Makani aali kulugwalo lwa Deuteronomo 22:25-27 mubwini taambi kujatikizya kusinizya mulandu wamwaalumi, nkaambo makani aali kulugwalo oolu atondezya kuti mwaalumi wakajisi kale mulandu. Mulawo ooyu wakali kubikkila maano kapati kukubula mulandu kwamusimbi. Amubone twaambo tweengelede.

Tupango tuli musyule twaamba kujatikizya mwaalumi iwakoonana amusimbi uusinkilidwe “mumunzi.” Kwiinda mukucita boobo, wakali kuba amulandu wakucita bumambe, mbwaanga musimbi iwakasinkilidwe wakali kubonwa kuti wakalikwetwe. Mbuti kujatikizya musimbi ooyo? ‘Tanaakakwiila nokuba kuti wakali mumunzi.’ Ikuti naakakwiila, nkokuti bamwi nobakamumvwa alimwi nobakamukwabilila. Pele kunyina naakakwiila. Akaambo kaceeci, boonse bakacita bumambe, aboobo boonse bakajanwa kuti bakajisi mulandu.—Dt. 22:23, 24.

Mpoonya Mulawo wakaamba bukkale bwiindene oobu: “Nokuba boobo, ikuti kamuli musyokwe mwaalumi ooyo mwaakamujana musimbi uusinkilidwe, eelyo wakamujata akoonana anguwe, nkokuti mwaalumi ooyo iwakoonana anguwe weelede kujaigwa alikke, musimbi tamweelede kumucita cintu cili coonse pe. Tajisi cibi ceelede lufwu. Eeci cili mbuli muntu umwi wajaya mweenzinyina. Nkaambo wakamujana musyokwe, alimwi musimbi ooyo uusinkilidwe wakakwiila pele kwakanyina uumuvwuna.”—Dt. 22:25-27.

Mubukkale oobo, babetesi bakali kumusyoma musimbi ooyo. Munzila nzi? Bakali kuyeeya kuti musimbi ooyo “wakakwiila pele kwakanyina uumuvwuna.” Aboobo tanaakacita bumambe. Nokuba boobo, mwaalumi wakalijisi mulandu wakujata musimbi uusinkilidwe akucita bumambe nkaambo “wakamujata akoonana anguwe.”

Aboobo, nokuba kuti mulawo wakali kubikkila kapati maano kukubula mulandu kwamusimbi, cibalo caamba kuti mwaalumi wakajisi mulandu wakujata musimbi alimwi akucita bumambe. Tulakonzya kuba masimpe kuti babetesi bakali ‘kwaavwuntauzya makani cakulomya’ alimwi akusala kweelana azyeelelo Leza nzyaakali kubelesya cakwiinduluka-induluka alimwi kwaziindi zinji.—Dt. 13:14; 17:4; Kul. 20:14.