1. Sena kuli makani aambi ngotukonzya kubandika aajatikizya busicamba?

 MBWAANGA twasika kumamanino aabbuku eeli, sena kucili makani aambi ngotukonzya kwaamba aajatikizya busicamba? Inzya. Cakusaanguna, amuzyibe kuti Bbaibbele lilijisi makani manji, aajatikizya bube oobu buyandika kapati kunze lyayaayo ngotwabandika mubbuku eeli. Cabili, tweelede kubona ncotweelede kucita kutegwa tugwasyigwe kapati aziiyo nzyotujana mu Bbaibbele izijatikizya busicamba.

2. Sena kuli babelesi ba Leza bambi basyomeka ibakatondezya busicamba? Mbaani mazina?

² Sena kuli bantu bamwi bamu Bbaibbele mbomukonzya kuyeeya aabo ibakatondezya busicamba kunze lyabaaba mbotwabandika mubbuku eeli? Ambweni mulakonzya kuyeeya kujatikizya basinsimi baambidwe mu Magwalo aa Chihebrayo mbuli Isaya, Jeremiya, Ezekiele, Jona naa Malaki. Masimpe kuti abalo bakapenga, mbubwenya mbwaakapandulula Paulo mucaandaano 11 cabbuku lya Bahebrayo. Kulugwalo oolu wakalemba kuti “bakasukusyigwa kwiinda mukusampaulwa akukwibbaulwa, alimwi ncobeni bakapenzyegwa kwiinda waawo, bakaangwa nketani akubikkwa muntolongo.” Kuyungizya waawo, kujatikizya bamwi wakalemba kuti: ‘Bakalibulide, bakali mumapenzi alimwi akutundululwa.’ Cuusisya ncakuti, bamwi bakajaigwa buya. (Heb. 11:​36, 37) Pele bakamubelekela Jehova cabusicamba tacikwe makani amasunko ngobakajana.

3-4. Mbuti bamakaintu bobilo ibataambidwe mazina mbobakamufwutula Mwami Davida muziindi zikatazya?

³ Bbaibbele kunyina nolibaamba mazina bantu bamwi ibakatondezya busicamba. Mucikozyanyo, lilatwaambila kujatikizya bamakaintu bobilo ibakali kupona mumazuba aa Mwami Davida. Bamakaintu aaba bakamugwasya Davida ciindi mwanaakwe mubyaabi Abisalomu naakali kuyanda kumujaya. Abisalomu wakali mubi moyo, sikulisumpula alimwi wakalikanzide kubanyanga bwami bausyi. Eeci cakapa kuti batije akuzwa mu Jerusalemu. Davida wakalomba Zadoki mupaizi sicamba kuti apiluke mumunzi kutegwa kamvwa makanze ngaakajisi Abisalomu aakuyanda kwaatula Davida abulelo. Aboobo ciindi Zadoki naakamvwa makanze ngaakajisi Abisalomu, wakatuma musimbi umwi uutaambidwe zina mu Bbaibbele kuti akaambile babelesi ba Davida bobilo nzyaakali kuyanda kucita Abisalomu. Nokuba kuti wakali kukonzya kujaigwa, ooyu musimbi wakaunka kuyakwaambila babelesi ba Davida bobilo ncaakamwaambila Zadoki. Aaba babelesi bakaunka akumwaambila simalelaabo Davida mulumbe, pele muntu umwi wakababona.  Ooyu muntu wakaatola makani kuli Abisalomu. Kuzwa waawo, aaba baalumi bakayuba mumugoti wamaanzi. Kumane mukaintu umwi utaambidwe zina, imukaintu wamukamwini mugoti, wakabazumizya kuyuba mumugoti kumane wakauvwumba cakufwambaana. Mpoonya baalumi ba Abisalomu bakaboola akutalika kubayandaula, pele walo wakabaambila kuunka kubusena bumbi. Eelo kaka tulabulumba busicamba mbobakatondezya bamakaintu aaba ibasyomeka ikukwabilila mwami wakasalidwe a Jehova!—2Sam. 15:​23-37; 17:​8-22.

⁴ Kwaamba masimpe, Bbaibbele lizwide zikozyanyo zyabaalumi abamakaintu bakali basicamba. Bantu aaba, ibaambidwe alimwi abaabo ibataambidwe mazina, bavwubi abacete, ibakali aampuwo abantu bantu buyo, cabusicamba bakazumanana kuba kulubazu lwa Jehova. Eelo kaka zikozyanyo zyabo zilakonzya kutugwasya andiswe mazuba aano!

