ORSHIADA ugen ken tar u Kanada u i yer un ér Don yô, ka a nôngo kpoghuloo a pasen ior mba ve tse sha godobi la kwagh. Don ôr kwagh u or môm ken ior mbara kaa ér: “Orgen u lu a ijiir i tsan ga, u i yilan un ér Peter la, lu môm ken ior mba hemban lun côu côu cii, mba m nenge a ve sha godobi ken uma wam cii yô. Yange vihi inja kpishi shi fa u palegh ior. Yange venda erdoo u ior tese un acin imôngo la.” Nahan cii kpa, Don za hemen u nôngon ér una wase or u lu a ijiir i tsan ga ne acin kposo kposo hemba anyom 14.

Iyange igen yô, Peter pine Don ér: “Hii nan ve kwagh a gbe u a mo yumu? Hanma or cii nan de kwagh wam. Er nan ve u wem ikyo yum nahana?” Don yange er tom a avur a ruamabera atar sha kwaghfan sha u una nôngo a ôr kwagh i kôr Peter ken ishima yô. Hiihii yô, a pine Peter aluer a fa iti i Aôndo yô, nahan kaa a na ér a ôr ken Bibilo i zwa Buter, ape i nger iti i Aôndo ken Pasalmi 83:18 la. Kwagh u sha uhar yô, Don tese Peter er i hii ve un we un ikyo yô, sha u kaan a na ér a ôr Mbaromanu 10:13, 14, ape Bibilo i kaa ér “hanma or u nan yer sha iti i Ter yô, nana war” la. Kwagh u sha utar yô, Don ôr Mateu 9:36, been yô, a kaa a Peter ér a hide a ôr ivur la iyolna. Ivur la kaa ér: “Man er [Yesu] nenge a ikpelaior yô, mhôônom kôr Un a ve tsung, sha ci u i tumbur a ve, ve sambe wuee er iyôngo i i lu a orkuran i ga nahan.” Hen shighe ne, Peter maa haa mliam ashe, nahan pine ér: “M ngu môm ken iyôngo nee?”

Tsô Peter hii u geman inja. Yange za ôr iyol shi sôr gbem tsembelee shi hua akondo a injaa a Don na un la. Maa Peter za hemen u lun sha ashe tsembelee.

Peter lu a antakerada ugen u ngeren akaa a uma na ker yô. Ken mhii u antakerada ne nger akaa a vihin tsung a a er un la, kpa akaa a na a a sember ngeren la yô, doo kpen kpen. Ngeren na ugen kaa ér: “M hen kwagh u iti i Aôndo nyian. Hegen me eren msen yô, me  fatyô u sônon Yehova. Doom kpishi er m fe iti na yô. Don kaa a mo ér Yehova una fatyô u lun Ijende yam, i ia keghen atô a mo hanma shighe, a lu nyi je kpaa yô.”

Peter yange nger mkaanem nam ma masetyô man hen anngôôv nav. A nger wener:

“Doom iyol nyian ga. M bee iyol hegen. Kpa aluer m kpe nyian je kpa, m fa je mer shi me va nenge a ijende yam [Don] ken Paradiso. Shighe u ne lu ôron ngeren ne la, alaghga me lu uma ga. Kpa aluer ne nenge a orgen hen ku wam, u ne fe nan tsembelee ga yô, lam nen a nan, shi nea lumun yô, ôr nen takerada u kiriki u kwer ne. * Takerada la kaa ér mo shi me va nenge a ijende yam la ken Paradiso. M na jighjigh a kwagh ne ishima i môm. Ka mo Peter, anmgbian wen u ne doo un ishima yum ne.”

Yange mba iin Peter kera yô, anngô na u kwase Ummi pase ér: “Anyom ahar a karen ken ijime la, Peter va hen a mo. Ken atô u anyom kpishi, lu hiin je saan Peter iyol je ne. Yange se wasaa je kpaa.” Ummi kaa a Don ér: “Me ôr takerada ne sha ci u nyityôkwagh i i ker anngôm ken ishima yô, a shi nan kpa, ka kwagh u injaa tsung.” Shi Ummi lumun u henen takerada wase u i sember duen a mi, i yilan ér Bibilo Tese Ér Nyi Jimi? la vea Orshiada u Yehova ugen.

Se kpa se fatyô u nengen a mlu u or u ken atô la, shi tesen dooshima sha mimi shi wan ishima a ior cii. (1 Tim. 2:3, 4) Aluer se er nahan yô, se fatyô u ôron kwagh u una fatyô u kôron ior mba ve lu wang sha ashe ga, er Peter nahan, kpa ve gem ve lu a ishima i dedoo la sha mtema. Nahan se fatyô u lun a vangertiôr ser, Aôndo u a “nengen ken ishima” la, una na mimi una seer doon mba i sar ve u fan un la.—1 Sam. 16:7; Yoh. 6:44.