anguwe. Ino nguni ngobaiminina?
6, 7. Ino mbaani ibaimininwa a Musa alimwi a Eliya mukusanduka, alimwi ino ntwaambo nzi tuyandika kapati ntwaayubununa Magwalo kujatikizya baabo ibaimininwa ambabo?
6 Mbwaanga Musa alimwi a Eliya bakatola lubazu mubulemu bwa Kristo, bakamboni basyomeka bobile aaba camasimpe baiminina baabo balela antoomwe a Jesu mu Bwami bwakwe. Iluzibo oolu lwakuti Jesu ulijisi mbalela limwi luleendelana acilengaano citondezya kubikkwa kwa Mesiya, imusinsimi Daniele ncaakatondezyegwa. Daniele wakabona “umwi uuli mbuli mwana amuntu” katambula “bweendelezi butamani” kuzwa kuli “Sinsiku,” Jehova Leza. Pele amubone ncaakatondezyegwa Daniele kwiinde buyo ciindi cisyoonto. Wakalemba kuti: “Bwami abweendelezi abupati bwazisi zyoonse zyaansi, zyoonse ziyooabwa mumaanza aabantu babasalali ba-Sijulu.” (Daniele 7:13, 14, 27) Inzya, myaanda yamyaka yiinda kumusanu kusanduka kakutanacitika, Leza wakayubununa kuti bamwi “basalali” bakali kuyootola lubazu mubwami bwa Kristo butalikomeneni.
7 Ino mbaani basalali baambwa mucilengaano ca Daniele? Mbantu bali boobo mbaamba mwaapostolo Paulo nati: “Muuya mwini ulazuminana amyuuya yesu tubeni kuti tuli bana ba-Leza. Lino kuti tuli bana, alimwi tuli baswaana, nkukuti baswaana ba-Leza, baswaana bakwe antoomwe a-Kristo, ikuti tuli bapenzinyina kuti tukabe balemunyina.” (Ba-Roma 8:16, 17) Mubwini, ibasalali mbaasikwiiya ba Jesu bananikidwe amuuya. Kubbuku lya Ciyubunuzyo Jesu wakati: “Oyo uuzunda njoomuzuminina kukala ambe acuuno cangu, mbubonya mbuli mbundakazunda ambebo, aboobo sunu ndikede a-Taata acuuno cakwe.” Bantu aaba babusyidwe ‘ibakazunda’ ibali 144,000 antoomwe a Jesu, bayoolela nyika yoonse.—Ciyubunuzyo 3:21; 5:9, 10; 14:1, 3, 4; 1 Ba-Korinto 15:53.
8. Ino mbuti basikwiiya ba Jesu bananike mbobatola lubazu mumulimo weelene angwaakabeleka Musa a Eliya, alimwi ino ncinzi citobela?
8 Pele ino nkaambo nzi Banakristo bananike ncobaimininwa a Musa alimwi a Eliya? Nkaambo kakuti Banakristo aaba nobacili bantunsi anyika, babeleka mulimo weelene angwaakabeleka Musa a Eliya. Mucikozyanyo, balabeleka kabali Bakamboni ba Jehova nomuba muciindi cakupenzyegwa. (Isaya 43:10; Incito 8:1-8; Ciyubunuzyo 11:2-12) Mbubwenya mbuli Musa a Eliya, cabusicamba balabuyubununa bukombi bwakubeja kumwi kabakulwaizya bantu babombe myoyo kukomba buyo Leza alikke. (Kulonga 32:19, 20; Deuteronomo 4:22-24; 1 Bami 18:18-40) Sena mulimo wabo wazyala micelo? Inzya! Kunze lyakubunganya bananike boonse, batugwasya tuulunzuma twa “mbelele zimwi” kutondezya kulibombya kuli Jesu Kristo.—Johane 10:16; Ciyubunuzyo 7:4.
