Juan 21:1-25
21 Nda̱wa̱á dí nirígá rígi̱, Jesús nisngájmaminaʼ mbu̱júu̱ náa xa̱bi̱i̱ náa mijngii lamáa* Tiberíades, xígi̱ kaʼnii nisngájmaminaʼ.
2 Mbóó xtáa Simón Pedro ga̱jma̱a̱ Tomás (bi̱ nutháán Cuateʼ),+ Natanael+ bi̱ na̱ʼkha̱ náa Caná dí kaʼyoo Galilea, e̱ji̱i̱n Zebedeo+ ga̱jma̱a̱ imbá gijmi̱i̱n xa̱bi̱i̱ Jesús.
3 Simón Pedro niʼthún: “Maʼgá gáñíinʼ e̱gi̱ʼ”. Ga̱jma̱a̱ ikhiin nitháán: “Mu̱ʼguáxu ga̱jma̱á nindxa̱a̱ʼ”. Ikhú nitsimún náa barco ga̱jma̱a̱ nigún gajmiún, mú mbruʼun rúʼko̱ na̱nguá nirawíin nditháan e̱gi̱ʼ.+
4 Índo̱ ni̱jkha̱ rajtsiriga̱, Jesús niwi̱ji̱ náa rawuunʼ lamáa, mú xa̱bi̱i̱ túniʼniiʼ á mu ikhaa nindxu̱u̱.+
5 Ikhú Jesús niʼthún: “E̱ji̱nʼ, na̱nguá kuaʼdáá rí mu̱ʼphu̱* ráʼ.” “Na̱nguá”, niriʼña ikhiin.
6 Ga̱jma̱a̱ ikhaa niʼthún: “Gu̱da̱ma̱ʼa̱n amala náa níjñu mújúunʼ barco ga̱jma̱a̱ makániala e̱gi̱ʼ”. Índo̱ nidama̱ʼa̱n amaʼ, nijtíin e̱gi̱ʼ rí asndu tséʼngu̱u̱n gúxmatriya̱a̱ʼ.+
7 Ikhú xa̱bi̱i̱ Jesús bi̱ nandoo kaʼyoo+ niʼthúu̱n Pedro: “¡Nindxu̱u̱ Tátá!”. Índo̱ niʼdxuun rí nindxu̱u̱ Tátá, Simón Pedro nigúwáanʼ xtíñuu numuu rí na̱nguá kagíʼ, ga̱jma̱a̱ ikhú nidama̱ʼa̱mínáʼ náa lamáa.
8 Mú eʼwíinʼ xa̱bi̱i̱ Jesús niguwáa̱nʼ ga̱jma̱a̱ barco rí chíʼgíiʼ* ruxmajtaa amaʼ rí gajtíin e̱gi̱ʼ, numuu rí na̱nguá kúwá mitsínguánʼ náa rawuunʼ lamáa, naʼni mbá 90 metro* rí mitsínguánʼ.
9 Índo̱ niguáʼnú náa rawuunʼ lamáa, ndiyáá gíʼ aguʼ. Ga̱jma̱a̱ náa chámbuʼ jngútámíinʼ e̱gi̱ʼ ma̱ngaa rígá pan.
10 Ikhú Jesús niʼthún: “Aguwaʼla kudiin tikhuun e̱gi̱ʼ bi̱ ndiʼkhún nirawíin”.
11 Ikhú Simón Pedro nitsimuu náa barco ga̱jma̱a̱ nixmájtaa asndu náa ku̱ba̱ʼ mijxooʼ amaʼ rí gajtíin mbá 153 e̱gi̱ʼ mbaʼwi̱i̱n. Mú, maski ajndu ra̱ʼkhá tháán mbaʼin na̱nguá nithu amaʼ.
12 Jesús niʼthún: “Aguwaʼ, guphiʼtsula”. Asndu nimbáa xa̱bi̱i̱ tákíi a̱jkiu̱u̱n gárajxu̱u̱ “Tsáa nindxa̱a̱ʼ rá.” Numuu rí ikhiin nduyáá má rí ikhaa nindxu̱u̱ Tátá.
