Hechos 28:1-31
28 Índo̱ xúgiáanʼ má nikáwáanʼxu̱, ikhú nidxáwíínxu̱ dí isla* rúʼko̱ mbiʼyuu Malta.+
2 Xa̱bu̱ bi̱ kúwá náa isla ninindxu̱ún májáanʼ a̱jkiu̱ún ga̱jma̱á ni̱ndxu̱xu̱ʼ. Nigíʼ aguʼ ga̱jma̱a̱ nindriguáanʼxu májánʼ, numuu dí naxnúu ruʼwa ga̱jma̱a̱ naʼni migúwán.
3 Mú índo̱ Pablo nigímbóó mbá eʼda ixi̱ ga̱jma̱a̱ nigruiʼyáʼ náa aguʼ, índo̱ nigigoo nigájnuu mbáa a̱bu̱nʼ nikijmaa ñawúunʼ.
4 Índo̱ xa̱bu̱ bi̱ kúwá náa isla ndiyáá a̱bu̱nʼ mbiiʼ bugi̱ frájkhaa náa ñawúunʼ, ikhú nigíʼdi̱i̱ nitamijná: “Mbáa xa̱bu̱ bugi̱ nindxu̱u̱ bi̱ nagudíin a̱ngui̱i̱n. Maski má nikríya̱a̱ʼ náa lamáa,* mú diosa* bi̱ naʼni rí mumíniiʼ xa̱bu̱ xániñuuʼ maxtáa”.
5 Mú ikhaa nixprígúu ñawúunʼ ga̱jma̱a̱ a̱bu̱nʼ nixpátuáʼáan náa aguʼ, ikhaa nda̱a̱ rí nigíʼnuu.
6 Ikhiin niguáʼthi̱i̱n rí ikhaa mujuaan o nda̱a̱ tsu̱ma̱ gángájxi̱i̱ makhañúu. Mú índo̱ niʼni má mba̱yu̱u̱ʼ ga̱jma̱a̱ ndiyáá rí nda̱a̱ dí egíʼnuu, ikhú niriʼkhu̱u̱ xóo endxaʼwamíjna̱ ga̱jma̱a̱ nigíʼdi̱i̱ nithi rí nindxu̱u̱ mbáa dios.
7 Mijngii má ikhí xtáa mbáa xa̱bu̱ bi̱ itháan gíʼdoo numuu náa isla bi̱ gíʼdoo mbaaʼ. Mbiʼyuu Publio. Ikhaa nigruiguáanʼxu májánʼ wéñuuʼ ga̱jma̱a̱ niguanúxu ikhí mbá ajtsú mbiʼi.
8 Mú anu̱u̱* Publio kaʼmáaʼ náa xiawoo naʼniuu mijkha ga̱jma̱a̱ teʼdi, ikhú Pablo nito̱ʼo̱o̱ náa kraʼaa, ga̱jma̱a̱ niʼtájkháan ma̱ngaa nixkrámaaʼ ikhú niʼni thanuu.+
9 Nda̱wa̱á dí nirígá rígi̱, eʼwíinʼ bi̱ naʼniún nandii bi̱ kúwá náa isla, nigún gúyáá ga̱jma̱a̱ ikhaa ni’ni thanún.+
10 Ma̱ngaa ndiyamajkuxu̱ wéñuuʼ ga̱jma̱a̱ nixnuxu rí guáʼdáá, ma̱ngaa índo̱ nigájnáaʼxu ikhí nixnuxu̱ xúgíʼ rí ndiyúxu̱.
11 Índo̱ nikúwáanʼxu̱ ajtsú igu̱nʼ náa isla rúʼko̱ ikhú nitsimuxu náa mbá barco rí náa edxu̱u̱ tima inún E̱ji̱i̱n Zeus. Barco rígi̱ na̱ʼkha̱ náa Alejandría, mú niguanúu náa isla rúʼko̱ mu manújngoo gu̱nʼ rí migúwán.*
12 Índo̱ niguáʼnuxu náa Siracusa niguanúxu ikhí mbá ajtsú mbiʼi.
13 Nda̱wa̱á rí ikhí, nigájnuxu̱ nijkuánuxu̱ náa Regio. Mbá mbiʼi nda̱wa̱á nixnúu wéñuuʼ giñánʼ dí na̱ʼkha̱ xígií náa sur, mú índo̱ niʼni a̱jma̱ mbiʼi nindoo nijkuánuxu náa Puteoli.
14 Ikhí nixkamiin a̱ngiu̱xu ga̱jma̱a̱ nitakáñuxu rí maguanúxu gajmiúxu mbá juwan mbiʼi. Nda̱wa̱á nigájnuxu ni̱jkuáxu Roma.
15 Índo̱ a̱ngiu̱xu̱ bi̱ kúwá ikhí nidxawíín ga̱jma̱a̱ numuxu̱, ikhú niguwáʼ asndu náa xuáá ndrígóo Apio asndu náa kúwáanʼxu náa rí nutháán Tres Tabernas. Índo̱ Pablo ndiʼñún, nixnáa núma̱aʼ Dios ga̱jma̱a̱ ndiyáa tsiaki̱i̱.+
16 Índo̱ nijkuánuxu Roma, Pablo niniña̱a̱nʼ rí maguanúu mbáwíí ga̱jma̱a̱ mbáa soldado bi̱ mañewu̱u̱n.
