Zikozyanyo Zyamikwasyi Iyazwidilila Imuli Bana Naa Bazyali Bakujana

TATUCILI BUYO BANTU BAKKALA MUŊANDA YOMWE

Mwana musimbi waba Philip uujisi myaka yakuzyalwa iili 20 wazyina lyakuti Elise wakali kukkala abausyi alimwi wakali kucita milimo minji yaaŋanda. Ba Philip nibakakwata ba Louise, sena ba Louise bakali kukonzya kumvwana amwana wakujana?

Ba Louise: Kumatalikilo tiicakali cuubauba. Ndili muntu uukkomana kuba aŋanda alimwi akubeleka milimo yaaŋanda.

Elise: Baama ba Louise bakabambulula zyintu muŋanda akuzisowela anze zyintu zyesu. Ndakazibamba kabotu alimwi zyintu pele zimwi ndakazibikka mpoziteelede, mbwaanga tiindakalizyi nkozyakeelede kubikkwa. Eeci cakabanyemya baama, twakazwangana alimwi twakaleka kwaambauzyanya nsondo yoonse.

Ba Louise: Ciindi cimwi ndakaambila Elise kuti: “Oobu bukkale tabukonzyi kutugwasya pe, nkaambo tandikonzyi kuzumanana mubukkale buli boobu.” Buzuba mbubwenya oobo kumangolezya wakaboola kulilekelela. Ndakamukumbata mpoonya toonse twakalila.

Elise: Baama bakasiya zifwoto zyangu kubwaanda kazilengelela, alimwi Bataata tiibakaagusya malaiti ngondakabikka muŋanda. Cilibonya kuba kantu kasyoonto, pele kusiya zyintu eezyi nkobakacita cakandigwasya kulimvwa kuti ndicijisi kwakukkala. Ndilalumba kubona ba Louise mbobamulanganya musyoonto wangu musankwa ciindi natuswaya. Kwainda myaka yobilo lino, ndatalika kubabona kuba bamumukwasyi ncobeni.

Louise: Ndilimvwa kuti muciindi cakuba buyo bantu bakkala muŋanda yomwe, lino tulamvwana kapati a Elise.

 “LUKAMANTANO LULAYANDIKA KAPATI”

Ba Anton aba Marelize nibakakwatana myaka iili cisambomwe yainda, aumwi wakajisi bana botatwe.

Ba Anton: Tulacita zyintu antoomwe amukwasyi, mbuli kuunka kubusena bumwi kuyoolikondelezya alimwi tulajana ciindi cakubandika amwana umwi aumwi kumugama. Cakatutolela myaka iili mbwiibede kutegwa tutalike kulimvwa kuti tuli banamukwasyi, pele lino twaambo tunji tujatikizya mukwasyi wesu twakatubamba.

Ba Marelize: Tulimvwa kuti cilayandika kapati kubona bana kuti “mbibesu” kutali kuti “mbibako naa mbibangu.” Ndiliyeeyede cimwi ciindi nindakatongooka nkaambo ndakalimvwa kuti ba Anton kunyina nibakamulaya kabotu mwanaangu umwi musankwa alimwi bakapa mwanaabo musimbi cuuno cibotu mumoota. Ndakaiya kuti lukamantano mumukwasyi lulayandika kapati kwiinda kukkala kucuuno cili kumbele mumoota. Tulasoleka kutasalulula nikuba kuti cilakatazya kucita zyintu zyeelene kubana boonse.

Alimwi ndilasoleka kutaamba zyintu zyakali kutukkomanisya mumukwasyi wesu wakaindi, nkaambo aabo batakaliko balamvwa mbuli kuti tulombozya mukwasyi wakaindi. Muciindi caboobo, ndilatondezya kulumba kumukwasyi ngotujisi lino.

“KUSAANGUNA KUBALUMBAIZYA”

Ba Francis bakakwatana aba Cecelia myaka yone yainda. Mumukwasyi wabo muli bana bapati baba Cecelia botatwe alimwi amwana mukubusi omwe waba Francis.

Ba Francis baamba kuti: Ndilasola kuba muntu uusikika alimwi akutafwambaana kunyema. Tulalya antoomwe akubelesya ciindi eeci kubandika mumukwasyi. Alimwi ndilabakulwaizya boonse kucita milimo yaaŋanda, calo cipa kuti mukwasyi woonse ugwasyigwe.

Ba Cecelia baamba kuti: Ndilajana ciindi cakubandika amwana umwi aumwi alimwi akuswiilila kutegwa ndizyibe nzyobayeeya anzyobalibilika. Ciindi notubandika mumukwasyi, tulasola kusaanguna kubalumbaizya, kumane tulabakulwaizya kutegwa bazumanane kucita kabotu. Mpoonya ikuti naa ndalubizya, ndilalilekelela.

 KUKOMEZYEGWA ABAZYALI BOBILO BAKUJANA

Yuki uujisi myaka yakuzyalwa iili 20, tanababwene bausyi kuzwa ciindi naakajisi myaka yakuzyalwa iili musanu. Banyina bakazookwatwa kuli ba Tomonori, pele bakafwa Yuki naakajisi myaka yakuzyalwa iili 10. Nikwakainda myaka yosanwe kuzwa ciindi bausyi bakujana ba Tomonori nibakakwata ba Mihoko, Yuki wakali kukkala abazyali bobilo bakujana.

Yuki: Ciindi bataata bakujana nibakasala kukwata alimwi, ndakaamba boobu mumoyo, “Tandiyandiki kuba abamaama bakujana. Ndacinca-cinca kale mumukwasyi wangu.” Ndakakaka kubabona mbuli baama alimwi tiindakali kubalemeka.

Ba Mihoko: Nokuba kuti balumi bangu tiibakandisungilizya kuti kandimuyanda mwanaabo mbuli mbwaakali kuyanda walo, ndakasala kuti katumvwana a Yuki. Twakacita ncotwakali kukonzya kutegwa zyintu nzyaakali kucita lyoonse zizumanane, mbuli zyintu zyakumuuya, kulikondelezya alimwi amubandi twamana kulalila. Alimwi ndakamuzyiba kabotu nitwakabandika kujatikizya lufwu lwabanyina.

Nindakamita, twakali kulibilika kujatikizya Yuki alimwi twakali kuyanda kuti alimvwe kuti ulayandwa mumukwasyi. Twakali kumuzumizya Yuki kumusanina mwana, kumusanzya, akumucinca matebela alimwi twakali kumulumbaizya kabamvwide beenzyinyina. Itsuki ulamuyanda kapati Yuki. Katanaiya kwaamba mabala aakuti “taata” naa “baama” wakalizyi kwaamba kuti niinii—icaamba kuti mupati wangu.

Yuki: Mbuli mwana wakujana, kulimvwa kulendelelwa alimwi akulimvwa kutaba cibeela camukwasyi ncilengwa buya. Ulakonzya kupandulula bukkale bwako kulibamwi pele balo tabakonzyi kumvwisya. Nokuba boobo, ndilikkomene kwaamba kuti Banakristoma bandigwasya kapati. Kutakkomana kujatikizya baama bakujana kwakamana. Balandipa lulayo lubotu alimwi ndilimvwa kwaanguluka kwaambaula ambabo camoyo woonse.

[Majwi aakwelelezya sikubala aali apeeji 9]

Amukkazyike moyo. Mikwasyi yakujana ilakonzya kukkomana alimwi akuzwidilila