Tobakamboni ba Jehova tatusekeleli mazuba aakuzyalwa nkaambo tusyoma kuti kusekelela kuli boobu takumukkomanisyi Leza. Nokuba kuti Bbaibbele talikasyi cacigaminina kusekelela mazuba aakuzyalwa, pele lilatugwasya kuzyiba zintu zijatikizyidwe mumapobwe aali boobo alimwi akumvwisya mbwaabona Leza. Amulange-lange zintu zyone akubona njiisyo zyamu Bbaibbele izijatikizyidwe.

  1. Mapobwe aakusekelela buzuba bwakuzyalwa akatalisyigwa abantu batakombi Leza. Kweelana abbuku litegwa Funk & Wagnalls Standard Dictionary of Folklore, Mythology, and Legend mbolyaamba, mapobwe aaya ayeeme anjiisyo yakuti ciindi muntu naazyalwa, “myuuya mibi inga yabalwana aabo basekelela” alimwi akuti “kujanika kwabalongwe alimwi akwaambwa kwamajwi mabotu kulakonzya kukwabilila basikusekelela.” Bbuku litegwa The Lore of Birthdays lyaamba kuti kaindi, kuzyiba buzuba bwakuzyalwa “cakali kugwasya kuzyiba buumi bwamuntu mbobuyooba kumbele” kweelana “alwiiyo lwanyenyeezi lujatikizya kuzyiba zyakumbele.” Bbuku eeli alimwi lyaamba kuti “nkendulu zibelesyegwa aabuzuba bwakuzyalwa zilijisi nguzu zilibedelede zyamasalamuzi zyakulongezya muntu.”

    Mukwiimpana, Bbaibbele lilakasya kubelesya masalamuzi, kusonda, kukomba mizimo naa “cintu cili boobu.” (Deuteronomo 18:14; Bagalatiya 5:​19-​21) Alimwi buya kaambo kamwi ikakapa kuti Leza atabotelwi amunzi wa Babuloni wansiku nkakuti bana Babuloni bakali kupandulula ibweende bwanyenyeezi, yalo iili nenzila imwi yakusonda. (Isaya 47:11-​15) Takuli kuti Bakamboni ba Jehova lyoonse inga balanga-langa zilengwa zyabantu zyoonse; nokuba boobo, ciindi Magwalo natupa busolozi busalala, tulaabikkila maano.

  2. Banakristo bakusaanguna tiibakali kusekelela mazuba aakuzyalwa. Bbuku litegwa The World Book Encyclopedia, lyaamba kuti “kusekelela kwabuzuba bwakuzyalwa bakali kukubona kuti ncilengwa cabantu batakombi Leza.” Bbaibbele litondezya kuti baapostolo alimwi abamwi buyo ibakayiisyigwa cacigaminina a Jesu, batupa cikozyanyo ncobeelede kutobela Banakristo boonse.​—2 Batesalonika 3:6.

  3. Banakristo balaililwa buyo ikwiibaluka lufwu lwa Jesu ikutali buzuba bwakuzyalwa. (Luka 22:17-​20) Eeci taceelede kutugambya nkaambo Bbaibbele lyaamba kuti “buzuba bwakufwa mbubotu kwiinda buzuba bwakuzyalwa.” (Mukambausi 7:1) Kuzoosika kumamanino aabuumi bwakwe anyika, Jesu wakapanga zina libotu kuli Leza, eeci cakapa kuti buzuba mbwaakafwa bube buzuba buyandika kapati kwiinda boobo mbwaakazyalwa.​—Bahebrayo 1:4.

  4. Bbaibbele kunyina nolyaamba kuti kuli mubelesi wa Leza wakasekelela buzuba bwakuzyalwa. Takuli kuti makani aaya akalubwa buya kubikkwa mu Bbaibbele nkaambo lilaamba kujatikizya bantu bobilo batakali kukomba Leza ibakasekelela mazuba aabo aakuzyalwa. Nokuba boobo, izyakacitika amapobwe aabantu bobilo aaba tazikkomanisyi pe.​—Matalikilo 40:20-​22; Marko 6:​21-​29.

Sena bana ba Bakamboni balimvwa kuti kuli ncobaindwa akaambo kakutasekelela mazuba aakuzyalwa?

Mbubwenya mbobacita bazyali babotu boonse, Bakamboni abalo balatondezya mbobabayanda bana babo mwaka woonse, kubikkilizya akubapa zipego alimwi akuba aciindi cakulikondelezya ambabo. Balasola kutobela cikozyanyo ciinda kubota ca Leza walo uupa zintu zibotu kubana bakwe lyoonse. (Matayo 7:​11) Bana ba Bakamboni tabalimvwi kuti kuli ncobaindwa, kweelana atwaambo tutobela mbotutondezya:

  • “Cilakkomanisya kapati kutambula cipego aciindi ncowatali kucilangila.”​—Tammy, uujisi myaka iili 12.

  • “Nokuba kuti tandipegwi zipego mubuzuba mbondakazyalwa, bazyali bangu balanduulila zipego aziindi zimwi. Eeci cilandikkomanisya nkaambo inga tiindali kuzilangila zintu nzyobandipa.”​—Gregory, uujisi myaka iili 11.

  • “Sena uyeeya kuti kusekelela buyo maminiti aali kkumi kumwi kamujisi tukkekke alimwi alwiimbo lomwe nkokupobola? Ukaboole kwesu ukabone pobwe yancobeni mboicitwa!”​—Eric, uujisi myaka iili 6.