17 Mú índo̱ niʼni ajtsú mbiʼi, nindxaʼwún xúgíinʼ judíos bi̱ itháan guáʼdáá numún. Ga̱jma̱a̱ índo̱ nigimbíin má xúgíinʼ, ikhú niʼthún: “A̱ngui̱nʼ, maski má nda̱a̱ nimbá dí raʼkhí rí ni̱ni̱ ga̱jma̱a̱ numuu xuajin ma̱ngaa numuu rí naguʼwún nuni̱ wajin xiʼñúlú,+ mú náa Jerusalén nixnajxu̱u̱n náa ñawúúnʼ xa̱bu̱ romanos mu maʼgá guʼwá e̱jua̱nʼ.+
18 Nda̱wa̱á rí ndiyáá ga̱jma̱a̱ numuʼ,+ ikhiin nindúún muni̱ kríñu̱u̱nʼ numuu rí nda̱a̱ mbá numuu rí makhañúʼ.+
19 Numuu rí bi̱ judío tsémbánúún rí nuthi, ikha jngóo ndiyóoʼ rí manda̱ʼa̱ maʼgá náa César,*+ raʼkháa ga̱jma̱a̱ numuu rí gúʼdoo mbá xkujndu ga̱jma̱a̱ numuu xuajñunʼ.
20 Ikha jngóo ninda̱ʼa̱ rí mba̱ya̱laʼ mu muʼtámíjná ga̱jma̱a̱ numuu rí guáʼthi̱i̱n xa̱bu̱ Israel, ikha jngóo kaxtoʼóʼ ga̱jma̱a̱ cadena rígi̱”.+
21 Ikhú ikhiin nithi: “Túndríguxu nimbá i̱yi̱i̱ʼ rí na̱ʼkha̱ náa Judea rí naʼthí ga̱jma̱a̱ numaaʼ, ni má nimbáa a̱ngiu̱lú bi̱ naguwáʼ ikhí na̱nguá nithi nimbá dí raʼkhí ga̱jma̱a̱ numaaʼ.
22 Májánʼ má gáʼni dí mudxáwiinxu rí gárata ga̱jma̱a̱ numuu rí natatsaʼwáminaʼ, numuu rí asndu náá ethi ga̱jma̱a̱ numuu grupo rígi̱”.+
23 Ikha jngóo ikhiin niri̱ya̱ʼ awan rí mbá mbiʼi muwi̱i̱n gajmiún ikhaa, ga̱jma̱a̱ mbaʼin wéñuuʼ xa̱bu̱ nigún náa guʼwá rí ikhaa xtáa. Ikhú miʼcha̱ asndu wakíʼ niʼthún kájxi̱ ga̱jma̱a̱ numuu Xa̱bu̱ Ñajunʼ ndrígóo Dios,* ga̱jma̱a̱ nijmuu Xtángoo ndrígóo Moisés+ ma̱ngaa rí ninirámáʼ Profetas*+ mu maʼni rí munimbu̱ún kuyáá Jesús.+
24 Tikhuun ninimbu̱u̱n dí ikhaa niʼthí mú eʼwíinʼ na̱nguá.
25 Numuu rí tsémbánún ikha jngóo nigíʼdi̱i̱ nigúun. Ikhú Pablo niʼthí rígi̱:
“Ikha jngóo espíritu santo* nijmiuu profeta Isaías mu maʼthúún rígi̱ wajin xiʼñála
26 niʼthí: ‹Ayuʼ náa xuajin rígi̱ ga̱jma̱a̱ aratháán: “Ikháanʼla mudxawíín mú nditháan xákrua̱ʼa̱la. Muyejxi̱ mú nditháan xúya̱a̱.+
27 Numuu rí niʼni gújkhúʼ a̱jkiu̱ún xa̱bu̱ bugi̱. Niruguáá cháʼwúún ga̱jma̱a̱ niruguáá idún mu xúdxawíín ní má xúyáá ní má xákru̱ʼu̱u̱n ni má xúgíiʼ a̱jkiu̱ún ga̱jma̱a̱ xátangi̱i̱n náa Dios, mu ikhúún ma̱ni̱ thanún”›.+
28 Ikha jngóo, gu̱ya̱a̱la rí ajngáa dí na̱ʼkha̱ náa Dios rí makáwáanʼla majuiʼthúún xa̱bu̱ bi̱ na̱nguá ni̱ndxu̱ún judíos.+ Ikhiin rí mudxawíín”.+
29 *
30 Ikhaa niguanúu a̱jma̱ tsiguʼ kañiiʼ náa guʼwá rí nitíʼñuu.+ Nagruiguíin májánʼ xúgíinʼ bi̱ nagún ruyáá,
31 mú, ikhaa nditháan tsémíñúu ma̱ngaa nimbá tsérikoo rí maʼthúún ga̱jma̱a̱ numuu Xa̱bu̱ Ñajunʼ ndrígóo Dios* ma̱ngaa rí maʼsngúún ga̱jma̱a̱ numuu Tátá Jesucristo.+
Mbaʼa nota
^ O “ku̱ba̱ʼ rí gíwánʼ náa tapo̱o̱ iyaʼ”.
^ O “mar”.
^ Náa ajngáa griego naʼthí, “Díkē”. Mbáa rígi̱ nandoo gáʼthúu̱n rí katsíñáánʼ má rí magíʼnuu mbáa xa̱bu̱.
^ O “tátée”.
^ O “gu̱nʼ rí nagajtaa idiʼ”.
^ Xígi̱ kaʼnii exna mbiʼñún bi̱ nutañajunʼ náa Roma.
^ O “Gaʼyee”, “Bi̱ nuthi dí marigá”.
