Juan 16:1-33
16 Ni̱tala rígi̱ mu fe ndrígala xándáti̱ga̱a̱.
2 Muxkawáanʼ náa guʼwá rí bi̱ judíos nuxnáá gamajkhu Dios.+ Na̱ʼkha̱nú mbiʼi rí asndu tsáa má bi̱ gágudiáanʼ+ maku̱mu̱u̱ rí xtáa raʼni ñajuunʼ Dios.
3 Mú, mu̱ni̱ xúgíʼ rígi̱ numuu rí tséninuwiinʼ Anu̱ʼ* ni má ikhúún.+
4 Ni̱tala xúgíʼ rígi̱ mu índo̱ gáʼga̱nú mbiʼi dí marigá, marmáʼáan a̱jkia̱la rí ni̱tala.+
Tátala rígi̱ nákha ginii numuu rí xtáá má ga̱jma̱á nindxa̱laʼ.
5 Mú rí xúgi̱ na̱jkháaʼ náa bi̱ nikungu̱u̱nʼ,+ ga̱jma̱a̱ nimbáa rí ikháanʼla tsérajxuʼ ‹náá edxu̱ʼ rá.›
6 I̱ndó nakuwáanʼ ngíná ga̱jma̱a̱ numuu rí ni̱tala.+
7 Mú na̱tala gajkhun: Mambáyalá má ikháanʼ dí maʼgáaʼ. Á mu rí tséjkháaʼ, bi̱ mambáyala+ xáʼkha̱ náa ikháanʼ, mú, á mu na̱jkháaʼ, ikhúún makuʼnguáanʼ náa ikháanʼla.
8 Ga̱jma̱a̱ índo̱ gáʼkha̱, maʼni makujmaa rí xa̱bu̱ numbaaʼ guáʼdáá aʼkhúún, ndiéjunʼ nindxu̱u̱ rí jmbu ga̱jma̱a̱ xú káʼnii Dios gánda̱ʼa̱a̱ cuenta.
9 Timbá masngájma pa̱jnu aʼkhúún xa̱bu̱ numbaaʼ,+ numuu rí ikhiin túsngajma fe náa ikhúún,+
10 ikhú ikhaa masngájmúún xa̱bu̱ numbaaʼ rí na̱ni̱ dí jmbu, numuu rí índo̱ gáʼgáaʼ náa Anu̱ʼ ní xúyo̱ʼ itháan,
11 ga̱jma̱a̱ nda̱wa̱á masngájma tsáá nindxu̱u̱ bi̱ gánda̱ʼa̱a̱ cuenta, numuu rí bi̱ naʼtáñajunʼ náa numbaaʼ rígi̱ nixtanda̱ʼa̱a̱ má cuenta.+
12 Xóó gúʼdoo mbaʼa wéñuuʼ rí mata̱la, mú xúgi̱ maʼni mingíjyúuʼ wéñuuʼ rí makruaʼala.
13 Mú índo̱ gáʼkha̱ espíritu santo* rí nasngájma rí gajkhun,+ maxnála ikha náa xúgíʼ rí gajkhun, numuu rí xáʼthi ga̱jma̱a̱ xóo nandoo ikhaa, maʼthí rí gáʼdxuun ga̱jma̱a̱ maʼtála rí wíji̱ ma̱ʼkha̱ nda̱wa̱á.+
14 Ikhaa maʼni mbu̱u̱n+ numuu rí ikhaa magruigú rí gúʼdoo ga̱jma̱a̱ maʼni rí mbu̱ya̱a̱ mangáanʼ.+
15 Xúgíʼ rí ndrígóo Anu̱ʼ nindxu̱u̱ má ndrígóʼ mangúún.+ Ikha jngóo ni̱tha̱ rí magruigú dí nindxu̱u̱ ndrígóʼ ikhúún ga̱jma̱a̱ maʼni mbu̱ya̱a̱ mangáanʼ.
16 Inu má, rí ní xúyoʼ itháan,+ mú xáʼni má mba̱yu̱u̱ʼ rí mbu̱yo̱ʼ mbu̱júu̱”.
17 Índo̱ nidxawíín rígi̱, tikhuun xa̱bi̱i̱ nitamíjná káníkhiin: “Ndiéjunʼ nindoo gáʼthí índo̱ niʼthúlu ‹inu má ni xúyoʼ itháan, mú xáʼni má mba̱yu̱u̱ʼ rí mbu̱yo̱ʼla mbu̱júu̱› rá. Ga̱jma̱a̱ dí niʼthí ‹na̱jkháaʼ náa Anu̱ʼ› rá.”
18 Nithi: “Ndiéjunʼ nindoo gáʼthí índo̱ niʼthí, ‹inu má›. Tsiánguá, na̱nguá eʼyáá ndiéjunʼ nindoo gáʼthí”.
19 Jesús ndiʼyoo má rí nandún muni̱i̱ grajxe̱, ikha jngóo niʼthún: “Lá kuwáanʼ ruraximíjna̱ kaníkháanʼ ga̱jma̱a̱ numuu rí nitha̱ ‹inu má ni xúyoʼ itháan, mú xáʼni má mba̱yu̱u̱ʼ rí mbu̱yo̱ʼla mbu̱júu̱› ráʼ.
