Juan 8:12-59
8 12 Ikhú Jesús niʼthún mbu̱júu̱: “Ikhúún ni̱ndxu̱ʼ aguʼ náa numbaaʼ.+ Bi̱ gáʼkha̱ kidxuʼ nditháan xájngruigo̱o̱ náa mikína, numuu rí marigá aguʼ+ rí ndaʼya náa ikhaa”.
13 Ikhú fariseos nitháán: “Xtaa raratá i̱ndó ga̱jma̱a̱ numaaʼ ikháán. Ragájkhun dí naratá”.
14 Jesús niriʼñúún: “Maski ajndu na̱tha̱ ga̱jma̱a̱ numuʼ ikhúún, mú rí na̱tha̱ nindxu̱u̱ gajkhun, numuu rí nda̱yo̱o̱ náa ni̱ʼkhá ga̱jma̱a̱ náa ejkhá.+ Mú ikháanʼ tséya̱a̱la náa ni̱ʼkhá ni má náa ejkhá.
15 Ikháanʼ nu̱ta̱ tsíin ni̱ndxu̱ún bi̱ mumíniiʼ xó má ku̱ma̱ rí guáʼdáá xa̱bu̱ numbaaʼ,*+ mú ikhúún tséraʼwi̱i̱ tsáa bi̱ mamínuuʼ.
16 Á mu ikhúún gátha̱ tsáa bi̱ mamínuuʼ, rí gátha̱ mani̱ndxu̱u̱ jmbu náa rí gajkhun numuu rí na̱nguá xtáá mbáwún, xtáá ga̱jmu̱ʼ Anu̱ʼ* bi̱ nikungu̱u̱nʼ.+
17 Ma̱ngaa náa Xtángoo ndrígala kiʼniraʼmáʼ: ‹Rí nuthi a̱jmi̱i̱n xa̱bu̱ nagiʼdoo numuu›.+
18 Ikhúún na̱tha̱ ga̱jma̱a̱ numuʼ, xúʼko̱ má Anu̱ʼ bi̱ nikungu̱u̱nʼ naʼthí ga̱jma̱a̱ numuʼ”.+
19 Ikhú nirajxi̱i̱: “Náá xtáa Ana̱a̱ʼ jngóo.” Jesús niʼthún: “Ikháanʼ tséniʼniúnʼla ni má tseniʼníiʼ Anu̱ʼ.+ Á mu nuniʼniúnʼ ikhúún, muniʼníiʼ má Anu̱ʼ ma̱ngaa”.+
20 Niʼthí rígi̱ índo̱ xtáa raʼsngáa náa guʼwá rí nduyamajkuíí Dios, náa rígá rí najthi mbújkha̱a̱ rí mitsúʼkháan.+ Mú nimbáa na̱nguá nigujtuwiin numuu rí xóó tséjkha̱nú mbiʼi ndrígóo.+
21 Ikha jngóo niʼthún mbu̱júu̱: “Ikhúún najkháaʼ, ga̱jma̱a̱ ikháanʼ mbuʼñúnʼla, mú makhañála ga̱jma̱a̱ numuu aʼkhála.+ Náa na̱jkháaʼ ikhúún, ikháanʼla xándoo gúʼgua”.+
22 Ikhú bi̱ judíos nigíʼdi̱i̱ nitamijná: “Lá maxíyaminaʼ xáʼ. Náá numuu rí naʼthí ‹náa na̱jkháaʼ ikhúún, ikháanʼla xándoo guʼgua›”.
23 Ikhaa xóó niʼthí: “Ikháanʼ nindxa̱la bi̱ kúwá mbayííʼ gi̱jyooʼ, mú ikhúún na̱ʼkhá rijma̱a̱.+ Ikháanʼla nindxa̱la náa numbaaʼ rígi̱, mú ikhúún na̱nguá ni̱ndxu̱ʼ náa numbaaʼ rígi̱.
24 Ikha jngóo ni̱tala ‹makhañála náa aʼkhá ndrígala›. Numuu rí á mu tsénimbala rí ikhúún ni̱ndxu̱ʼ bi̱ na̱tha̱, makhañála náa aʼkhá ndrígala”.
