Cibalo 1

Ncaakali Mwiiyi Mupati Jesu

IMYAKA yiinda kuzyuulu zyobile yainda, kwakazyalwa mwana uulibedelede kapati kumbele iwakazyikuba mwaalumi mupati kwiinda boonse bakaponede. Kunyina muntu wakali kupona kuciindi eeco cansiku iwakajisi ndeke naa myootokala. Kwakanyina zipekupeku, mincini yakkompyuta alimwi ayeeyo iibelesyegwa kubala alimwi akulangilila zifwanikiso iitegwa Internet.

Imwana ooyo wakaulikwa zina lyakuti Jesu. Wakaba muntu musongo kwiinda boonse bakaponede naa ibapona ino anyika. Jesu alimwi wakaba mwiiyi mubotu kwiinda boonse. Wakali kupandulula zintu zikatazya munzila nguba-uba kuteelela.

Jesu wakali kubayiisya bantu kufwumbwa nkwaakali kubajana. Wakali kubayiisya kunkomwe yalwizi alimwi amumaato. Wakali kubayiisya mumaanda aabo alimwi anaakali kweendeenda. Jesu wakanyina mootokala alimwi kunyina naakabelesya bbaasi naa citima munyendo zyakwe zyoonse. Wakali kweenda amaulu kuya kubusena bumwi abumwi kaya buyiisya bantu.

Nzinji zintu nzyotwiiya kuzwa kubantu bambi. Pele tulakonzya kwiiya zintu ziyandika kapati kuzwa ku Mwiiyi Mupati, Jesu. Imajwi aa Jesu ajanika mu Bbaibbele. Notubala naa kuswiilila majwi aabalwa kuzwa mu Bbaibbele, inga cili buyo mbuli kuti Jesu uli mukubandika andiswe.

Ino nkaambo nzi Jesu ncaakali Mwiiyi Mupati boobo? Ikaambo kamwi nkakuti Jesu awalo kuli mwiiyi wakamuyiisya. Alimwi wakalizyi mbociyandika kapati kuswiilila. Pele ino nguni Jesu ngwaakali kuswiilila? Ino nguni wakamuyiisya?— Bausyi mbabakamuyiisya. Alimwi Leza mba Bausyi ba Jesu.

 Katana kuboola anyika akuba muntunsi, Jesu wakali kukkala kujulu a Leza. Aboobo Jesu wakaliindene abantu bambi boonse nkaambo kunyina muntu uumbi iwakakkala kujulu katana kuzyalwa anyika. Kujulu Jesu wakali Mwana uumvwida Bausyi, iwakali kutobela zyoonse nzyaakali kwaambilwa. Aboobo Jesu wakali kukonzya kuyiisya bantu zintu nzyaakayiide kuli Leza. Ulakonzya kumwiiya Jesu kwiinda mukumvwida bauso alimwi abanyoko.

Akambi kaambo ikakapa kuti Jesu abe Mwiiyi Mupati uucibwene kuyiisya nkakuti wakali kubayanda bantu. Wakali kuyanda kugwasya bantu kwiiya mbwabede Leza. Jesu wakali kubayanda bantu boonse, ibapati alimwi abana. Alimwi abalo bana bakali kuyanda kuyanzana a Jesu nkaambo wakali kwaambaula ambabo alimwi akubaswiilila nzyobakali kwaamba.

Bumwi buzuba ibazyali bamwi bakaleta bana babo basyoonto kuli Jesu. Pele ibeenzyinyinaa Jesu bakayeeya kuti Mwiiyi Mupati wakajisi bubi kapati cakuti tanaakajisi ciindi cakwaambaula abana basyoonto. Aboobo bakaambila bazyali aabo ikuti bapiluke buyo. Pele ino ncinzi  Jesu ncaakaamba?— Jesu wakati: “Amubaleke bana baze kulindime, mutabakasyi pe.” Ee, Jesu wakali kuyanda kuti bana baunke kulinguwe. Aboobo, nokuba kuti wakali muntu musongo alimwi uulemekwa kapati, Jesu wakajana ciindi cakuyiisya bana basyoonto.—Maako 10:13, 14, Ci.

Sena ulikazyi kaambo kakapa kuti Jesu ayiisye bana alimwi akubaswiilila nzyobakali kwaamba? Ikamwi nkakuti wakali kuyanda kubakkomanisya kwiinda mukubaambila zintu zijatikizya Leza, Bausyi bakujulu. Ino inga wabakkomanisya buti bantu?— Nkwiinda mukubaambila zintu nzyookaiya kujatikizya Leza.

Cimwi ciindi, Jesu wakabelesya mwana musyoonto ikuyiisya balongwe bakwe ciiyo cimwi ciyandika kapati. Wakaimika mwana musyoonto akati kabasikwiiya bakwe. Mpoonya Jesu wakaambila baalumi aaba bapati kuti bakeelede kucinca miyeeyo yabo akuba mbuli mwana musyoonto ooyu.

Ino ncinzi Jesu ncaakali kwaamba naakaamba makani aayo? Sena ulizyi muntu mupati naa mwana mupati-pati mbwayelede kuba mbuli mwana musyoonto?— Imwana musyoonto tajisi luzibo lunji mbuli mupati alimwi ulayandisisya kwiiya. Aboobo ncaakali kwaamba Jesu ncakuti basikwiiya bakwe bakeelede kuba bantu balicesya mbuli mbobalicesya bana basyoonto. Inzya, nzinji nzyotunga twaiya toonse kuzwa kubantu bambi. Alimwi toonse tweelede kuzyiba kuti injiisyo zya Jesu zilayandika kapati kwiinda mizeezo yesu tobeni.—Matayo 18:1-5.