20 Na̱tala gajkhun rí ikháanʼ magáwíinʼ a̱jkia̱la ga̱jma̱a̱ mumbi̱ya̱ʼ, mú xa̱bu̱ numbaaʼ maʼdxúún, ikháanʼ makuwáanʼ awúu̱n ga̱ʼkhu̱, mú ga̱ʼkhu̱ ndrígala magutajxi̱i̱ gagi.+
21 Índo̱ mbáa a̱ʼgu̱ inu magiʼdaa ada̱, naxnúu ga̱ʼkhu̱ numuu rí ni̱jkha̱nú má mbiʼi rí maʼnii. Mú nda̱wa̱á rí nigiʼdaa ada̱, nadxuu wéñuuʼ numuu rí nixtáa i̱mba̱a̱ xa̱bu̱ náa numbaaʼ rígi̱, ga̱jma̱a̱ rígi̱ naʼni rí mambumuu xúgíʼ ga̱ʼkhu̱ rí nigiʼdoo.
22 Ikhaa má erígá ga̱jma̱a̱ numala mangáanʼ. Xúgi̱ kuwáanʼ ngíná, mú matangu̱ún mba̱yala mbu̱júu̱, ga̱jma̱a̱ ikhú a̱jkia̱la maʼdxuu wéñuuʼ+ ma̱ngaa nimbáa xáʼngo̱o̱ gárígú káʼyála gagi ndrígala.
23 Ga̱jma̱a̱ mbiʼi rúʼko̱, ikháanʼ xúniu̱nʼ nimbá grajxe̱. Na̱tala gajkhun, asndu ndiéjunʼ má rí gunda̱ʼa̱a̱ Anu̱ʼ+ ga̱jma̱a̱ mbiʼyuʼ, ikhaa maxnála.+
24 Asndu xúgi̱ xóó nda̱a̱ nimbá rí e̱nda̱ʼa̱la ga̱jma̱a̱ mbiʼyuʼ. Gunda̱ʼa̱la ga̱jma̱a̱ mundrígú, mu xúʼko̱ makuwáanʼ itháan gagi.
25 Nijmuʼ xkri̱da mu mata̱la rígi̱. Mú na̱ʼkha̱ mbiʼi rí ní xájmuʼ itháan xkri̱da mu mata̱la, numuu rí mata̱la mbájmbu ga̱jma̱a̱ numuu Anu̱ʼ.
26 Mbiʼi rúʼko̱ majmala mbiʼyuʼ mu munda̱ʼa̱a̱ Anu̱ʼ. Raʼkháa rígi̱ eyoʼ gátala rí ikhúún ma̱ndo̱ʼo̱o̱ ga̱jma̱a̱ numala.
27 Numuu rí Anu̱ʼ nandoo kaʼyala má ikháanʼ, numuu rí ikháanʼ nindala ku̱yo̱ʼ+ ga̱jma̱a̱ ninimbala rí ikhúún ni̱ʼkhá xtiʼkhuu Dios.+
28 Ni̱ʼkhá náa numbaaʼ xóo xtiʼkhuu Anu̱ʼ. Mú xúgi̱ naniʼñúuʼ numbaaʼ ga̱jma̱a̱ na̱jkháaʼ náa Anu̱ʼ”.+
29 Ikhú xa̱bi̱i̱ nitháán: “Xúgi̱ rí naratá kaʼwu, dí tséjmaaʼ xkri̱da.
30 Rí xúgi̱ ndu̱ya̱a̱xu rí ikháán natayáá xúgíʼ ga̱jma̱a̱ rí tséyáaʼ rí nimbáa maʼniaaʼ grajxe̱. Ga̱jma̱a̱ numuu rígi̱ nu̱nimbuxu rí ikháán ni̱dxa̱ʼ náa Dios”.
31 Jesús niriʼñúún: “Lá nunimbala xúgi̱ ráʼ.
32 Gudxawíínla rígi̱. Na̱ʼkha̱ mbiʼi, mbiʼi rúʼko̱ ni̱ʼkha̱nú má, dí ikháanʼ magadiráʼáanʼla. Mámbáa maʼga̱a̱ goʼwóo ga̱jma̱a̱ muniʼñúla mbáwún.+ Gajkhun má rí na̱nguá xtáá mbáwún, numuu rí Anu̱ʼ xtáa ga̱jma̱á ni̱ndxu̱ʼ.+
33 Ni̱tala rígi̱ mu makuwáanʼla tsímáá ga̱jma̱a̱ numuʼ.+ Náa numbaaʼ mumíniiʼla. Mú ¡xámíñála!, ikhúún niʼngo̱ʼ náa numbaaʼ”.+
Mbaʼa nota
^ O “Táteʼ”.
