Makani 46: Bwaanda bwa Jeliko

AMULIZYE

INO ncinzi cipa kuti bwaanda bwa Jeliko buwe? Kulibonya mbuli kuti bbomba lipati lyabuuma bwaanda. Pele mumazuba aayo tiibakalijisi mabbomba nizyiba mfwuti. Aalo aaya maleele kale aa Jehova! Atubone mbocakacitika.

Swiilila Jehova ncaambila Josyuwa, ulati: ‘Iwe abasikalumamba bako mweende kuzinguluka munzi. Kamuzinguluka abuzuba ciindi comwe kwamazuba aali cisambomwe. Mubwezelezye abbokesi lyacizuminano. Bapaizi bali ciloba beelede kuba kumpela lyandilyo kumwi kabasiba myeembo.

‘Mubuzuba bwaciloba mweelede kuuzinguluka munzi kwaziindi zili ciloba. Mwamana musibe myeembo kwaciindi cilamfwu, alimwi boonse boongolole ajwi lyabukali lyalumamba. Eelyo bwaanda buyakuwa cakumaniina.’

Josyuwa abantu bakwe bacita Jehova mbwaabalailila. Nobeenda, boonse bali zi. Taku waambaula pe. Cilimvwisya buyo nkulila kwamyeembo amujiinci. Kweelede kuti bali yoowede aaba basinkondo bali mu Jeliko ibalwana bantu ba Leza. Hena waibona ntambo iisalala iilengeenga ampulungwido? Ino mpulungwido eeyi njaani? Inzya, Lahabu wacita mbuli mbobakamwaambila basikutwela bobilo. Boonse bamukwasyi wakwe nkobali mukati balalangilila anguwe.

Kuzyi kusika mubuzuba bwaciloba nobamana kuzinguluka munzi kwaziindi zili ciloba, myeembo yalila, basikalumamba boongolola, kumane bwaanda bwawa. Kumane Josyuwa wati: ‘Amujaye kufwumbwa muntu uuli mumunzi alimwi mumuumpe. Amuumpe zyoonse! Muleke buyo nsiliva, ingolida, mukuba abutale akuzyibikka muciyobwedo catente lya Jehova.’

Kuli basikutwela bobilo, Josyuwa wati: ‘Amunjile muŋanda ya Lahabu mumuzwisye anze amukwasyi wakwe woonse.’ Lahabu amukwasyi wakwe bafwutulwa mbuli mbobakamusyomezya basikutwela.

Josyuwa 6:1-25.

Mibuzyo

Ncinzi Jehova ncaakaambila basikalumamba alimwi abapaizi kuti bacite kwamazuba aali cisambomwe?
Ncinzi ncobakeelede kucita basikalumamba mubuzuba bwaciloba?
Mbuli mbobona acifwanikiso, ncinzi cicitika kubwaanda bwa Jeliko?
Nkaambo nzi ncokuli ntambo iilengeenga ampulungwido?
Ncinzi Josyuwa ncaambila basikalumamba ncobeelede kubacita bantu alimwi amunzi? Pele ino mbuti nsiliva
Ncinzi basikutwela bobilo ncibaambilwa kucita?

Mibuzyo aimwi

Bala Josyuwa 6:1-25.
Mbuti kuzinguluka munzi wa Jeliko kwabana Isilayeli mubuzuba bwaciloba mbokukonzyenyi amilimo ya Bakamboni ba Jehova njobacita kumazuba aano aakumamanino? (Jos. 6:15, 16; Is. 60:22; Mt. 24:14; 1 Kor. 9:16)

Mbuti businsimi bulembedwe kuli Josyuwa 6:26 mbobwakazuzikizyigwa mumyaka iili 500 kumpela, alimwi eeci cituyiisya nzi kujatikizya jwi lya Jehova? (1 Bam. 16:34; Is. 55:11)