Kristo Wamanizya Kuzunda
9. Mbuti bbuku lya Ciyubunuzyo 6:2 mbolitondezya mbwabede lino Jesu?
9 Jesu lino tacili muntu uulya maila utantide amwana wambongolo, pele Mmwami singuzu. Utondezyedwe kuti utantide ambizi—icitondezyo camu Bbaibbele cankondo. (Tusimpi 21:31) Ibbuku lya Ciyubunuzyo 6:2 lyaamba kuti: “Ndakabona imbizi iituba, nkabela oyo iwakakede alinjiyo wakalijisi buta, alimwi wakapegwa musini, mpawo wakainka kuya buzunda akuzunda.” Kuyungizya waawo, kaamba Jesu, sintembauzyo Davida wakalemba kuti: “Musako wabwami bwako Jehova ulautuma kuzwa ku-Zioni; ube mweendelezi akati kabasinkondonyoko.”—Intembauzyo 110:2.
10. (a) Mbuti kutanta kwa Jesu ambizi kwakuzunda mbokwakatalika munzila iikondelezya? (b) Ino mbuti kuzunda kwa Jesu kwakusaanguna mbokwakaijatikizya nyika yoonse?
10 Jesu wakasaanguna kuzunda basinkondonyina basinguzu kapati, nkokuti Saatani amadaimona. Naakabatanda kujulu, wakabawisyila anyika. Mbwaanga ilizyi kuti ciindi cicisyeede nciniini, myuuya mibyaabi eeyi yatondezya bukali mboijisi kubantu, akuleta mapenzi manji. Mapenzi aaya alitondezyedwe ku Ciyubunuzyo abasimbizi bambi botatwe. (Ciyubunuzyo 6:3-8; 12:7-12) Kweelana ambokwakasinsimwa mubusinsimi bwa Jesu kujatikizya “citondezyo cakuboola [kwakwe] acamamanino aaciindi,” ikutanta kwabo ambizi kwasololela kunkondo, nzala alimwi azilwazi. (Matayo 24:3, 7; Luka 21:7-11) Mbubwenya mbwamyongwa mukaintu uyanda kutumbuka, “mapenzi” aaya aali mbuli kumyongwa kwamukaintu ayoozumanana kusikila Kristo akamanizye “kuya buzunda akuzunda” kwiinda mukunyonyoona zibeela zyoonse zyambunga ya Saatani iilibonya. *—Matayo 24:8.
11. Mbuti makani aakaindi aambungano ya Bunakristo mbwaapa bumboni kunguzu zyabweendelezi bwa Kristo?
11 Alimwi inguzu zyabweendelezi zya Jesu zilalibonya mukuti waikwabilila mbungano ya Bunakristo kutegwa izuzikizye mulimo wanjiyo wakukambauka mulumbe wa Bwami nyika yoonse. Nokuba kuti yali kukazyigwa citaambiki a Babuloni Mupati—ibulelo bwanyika yoonse bwabukombi bwakubeja alimwi akuzwa kumfwulumende zyalunya, imulimo wakukambauka tiiwazumanana buyo pe, pele alimwi wasika atala eeni mpoutanasikide mubukkale bwabantu. (Ciyubunuzyo 17:5, 6) Oobu mbumboni butalikomeneni bwakuti Kristo ulalela!—Intembauzyo 110:3.
12. Ino nkaambo nzi bantu banji ncobatakuboni kubako kwa Kristo kutalibonyi?
12 Pele cuusisya ncakuti, bantu banji kubikkilizya atuulunzuma twabantu balyaamba kuti Mbanakristo, balaalilwa kubona kuti zintu zigambya zili mukucitika anyika zitondezya zintu zimwi zitalibonyi. Mane buya balabasampaula aabo ibaambilizya Bwami bwa Leza. (2 Petro 3:3, 4) Ino nkaambo nzi? Nkaambo kakuti Saatani woofwaazya mizeezo yabo. (2 Ba-Korinto 4:3, 4) Mubwini, wakatalika koofwaazya baabo ibalyaamba kuti Mbanakristo amudima wakumuuya myaanda yamyaka minji yainda, nokuba kubapa kuti bacileke kusyoma mubulangizi butaliboteli bwa Bwami.
