Juan 13:1-38
13 Nákha xóó tserígá ndxa̱a̱ Pascua, Jesús ndiʼyoo má rí ni̱jkha̱nú mbiʼi+ rí maniñuuʼ numbaaʼ rígi̱ mu mata̱nga̱a̱ náa Anu̱u̱.*+ Ikha jngóo nindoo kaʼñún xa̱bi̱i̱ bi̱ kúwá numbaaʼ rígi̱ asndu iwáá mbiʼi rí nixtáa gajmíi̱n.+
2 Índo̱ kúwá ruphiʼtsu wañúún, Gixa̱a̱ nigíwanʼ má náa a̱jkiu̱u̱n Judas Iscariote,+ a̱ʼdióo Simón, rí maxnájxi̱i̱ Jesús.+
3 Ikha jngóo Jesús ndaʼyoo má rí Anu̱u̱ niniñuuʼ náa ñawúunʼ xúgíʼ dí rígá ga̱jma̱a̱ rí ikhaa ni̱ʼkha̱ náa Dios ga̱jma̱a̱ rí mata̱nga̱a̱ náa Dios,+
4 ikhú nitu̱jxu̱u̱ náa mesa, niríyaʼ xtíñuu rí kagúwuunʼ mbájníí ga̱jma̱a̱ nigrígu kaníí, niguajtuun mbá toalla ga̱jma̱a̱ niroʼóo náa smídúu.+
5 Nda̱wa̱á niguxiʼñáʼ iyaʼ náa mbá pájxua̱a̱ ga̱jma̱a̱ ikhú nigíʼdu̱u̱ niʼjñáa rajkhúún xa̱bi̱i̱ ga̱jma̱a̱ nda̱wa̱á niʼnigujndo̱o̱ʼ ga̱jma̱a̱ toalla rí niroʼóo náa smídúu.
6 Índo̱ ni̱jkha̱nú náa gíʼ Simón Pedro, ikhú niʼthúu̱n: “Tátá, ikháán marajña̱a̱ rajkúʼ ráʼ.”
7 Jesús niriʼñuu: “Xúgi̱ na̱nguá ekrua̱ʼa̱a̱ʼ dí xtáá rani̱, mú itháan nda̱wa̱á makrua̱ʼa̱a̱ʼ”.
8 Ikhú Pedro niʼthúu̱n: “Ikháán nditháan xárajña̱a̱ rajkúʼ”. Mú Jesús niriʼñuu: “Á mu tséjñáa+ xándoo maraxtaa ga̱jma̱á ni̱ndxu̱ʼ”.
9 Ikhú Simón Pedro niʼthúu̱n: “Tátá, á mu xúʼko̱ xárajña̱a̱ i̱ndó rajkúʼ, arajñáa ñawúnʼ ga̱jma̱a̱ edxu̱ʼ ma̱ngaa”.
10 Mú Jesús niʼthúu̱n: “Bi̱ niwan, kaʼwii má, ikha jngóo i̱ndó rajkúu eyóoʼ miʼjñáa. Ikháanʼ kaʼwáanʼla má, mú raʼkháa xúgiáanʼ”.
11 Numuu rí ndaʼyoo má tsáa gáxnájxi̱i̱.+ Ikha jngóo niʼthí “raʼkháa xúgiáanʼ kaʼwáanʼla”.
12 Nda̱wa̱á rí niʼjñáa rajkhúún, nigúwa̱a̱nʼ xtíñuu ga̱jma̱a̱ nitanga̱a̱ nigi̱ʼi̱ náa mesa, ikhú niʼthún: “Nakrua̱ʼa̱la rí ninia̱la ráʼ.
13 Ikháanʼ nuthu̱nʼ rí ni̱ndxu̱ʼ Maestro ga̱jma̱a̱ Tátá, ga̱jma̱a̱ gajkhun má dí nu̱tala, numuu rí ikhaa má ni̱ndxu̱ʼ.+
14 Ikha jngóo, á mu ikhúún rí ni̱ndxu̱ʼ Tátá ga̱jma̱a̱ Maestro, nijña̱a̱ rajkuála,+ xúʼko̱ má mangáanʼ gíʼmaa mujña̱a̱ rajkhúún a̱ngia̱la.+
15 Ikhúún niʼgíʼ xkri̱da mu mu̱ni̱ xó má rí ikhúún ninia̱la.+
16 Na̱tala gajkhun rí mbáa ñumbáá na̱nguá gíʼdoo itháan numuu ki xóo patriúun ni má bi̱ kaxúngua̱a̱nʼ ki xóo bi̱ nikungua̱a̱nʼ.