Mbouyandika Mupailo

5-7. Ino ncinzi cakamugwasya Paulo kuba abusicamba mbwaakali kuyandika ciindi naakali kupenzyegwa?

⁵ Mbuti mbotukonzya kubaiya bamaalumi abamakaintu ibalembedwe mu Bbaibbele ibakatondezya busicamba? Tweelede kunooyeeya kuti aaba bantu tiibakazyalwa kabali basicamba pe. Sena bakazwidilila kubelekela Jehova akaambo kanguzu zyabo beni? Naaceya. Kuli cintu cimbi ncobakali kuyandika kutegwa babe basicamba. Ino ncintu nzi eeco?

⁶ Mucikozyanyo, amuyeeye buyo cakagwasya mwaapostolo Paulo kutegwa atondezye busicamba. Kabali mu Filipi, Paulo a Sila bakaumwa ankamu iyakanyemede kapati, bakazapawidwa zisani, bakaumwa cakwiinduluka-induluka amisako, bakawaalwa muntolongo imwakali kusiya akwaangwa maulu muziliba. (Mil. 16:​12, 19-24) Nobakaangununwa, sena Paulo wakayoowa kutalika kukambauka? Mbwaanga ooyu  mwaalumi wakali muntu mbuli ndiswe, tacigambyi kuti wakali kukonzya kuyoowa. Nokuba boobo, Paulo wakalizyi kuti Jehova wakali kuyanda kuti azumanane kukambauka. Kunze lyaboobo, lino Paulo wakali kuyookambaukila kumunzi wa Tesalonika. Ino ncinzi cakamugwasya kuba anguzu alimwi abusicamba?

⁷ Kumbele Paulo wakalemba kuti: “Nkaambo nokuba kuti musyule twakapenga akusampaulwa ku Filipi, mbubonya mbomuzyi, Leza wakatupa busicamba bwakuti tumwaambile makani mabotu aa Leza nokuba kuti twakali kukazyigwa kapati.” (1Tes. 2:2) Paulo wakalizyi kuti wakali kuyandika busicamba kutegwa abeleke mulimo Leza ngwaakamupa. Pele ino wakali kuyoobujana kuli busicamba oobo? Sena wakali kuyoobelesya nguzu zyakwe mwini? Peepe. ‘Leza ngowakamupa busicamba.’ Cakulicesya wakapaila kuli Jehova kumulomba busicamba mbwaakali kuyandika. Awalo Jehova wakawiingula mupailo wakwe.

8. Ino ncinzi ncotweelede kucita kutegwa tube abusicamba mbuli bwaakajisi Paulo?

⁸ Andinywe mulakonzya kulomba busicamba mbubwenya mbwaakacita Paulo. Mutalibiliki kuti tamukonzyi kuba basicamba akaambo kakuti tamujisi nguzu zyakuba abube oobu. Muciindi caboobo, amupaile kuli Jehova Leza kumulomba kuti amugwasye kuba sicamba. Aboobo mulakonzya kuba masimpe kuti uyoomugwasya kuba basicamba mubukkale buli boonse.—Mil. 4:29.

9. Nkaambo nzi ncotweelede kumulomba Jehova kuti atuyungizyile lusyomo?

⁹ Mulakonzya kumulomba Jehova kuti amuyungizyile lusyomo, nkaambo lusyomo ncibeela camucelo wamuuya uusalala wa Jehova. (Gal. 5:​22, 23) Kunze lyaboobo, lusyomo lulakonzya kumukwabilila kukulwanwa a Saatani akumupa kuzumanana kusyomeka kuli Jehova. (Ef. 6:16) Lusyomo lwa Bunakristo lulaanguzu kapati cakuti Bbaibbele lyaamba kuti tulakonzya ‘kwiizunda nyika’ kuti katujisi lusyomo luyumu. (1Joh. 5:4) Kakunyina kudooneka, tulakonzya kuba abusicamba kuti katujisi lusyomo muli Jehova. Ikuti katujisi lusyomo lwakuti Jehova ulakonzya kutugwasya muziindi zyamapenzi, tulakonzya kuba abusicamba bwakuliyumya mubukkale buli boonse. Aboobo toonse buyo, tulijisi kaambo kabotu ncotweelede kulomba mbuli mbobakacita baapostolo ba Jesu nobakati: “Kotuyungizyila lusyomo.”—Lk 17:5.