Ikucileka Kusyoma Mubulangizi bwa Bwami
13. Ino mudima wakumuuya kuli baabo bakali kulyaamba kuti Mbanakristo wakasololela kunzi?
13 Jesu wakasinsima kuti, basiluleyo mbubwenya mbuli nsaku zyakasyangwa mumaila bakali kuyoonjila mumbungano ya Bunakristo alimwi akuleesya banji. (Matayo 13:24-30, 36-43; Incito 20:29-31; Juda 4) Mukuya kwaciindi, aaba baambwa kuti Mbanakristo bakatalika kutola lubazu mumapobwe aabantu batakombi Leza, muzilengwa alimwi anjiisyo zibyaabi akutalika kuzyibona kuti nzya “Bunakristo.” Mucikozyanyo, Kkilisimasi yakazwa kucilengwa cijatikizya kukomba baleza bakubeja bategwa Mithra alimwi a Saturn. Pele ino ncinzi cakapa baabo ibakali kulyaamba kuba Banakristo kunoocita mapobwe aaya aatali aa Bunakristo? Ibbuku litegwa The New Encyclopædia Britannica (1974) lyaamba kuti: “Ipobwe lyakusekelela kuzyalwa kwa Jesu Kristo lya Kkilisimasi lyakatalika akaambo kakuti bulangizi bwakuti Kristo ulaboola cakufwambaana bwakali kuyaabuceya.”
14. Mbuti njiisyo zya Origen alimwi a Augustine mbozyakanyonganya kasimpe ka Bwami?
14 Alimwi amulange zyakunyonganya bupanduluzi bwabbala lyakuti “bwami.” Ibbuku lyakuti The Kingdom of God in 20th-Century Interpretation lyaamba kuti: “Origen [sikwiiya zyabukombi wamumwaanda wamyaka watatu] ngowakali wakusaanguna kucinca mbobalibelesya Banakristo bbala lyakuti ‘bwami’ kuti lyaambe cintu camukati, nkokuti bulelo bwa Leza mumyoyo.” Ino njiisyo ya Origen yakayeeme ali? Tamuli mu Magwalo pe, pele muuli “basyaabusongo alimwi aluzibo lwamunyika” ilwiindene kapati akuyeeya kwa Jesu acikombelo cakusaanguna.” Augustine waku Hippo iwakapona kuzwa (mu 354 kusikila mu 430 C.E.), mubbuku lyakwe lyakuti Munzi wa Leza (De Civitate Dei) wakaamba kuti cikombelo cini kucigama mbo Bwami bwa Leza. Ikuyeeya kuli boobo kutali kwamu magwalo kwakapa kuti zikombelo zilyaamba kuti nzya Bunakristo zilijanine twaambo tulimvwisya twakutolela lubazu mutwaambo twacisi. Alimwi zyalijisi nguzu zili boobo kwamyaanda yamyaka minji, ikanji-kanji eeci cali kuleta manyongwe aataambiki.—Ciyubunuzyo 17:5, 18.
15. Ino mbuti lugwalo lwa Ba-Galatiya 6:7 mboluli mukuzuzikizyigwa kujatikizya zikombelo zinji zya Bunakristo Bwanyika?
15 Pele mazubaano, zikombelo zili mukulibonena zintu zitobela akaambo kamilimo njobakacita. (Ba-Galatiya 6:7) Zinji tazicijisi nguzu alimwi bantu banji bali mukuzwa mulinzizyo. Ikulonga kwabantu kuzwa mucikombelo ikuli boobo kulalibonya kapati mumasi aaku Europe. Kweelana amagazini yiitwa kuti Christianity Today, “lino maanda aazikombelo zipati zyaku Europe taacili maanda aakukombela pe, pele aba aatondezyelwa zintu zyakaindi. Aboobo balikke bajanika mbabaabo baboola kulangilila zintu eezyi.” Ibukkale oobu bulakonzya kubonwa amumasi aambi. Ino eeci citondezya nzi kujatikizya bukombi bwakubeja? Sena buyoomana akaambo kakubula mali alimwi abantu? Alimwi ino mbuti bukombi bwakasimpe mbobuyoojatikizyigwa?
