CIIYO 17
Ino Jesu Ujisi Bube Buli Buti?
Ciindi notwiiya zintu Jesu nzyaakaamba akucita kali anyika, twiiya bube ibutupa kuba acilongwe anguwe alimwi a Jehova, nkokuti Bausyi. Ino mbube nzi bumwi oobu bukkomanisya? Alimwi mbuti mbotukonzya kumwiiya Jesu mubuumi bwesu?
1. Muunzila nzi Jesu mwali mbuli Bausyi?
Kujulu, Jesu ulabalangilila Bausyi basiluyando alimwi walikwiiya kuzwa kulimbabo kwamyaka minji. Akaambo kaceeci, ulayeeya, kulimvwa alimwi akucita zintu mbubwenya mbuli mbabo. (Amubale Johane 5:19.) Mubwini, Jesu ulabutondezya kabotu-kabotu bube bwa Bausyi cakuti wakaamba kuti: “Kufwumbwa ooyo wandibona wamubona awalo Taata.” (Johane 14:9) Ciindi nomwiiya bube bwa Jesu, muyoomuzyiba kabotu Jehova. Mucikozyanyo, luzyalo Jesu ndwaakajisi kubantu, lutondezya Jehova mbwalimvwa kujatikizya ndinywe.
2. Mbuti Jesu mbwaakatondezya kuti ulamuyanda Jehova?
Jesu wakaamba kuti: “Ikutegwa nyika izyibe kuti ndilamuyanda Taata, ndilacita mbubonya Taata mbwaakandilailila kuti ndicite.” (Johane 14:31) Ciindi Jesu naakali anyika, wakatondezya kuti ulabayanda kapati Bausyi kwiinda mukubamvwida nociba ciindi nocakali kukatazya kucita boobo. Alimwi Jesu wakali kuyanda kubandika kujatikizya Bausyi akugwasya bantu kuba acilongwe ambabo.—Johane 14:23.
3. Mbuti Jesu mbwaakatondezya kuti ulabayanda bantu?
Bbaibbele lyaamba kuti Jesu ‘ulabayanda kapati bantu.’ (Tusimpi 8:31) Wakalutondezya luyando oolu kwiinda mukukulwaizya bantu akulyaaba kubagwasya. Wakacita maleele aakatondezya nguzu aluzyalo ndwaakajisi kubantu. (Marko 1:40-42) Wakali kubeendelezya caluzyalo bantu alimwi akutasalulula. Majwi aakwe akali kupa luumbulizyo abulangizi kubabombe myoyo boonse ibakali kumuswiilila. Jesu wakalilisungwide kupenga akufwa akaambo kaluyando ndwajisi kubantu boonse. Pele uyandisya kapati aabo batobela njiisyo zyakwe.—Amubale Johane 15:13, 14.
AMWIIYE ZINJI
Amwiiye makani aamwi kujatikizya bube bwa Jesu akulanga-langa mbomukonzya kutondezya luyando abwaabi mbuli mbwaakacita.
4. Jesu ulabayanda Bausyi
Cikozyanyo ca Jesu cituyiisya mbotukonzya kutondezya luyando ndotujisi kuli Leza. Amubale Luka 6:12 a Johane 15:10; 17:26. Mwamana kubala lugwalo lumwi alumwi, amubandike mubuzyo uutobela:
-
Mbuti mbotukonzya kumwiiya Jesu, akutondezya kuti tulamuyanda Jehova?
Jesu wakali kubayanda Bausyi bakujulu alimwi kanji-kanji wakali kubandika ambabo mumupailo
5. Jesu wakali kubabikkila maano bantu bapengede
Jesu wakali kubikka nzyobayandika bantu mubusena bwakusaanguna. Nociba ciindi naakakatede wakali kubelesya ciindi alimwi anguzu zyakwe kugwasya bantu. Amubale Marko 6:30-44, akubandika mibuzyo eeyi:
-
Mucibalo eeci, ninzila nzi zimwi izitondezya Jesu mbwaakali kubabikkila maano bantu?—Amubone tupango 31, 34, 41, alimwi a 42.
-
Ncinzi cakali kumukulwaizya Jesu kubagwasya bantu?—Amubone kapango 34.
-
Mbwaanga Jesu utondezya bube bwa Jehova, ino zyoonse eezyi zimuyiisya nzi kujatikizya Jehova?
-
Ninzila nzi zimwi motukonzya kumwiiya Jesu caboola kukubabikkila maano bantu?
6. Jesu mwaabi
Jesu wakali mwaabi nokuba kuti tanaakajisi zintu zinji zyakumubili, alimwi aswebo utukulwaizya kuba baabi. Amubale Milimo 20:35, akubandika mubuzyo ooyu:
-
Kweelana ancaakaamba Jesu, ncinzi cikonzya kutupa kukkomana?
Atweebelele VIDIYO, akubandika mubuzyo uutobela.
-
Muunzila nzi zimwi motukonzya kuba baabi, nokuba kuti tatujisi zintu zinji zyakumubili?
Sena mulizyi?
Bbaibbele lituyiisya kuti tweelede kupaila kuli Jehova kwiinda muzina lya Jesu. (Amubale Johane 16:23, 24.) Notupaila munzila iili boobu, tutondezya kulumba kuliceeco Jesu ncaakatucitila, ikutugwasya kuba acilongwe a Jehova.
BAMWI BAAMBA KUTI: “Leza tabikkili maano kumapenzi eesu.”
-
Mbwaanga Jesu utondezya bube bwa Bausyi, mbuti zintu nzyacita mbozitondezya kuti Jehova ulatubikkila maano?
MUBUFWAAFWI
Jesu ulamuyanda Jehova alimwi abantu. Mbwaanga Jesu uli mbuli Bausyi, ikuti mwamuzyiba kabotu, nkokuti mulamuzyiba awalo Jehova.
Ncinzi Ncomwaiya?
-
Mbuti mbotukonzya kutondezya luyando kuli Jehova mbuli mbwaakacita Jesu?
-
Mbuti mbotukonzya kutondezya luyando kubantu mbuli mbwaakacita Jesu?
-
Mbube nzi mbwajisi Jesu ibumukkomanisya kapati?
AMUZYIBE ZINJI
Atubone bube bwa Jesu bumwi mbotukonzya kwiiya.
“Kutegwa Mumwiiye Jesu, Amube . . .” (Jesu—Nenzila, Ngokasimpe, Mbobuumi, peeji 317)
Amwiiye kaambo ncotweelede kupaila muzina lya Jesu.
“Nkaambo Nzi Ncotweelede Kupaila Muzyina Lya Jesu?” (Ngazi Yamulindizi, February 1, 2008)
Sena Bbaibbele kuli ncolyaamba kujatikizya mbwaakali kulibonya Jesu?
Ncinzi ncotukonzya kwiiya twalanga Jesu mbwaakali kubeendelezya bamakaintu?
“Leza Uyanda Kuti Bamakaintu Kabeendelezyegwa Cabulemu” (Ngazi Yamulindizi, September 1, 2012)
Andiza Inga Mwaakkomanina Ayaaya
MIBUZYO IIVWULA KUBUZYIGWA
Ino Ndwiiyo Nzi Lwamu Bbaibbele Ndobapa Bakamboni ba Jehova?
Mulakonzya kubelesya Bbaibbele lili lyoonse nomwiiya mupulogilamu iitabbadelelwi ya Bakamboni ba Jehova. Amwaanguluke kutamba bamukwasyi wanu boonse naa balongwe.
