Muli Bwasanu, mu March 11, 2011, ku Japan kwakacitika muzuzumo wanyika mupati iwakali kusika ku 9.0 kukomena, ibantu bainda ku 15,000 bakafwa alimwi akunyonyookelwa zintu zikonzya kuulwa mali aainda ku $200 bbiliyoni (U.S.). Nobakacenjezyegwa kujatikizya ntenda eeyi, ba Kei ibajisi myaka yakuzyalwa iili 32 bakafwutuka kwiinda mukutanta amulundu. Ba Kei baamba kuti: “Buzuba bwakatobela, ndakapiluka kuyoobona naa kuli zintu nzyondakali kunga ndabweza, pele ndakajana kuti zintu zyoonse zyakatolwa ameenda, kubikkilizya aŋanda yangu. Alimwi kunyina cili coonse cakasyaala.”

Ba Kei bakazumanana kwaamba kuti: “Cakatola ciindi cili mbocibede kusyoma kuti tazili buyo zintu kuzigama izyakasweeka, pele ndakasweekelwa acilawo. Izintu eezyo zyakali kubikkilizya mootokala, kkompyuta njondakali kubelesya kumulimo, matebulu, tuuno, zyuuno zyasofa, piyano, bbanjo, nyeele, mafwuta, alimwi azintu nzyondakali kubelesya kupenta, kubikkilizya azifwanikiso buya.”

Amusole kubikkila buyo maano kuzintu nzyomujisi lino, kutali nzyomwakasweekelwa. Ibbaibbele lyaamba kuti: “Nokuba kuti muntu kajisi zyintu zinji buti, ibuumi bwakwe tabuzwi kuzyintu eezyo nzyajisi.” (Luka 12:15) Ba Kei balabuyeeya bukkale bwabo akwaamba kuti: “Ndakalemba mulongo wazintu nzyondakali kuyanda, pele eeci cakali kundiyeezya buyo zintu nzyondakajisi izyakatolwa ameenda. Mumulongo wangu ndakali kulemba buyo zintu nzyondakali kuyandisya kapati, mpoonya ikuti zyazuzikizyigwa, ndakali kuzigwisya mumulongo. Mulongo wazintu ooyu wakandigwasya kubambulula buumi bwangu.”

Muciindi cakubikkila buyo maano kupenzi ndyomujisi, kamuzibelesya zintu izyakamucitikila kuyumya-yumya bamwi. Ba Kei baamba kuti: “Ndakali kutambula lugwasyo kuzwa kulibasikupa lugwasyo kubuleya alimwi akubalongwe, pele mbondakazumanana kugwasyigwa, ndakatalika kulibona mbuli kuti kunyina ncondikonzya kulicitila. Mpoonya ndakayeeya majwi aamu Bbaibbele aali mulugwalo lwa Milimo 20:35 aakuti, ‘kupa kulakkomanisya kapati kwiinda kutambula.’ Pele akaambo kakuti tiindakajisi zintu zinji zyakumubili, ndakasala kuti kandiyumya-yumya bantu bamwi ibakajatikizyidwe muntenda eeyi. Kutondezya bwaabi munzila iili boobu kwakandigwasya kapati.”

Amupaile kuli Leza kulomba busongo bwakulwana mapenzi aanu. Ba Kei bakasyoma cisyomezyo camu Bbaibbele ca Leza icakuti, ‘ulaswiilila cikombyo cabasweekede.’ (Intembauzyo 102:17) Andinywe mulakonzya kucita mbubwenya oobo.

Sena mulizyi? Ibbaibbele lilaamba ciindi nokutakabi kulibilika kujatikizya kusweekelwa zintu akaambo kantenda zilicitikila. *—Isaya 65:21-23.