Amulibambile Buzuba Bupati bwa Leza
16. Ino nkaambo nzi kusulaika Babuloni Mupati kuyaabwiindila ncokali kaambo kapati?
16 Mbubwenya mbuli makumbi aasiya mbwaatondezya kuti iyanda kuboola mvwula, ikusulaika bukombi ikwavwula mumasi manji ncitondezyo cakuti bukombi bwakubeja buli afwaafwi kumana. Lino-lino, Jehova uyoopa kuti basitwaambo twacisi bakamantane mukuyubununa alimwi akunyonyoona muvwuule wakumuuya Babuloni Mupati. (Ciyubunuzyo 17:15-17; 18:21) Sena eeci ceelede kubayoosya Banakristo bakasimpe kubikkilizya azibeela-beela zimbi “[zya]mapenzi mapati” iziyootobela? (Matayo 24:21) Peepe! Mubwini, banoojisi twaambo tuyoobapa kukkomana eelyo Leza aakubanyonyoona basizibi. (Ciyubunuzyo 18:20; 19:1, 2) Amulange cikozyanyo cijatikizya Jerusalemu wamumwanda wamyaka wakusaanguna alimwi a Banakristo bakali kukkala mumo.
17. Ino nkaambo nzi babelesi ba Jehova basyomeka ncobajisi lusyomo lwakuti bayoozwidilila mubukkale oobu bwakumamanino?
17 Impi yabasikalumba yabana Roma noyakasaala munzi wa Jerusalemu mu 66 C.E., Banakristo bakapakamene kunyina nobakagambwa antela kuyoowa. Akaambo kakuti bakali basikwiiya basungu ba Jwi lya Leza, bakalizyi kuti ‘kusaalwa kwanguwo kwakali afwaafwi.’ (Luka 21:20) Alimwi bakalizyi kuti Leza wakali kuyoobajaluda nzila kutegwa bafwutuke. Nocakacitika eeco, Banakristo bakaccija. (Daniele 9:26; Matayo 24:15-19; Luka 21:21) Ncimwi buyo amazubaano, aabo ibamuzyi Leza alimwi ibamvwida Mwanaakwe banoojisi lusyomo lwakuzwidilila mubukkale bwakumamanino oobu. (2 Ba-Tesalonika 1:6-9) Alimwi aakutalika mapenzi mapati, cakukondwa ‘bayoolanga mujulu, akulungumika mitwe yabo, nkaambo balizyi kuti kunununwa kwabo kunooli afwaafwi.’—Luka 21:28.
18. Ino ncinzi ciyoocitika akaambo kakusaala kugaminide nkwayoocita Gogo kubabelesi ba Jehova?
18 Aakunyonyoonwa Babuloni Mupati, kali Gogo waku Magogo, Saatani uyoobalwana camamanino alimwi cigaminina Bakamboni ba Jehova basiluumuno. Baakusika “mbuli ijoba livumba nyika,” nkamu ya Gogo iyoolangila kuzunda mukulaba buyo kwaliso. Elo kaka cilagambya kapati cintu ciyoobacitikila! (Ezekieli 38:14-16, 18-23) Imwaapostolo Johane wakalemba kuti: “Ndakabona ijulu lijulidwe, nkabela kwakaboneka imbizi iituba. Oyo uuitantide ulategwa Musyomesi Uusinizye . . . Mukanwa lyakwe mwakazwa ipanga libosya lyakuumya masi oonse.” Ooyu “MWAMI WABAMI” uutakonzyi kuzundwa uyoobafwutula bakombi ba Jehova basyomeka alimwi akunyonyoona basinkondonyina babo boonse. (Ciyubunuzyo 19:11-21) Elo kaka taaliboteli mamanino aaya mukuzuzikizyigwa kwacilengaano cakusanduka!
19. Ino mbuti kuzunda kwa Kristo cakumaninina mbokuyoobajatikizya basikwiiya bakwe basyomeka, alimwi ino ncinzi ncobeelede kusolekesya kucita lino?
19 Jesu ‘uyoolumbaizyigwa cabulemu kuli boonse bamusyoma kubuzuba oobo.’ (2 Ba-Tesalonika 1:10) Sena mulayanda kuba umwi wabaabo ibayootondezya bulemu ku Mwana a Leza sikuzunda? Nkokuti mweelede kuzumanana kuyumya lusyomo lwanu alimwi ‘mweelede kulibamba, nkaambo kuciindi ncomutazyi nciconya ncazoosika Mwana aa Muntu.’—Matayo 24:43, 44.
Amupakamane
20. (a) Mbuti mbotunga twatondezya kulumba kububambe bwa Leza bwa “muzike musyomesi uucenjede”? (b) Ino mmibuzyo nzi njotweelede kulibuzya?