25 Ikha jngóo nirajxi̱i̱: “Tsáá lá nindxa̱a̱ʼ”. Jesús niʼthún: “Nda̱a̱ má numuu rí ma̱tala.
26 Gúʼdoo wéñuuʼ rí ma̱tha̱ ga̱jma̱a̱ numala, ga̱jma̱a̱ rí mugíʼníí mámbáa dí ikháanʼ. Numuu rí bi̱ nikungu̱u̱nʼ nindxu̱u̱ jmbii náa rí gajkhun, ga̱jma̱a̱ ikhúún na̱tha̱ náa numbaaʼ rí nidxawuun náa ikhaa”.+
27 Mú ikhiin na̱nguá nikru̱ʼu̱u̱n rí xtáa raʼthí ga̱jma̱a̱ numuu Anu̱u̱.
28 Ikhú Jesús niʼthún: “Índo̱ ikháanʼ gúrájkhaa* A̱ʼdióo Xa̱biya̱,+ ikhú mbu̱ya̱a̱ rí ikhúún ni̱ndxu̱ʼ bi̱ ni̱tha̱+ ga̱jma̱a̱ tséni rí ikhúún nandoʼ,+ na̱tha̱ rí Anu̱ʼ niʼsngóʼ.
29 Bi̱ nikungu̱u̱nʼ xtáa ga̱jma̱á ni̱ndxu̱ʼ, na̱nguá niñuʼ mbáwún, numuu rí na̱ni̱ má xúʼko̱ rí ikhaa nanigu̱u̱ʼ”.+
30 Mbaʼin niguáʼdáá fe náa ikhaa índo̱ niʼthí rígi̱.
31 Jesús niʼthún judíos bi̱ ninimbu̱ún kuyáá: “Á mu nakuwáanʼ má xúʼko̱ náa rí nisngáa,* musngajmá gajkhun rí nindxa̱la xa̱bi̱ʼ,
32 muniʼnuuʼ rí gajkhun,+ ga̱jma̱a̱ rí gajkhun maʼni káwáanʼla”.+
33 Ikhiin niriʼñáá: “Ikháanʼ ni̱ndxu̱xu̱ʼ bi̱ naguwáʼ náa Abrahán ga̱jma̱a̱ nimbá miʼtsú tánindxu̱xu ñumbáá ndrígóo mbáa. Ndíjkha rí naratá ‹makáwáanʼla› rá.”
34 Jesús niriʼñúún: “Na̱tala gajkhun rí xúgíinʼ bi̱ nuni̱ aʼkhá ni̱ndxu̱ún ñumbáá ndrígóo aʼkhá.+
35 Ma̱ngaa mbáa ñumbáá tséguanúu kámuu náa goʼwóo bi̱ nañajunʼ ga̱jma̱a̱, mú a̱ʼdióo patrón naguanúu kámuu.
36 Á mu Ada̱ gáʼni káwíin, i̱ndó xúʼko̱ rí phú gajkhun makáwíin.
37 Nda̱yo̱o̱ má rí nindxa̱la e̱ji̱i̱n Abrahán, mú ikháanʼ nandala muxíñúu numuu rí tsíyala gúndrígú rí nasngáa.
38 Ikhúún na̱tha̱ rí ndi̱yo̱o̱ nákha xtáá ga̱jmu̱ʼ Anu̱ʼ,+ mú ikháanʼ nuni̱la rí nidxawíín rí niʼthá ana̱la”.
39 Ikhú ikhiin nitháán: “Abrahán nindxu̱u̱ anu̱xu”. Mú Jesús niʼthún: “Á mu nindxa̱la e̱ji̱i̱n Abrahán,+ mu̱ni̱la xó má niʼni Abrahán.
40 Ikhúún ni̱ndxu̱ʼ bi̱ naʼthí dí gajkhun rí nidxawuun náa Dios,+ mú nandala muxíñúu. Abrahán táʼni rúʼko̱.
41 Ikháanʼ nu̱ni̱ ikháá má xóo rí nandoo ana̱la”. Mú ikhiin nitháán: “Ikháanʼxu na̱nguá nindxu̱xu ejín xáná,* kuáʼdáa mbáwíí Anu̱xu, ikhaa nindxu̱u̱ Dios”.
42 Jesús niriʼñúún: “Á mu Dios nindxu̱u̱ Ana̱la, ikháanʼla maʼndala ku̱yo̱ʼ,+ numuu rí Dios nindxu̱u̱ bi̱ nikuʼmún ma̱ʼkhá, ga̱jma̱a̱ numuu ikhaa xtáá gi̱i̱. Na̱nguá ni̱ʼkhá ga̱jma̱a̱ numuʼ ikhúún, ni̱ʼkhá numuu rí ikhaa nikungu̱u̱nʼ.+
