Bataata bakalonga kuzwa kucisi ca Australia akuunka kucisi ca Germany mu 1949. Bakaunka kuyooyandaula mulimo mumakkampani aasya mabwe akupanga magesi mpoonya bakakkala ku Victoria. Okuya nkobakabakwatila bamaama, mpoonya mebo ndakazyalwa mu 1953.

Nokwakainda buyo myaka misyoonto, bamaama bakatalika kwiiya Bbaibbele a Bakamboni ba Jehova, aboobo njiisyo zyamu Bbaibbele ndakatalika kuzizyiba kandicili muniini. Nokuba boobo, bataata kunyina nobakali kuyanda cikombelo cili coonse. Bakatalika kuba basinkondo, alimwi akuyoosya, aboobo bamaama bakatalika kubayoowa. Pele bakazumanana kwiiya Bbaibbele cakusisikizya alimwi akutalika kuziyanda kapati njiisyo zyandilyo. Ikuti bataata kabatako, bakali kutwaambila nzyobakali kwiiya mebo amucizyi wangu. Bakatwaambila kujatikizya paradaiso yakumbele alimwi ambotukonzya kuba bantu bakkomene ikuti naa twatobela zyeelelo zya Bbaibbele zyakulilemeka.—Intembauzyo 37:10, 29; Isaya 48:17.

Nondakali aamyaka iili 18 yakuzyalwa, ndakayanda kuzwa aŋanda akaambo kabataata ibakali basinkondo. Nokuba kuti ndakali kuzisyoma nzyobakandiyiisya bamaama kuzwa mu Bbaibbele, tiindakali kuzibikkila kapati maano. Aboobo ndakaalilwa kuzibelesya. Ndakatalika kubeleka mulimo wakubamba malaiti mukkampani iyakali kusya malasya. Nondakali amyaka iili 20, ndakakwata. Nokwakainda myaka yotatwe, twakazyala mwana musimbi wakusaanguna aboobo ndakatalika kuyeeya alimwi cintu cakali kuyandika kapati mubuumi bwangu. Ndakalizyi kuti Bbaibbele lilakonzya kuugwasya mukwasyi wesu, aboobo ndakatalika kwiiya Bbaibbele a Bakamboni ba Jehova. Pele bakaintu bangu tiibakali kubakkomanina Bakamboni. Ciindi nondakaunka kumuswaangano wabo umwi, bakaintu bangu bakandaambila kuti ndileke kwiiya Bbaibbele ikuti naa nditaciti oobo, ndeelede kuzwa aŋanda. Akaambo kakuyoowa, ndakatobela nzyobakali kuyanda aboobo ndakacileka kuyanzana a Bakamboni. Pele mukuya kwaciindi ndakausa kapati akaambo kakwaalilwa kutobela ncondakazyi kuti cililuzi.

Bumwi buzuba, babelesima bakanditondezya zintu ziletela muzeezo wakoonana. Cakali kukkomanisya pele alimwi cakali kupa kulimvwa bubi, alimwi cakandipa kulimvwa kuba amulandu kapati. Kuyeeya zintu nzyondakaiya mu Bbaibbele, ndakali masimpe kuti Leza uyoondisubula. Pele mbondakali kuyaabuzumanana kuzyeebelela zintu eezyi, ndakacinca mbondakali kuzibona zintu ziletela muzeezo wakoonana. Mukuya kwaciindi, ndakaba acilengwa cakuzyeebelela.

Kwamyaka iinda ku 20 yakatobela, ndakaindila buya kutatobela zyeelelo nzyobakandiyiisyide bamaama. Bukkale bwangu bwakatalika kutondezya  zintu nzyondakali kusanina mizeezo yangu. Ŋambawido yangu tiiyakali kabotu, alimwi ndakali kuyandisya kwaamba masesya aajatikizya makani aakoonana. Koonana ndakatalika kukulanga munzila iitali kabotu. Nokuba kuti ndakacili kukkala aabakaintu bangu, ndakalisyabide abamakaintu bambi. Bumwi buzuba ndakalilanga mucimbonimboni akwaamba kuti, ‘Tandikuyandi.’ Bulemu bwangu bwakamana alimwi ndakatalika kulimvwa kubula mpindu.

Cikwati cangu cakamana, alimwi buumi bwangu bwakanyongana kapati. Mpoonya ndakapaila kuli Jehova camoyo woonse. Ndakatalika alimwi kwiiya Bbaibbele nokuba kuti kwakaindide myaka iili 20 kuzwa nindakacilekede. Aciindi eeci bataata bakalifwide, mpoonya bamaama bakalibbapatizyidwe kuba Kamboni wa Jehova.