20 “Muzike musyomesi uucenjede” lyoonse ulabakulwaizya bantu ba Leza kuzumanana kubikkila maano kumuuya alimwi akuba bapakamene. (Matayo 24:45, 46; 1 Ba-Tesalonika 5:6) Sena mulakulumba kuyeezyegwa ooku kwamuciindi ceelede? Sena mulakubelesya mukusala zintu nzyomweelede kubikkila maano kapati mubuumi? Mweelede kulibuzya mibuzyo eeyi: ‘Sena ndilizyi kabotu-kabotu ncozipandulula munzila yakumuuya zintu zili mukucitika munyika alimwi akasimpe kakuti Mwana aa Leza ulalela kujulu? Sena ndilimubwene kalibambide kunyonyoona Babuloni Mupati alimwi abukkale boonse bwa Saatani?’
21. Ino ntwaambo nzi tukonzya kupa kuti bamwi baleke kubikkila maano kumuuya, alimwi ino ncinzi ncobeelede kucita cakufwambaana?
21 Bamwi lino ibayanzana abantu ba Leza baleka kubikkila maano muzintu zyakumuuya. Sena nkaambo kakuti baalilwa kukkazyika moyo antela kuliyumya mbuli mbubakacita bamwi basikwiiya ba Jesu bakusaanguna? Sena cibapa kucita boobo nkulibilika azintu zyamubuumi, ikuyandisya lubono antela nkupenzyegwa? (Matayo 13:3-8, 18-23; Luka 21:34-36) Ambweni bamwi bajana kuti makani amwi aamwaigwa a “muzike musyomesi uucenjede” mmayumu kumvwisya. Ikuti naa cimwi cazintu eezyi camucitikila, tumukulwaizya kubukulusya busungu bwanu mukwiiya Jwi lya Leza alimwi akumukombelezya Jehova kutegwa mube acilongwe ciyumu alimwi cini-cini anguwe.—2 Petro 3:11-15.
22. Ino kwamujatikizya buti ikulanga-langa cilengaano cakusanduka alimwi abusinsimi bumbi buswaangene?
22 Cilengaano cakusanduka cakapegwa kuli basikwiiya ba Jesu aciindi nobakali kuyandika kukulwaizyigwa. Mazubaano, tulijisi cintu ciinda kukomena cikonzya kutukulwaizya, nkokuti ikuzuzikizyigwa kugambya kwakusanduka alimwi abusinsimi bunji buswaangene. Mbotuya buzumanana kuzinzibala kuyeeya zintu eezyi zikondelezya zyakazuzikizyigwa alimwi ancozipandulula kujatikizya ziyoocitika kumbele, aswebo atwaambe camoyo woonse majwi aamwaapostolo Johane naakati: “Ameni! Koboola ncobeni, Mwami Jesu.”—Ciyubunuzyo 22:20.
Bupanduluzi buyungizidwe
^ munc. 10 Ibbala lya Cigiliki litaanzi ilyakasandululwa kuti “mapenzi” lyaamba “kumyongwa kucitika mukaintu nayanda kutumbuka.” (Matayo 24:8, Kingdom Interlinear) Eeci caamba kuti mbubwenya mbuli kumyongwa kwamukaintu uyanda kutumbuka, mapenzi aali munyika ayoozumanana, ikwiindila kuvwula, aya kutola ciindi cilamfwu alimwi ayoosololela kumapenzi mapati.
Sena Muciyeeyede?
• Mumyaka yakuma 1870, ino ncinzi kakamu kabasikwiiya Bbaibbele ncobakazyiba kujatikizya kuboola kwa Kristo?
• Mbuti cilengaano cakusanduka mbocazuzikizyigwa?
• Ino kutanta kwa Jesu kayaabuzunda ambizi kuyijatikizya buti nyika alimwi ambungano ya Bunakristo?
• Ino ncinzi ncotweelede kucita kuti katuyanda kuyooba akati kabaabo ibayoofwutuka Jesu aakumanizya kuzunda?
[Mibuzyo yaciiyo]
[Zifwanikiso izili apeeji 9]
Icakayubununwa mucilengaano cacitika ncobeni
[Zifwanikiso izili apeeji 10]
Sena mulizyi cakacitika Kristo naakatalika kuzunda kwakwe?