Hechos 4:1-37
4 Índo̱ a̱jmi̱i̱n ikhiin kúwá ruthúún xa̱bu̱ xuajin, niguwáʼ kanuu ndxajkun, ga̱jma̱a̱ bi̱ naʼtáñajúúnʼ bi̱ nuñewa̱a̱n guʼwá rí nduyamajkuíí Dios gajmiún saduceos.*+
2 Ra̱ʼkhá tháán nikiʼníin numuu rí apóstoles nusngúún xa̱bu̱ xuajin, ga̱jma̱a̱ nuthúún pa̱jnu rí Jesús nigabi̱i̱* náa majñu̱únʼ wajinʼ.+
3 Ikha jngóo nirugui̱i̱n ga̱jma̱a̱ nixudiinʼ guʼwá e̱jua̱nʼ+ asndu i̱mba̱ néjtsuu, numuu rí na̱jkha̱ raʼni kína má.
4 Ikha jngóo, mbaʼin bi̱ nidxawíín dí nijuiʼthá niguánú ninimbu̱ún, ga̱jma̱a̱ ninindxu̱ún mbá 5,000 xa̱bekha.+
5 Imbo̱o̱ mbiʼi, náa Jerusalén nigimbúun xa̱bu̱ ñajunʼ, xabuanii ga̱jma̱a̱ bi̱ nusngáa xtángoo,
6 mangiin ndxajkun bi̱ kuya̱ edxu̱u̱, Anás,+ Caifás,+ Juan, Alejandro ga̱jma̱a̱ xúgíinʼ bi̱ kuñún ndxajkun bi̱ kuya̱ edxu̱u̱.
7 Ikhú nitsijii Pedro ga̱jma̱a̱ Juan náa taphu̱ún ikhiin ga̱jma̱a̱ nigi̱ʼdi̱i̱ nirajxu̱u̱n: “Tsáa lá nixnála tsiaki̱i̱ rí muni̱ o tsáá mbiʼyuu eni̱la ga̱jma̱a̱ rígi̱ rá.”
8 Numuu rí Pedro nigiʼdoo espíritu santo*+ ikha jngóo niriʼñúún:
“Xa̱bu̱ ñajunʼ bi̱ kúwá náa xuajin ga̱jma̱a̱ xabuanii,
9 á mu xúgi̱ nurajxuxu ga̱jma̱a̱ mbá numuu rí májánʼ, dí nini̱xu ga̱jma̱a̱ numuu xa̱bu̱ gúʼxúʼ bugi̱+ ga̱jma̱a̱ nandala mbu̱ya̱a̱ tsáá niʼnitanuu,
10 mu mbu̱ya̱a̱la xúgiáanʼ ikháanʼla ga̱jma̱a̱ xúgíinʼ xa̱bu̱ bi̱ kúwá náa Israel, rí xa̱bu̱ bugi̱ niguma tanáá ga̱jma̱a̱ numuu mbiʼyuu Jesucristo bi̱ na̱ʼkha̱ náa Nazaret,+ bi̱ ikháanʼla nidujmaa náa ixi̱,+ mú Dios niʼniga̱bi̱i̱ náa majñu̱únʼ wajinʼ.+ Ga̱jma̱a̱ numuu ikhaa xa̱bu̱ bi̱ xtáa náa inala xúgi̱ niguma tanáá.
