Marko 13:1-37
13 Naakali kuzwa mutempele, umwi wabasikwiiya bakwe wakati kulinguwe: “Omwiiyi, langa! Kubota mabwe aaya amayake aaya!”+
2 Pele Jesu wakamwaambila kuti: “Tee waabona ngemunya mayake aaya mapati? Taakwe bbwe liyoocaala aano atala aabbwenyina kakunyina kukolomonwa.”+
3 Mpoonya naakakkede aa Cilundu ca Maolifa kalilibonya tempele, Petro, Jakobo, Johane alimwi a Andreya bakamubuzya kumbali kuti:
4 “Kotwaambila, ino ndilili zintu eezyi noziyooba alimwi ncinzi ciyooba citondezyo cakuti mamanino aazintu zyoonse eezyi alaafwaafwi kusika?”+
5 Aboobo Jesu wakatalika kubaambila kuti: “Amulangisye kuti kutabi muntu uumweena.+
6 Banji bayooboola muzina lyangu, kabati, ‘Ndime nguwe,’ eelyo bayakweena bantu banji.
7 Kunze lyaboobo, mwaakumvwa nkondo mumasena aalaafwaafwi amasena aali kule, mutakayoowi pe; eezyi zintu zyeelede kucitika, pele mamanino taanasika.+
8 “Nkaambo cisi ciyoobukila cisinyina abwami buyoobukila bwaminyina;+ kuyooba mizuzumo yanyika mumasena aaindene-indene; alimwi kuyooba nzala.+ Eezyi ngamatalikilo aamapenzi aali mbuli kumyongwa kwamukaintu uuyanda kutumbuka.+
9 “Pele nywebo, amucenjele. Bantu bayoomutola kunkuta,+ alimwi muyakuumwa muzikombelo+ akwiimikwa kumbele lyabeendelezi alimwi abami akaambo kandime kuti bukabe bumboni kulimbabo.+
10 Alimwi mumasi oonse, makani mabotu aleelede kukambaukwa cakusaanguna.+
11 Lino nobamutola kunkuta, mutalibiliki kuti muyakwaamba nzi; pele kufwumbwa ncomuyoopegwa aciindi eeco, amukaambe, nkaambo tamuli ndinywe mwaambaula pe, pele muuya uusalala nguwaambaula.+
12 Kunze lyaboobo, muntu uyakwaaba munyina kuti ajaigwe, ausyi uyakwaaba mwanaakwe, abana bayoobukila bazyali babo akubajazya.+
13 Alimwi muyoosulwa abantu boonse akaambo kazina lyangu.+ Pele ooyo uuliyumya kusikila kumamanino+ uyoofwutulwa.+
14 “Pele mwaakubona cintu cisesemya+ cileta lunyonyooko kaciimvwi abusena mpociteelede (ooyo uubala abelesye maano), mpoonya aabo bali mu Judaya bakatalike kutijila kumalundu.+
15 Muntu uuli aciluli caŋanda atakaseluki naa kunjila muŋanda yakwe kuti agusye cintu cili coonse;
16 awalo muntu uuli mumuunda atakapiluki kuzintu nzyaasiya kuyoobweza cisani cakwe caatala.
17 Maawe kuli bamakaintu bamitide abaabo banyonsya bana kumazuba aayo!+
18 Kamuujisi kupaila kutegwa eeci citakacitiki ciindi camupeyo;
19 nkaambo mazuba aayo ayooba mazuba aamapenzi+ aatanacitikide kuzwa kumatalikilo aazilenge eezyo nzyaakalenga Leza kusikila ciindi eeco, alimwi kunyina naayooba limbi pe.+
20 Mubwini, ikuti Jehova* naatakaafwiinsya mazuba aayo, kunyina muntu wakali kukonzya kufwutuka. Pele akaambo kabasale aabo mbasalide, waafwiinsya mazuba.+
21 “Alimwi ikuti umwi akamwaambile kuti, ‘Amubone! Ngooyu Kristo,’ naa, ‘Amubone! Nguulya,’ mutakasyomi pe.+
22 Nkaambo ba Kristo bakubeja abasinsimi+ bakubeja bayoobuka akucita zitondezyo azintu zigambya ikutegwa, ikuti kacikonzyeka bakeene abasale.
23 Pele nywebo amucenjele.+ Ndamwaambila zintu zyoonse kazitanacitika.
24 “Pele kumazuba aayo, aakwiinda mapenzi aayo, izuba liyoosizyigwa, awalo mwezi taukamuniki,+
25 alimwi nyenyeezi zinooyooloka kuzwa kujulu alimwi nguzu zyakujulu ziyoozungaanizyigwa.
26 Mpoonya bayoobona Mwanaamuntu+ kaboola mumakumbi kajisi nguzu zinji abulemu.+
27 Aboobo uyootuma bangelo alimwi bayoobunganya basale bakwe antoomwe kuzwa kumyuwo yone,* kuzwa kumagolelo aanyika kusikila kumagolelo aajulu.+
28 “Lino amwiiye cikozyanyo eeci kumukuyu: Mboyatalikila buyo kusyuuka mitabi yanguwo akuba amatuvwu, mulazyiba kuti mainza alaafwaafwi.+
29 Mbubonya buyo andinywe, mwaakubona zintu eezyi kazicitika, amukazyibe kuti ulaafwaafwi, uli amulyango.+
30 Ncobeni ndimwaambila kuti izyalani eeli talikamani pe kusikila zintu zyoonse eezyi zikacitike.+
31 Julu anyika ziyoomana,+ pele majwi aangu taakamani pe.+
32 “Kujatikizya buzuba oobo naa ciindi, kunyina uuzyi pe, nobaba bangelo kujulu naba Mwana, pele buyo Taata.+
33 Amulangile, amupakamane,+ nkaambo tamuzyi ciindi cibikkidwe nociyoosika.+
34 Cili mbuli muntu wakaya kucisi cimbi iwakasiya ŋanda yakwe akupa nguzu bazike bakwe,+ aumwi wakapegwa mulimo wakwe akulailila sikulindila mulyango kuti kapakamene.+
35 Aboobo amulangile, nkaambo tamuzyi mukamwini ŋanda naboola,+ naa uyooboola kumangolezya naa akati kamasiku naa kubucedo* naa mafwumofwumo,+
36 kutegwa asika cakutayeeyelwa, atamujani nywebo kuti muloona.+
37 Pele ncondimwaambila, alimwi ndaambila boonse kuti: Amulangile.”+
Bupanduluzi buyungizyidwe
^ Amubone Makani Aayungizyidwe A5.
^ Naa “kumabazu one aanyika.”
^ Mu Chigiriki, “ciindi mukombwe nalila.”