43 Numuu rí tséʼgíʼ edxa̱la mudxawíín rí na̱tha̱. Ikha jngóo na̱nguá ekrua̱ʼa̱la rí na̱tala.
44 Ikháanʼ nindxa̱la e̱ji̱i̱n Gixa̱a̱, ga̱jma̱a̱ nandala mu̱ni̱ rí ikhaa nandoo.+ Ikhaa asndu nákha ginii nindxu̱u̱ bi̱ nagudíin xa̱bu̱.+ Tánindxu̱u̱ jmbii náa rí gajkhun numuu rí gajkhun nda̱a̱ náa ikhaa. Mámbá rí naʼthí dí mindu̱wa̱ʼ, nasngájma xóo nindxu̱u̱ numuu rí ikhaa nindxu̱u̱ bi̱ naʼni nduwaʼ ga̱jma̱a̱ nindxu̱u̱ anu̱ún bi̱ nuni̱ nduwaʼ.+
45 Mú ikháanʼla tsénimbala ku̱yo̱ʼ, numuu rí na̱tha̱ rí gajkhun.
46 Tsáa dí ikháanʼ maʼthí rí ikhúún nikuʼdáminaʼ mbá aʼkhá rá. Á mu ikhúún na̱tha̱ rí gajkhun, ndíjkha rí tsénimbala ku̱yo̱ʼ rá.
47 Bi̱ ni̱ndxu̱ún e̱ji̱i̱n Dios nudxawíín ajngóo Dios.+ Mú ikháanʼla tsédxawíín ajngóo Dios, numuu rí na̱nguá nindxa̱la e̱ji̱i̱n”.+
48 Índo̱ judíos nidxawíín, nitháán: “Gajkhun rí ‹ikháán nindxa̱a̱ʼ xa̱bu̱ samaritano+ ga̱jma̱a̱ xtaʼdaa mbáa xa̱bu̱ wéñiiʼ›”.*+
49 Jesús niriʼñúún: “Ikhúún na̱nguá gúʼdaa nimbáa xa̱bu̱ wéñiiʼ. Rí na̱ni̱ ikhúún nasngájmá rí ndayamajkhuu Anu̱ʼ, mú ikháanʼ tséyamajkuʼla.
50 Mú ikhúún tséʼyáʼ rí magruígu gamajkhu,+ xtáa mbáa bi̱ ndayáʼ, ikhaa buʼko̱ bi̱ gáraʼwíí tsáá bi̱ gágruigú gamajkhu.
51 Na̱tala gajkhun rí á mu mbáa naʼnimbo̱o̱ ajngóʼ, xáʼga̱nú makhañúu”.+
52 Ikhú judíos nitháán: “Rí xúgi̱ nakujmaa kaʼwu rí xtaʼdaa mbáa xa̱bu̱ wéñiiʼ. Abrahán nikháñuu ga̱jma̱a̱ profetas* mangiin, mú ikháán naratá ‹bi̱ naʼnimbo̱o̱ ajngóʼ, xáʼga̱nú makhañúu›.
53 Lá naku̱ma̱a̱ʼ rí xtaʼdáá wéñuuʼ numaaʼ ki xóo anu̱xu Abrahán bi̱ nikháñuu ráʼ. Profetas ma̱ngaa nikháñún. Tsáá lá nindxa̱a̱ʼ wéñuuʼ ku̱ma̱ʼ ikháán rá.”
54 Jesús niriʼñúún: “Á mu nasngajmá rí ikhúún gúʼdoo numuʼ, xágiʼdoo nditháan numuu. Anu̱ʼ nindxu̱u̱ bi̱ nasngájma rí gúʼdoo numuʼ,+ bi̱ ikháanʼ nu̱tala rí nindxu̱u̱ Dios ndrígala.
55 Ikháanʼ tséniʼniiʼla,+ mú ikhúún naniʼníiʼ.+ Á mu ikhúún gátha rí tseniʼníiʼ, ma̱ni̱ nduwaʼ xó má ikháanʼla. Mú ikhúún naniʼníiʼ ga̱jma̱a̱ nanimbo̱ʼ ajngóo.
56 Abrahán bi̱ nindxu̱u̱ ana̱la, nidxuu wéñuuʼ índo̱ nindxa̱ʼwáminaʼ ga̱jma̱a̱ numuu rí gáni, ni̱jkha̱nú ndiʼyoo ga̱jma̱a̱ nidxuu wéñuuʼ”.+
57 Ikhú judíos nitháán: “Asndu xóó na̱nguá xtaʼdáá 50 tsiguaaʼ, xú káʼnii nitayáá Abrahán rá.”
58 Jesús niʼthún: “Na̱tala gajkhun rí ikhúún xtáá má nákha xóó tséxtáa Abrahán”.+
59 Ikhú nirajxi̱ itsí mu muxnáá ga̱jma̱a̱ Jesús, mú ikhaa nirkaʼwumi̱na̱ʼ ga̱jma̱a̱ nigájnáa náa guʼwá rí nduyamajkuíí Dios.