11 Rígi̱ nindxu̱u̱ ‹itsí rí ikháanʼ táʼndala gájmala, bi̱ nu̱ni̱ guʼwá rí asndu ndi̱ya̱a̱ dí ragíʼdoo numuu, ikhaa rúʼko̱ ni̱jkha̱nú ninindxu̱u̱ itsí rí itháan gíʼdoo numuu›.+
12 Numuu rí ndawa̱a̱ i̱mba̱a̱ bi̱ maʼni káwáanʼ, i̱ndó ma̱ndoo maguma káwíin xa̱bu̱ ga̱jma̱a̱ numuu mbiʼyuu mbáwíí xa̱bu̱”.+
13 Índo̱ ndiyáá dí Pedro ga̱jma̱a̱ Juan tsémíñúún ma̱ngaa índo̱ ndiyáá dí ikhiin na̱nguá guáʼdáá numún ni má tágún mitsídánʼ escuela*+ niʼniún tsiánguá. Ma̱ngaa ndiyáá rí ikhiin nikúwá gajmiún Jesús.+
14 Numuu rí nduyáá dí ikhí gajmiún xa̱bu̱ bi̱ niguma tanáá,+ ikha jngóo túthi nimbá ga̱jma̱a̱ numuu.+
15 Ikhú nitañajúúnʼ rí magajníin náa nagimbíi̱n xa̱bu̱ ede̱* ga̱jma̱a̱ nigíʼdi̱i̱ nitamijná.
16 Nithi: “Ndiéjunʼ lá gúʼni̱ gajmiúlú xa̱bu̱ bugi̱ rá.+ Numuu dí xúgíinʼ xa̱bu̱ Jerusalén ndiyáá dí niguma mbá milagro,+ ga̱jma̱a̱ xándoo muʼthá dí ragájkhun nindxu̱u̱.
17 Mu rígi̱ xáwán ri̱go̱o̱ náa eʼwíinʼ xa̱bu̱, guʼnimiñúnlu ga̱jma̱a̱ guʼthúún rí ní xútháán nimbáa ga̱jma̱a̱ numuu mbiʼyuu xa̱bu̱ bugi̱”.+
18 Ikhú nindxa̱ʼwu̱u̱n ga̱jma̱a̱ nitañajúúnʼ dí ní xúthi ma̱ngaa ní xúsngáa nditháan ga̱jma̱a̱ numuu mbiʼyuu Jesús.
19 Mú Pedro ga̱jma̱a̱ Juan niriʼñúún: “Á mu rí májánʼ eya̱a̱la náa inuu Dios rí munimbuxu ku̱ya̱la ikháanʼ, raʼkháa náa Dios, ikháanʼ má gúya̱a̱la.
20 Mú ikháanʼxu xándoo muniʼñááʼ ru̱ta̱ rí ndi̱ya̱a̱xu ga̱jma̱a̱ dí nidxáwíínxu̱”.+
21 Ikha jngóo, nda̱wa̱á rí ninimiñún mbu̱júu̱, niniñu̱u̱nʼ magúun numuu rí na̱nguá nixkamaa xóo muni̱ gíníi numuu rí nimíñúún nini̱ xa̱bu̱ xuajin,+ numuu rí xúgíinʼ ikhiin kúwá runi̱ mba̱a̱ Dios ga̱jma̱a̱ numuu dí nirígá.
22 Numuu rí xa̱bu̱ bi̱ niguma tanáá ga̱jma̱a̱ milagro rígi̱ gíʼdoo itháan rí 40 tsiguuʼ.
23 Nda̱wa̱á rí niniñu̱u̱nʼ magúun, ikhiin nigún náa kúwá eʼwíinʼ xa̱bi̱i̱ Jesús ga̱jma̱a̱ nithi rí nithúún ndxajkun bi̱ kuya̱ edxu̱u̱ ma̱ngaa xabuanii.
24 Índo̱ nidxawíín rígi̱ mbá kambájxu̱u̱n nitajkháan náa Dios ga̱jma̱a̱ nithi:
“Tátá bi̱ itháán Mba̱a̱, ikháán bi̱ nitani̱ mekhu, ku̱ba̱ʼ, lamáa* ga̱jma̱a̱ xúgíʼ dí rígá ikhí,+
25 ikháán niratá ga̱jma̱a̱ espíritu santo náa wajin xiʼñúxu David+ bi̱ nindxu̱u̱ xa̱bia̱a̱ʼ: ‹Náá numuu rí nakiʼníin xa̱bu̱ xuajin ga̱jma̱a̱ nindxa̱ʼwa̱míjna̱ muni̱ rí tséjmaa rá.