‘Amube Basicamba!’

10-11. Nkaambo nzi Paulo ncaakayeezya Banakristo Bahebrayo ncociyandika kuba basicamba?

¹⁰ Jesu wakasinsimide kuti Jerusalemu wakali kuyoonyonyoonwa. Kakusyeede myaka misyoonto kutegwa eeci cicitike, Paulo wakalembela bakwesu ibakali kukkala mu Jerusalemu alimwi amunsi-munsi kuti balibambile mapenzi aakali kulangilwa. (Lk. 19:​41-44; 21:​20-24) Mbuti Paulo mbwaakabayeezya mbociyandika kuba basicamba? Wakabayeezya cisyomezyo ca Jehova icaambidwe kumakani aantalisyo aabbuku eeli. Jehova wakaamba kuti: “Ziyume zitete, tandikakusiyi pe alimwi tandikakulekelezyi pe.” Ino cisyomezyo eeci cakabajatikizya buti? Paulo wakayungizya kuti: “Kutegwa tube basicamba akwaamba kuti: ‘Jehova ngomugwasyi wangu; tandikooyoowa pe. Ino muntu inga wandityani?’”—Heb. 13:​5, 6.

¹¹ Bbaibbele talyaambi cini cakacitika ciindi bana Roma nobakanyonyoona Jerusalemu mu 70 C.E. Pele tuli masimpe kuti Banakristo basyomeka bakalutobela lulayo lwa Paulo. Kunze lyaboobo, bakaba abusicamba bwakutobela malailile aa Jesu ‘aakutijila kumalundu’ aciindi ceelede.—Lk. 21:​20, 21.

12. (a) Nzisyomezyo nzi zikonzya kumugwasya kuba basicamba ciindi nomwajana buyumuyumu? (b) Mbuti bamwi mbobakatondezya busicamba alimwi ino nywebo mukanzide kucita nzi? (Amubone kabbokesi kakuti: “Amwiiye Busicamba Bwabo.”)

¹² Jehova ulakonzya kumupa busicamba  andinywe kuti mwajana buyumuyumu lino alimwi akumbele. (Ezk. 38:​1, 2, 10-12; Mt. 24:21) Lyoonse kamuyeeya kuti Jehova wakatusyomezya kuti unootukwabilila kuli Saatani akubantu babyaabi. (Ezk. 38:​19-23; 2Tes. 3:3) Kunyina naaceya nayoobalekelezya aabo ibamuyanda akumusyoma. Mbubwenya Jehova mbwaakasyomezya Joshua, andinywe umwaambila kuti: “Koyuma buyo akuba sicamba”! (Jos. 1:​7, 9, 18) Kunze lyaboobo, lyoonse kamuyeeya majwi aa Jesu aakuti: “Amube basicamba!” Kweelana ambwaakasyomezya, Jesu kunyina nayakwaalilwa kumutumina muuya uusalala uuzwa kuli Bausyi. Muuya ooyu, uyoomupa busicamba bwakuzumanana kusyomeka kuli Jehova. (Joh. 14:26; 15:​26, 27; 16:33) Tacidoonekwi buya kuti eeci ‘ciyoopa kuti mube basicamba’!

13. Ncinzi cimukulwaizya kuzumanana kutondezya busicamba?

¹³ Amweezeezye buyo mbokunoobede ciindi nokunooli luumuno munyika yoonse. Eelo kaka iyootweenda misozi yalukkomano ciindi twaakutambula bayandwa besu ibakafwa aabo ibali mumizeezo ya Jehova! Kunze lyaboobo, cinookkomanisya kapati kubonana abaalumi abamakaintu basicamba mbotwabandika mubbuku eeli alimwi abamwi buyo. Munyika ya Saatani bakapenga citaambiki alimwi bamwi bakajaigwa buya akaambo kakuzumanana kusyomeka kuli Leza. Aboobo sena muyeeya kuti baakubusyigwa munyika mpya, banikuuside akaambo kakusala kubelekela Jehova? Naaceya! Ciindi mwanoobeleka antoomwe ambabo kusandula nyika eeyi kuba paradaiso, sena muyakuusa akaambo kakuti mwakatondezya busicamba alimwi aluyando kuli Jehova mumazuba aamamanino? Peepe! Aboobo amube amakanze aakuzumanana kuba basicamba kusikila kumamanino. Kuti mwazumanana kucita boobo, munookkomene mane kukabe kutamani.