13 Jesús nikuʼmaminaʼ niguajtuun pan ga̱jma̱a̱ nixnúún, xúʼko̱ má niʼni ga̱jma̱a̱ e̱gi̱ʼ.
14 Rígi̱ eʼni ajtsú aʼphu̱+ rí Jesús nasngájmaminaʼ náa xa̱bi̱i̱ nda̱wa̱á rí ikhaa nitujxi̱i̱* náa majñu̱únʼ wajinʼ.
15 Índo̱ niguámbu̱u̱n ruphiʼtsu, Jesús nirajxu̱u̱ Simón Pedro: “Simón a̱ʼdióo Juan, nandaaʼ xtayoʼ ki xóo bugi̱ ráʼ.” Ikhaa niriʼña: “Xúʼko̱ Tátá, ikháán natayáá rí nandoʼ ka̱ya̱a̱ʼ”. Jesús niʼthúu̱n: “Ataxníʼtsún tháan e̱jín múgiúʼ”.+
16 Dí maʼni a̱jma̱ aʼphu̱ nirajxu̱u̱ mbu̱júu̱: “Simón a̱ʼdióo Juan, nandaaʼ xtayoʼ ráʼ.” Ikhaa niriʼñuu: “Xúʼko̱ Tátá, ikháán natayáá rí nandoʼ ka̱ya̱a̱ʼ”. Jesús niʼthúu̱n: “Atiewu̱u̱nʼ tháan e̱jín múgiúʼ”.+
17 Índo̱ nirajxu̱u̱ rí ajtsú aʼphu̱: “Simón a̱ʼdióo Juan, nandaaʼ xtayoʼ ráʼ.” Ikhú Pedro nixtáa ngíná índo̱ ndiʼyoo rí nirajxu̱u̱ ajtsú aʼphu̱ “nandaaʼ xtayoʼ ráʼ.” Ikha jngóo niʼthúu̱n: “Tátá, ikháán má natayáá xúgíʼ, rí ikhúún nandoʼ ka̱ya̱a̱ʼ”. Jesús niʼthúu̱n: “Ataxníʼtsún tháan e̱jín múgiúʼ.+
18 Natha̱nʼ gajkhun rí nákha dxámáá nindxa̱a̱ʼ, ikháán natagíʼ xtíñaaʼ ga̱jma̱a̱ nadxuʼ asndu náa eyaaʼ, mú, índo̱ gíkhi̱i̱n mataxruíyaʼ ñawáanʼ mu i̱mba̱a̱ magúwaanʼ xtíñaaʼ, ga̱jma̱a̱ maʼga kañán náa ikháán tsíyaaʼ gídxúʼ”.
19 Niʼthí rígi̱ mu maʼthí xú káʼnii Pedro gákháñuu, ga̱jma̱a̱ rígi̱ maʼni mba̱a̱ Dios. Ga̱jma̱a̱ nda̱wa̱á rí niʼthúu̱n, niʼthí xóó: “Ayi̱ má xúʼko̱ kidxuʼ”.+
20 Pedro nitangayii ga̱jma̱a̱ ndiʼyoo rí na̱ʼkha̱ kidxu̱únʼ xa̱bi̱i̱ Jesús bi̱ nandoo kaʼyoo,+ ikháá má bi̱ nijngamaa náa tso̱xto̱o̱ nákha niphiʼtsu wañún ga̱jma̱a̱ bi̱ nirajxu̱u̱ “Tátá, tsáá nindxu̱u̱ bi̱ gáxnajxi̱i̱n rá.”
21 Mú índo̱ ndiʼyoo, Pedro nirajxu̱u̱ Jesús: “Tátá, ndiéjunʼ gágíʼnuu bugi̱ rá.”
22 Jesús niʼthúu̱n: “Á mu nandoʼ rí ikhaa maxtáa asndu índo̱ ikhúún gáʼkháaʼ, ndiéjunʼ lá eʼniaaʼ ikháán rá. Ikháán ayi̱ má xúʼko̱ kidxuʼ”.
23 Ikha jngóo niwán ri̱ga̱ náa a̱ngui̱i̱n rí xa̱bi̱i̱ bugi̱ xákhañuu. Mú Jesús na̱nguá niʼthí rí xákhañuu. Rí niʼthí nindxu̱u̱: “Á mu nandoʼ rí ikhaa maxtáa asndu índo̱ ikhúún gáʼkháaʼ, ndiéjunʼ lá eʼniaaʼ ikháán rá.”
24 Xa̱bi̱i̱ Jesús bugi̱+ bi̱ naʼthí ajngáa rígi̱ ga̱jma̱a̱ ikhaa má bi̱ niʼnirámáʼ, ma̱ngaa nduʼyáá rí naʼthí nindxu̱u̱ gajkhun.
25 Mbaʼa rí Jesús niʼni xóó, á mu nigumarámáʼ kuduun, ikhúún naku̱mu̱ʼ rí náa numbaaʼ xáʼngo̱o̱ gájti rollos rí gágumaraʼmáʼ.+
