“OMUKAINTU.” Oobo mbombubo Jesu zimwi ziindi mbwaakali kubaita bamakaintu. Mucikozyanyo, ciindi naakaponya muntu iwakaloongomene katakonzyi koololoka kwamyaka iili 18, Jesu wakati: “Omukaintu, waangululwa kubulwazi bwako.” (Lk. 13:10-13) Jesu wakalibelesya bbala eeli ilyakali kubelesyegwa kanji-kanji noliba leelyo naakali kwaambaula abanyina, eeco icakali kubonwa kuti mbulemu kuciindi eeco. (Joh. 2:4; 20:13) Pele kwakali bbala alimbi ilyakajisi bupanduluzi abumbi ibwiindilila aakutondezya buyo bulemu kapati.

Bbaibbele libelesya bbala ilitondezya luzyalo alimwi alubomba ciindi nolyaamba kujatikizya bamakaintu bamwi. Jesu wakalibelesya ciindi naakali kubandika amukaintu iwakali kuciswa bulwazi bwakalobola kwamyaka iili 12. Nzila mukaintu ooyu mbwaakamusikila Jesu tiiyakazumizyidwe pe kweelana a Mulawo wa Leza, walo iwakali kwaamba kuti muntu uuciswa bulwazi oobu wakalisofweede. Ibamwi inga baamba kuti wakeelede kulizandula kuli bamwi akaambo kabulwazi mbwaakajisi. (Lev. 15:19-27) Pele wakali kuyandisisya kugwasyigwa. Mubwini, “wakapenga kapati mumaanza aabasilisi banji alimwi wakasowa lubono lwakwe loonse, nokuba boobo tanaakapona pe, pele bulwazi bwakaindila.”—Mk. 5:25, 26.

Cakuyubaila, mukaintu ooyu wakainda munkamu akuunka kusyule lya Jesu akujata maaya aacisani cakwe caatala. Mpoonya-mpoonya bulowa bwakaleka kuzwa! Mukaintu ooyu wakali kuyeeya kuti takoozyibwa pe, pele Jesu wakabuzya kuti: “Ino nguni wandiguma?” (Lk. 8:45-47) Naakamvwa boobo, mukaintu ooyu kayoowede alimwi kakankama wakafwugama kumbele lya Jesu “akumwaambila makani oonse mbwaabede.”—Mk. 5:33.

Kutegwa mukaintu ooyu alimvwe kwaanguluka, calubomba Jesu wakaamba kuti: “Koba acamba, mwanaangu!” (Mt. 9:22) Kweelana abasikwiiya zyamu Bbaibbele, mabala aamu Chihebrayo alimwi amu Chigiriki aamba kuti “mwanaangu” alakonzya kubelesyegwa camaambilambali ikwaamba “luzyalo alimwi alubomba.” Jesu wakazumanana kumukulwaizya mukaintu ooyu kwiinda mukumwaambila kuti: “Koya muluumuno, alimwi utakaciswi kabili kubulwazi oobu ibwali kukupenzya.”—Mk. 5:34.

“Mwanaangu.” Oobu mbombubo mwaalumi muna Israyeli muvwubi wazina lya Boazi mbwaakamwiita Rute muna Moabu. Awalo Rute wakalilibilikide akaambo kakuti wakali kuvwulula bbaale mumuunda wamuntu ngwaatakazyi. Boazi wakati: “Swiilila mwanaangu.” Mpoonya wakakulwaizya Rute kuzumanana kuvwulula mumyuunda yakwe. Rute wakakotama akuvwuntama ansi kumbele lya Boazi akubuzya ikaambo ncaakamufwida luzyalo kakuli wakali mweenzu. Boazi wakaingula kwiinda mukwaamba majwi aayumya-yumya aakuti: “Ndakalwiidwa makani oonse aazintu nzyookacitila banyokozyala [bamukamufwu ba Naomi] . . . Jehova akulongezye akaambo kamilimo yako.”—Rut. 2:8-12.

Eelo kaka Jesu alimwi a Boazi nzikozyanyo zibotu kubaalu Banakristo! Zimwi ziindi, baalu bobilo inga baswaya mukaintu Munakristo uuyandika lugwasyo lwamu Magwalo alimwi akukulwaizyigwa. Bamana kulomba busolozi kuli Jehova kwiinda mumupailo alimwi nobamana kuswiilila mucizyi ncaamba, inga cabaubila baalu kumukulwaizya akumupa luumbulizyo kuzwa mu Jwi lya Leza.—Rom. 15:4.