Ibabalwa kuti Mbaakamboni ba Jehova mbaabo bakambauka makani mabotu aa Bwami bwa Leza cabusungu mwezi amwezi. (Matayo 24:14) Eeci cilabikkilizya baabo bakabbapatizyigwa kuba Bakamboni alimwi abaabo batanabbapatizyigwa pele ibeelela kutola lubazu mumulimo wakukambauka.

 Peepe. Takuyandiki kusanga buya kuti muntu aambwe kuti ngu Kamboni naa kuti apegwe mulimo umwi naa mukuli umwi mumbunga yesu. (Milimo 8:18-20) Alimwi buya, bunji bwazyakusanga zilapegwa kakunyina kuzyiba wapa. Kamboni umwi aumwi ulaaba ciindi cakwe, nguzu, alimwi alubono kumulimo wanyika yoonse kweelana ambwayanda alimwi akweelana abukkale bwakwe.​​—2 Bakorinto 9:7.

 Mwezi amwezi, Bakamboni balapa malipooti aamulimo wabo wakukambauka kumbungano nkobazulilwa. Lipooti eeyi ilapegwa cakuliyandila.

 Malipooti aambungano alabikkwa antoomwe, mpoonya mweelwe woonse ulatumwa kuofesi yamutabi iili kubusena ooko. Kumane ofesi yamutabi ilatuma myeelwe yoonse yacisi cimwi acimwi naa cilawo kumaofesi eesu mapati.

 Kumamanino aamwaka wamulimo umwi aumwi, a mweelwe wa Bakamboni mucisi cimwi acimwi mumwaka ooyo ulazyibwa. Mpoonya myeelwe eeyi ilasanganizyigwa kutegwa kuzyibwe mweelwe wa Bakamboni nyika yoonse. Lipooti yacisi cimwi acimwi, kubikkilizya azyakuluula zijatikizya mulimo wakukambauka zilamwaigwa mucibeela cakuti “Nyika Yoonse” awebbusaiti yesu. Malipooti aaya alatukulwaizya, mbubwenya mbwaakali kubakulwaizya Banakristo bamumwaanda wamyaka wakusaanguna.​​—Milimo 2:41; 4:4; 15:3.

 Nokuba kuti bantu bali boobu tatubabalilizyi mumweelwe wa Bakamboni, tulabatambula camaanza obilo mumbungano zyesu. Bunji bwabo balajanika ku Ciibalusyo calufwu lwa Kristo cicitwa mwaka amwaka, aboobo mweelwe wabantu bali boobu ulazyibwa kwiinda mukulanga mweelwe wabantu bajanika kumuswaangano ooyu alimwi amweelwe wa Bakamboni. Mu 2023, bantu ibakajanika ku Ciibalusyo bakali 20,461,767.

 Bantu banji ibatajaniki kumiswaangano yesu balagwasyigwa abubambe bwesu bwaciiyo ca Bbaibbele caaŋanda citabbadelelwi. Mu 2023, twakasololela mweelwe waakati-kati uusika ku 7,281,212 waziiyo zya Bbaibbele mwezi amwezi, zimwi izyakali kucitwa abantu baindene-indene aciindi comwe.

 Kanji-kanji bamfwulumende inga bajana myeelwe kwiinda mukubuzya bantu cikombelo nkobazulilwa. Mucikozyanyo, ibamucibeela ca U.S. Census Bureau bakaamba kuti mubuvwuntauzi bwabo “bakali kuyanda kuzyiba kujatikizya baabo mbobakali kubuzya-buzya kuti naa bakali kuzulilwa kucikombelo nzi,” alimwi bakayungizya kwaamba kuti myeelwe njobakajana “yakali yabantu ibakali kuyeeyela buyo ibakanyina twaambo tugaminide.” Mukwiimpana, swebo tubala baabo bakambaukila bamwi akupa lipooti yamulimo wabo kuti mba Bakamboni ba Jehova kutali baabo ibalyaamba buyo amulomo.