Bantu babeleka canguzu tabawayiwayi kubeleka mulimo. Muciindi caboobo, balakukkomanina kubeleka canguzu kutegwa bajane nzyobayandika alimwi akugwasya bamwi, nokuba kuti mulimo ngobacita tabaukkomanini bantu bamwi.

Kwaamba masimpe, buumi bujisi zintu zinji zyakucita. Munyika eeyi bantu banji mobatakukkomanini kubeleka canguzu, kuba munkutwe kulagwasya kapati.—Mukambausi 3:13.

Ndaiya kuti, ciindi muntu nabeleka canguzu cipa kuti alimvwe kabotu alimwi akukkutila. Kulimvwa kukkutila ooku kwandipa kuti kandikukkomanina kubeleka. Ikuti kamukuyanda kapati kubeleka kuyoomugwasya kutegwa mube ampuwo mbotu.”—Reyon.

NJIISYO YAMU BBAIBBELE: “Mulimo uuli woonse uubelekwa canguzu ujanya mpindu.”—Tusimpi 14:23.

Amuubone munzila iili kabotu mulimo kwiinda mukutobela nzila zilembedwe ansi aawa.

Amukukkomanine kwiiya kucita zintu munzila yeelede. Kufwumbwa naa mubeleka milimo yaaŋanda, mumanizya homuweki naa mubeleka mulimo wakumubili, amulitakate mumulimo ngomucita. Mwacizyiba buyo kuubeleka kabotu mulimo, amujane nzila mbomukonzya kuyaambele, ambweni kucikonzya kuucita cakufwambaana naa kuubeleka kabotu kwiinda waawo. Ikuti kamuubeleka kabotu mulimo wanu, nkokuti munakuukkomanina kapati.

NJIISYO YAMU BBAIBBELE: “Sena wamubona muntu uucibwene kubeleka mulimo wakwe? Uyakwiima kumbele lyabami; takaimi kumbele lyabantu-bantu buyo pe.”—Tusimpi 22:29.

Amubone mbougwasya mulimo ooyo. Kanji-kanji, ciindi noomwiibeleka kabotu milimo yanu, mugwasya bantu bambi. Mucikozyanyo, ciindi nomwiibeleka cabunkutwe milimo yanu yaaŋanda, nkokuti mucesya mulimo ngobeelede kubeleka banamukwasyi bamwi.

NJIISYO YAMU BBAIBBELE: “Kupa kulakkomanisya kapati kwiinda kupegwa.”—Milimo 20:35.

Amubeleke kwiinda waawo mpomweelede kusika. Muciindi cakubeleka buyo asyoonto, amusole kubeleka kwiinda waawo mpomweelede kusika. Kwiinda mukucita boobo, mutondezya kuti mulabweendelezya buumi bwanu, kutali kuti musinikizyigwa buya kubeleka milimo minji, pele akaambo kakuti mbomwasala kucita.—Matayo 5:41.

NJIISYO YAMU BBAIBBELE: “Mulimo wako mubotu utabi wakusinikizyigwa buya pe, pele ube wakuliyandila.”—Filimoni 14.

Amuzilange kabotu zintu. Bantu bankutwe tabali batolo alimwi buya tabaciindizyi kubeleka. Balasoleka kuzilanga kabotu zintu, balakkomana kubeleka canguzu akujana ciindi cakulyookezya.

NJIISYO YAMU BBAIBBELE: “Kulyookezya kusyoonto nkubotu kwiinda kulijaya kubeleka mulimo muyumu akutandaanya muwo.”—Mukambausi 4:6.