Ikaambo kambi Jesu ncaakali Mwiiyi Mupati uuzwidilila mukuyiisya nkakuti wakalicizyi mbokubotezyegwa zintu nzyaakali kwaambila bantu bambi. Wakapandulula zintu munzila nguba-uba  alimwi iimvwika. Mumibandi yakwe, wakali kubikkilizya bayuni, maluba-luba alimwi azintu zimbi nzyobakazyi bantu boonse ikutegwa abagwasye kuteelela zintu zimwi zijatikizya Leza.

Bumwi buzuba Jesu naakali munsi aamulundu, ibantu banji bakaboola kulinguwe. Jesu wakakkala akubakananina makani, naa mulumbe mbubwenya mbobwene aacifwanikiso eeci. Imakani aaya ayitwa kuti Mulumbe waa Cilundu. Wakati: ‘Amulange bayuni bauluka mujulu. Tababyali mbuto pe. Tabayoboli zyakulya mumatala. Pele Leza uuli kujulu ulabasanina. Sena nywebo tamuyandiki kwiinda mbabo?’

Alimwi Jesu wakaamba kuti: ‘Amwiiye kumaluba-luba aamusokwe. Alakomena nokuba kuti taabeleki. Alimwi amubone mbwaayebeka! Naba Mwami Solomoni wakali muvwubi kapati taakwe naakasamide cakweebeka mbuli maluba-luba aamusokwe. Aboobo ikuti Leza kakuli ulaalanganya maluba-luba aamena, sena takamulanganyi nywebo?’—Matayo 6:25-33.

 Sena waciteelela ciiyo Jesu ncaakali kuyiisya?— Tanaakali kuyanda kuti katulibilika kujatikizya nkotunga twajana cakulya naa zyakusama. Leza ulizyi kuti tulayandika zintu eezyo zyoonse. Jesu tanaakaamba kuti tatweelede kubeleka kutegwa tujane cakulya alimwi azyakusama. Pele wakali kwaamba kuti tweelede kubikka Leza mubusena butaanzi. Ikuti twacita oobo, Leza uya kubona kuti tulijisi zyakulya alimwi azyakusama nzyotuyandika. Sena ulaasyoma makani aaya?—

Ino ncinzi bantu ncobakayeeya Jesu naakamanizya kwaambaula?— Ibbaibbele lyaamba kuti bantu boonse bakagambwa akuyiisya kwakwe.  Cakali kukondelezya kapati kumuteelela. Zintu nzyaakaamba zyakagwasya bantu kucita zintu ziluleme.—Matayo 7:28.

Aboobo cilayandika kapati kuti tumwiiye Jesu. Sena ulizyi mbotunga twacita oobo?— Tulaajisi majwi aakwe aalembedwe mubbuku. Sena ulilizyi zina ibbuku eelyo?— Ndi Bbaibbele Lisalala. Eeci caamba kuti tulakonzya kumuswiilila Jesu kwiinda mukubikkila maanu kuzintu nzyotubala mu Bbaibbele. Masimpe ngakuti, Ibbaibbele lilijisi kaano kakondelezya kapati kujatikizya mbwaakatwaambila Leza kuti katumuswiilila Jesu. Atubone cakacitika.

Bumwi buzuba Jesu wakatola balongwe bakwe botatwe aatala lyamulundu umwi mulamfwu. Imazina aabo mbaa Jakobo, Johane alimwi a Petro. Tulaiya makani aambi manji kujatikizya baalumi aaba kumbele, mbwaanga boonse botatwe bakali kumvwana kapati a Jesu. Pele aaciindi eeci caalubazu, busyu bwa Jesu bwakatalika kubala mbuli zuba. Alimwi izisani zyakwe zyakatuba buu mbubwena mbobona mucifwanikiso eeci.

Kuzwa waawo, Jesu abalongwe bakwe bakamvwa jwi kuzwa kujulu. Lyakati: “Ngooyu Mwanaangu ngweyandisisya mulinguwe mwenkondwa. Amumuswiilile!” (Mateyo 17:1-5, Ci) Sena ulimuzyi iwakaamba majwi aayo?— Ngu Leza! Inzya, ngu Leza iwakaamba kuti bakeelede kumumvwida Mwanaakwe.

Ino swebo mbuti mazubaano? Sena tuyoomumvwida Leza akuswiilila Mwanaakwe, Mwiiyi Mupati?— Eeci ncotweelede kucita toonse. Sena uciyeeyede mbotukonzya kucita boobo?—

Inzya, tulakonzya kuswiilila Mwanaa Leza kwiinda mukubala zibalo zili mu Bbaibbele izijatikizya buumi bwakwe. Kuli zintu zitaliboteli zinji nzyayanda kutwaambila Mwiiyi Mupati. Uyookkomana ikwiiya zintu eezi izilembedwe mu Bbaibbele. Alimwi ciyookukkomanisya ikuti kobaambila beenzyinyoko kujatikizya zintu eezi zibotu nzyoiya.

Ikutegwa ujane twaambo tumbi tujatikizya zintu zibotu izijanwa mukuswiilila Jesu, jalula Bbaibbele lyako akubala kuli Johane 3:16; 8:28-30; alimwi aku Incito 4:12.

[Cifwanikiso icili apeeji 11]

Nkaambo nzi bana ncobakali kukukkomanina ikubaa Jesu?

[Cifwanikiso icili apeeji 12]

Ino nciiyo nzi bana alimwi abapati ncobanga baiya kumwana musyoonto?

[Cifwanikiso icili apeeji 13]

Ino nciiyo nzi Jesu ncaakali kuyiisya naakaamba makani aabayuni alimwi amaluba-luba?

[Cifwanikiso icili apeeji 14]

“Ngooyu Mwanaangu . . . Amumuswiilile!”