17 Xúgi̱ rí ndu̱ya̱a̱la xúgíʼ rígi̱, makuwáanʼ gagi á mu nuʼgíʼ nunimbánííla.+
18 Raʼkháa xúgiáanʼ eta̱la, ikhúún naniʼniúnʼ bi̱ niraʼwi̱i̱n. Nirígá rígi̱ mu mambanúu rí Kiʼnirámáʼ+ náa naʼthí: ‹Bi̱ mbóó ekuiʼtsu ga̱jmu̱ʼ, rí xúgi̱ nindxu̱u̱ xóo mbáa xa̱bu̱ sia̱nʼ›.*+
19 Asndu nákha xúgi̱ na̱tala, nákha xóó tsérígá, mu índo̱ gáʼga̱nú marigá ikháanʼ mu̱ni̱mbala gajkhun rí ikhúún ni̱ndxu̱ʼ bi̱ ni̱tha̱.+
20 Na̱tala gajkhun rí asndu tsáa bi̱ gágruiguíi bi̱ ikhúún gákuʼmáa, nagruigúún má mangúún,+ ga̱jma̱a̱ bi̱ nagruigúún ikhúún nagruiguíi bi̱ nikuʼmún ma̱ngaa”.+
21 Nda̱wa̱á rí niʼthí xúgíʼ rígi̱, Jesús nixtáa ngíná wéñuuʼ ga̱jma̱a̱ niʼthí: “Na̱tala gajkhun rí mbáa dí ikháanʼ maxnájxu̱u̱n”.+
22 Ikhú xa̱bi̱i̱ nigíʼdi̱i̱ ndiyamijná kaníkiin ga̱jma̱a̱ niʼniún tsiánguá, numuu rí tséyáá tsáa numuu eʼthí.+
23 Ikhú mbáa xa̱bi̱i̱ Jesús bi̱ nandoo kaʼyoo,+ bi̱ gíʼ náa mesa náa níjniúu* Jesús.
24 Ikhú Simón Pedro niʼniuu seña ga̱jma̱a̱ edxu̱u̱ mu marajxu̱u̱: “Tsáá eʼthí ga̱jma̱a̱ numuu”.
25 Ikhú nikuʼmaminaʼ náa tsoxto̱o̱ Jesús ga̱jma̱a̱ nirajxu̱u̱: “Tátá, tsáá nindxu̱u̱ rá.”+
26 Jesús niriʼñuu: “Ikhaa nindxu̱u̱ bi̱ gáxnu̱u̱ mbá xuíʼtóo pan rí marmajan”.+ Ga̱jma̱a̱ nda̱wa̱á rí nirmajan pan, nixnúu Judas Iscariote, a̱ʼdióo Simón.
27 Nda̱wa̱á rí Judas niguajtuun pan, Gixa̱a̱* nito̱ʼo̱o̱ náa ikhaa.+ Ikhú Jesús niʼthúu̱n: “Rí xtaa ratani̱, atani̱ má nacha̱”.
28 Mú nimbáa bi̱ tri̱gi̱i̱n náa mesa na̱nguá eʼyoo náá numuu rí xúʼko̱ niʼthúu̱n.
29 Numuu rí Judas kagu̱ mbújkha̱a̱,+ ikha jngóo tikhuun rí ikhiin nindxa̱ʼwa̱míjna̱ rí Jesús niʼthúu̱n “aratsi rí mbaʼyúlú náa ndxa̱a̱” o rí maxnún chíʼgíiʼ* xa̱bu̱ gíníi.
30 Índo̱ niguámbóo nigruigú pan, ikhú nigájnáa ikhí. Ga̱jma̱a̱ niʼni mbruʼun má.+
31 Índo̱ ikhaa ni̱jkha̱a̱, ikhú Jesús niʼthí: “Rí xúgi̱ A̱ʼdióo Xa̱biya̱ niguma mba̱a̱,+ ga̱jma̱a̱ Dios niguma mba̱a̱ ga̱jma̱a̱ numuu ikhaa.
32 Mínaaʼ má Dios gáʼni mba̱a̱,+ ga̱jma̱a̱ inu má maʼni mba̱a̱.
33 E̱ji̱nʼ, ní xáxtáá mba̱yu̱u̱ʼ ga̱jma̱á nindxa̱la. Ikháanʼ mbuʼñún, mú ikháá má na̱tala rí ni̱thu̱u̱n judíos: ‹Rí xándoo muʼgua náa ikhúún maʼgáaʼ›.+
34 Naxna̱la i̱mba̱ nuxi̱ʼ kiʼtáñajunʼ: Rí gaʼndala kuyamíjna̱ kaníkháanʼ, xó má ikhúún nindoʼ ka̱ya̱la,+ xúʼko̱ má gáʼndala kuyamíjna̱ mangáanʼ.+
35 Á mu nuni̱la xúgi̱ kaʼnii, xúgíinʼ gúyáá rí ikháanʼ nindxa̱la xa̱bi̱ʼ: Á mu nandala kuyamíjna̱”.+
36 Ikhú Simón Pedro nirajxu̱u̱: “Tátá, náá edxu̱ʼ rá.” Jesús niriʼñuu: “Náa na̱jkhá xúgi̱, xándoo mi̱dxa̱ʼ kidxuʼ, mú itháan nda̱wa̱á ma̱ndoo mi̱dxa̱ʼ”.+
37 Ikhú Pedro niʼthúu̱n: “Tátá, náá numuu rí xándoo maʼgá xúgi̱ rá. Ikhúún xtáá xawii makhañúʼ ga̱jma̱a̱ numaaʼ”.+
38 Jesús niriʼñuu: “Ikháán xtaa xawii makhañáaʼ ga̱jma̱a̱ numuʼ ráʼ. Natha̱nʼ gajkhun rí asndu xóó tséndxaʼwá mbaxtá ikháán niguámbáaʼ má niratá ajtsú nuthu rí tsétatsiniúnʼ”.+
