Kuli lulayo lunji lupegwa kujatikizya makani aaya. Nokuba boobo, taluli lulayo loonse lugwasya. Mucikozyanyo, bamwi balakonzya kumwaambila kuti mutalili naa kutondezya mbomulimvwa munzila iili yoonse. Pele bamwi balakonzya kumwaambila ciindene aceeci akumwaambila kuti mutondezye mbomulimvwa. Ibbaibbele lilatondezya mbomukonzya kuzilanga kabotu zintu, inzila yeendelana abuvwuntauzi bwamazuba aano.

Mumasena amwi, kuti musankwa walila ubonwa kuti tali musankwa ncobeni. Pele sena kuli kaambo keni keelede kupa muntu kumvwa nsoni kulila nomuba mubuleya? Basyaazibwene mulwiiyo lwamumizeezo balazumina kuti tacilubide kulila akaambo kabuumba. Mukuya kwaciindi, kulila kulakonzya kumugwasya kuzunda buumba tacikwe makani naa kusweekelwa nkupati buti. Kutalila cipa kufwundilila, calo cikonzya kumucisa kapati. Ibbaibbele talizuminizyi muzeezo wakuti cililubide kulila akaambo kabuumba. Mucikozyanyo, amuyeeye kujatikizya Jesu. Nokuba kuti wakalijisi nguzu zyakubusya bantu bafwide, Jesu wakalila caantangalala akaambo kalufwu lwamulongwe wakwe Lazaro!—Johane 11:33-35.

Akwalo kunyema kanji-kanji ncibeela cakulila kwaambisya lufwu nolwacitika cakutayeeyela. Kuli twaambo tunji tukonzya kupa kuti muntu iwafwidwa anyeme, mbuli ciindi muntu uulemekwa naamba twaambo tutako alimwi cakutayeeya. Mwaalumi umwi waku South Africa wazina lyakuti Mike wakaamba kuti: “Ndakajisi buyo myaka iili 14 ciindi bataata nobakafwa. Ciindi camalila, musololi wacikombelo ca Anglican wakaamba kuti Leza uyanda bantu babotu alimwi ulafwambaana kubabweza. * Eeci cakandinyemya nkaambo bataata twakali kubayanda kapati. Lino kwainda myaka iili 63 pesi cicindicisa.”

Mbuti kujatikizya kulipa mulandu? Kwaambisya ciindi nokwacitika lufwu lwakutayeeyela, muntu iwafwidwa ulakonzya kuyeeya cakwiinduluka-induluka kuti, ‘Nocatakacitika ikuti nondakacita eeci aceciya.’ Naa ambweni ciindi camamanino nomwakabonana amufwu mwakazwangana. Eeci inga capa kuti mwiindile kulipa mulandu.

Ikuti naa kulipa mulandu alimwi akunyema kazimukatazya, tamweelede kufwida mumoyo pe. Muciindi caboobo, amwaambile mulongwe walo uukonzya kumuswiilila akumukkazika moyo kwiinda mukumwaambila kuti bantu boonse ibali mubuumba mbobalimvwa oobo. Ibbaibbele lituyeezya kuti: “Mulongwe mwini-mwini ulatondezya luyando ciindi coonse, alimwi ngomunyoko wakazyalilwa kuti akugwasye muziindi zyamapenzi.”—Tusimpi. 17:17.

Jehova Leza, Mulengi wesu, ngo Mulongwe mwini-mwini ngwakonzya kuba awalo muntu iwafwidwa. Amumwaambile mbomulimvwa mumoyo wanu nkaambo “ulamubikkila maano.” (1 Petro 5:7) Aboobo ulabasyomezya boonse bacita boobo kuti mizeezo yabo iyakuumbulizyigwa ‘aluumuno lwa Leza oolo lwiinda maano oonse.’ (Bafilipi 4:6, 7) Alimwi amumulekele Leza kuti amuponye kwiinda muluumbulizyo lujanika mu Jwi lyakwe, Bbaibbele. Amulembe mulongo wamagwalo aawumbulizya. (Amubone  kabbokesi kabikkilizyidwe.) Ambweni inga mwayanda kwaapeta amwi aamagwalo aayo. Kuzinzibala kuyeeya  zintu zili boobu kulakonzya kumugwasya kwaambisya masiku nomuli nyolikke alimwi anocamukatazya koona.—Isaya 57:15.

Caino-ino, mwaalumi umwi uujisi myaka yakuzyalwa iili 40 ngotutiite kuti ba Jack, wakafwidwa mukaintu wakwe iwakali kuciswa bulwazi bwakkansa. Ba Jack bakaamba kuti zimwi ziindi balimvwa kulendelelwa kapati. Pele bagwasyigwa kwiinda mukupaila. Bakaamba kuti: “Ikuti ndapaila kuli Jehova inga tandicilimvwi kulendelelwa. Kanji-kanji ndilasinsimuka masiku mpoonya ndilaalilwa koona alimwi. Ndamana kubala akuzinzibala kuyeeya twaambo twamu Magwalo tuumbulizya mpoonya akupaila camoyo woonse, ndilimvwa kukkalikana mumizeezo alimwi akulimvwa kuba aluumuno calo cindigwasya kuti ndoone.”

Mukaintu umwi uucili mwana-mwana uutegwa Vanessa wakafwidwa banyina akaambo kakuciswa. Awalo wakabona mbougwasya mupailo. Wakaamba kuti: “Ciindi nondakali muziindi zikatazya ncobeni, ndakali kunga ndiita buyo zina lya Leza mpoonya akutalika kulila. Jehova wakaiswiilila mipailo yangu alimwi lyoonse wakali kundipa lugwasyo ndondakali kuyandika.”

Basikupa lulayo kubantu ibakafwidwa bakulwaizya baabo bali mubuumba kuti kabatola lubazu mumilimo yakulisungula iigwasya banamaleya. Kucita boobo kulakonzya kuleta lukkomano alimwi akucesya buumba. (Milimo 20:35) Bunji bwa Banakristo ibakafwidwa bajana kuti kubeleka mulimo wakugwasya bamwi kwabaumbulizya kapati.—2 Bakorinto 1:3, 4.