Kwakali lwiindano lupati kujatikizya bukkale bwangu alimwi azyeelelo zyamu Bbaibbele zisumpukide. Pele aciindi eeci ndakalikanzide kujana luumuno lwamumizeezo lusyomezyedwe mu Bbaibbele. Ndakatalika kubelesya majwi aali kabotu alimwi akweendelezya bukali bwangu. Alimwi ndakaleka bukkale bwangu bwakutalilemeka, kuuma njuka, kuciindizya kunywa, alimwi ndakaleka kubabbida basikundilemba mulimo.

Beenzuma kumulimo tiibakakamvwisya ikaambo ncondakali kuyanda kucinca boobu. Kwamyaka yotatwe, bakazumanana kundisinikizya kuti ndijokele kubukkale bwangu bwakaindi. Ikuti naa ndanyema kapati naa ndaamba bbala litali kabotu, bakali koompolola akwaamba kuti: “Yaa! Joe ngotwakazyi wapiluka.” Eelo kaka majwi aali boobu akali kundicisa! Kanji-kanji ndakali kulimvwa mbuli kuti ndaalilwa.

Busena nkondakali kubelekela bwakazwide zintu ziletela muzeezo wakoonana izyakasimbidwe alimwi amumakkompyuta. Lyoonse babelesima bakali kutuma zifwanikiso zibyaabi kapati kwiinda mukubelesya makkompyuta aabo mbubwenya mbondakali kucita andime kaindi. Ndakali kusoleka kuleka cilengwa eeci, pele kulibonya kuti balo bakali kuyanda kuti ndaalilwe kucileka. Aboobo ndakalomba iwakali kundiyiisya Bbaibbele kuti andigwasyilizye alimwi akundikulwaizya. Cakukkazika moyo, wakandiswiilila ciindi nondakali kumwaambila zintu zyakali mumoyo wangu. Kwiinda mukubelesya magwalo aamu Bbaibbele aagaminide, wakanditondezya mbondikonzya kulwana penzi lyangu, alimwi wakandikulwaizya kulomba lugwasyo kuli Jehova kwiinda mukupaila lyoonse.—Intembauzyo 119:37.

Bumwi buzuba ndakapanga muswaangano ababelesima. Nobakabungana boonse, ndakabaambila kuti babape bukoko bamaalumi bobilo ibakali kulyaamba kuti mbaacakolwa. Boonse bakaamba cakoompolola kutondezya kuti tiibaukkomanina muzeezo: “Tokonzyi kucita boobo! Aaba bamaalumi balipengede akaambo kacilengwa cakunywa bukoko!” Mpoonya ndakabaambila kuti: “Inzya, andime mbondipengede oobo.” Kuzwa buzuba oobo, babelesima aaba bakazyiba mbondakapengede kulwana cilengwa cangu cakweebelela zintu ziletela muzeezo wakoonana alimwi bakaleka kundisinikizya kuti ndijokele kubukkale bwangu bwakaindi.

Mukuya kwaciindi, kwiinda mukugwasyigwa a Jehova ndakacileka cilengwa eeci cakweebelela zintu ziletela muzeezo wakoonana. Kumane mu 1999, ndakabbapatizyigwa kuba Kamboni wa Jehova, alimwi ndilalumba kapati kuti ndakaba acoolwe alimwi cakupona buumi buli kabotu, ibukkomanisya.

Lino ndilamvwisya kaambo Jehova ncazisulaika zintu nzyondakali kukkomanina kwaciindi cilamfwu. Mbwali Taata siluyando, wakali kuyanda kundikwabilila kumapenzi aaboola akaambo kakweebelela zintu ziletela muzeezo wakoonana. Eelo kaka ngamasimpe majwi aali mulugwalo lwa Tusimpi 3:5, 6! Cibalo eeci caamba kuti: “Kosyoma Jehova amoyo wako woonse, utasyomi maano aako omwini pe. Munzila zyako zyoonse kolanga kulinguwe, eelyo walo ulalulamika nzila zyako.” Zyeelelo zyamu Bbaibbele tiizyandikwabilila buyo pele alimwi zyandigwasya kuzwidilila.—Intembauzyo 1:1-3.

Kaindi, ndakali kulimvwa kuba muntu uunyina mpindu, pele lino ndilimvwa kuba ampindu alimwi ndijisi luumuno lwamumizeezo. Ndipona buumi buli kabotu alimwi ndilimvwa kuti Jehova wakandilekelela alimwi ulandigwasyilizya. Mu 2000, ndakakwata ba Karolin, mucizyi mubotu Munakristo uumuyanda kapati Jehova mbubwenya mbuli mbondimuyanda. Muŋanda yesu muli luumuno kapati. Tulimvwa kuti ncoolwe cipati kuba cibeela cabunyina bwaluyando bwa Bunakristo bwanyika yoonse.