Bibilo kaa a vese ken Ivangeli i Mateu la ér: “Yesu nyôr ken tempel u Aôndo, zenda mbateenkwagh man mbayamenkwagh ken tempel cii kera, A mgbegha utebur mba mbamusannyaregh man mkônom ma mbateenmkungum kera kpaa. A kaa a ve ér, I nger ér: Á yila iyou Yam ér iyou i msen; kpa ne yô, ne gema a mi, hingir bar u mbanumunior.”—Mat. 21:12, 13.

Yiase i Mbayuda la i tese ér mbakasuav mba ken tempel mbara eren kwagh a mbakasuav vev sha inja ga, sha u teen ve kwagh sha ishe i taver. Ikyav i tesen yô, mkungum yange ma taver ishe ga, nahan icanor je kpa nan fatyô u yamen ma za nan naagh a mi. Nahan kpa, ngeren mbatsev mba Mbayuda la kaa ér, shighe u Kristu va hide yem, anyom kar er 50 nahan la, i gba u or a kimbi sule u azurfa môm ve nana fatyô u yamen mkungum mhar ye. Yange i gba u or nana er tom ayange 25 ve nana zua a imba inyar la ye. Mkungum yange ma taver ishe kpishi je yô, atsanaior kera faantyô u yamen ga. (Lev. 1:14; 5:7; 12:6-8) Sha nahan yô, ishima vihi ortesen Simeon ben Gamaliel kpishi je yô, pande iniav mbi gba u Mbayuda vea naan la. Fese je, ishe i i teen mkungum mhar la kera taver ga je kpiligh iyol.

Sha kwagh u i er sha heen ne yô, Yesu lu a ityôkyaa i injaa i yilan mbakasuav mba ken tempel mbara ér “mbanumunior” gbenda, sha ci u ve wa hua shi ve lu eren kwagh a mbakasuav vev sha inja ga yum.