Bakaba Basicamba

TALILI lyoonse nocili cuuba-uba ikuba basicamba ikutegwa tukambauke. Atwaambe kuti, imwaapostolo Paulo wakati cimwi ciindi wakacita obo “akati kankondo zinjizinji.” (1 Ba-Tesalonika 2:2) Sena “nkondo” yakukambauka ijisi mpindu iili yoonse? Kunyina cisyomezyo cakuti kuyootucitikila zintu zibotu, pele ibantu ba Leza lyoonse balakondwa akaambo kakuti mbaasicamba. Amulange-lange zikozyanyo zimwi.

Umwi mwana musimbi ulaamyaka yakuzyalwa iili lusele wazina lya Tara wakaswiililisya imwiiyi wakwe naakali kwaambila basicikolo kuti lya Nkondo Yanyika Yabili, iba Juda ibakali munkambi zyakupenzezya bakali kusama bbaaji ya Davida yacifwainikiso Canyenyeezi yamungunga waji kutegwa kabazyibwa. Tara wakatelaika naa wakeelede kukanana. Ulayeeya ategwa, “Ndakapaila kanditafwinyide.” Mpoonya wakatambika janza akwaamba kuti Bakamboni ba Jehova abalo bakalimo munkambi eezyo, elyo bakali kusama mabbaaji aasiya-siya (purple triangle). Imwiiyi wakaakkomanina makani ayo elyo wakamulumba musimbi oyo. Ikaambo ka Tara kakajula mulyango kumibandi iimbi amwiiyi oyo, walo kumbele iwakazikutondezya basicikolo boonse mukkilasi ividiyo yakuti Jehovah’s Witnesses Stand Firm Against Nazi Assault.

Kucisi ca Guinea, Afulika nkoili Kumbo, sikumwaya umwi mukubusi uutabbapatizidwe wazina lya Irène wakali kuyanda kuyaambele mumulimo wakwe wamumuunda. Mishinali iwakali kucitya ciiyo ca Bbaibbele kulinguwe wakamukulwaizya kuti asoleke kwaabila mamagazini aa Ngazi Yamulindizi a Awake! kuli basicikolonyina kucikolo. Irène wakeenkeenka akaambo kakuti basicikolonyina tiibakali kumuteelela pe. Pele akaambo kakukulwaizya kwamishinali, Irène wakayeeya kuti asikile sicikolo umwi iwakaindide kukazya. Irène kataciyeeyeli, imusimbi oyo wakateelela alimwi wakaatambula mamagazini caluyandisisyo. Basicikolo abambi bakacita mbubwena. Irène wakamwaya mamagazini manji mwezi oyo kwiinda mweelwe ngwaakamwaya mumyezi yosanwe yamusyule.

Ku Trinidad, imwaalu wakeenkeenka kusikila mupati wacikolo kuti amutondezye lwiiyo lugwasya luli mumagazini ya Awake! Nokuba boobo, wakaliyumya-yumya. Waamba kuti: “Ndakapaila neekanjila mukkomponi. Ndakagambwa kubona kuti mupati wacikolo oyo wakali kkomene kapati.” Imukaintu oyo wakatambula magazini ya Awake! yakajisi mutwe wakuti “Ino Bakubusi Basunu Bajisi Bulangizi Nzi?” alimwi mane wakazumina kuyooibelesya kuyiisya basicikolo bakwe mukkilasi. Kuzwa leelyo, watambula mamagazini aali 40 aabandika mitwe iisiyene-siyene.

Vaughn kacili mukubusi, imulimo wakukambauka wakali kumuyumina kapati lyoonse. “Ndakali kuyoowa kapati, imaanza aangu akali kunga azwa nkasaalo alimwi ndakali kunga ndafwambaana kapati kukanana—ndakali kukakilwa ikubandika asyoonto-asyoonto.” Nokuba boobo, wakaba mubelesi waciindi coonse. Noliba leelyo, tiicakali cuuba-uba pe lyoonse kuti abandike cabusicamba. Cimwi ciindi, kakatede akaambo kakuti buzuba obo boonse wakabumanina mukuyandaula mulimo wakumubili, pele katazwidilili, wakayanda kuti akambaukile muntu umwi mucitima ciinda kunsi anyika, kutegwa “abotye-botye buzuba obo ibwakali bubyaabi.” Pele wakayoowa akaambo kambobakali kulibonya basimakwebo ibakali mucitima eci. Limwi wakaliyumya-yumya kuti abandike amudaala iwakakkede munsi lyakwe. Kwakaba mubandi mulamfwu. “Ujisi mibuzyo mibotu kapati iitalangilwi kuzwa kumukubusi mbuli nduwe,” mbwaakaamba simakwebo oyo, mpoonya wakabuzya kuti, “Sena nduwe haazibwene mulwiiyo lwabukombi?” Vaughn wakaingula kuti, “Peepe, ndili umwi wa Bakamboni ba Jehova.” Imwaalumi oyo wakamwetamweta ulaamba, “Eenaa. Ndazyiba lino, calipandulula we.”

Aaba Bakamboni boonse—abambi ibanji loko—balikkomene kuti bakaba basicamba kumakani aakukambauka. Sena andinywe muyoocita obo?

[Cifwanikiso icili apeeji 17]

Tara

[Cifwanikiso icili apeeji 17]

Vaughn