“Imuzoka ooyo wakaindi, uutegwa Diabolosi a Saatani, . . . weena nyika yoonse.”—Ciyubunuzyo 12:9.

NZYOBAAMBA BANTU

Bamwi basyoma kuti Saatani Diabolosi tali muntu pe, muciindi caboobo, bayeeya kuti ncibi cili mumuntu umwi aumwi.

NCOLYAAMBA BBAIBBELE

Saatani nkwali ncobeni. Mungelo muzangi, ncilenge camuuya cikazyanya a Leza. Ibbaibbele lyaamba Saatani kuti ‘ngomweendelezi wanyika eeyi.’ (Johane 12:31) Ubelesya ‘zitondezyo zyakubeja’ alimwi ‘anzila zitaluleme’ kutegwa azuzikizye makanze aakwe.—2 Batesalonika 2:9, 10.

Ibbaibbele lilaamba kujatikizya mubandi ngwaakajisi Leza alimwi a Saatani kujulu. Aboobo, mbwaanga Leza wakabandika a Saatani, nkokuti Saatani tacili cibi cili mumuntu umwi aumwi, nkaambo Leza tajisi cibi cili coonse mulinguwe. (Deuteronomo 32:4; Job 2:1-6) Eeci citondezya kuti Saatani tacili cibi cili mumuntu umwi aumwi, pele nkwali ncobeni.

NKAAMBO NZI MAKANI AAYA NCAAYELEDE KUMUJATIKIZYA?

Makanze aa Saatani aakuyanda kumupa kusyoma kuti tako, alikozyenye ayaayo aacigwebenga calo citayandi kuzyibwa kutegwa cizumanane kucita zyintu zibyaabi. Kutegwa mulikwabilile kuli Saatani, cakusaanguna mweelede kuzyiba kuti nkwali ncobeni.

“Maawe kunyika . . . nkaambo Diabolosi wamuselukila.”—Ciyubunuzyo 12:12.

NZYOBAAMBA BANTU

Bantu banji basyoma kuti Saatani ukkala kunsi aanyika mumulilo wahelo. Bamwi bayeeya kuti uli mubantu bacita zyintu zibi.

NCOLYAAMBA BBAIBBELE

Saatani ncilenge camuuya, alimwi ukkala mubusena bwamuuya, ibutalibonyi. Aciindi cimwi, Saatani wakali kucikonzya kusika kubusena nkwakkala Leza abangelo bakwe basyomeka. (Jobu 1:6) Pele wakatandwa kubusyu bwa Leza, antoomwe azilenge zimwi zyamuuya zibyaabi, lino ukkala buyo anyika.—Ciyubunuzyo 12:12.

Sena eeci caamba kuti Saatani ujanika buyo abusena bomwe anyika? Mucikozyanyo, ambweni mwakabala kujatikizya dolopo lyansiku lya Pegamo lyalo lyaambwa kuti “nkwakkede Saatani.” (Ciyubunuzyo 2:13) Mubwini, majwi aakuti nkwakkede Saatani akalembwa akaambo kakuti bantu bakubusena oobu bakali kukomba Saatani. Saatani takkali abusena bomwe anyika pe. Muciindi caboobo, Bbaibbele lyaamba kuti “mami oonse aamunyika” ngaakwe.—Luka 4:5, 6.

“Nyika yoonse ili mumaanza aamubi.”—1 Johane 5:19.

NCOLYAAMBA BBAIBBELE

Bantu banji balayungwa alimwi akweendelezyegwa a Saatani. (2 Bakolinto 11:14) Kaambo aaka kalatugwasya kumvwisya cipa kuti bantu baalilwe kusumpula bukkale munyika.

Alimwi Bbaibbele lilaamba kujatikizya bukkale bwaindila kubija, mwalo Saatani abangelo bamwi bazangide mobeendelezya bantu alimwi akubapenzya.—Matayo 12:22; 17:15-18; Maako 5:2-5.

NCOMUKONZYA KUCITA

Tamweelede kumuyoowa Saatani. Kutegwa mutayungwi a Saatani, mweelede kwiiya mbwabeena bantu, kutegwa ‘muzyibe nzila zyakwe zyabucenjezu.’ (2 Bakolinto 2:11) Kwiinda mukubala Bbaibbele, mulakonzya kubuzyiba bucenjezu bwa Saatani calo ciyoomugwasya kuti muteenwi.

Amuzisowe zyintu zyoonse ziswaangene amicito yamadaimona. (Milimo 19:19) Zyintu eezyi zilabikkilizya azizimba, mabbuku, mavidiyo, nyimbo, alimwi azisobano zyaakkompyuta zikulwaizya kukomba mizimo naa kusonda.

Bbaibbele lyaamba kuti: “Amumukazye Diabolosi eelyo uyoomutija.” (Jakobo 4:7) Kwiinda mukutobela lulayo lwamu Bbaibbele lwabusongo, mulakonzya kulikwabilila kubucenjezu bwa Saatani.—Baefeso 6:11-18.