26 Reyes bi̱ kúwá náa tsu̱du̱u̱ ku̱ba̱ʼ ga̱jma̱a̱ xa̱bu̱ ñajunʼ, niruwamijná mu muxmijná gajmiún Jeobá* ma̱ngaa bi̱ ikhaa niraʼwíi›.*+
27 Ga̱jma̱a̱ xúʼko̱ má nirígá, xó má Herodes* ga̱jma̱a̱ Poncio Pilato+ niruwami̱jná náa xuajin rígi̱ gajmiún xa̱bu̱ xuajin ma̱ngaa xa̱bu̱ Israel nikiʼníin kuyáá xa̱bia̱a̱ʼ Jesús, bi̱ ikháán nitraʼwíi,+
28 mu marigá xó má nindaaʼ ikháán ga̱jma̱a̱ tsiaki̱i̱ ndrígáaʼ, xó má niratá marigá nákha wapháá.+
29 Rí xúgi̱ Jeobá* atayáá xóo enimiñúxu, ga̱jma̱a̱ atani̱ rí xa̱bia̱a̱ʼ muthi má xúʼko̱ ajngá rawaanʼ ga̱jma̱a̱ rí xámíñún,
30 nákha ikháán xtaa rataxruiyaʼ ñawáanʼ mu matani̱ thanún xa̱bu̱ ga̱jma̱a̱ milagros dí itháan mba̱ʼu̱+ náa mbiʼyuu xa̱bia̱a̱ʼ bi̱ kaʼwu a̱jkiu̱u̱n, Jesús”.+
31 Índo̱ niguámbu̱u̱n nitajkháan ga̱jma̱a̱ xúgíʼ a̱jkiu̱ún, náa nigimbíin niʼxma ga̱jma̱a̱ xúgíinʼ ikhiin nindrigú espíritu santo,+ ga̱jma̱a̱ nigíʼdi̱i̱ nitaraʼa ajngá rawuunʼ Dios rí asndu támiñúún.+
32 Ma̱ngaa mbaʼin bi̱ ninimbu̱ún, bi̱ nindxa̱ʼwa̱míjna̱ mbóó ga̱jma̱a̱ bi̱ nikumu̱ún mbóó, nimbáa dí ikhiin na̱nguá niʼthí rí guáʼdáá nindxu̱u̱ ndrígu̱ún ikhiin, rí nuni̱ nuxnún eʼwíinʼ rí guáʼdáá.+
33 Ga̱jma̱a̱ tsiaki̱i̱ dí niguáʼdáá apóstoles túniñaanʼ rutaraʼa ga̱jma̱a̱ numuu rí nigabi̱i̱ Tátá Jesús.+ Xúgíinʼ ikhiin niguma tsajkurámiinʼ ga̱jma̱a̱ numuu rí májánʼ wéñuuʼ a̱jkiu̱u̱n Dios.*
34 Ndawa̱a̱ nimbáa bi̱ ndayóoʼ náa ikhiin,+ numuu rí xúgíinʼ bi̱ guáʼdáá mbañúúnʼ o guʼwún nigujua̱a̱, ma̱ngaa mbújkha̱a̱ rúʼko̱
35 nagún kudúún náa inún apóstoles.+ Ikhú nuruiʼta̱a̱ xó má ndayóoʼ mámbáa.+
36 Ikha jngóo José, bi̱ nindxu̱u̱ levita bi̱ na̱ʼkha̱ náa Chipre bi̱ apóstoles ma̱ngaa nuxna mbiʼíí Bernabé+ (rí nandoo gáʼthúu̱n “bi̱ naʼni̱i̱ a̱jkiu̱ún eʼwíinʼ”),
37 nigujua̱ mbóo mbaaʼ ga̱jma̱a̱ ni̱jkha̱ kayóo mbújkha̱a̱ rúʼko̱ náa inún apóstoles.+
